6 Pus ju anch ju capitán lhitajulh alakatam barco.

Ju yuchi ixmintacha ju lakꞌachakꞌan Alejandría chai ixꞌamputun ju xalacatꞌun Italia.

Pus ju capitán quintajunin ni actajuch ju anch.

Chai ictꞌatajuch.

Icꞌauch.

7 Pus na lakalhu avilhchan va lacsni xacꞌalhtananau chai xcayama icchaꞌauch vanin ju lakꞌachakꞌan Gnido.

Para ni na pꞌas ixlai ju un pus icpuꞌauch vanin ju xalacatꞌun Salmón ju vanin ixtꞌavi ju lacatꞌicstꞌi lacatꞌun ju vachuꞌ lacaꞌalama ixvi.

Ju anch Creta juncan.

Ju anch jantu na pꞌas ixlai ju un.

8 Pus xacquilhtuꞌantauch lacxcan lacabarco tus xcayama icxajchauch ju lakꞌachakꞌan junta Buenos Puertos juncan.

Ju yuchi vanin ixtꞌavi ju lakꞌachakꞌan Lasea.

9 Pus ni na lhu xaquintamamaktilatan ju un pus na ixtapasaputun ju avilhchan acsni laicaꞌ alhtanan ju barco ni va catsucuyach ju un.

Pus yuchi chani alhijuni ju lapanacni ju Pablo:

10 ―Quintꞌalapanacni ni caꞌalhtananchokopalau ju lacabarco jantu xcai ni tuꞌuꞌ catapasalh.

Laich catsꞌankꞌa ju tacꞌucꞌat chai ju barco chai jantu xcai ni vachuꞌ ju quijnanꞌan canitajuyau ju lacxcan.

11 Para ju capitán jantu xalacaꞌini ixchivinti ju Pablo.

Alai yuꞌunch ju alacaꞌinilh ju ixmalhtanai ju barco chaich ju amanavin barco.

12 Chai ni va tachi ixlai ju un ju anch ju lacalhicꞌasnin pus na lacatsꞌunin lapanacni ju jantu ixtataxtuputun ju anch.

Tachi chun ju ixtatajumanalh lacabarco ixtanajun ni palai kꞌox ni cataxtuch.

Tsꞌa ma laich capuxajchau ju lakꞌachakꞌan Fenice ju vachuꞌ vi ju xalacatꞌun Creta.

Ju anch vachuꞌ lai astacnancan ju barco.

Chai ju un ju minacha ju lhitsꞌastai chai ju lhichꞌatoꞌanta jantu lai ixtanui ju anch.

Ixtanajun ni laich cataꞌastacnalh ju anch tus catapasayaꞌ ju avilhchan acsni na lai ju un ju lacaꞌalama.

13 Pus acsni va lacsni ixlai ju un ju ixminacha ju lhichꞌatoꞌanta pus ju lapanacni ixtanajun ni ca laich cataꞌalhtanampa.

Pus ictaxtuch chai xacquilhtuꞌantauch ju lacxcan.

14 Para ni pantsꞌiquis va na pꞌas lana xalai ju un ju xaminacha lacatꞌun.

Chai slivasalh na neklh ju barco.

15 Pus ju un chꞌapaꞌula ju barco.

Jantu lai isastꞌucꞌa ju un.

Pus ni jantu lai ixmalhtanacan ju barco pus lana macaulh ni chach sun lhiꞌalh ju un vanta anchach ju casunlhiꞌalh.

16 Chai acsni ictapasauch vanin lacalacatꞌicstꞌi lacatꞌun junta Clauda ixjuncan pus ju un jantu pꞌas ixlai ju anch.

Ju anchach xcayama icxakꞌamacutuch ju lacatꞌicstꞌi barco ju ixakꞌamalhiꞌanta ju kꞌai barco.

17 Icmujuch lacakꞌai barco chai ju astan ju lapanacni talakachꞌilh ju kꞌai barco lacalasu ni va ixtanajun ni jantu xcai ni calaclhvakaꞌ ni na pꞌas ixnekꞌa ju xcan.

Chai na va ixtatalhanan ni va laich casunlhiꞌalh lacacucu junta Sirte juncan.

Pus yuchi talhipꞌuxnilh ju kꞌai pumpuꞌ ju ixpuꞌalhtananch ju barco acsni ixtanui ju un.

Ixtanajun ni jantu makat casunlhiꞌalh ju barco ju chunch.

18 Chai acsni tuncunchokolh ni vana va chun ixlai ju un pus tamamuxtulh ju lacxcan ju xatacꞌucꞌat.

19 Chai ju ixlhilakatꞌutu avilhchan ju quijnan laquimacach quincꞌan icmamuxtu ju ixpuchꞌalhcat ju barco.

20 Na lhu avilhchan jantu lai xaclaktsꞌinau ju avilhchan nin yuchi ju stꞌacu.

Va tachi ixtꞌajun ju kꞌai un.

Jantuch va tilacatsꞌunin xacnonauch ni ca jantuch catitacutchauch.

21 Na lhu avilhchan jantu xacventauch.

Pus astan ju Pablo taya laꞌixlacaitat ju lapanacni chai alacjuni:

―Quintꞌalapanacni na kꞌox ca ixva ni xaquilakꞌasmatniu ju quinchivinti.

Jantu caꞌixtaxtuchauch ju lakꞌachakꞌan Creta.

Jantu caꞌixmiuch makꞌalhkꞌajnin ju ani.

Chai jantu caꞌixmiu makꞌatsꞌankꞌanin ju ani taxtokni.

22 Para jantu amakꞌaninintꞌit.

Mas catsꞌankꞌayaꞌ ju barco para jantu xamatiꞌ ju quilhiquijnan ju canitajuyau ju lacxcan.

23 Pus ju quitꞌin ixlapanac Dios icjunita chai yuchach ju icchꞌalhcatnani.

Pus ju lhiyaxch tsꞌis ju yuchi quimalakachanitachilh ju ixꞌanquilh.

24 Ju yuchi quijuni:

“Jantu atꞌalhan ji Pablo.

Tasqꞌuini ni atꞌalacꞌasunitꞌachiꞌ ju César.

Chai ju va milacata ju uxintꞌi ju Dios jantu calacasqꞌuinaꞌ ni xamatiꞌ catini tachi chun ju tatꞌaꞌantan ju lacabarco”.

Chunch quijuni ju Dios.

25 Pus ju chavai ji quintꞌalapanacni jantuch amakꞌaninintꞌit.

Ju quitꞌin icquiclacaꞌi ju Dios ni chunch ju catapasayaꞌ tachi ju xaquijunich.

26 Para ju un sun aquintalhiꞌanan lacalakatam lacatꞌicstꞌi lacatꞌun ju vi lacaꞌalama.

―Chunch ju ajuni ju lapanacni ju Pablo.

27 Pus lakatꞌui semana xacꞌucxuntꞌonau lacabarco ju lacaꞌalama.

Astan icchaꞌauch ju xaꞌalama Adria para ju un va tachi ixnekta ju barco.

Pus acsni chaꞌalh paitat tsꞌis ju ixmalhtananin barco ixtalhiulai ni vanin xacchaꞌamputunau ju lacatꞌun.

28 Pus talhcalh ju ixlhiputankꞌai ju xcan chai chaꞌalh lakapꞌuxamcauchaxan metro.

Acsni taꞌalhtanampa alacatsꞌunin aktam talhcachokopa chai ju acsnich chaꞌalh lakapꞌuxamtujun metro.

29 Na ixtatalhananch ni va laich casunlhiꞌancalh ju barco lakꞌakchiuxin chai calaclalh.

Pus laꞌixlhipulacan ju barco tamujulh lacxcan lakatꞌatꞌi tsasnat ju ixꞌachꞌicanta lacalasu.

Ju chunch chꞌapayaulh ju barco.

Na ixtalhamakꞌaninin.

Ixtanajun ni sokꞌo catunculh.

30 Ju ixmalhtananin barco ixtaꞌatsꞌalhputunch.

Va ixtalaich tachi ju va catamuju ju tsasnat ju cachꞌapayaulh ju barco laꞌixlhiꞌaktsulh ju barco.

Para va ixtatꞌajun munin ju lacatꞌicstꞌi barco ju lacxcan ni ixtanajun ni catapuꞌanach.

31 Para ju Pablo alacjunich ju xacapitán chai ju taropajni:

―Ni catataxtuyach lacabarco ju yuꞌunch pus ju uxijnan jantu lai atꞌitꞌakꞌalhtꞌaxtꞌutꞌit.

32 Pus ju acsnich ju taropajni tachakxlh ju xalaso ju lacatꞌicstꞌi barco chai tamamuxtulh.

33 Chai acsni tsuculh tuncunuꞌ pus ju Pablo alacjunich ni chach tavailh.

Ajunich:

―Ju chavai lakatꞌui semana xajun ju lhistꞌactꞌit ju barco.

Jantu lhtꞌatꞌatꞌatꞌit sin tuꞌuꞌ utꞌatꞌit.

34 Pus iclatapaininiyau ni avaꞌintꞌitch.

Ju chunch caꞌalinaꞌ ju mintachaputꞌan ni laich atꞌakꞌalhtꞌaxtꞌuyaꞌitꞌit.

Jantu xamatiꞌ catini chai nin lacatsꞌunin jantu catacꞌatsaniyaꞌ.

35 Chai acsni nonkꞌo ju chunch ju Pablo pus chꞌapalh lakatam xkapavati.

Xtaknilh lakꞌailaktsꞌiuch ju Dios laꞌixꞌucxlacapuꞌan ixchuxꞌan.

Astan chꞌekꞌeꞌilh lacatsꞌunin chai tsuculh vainaꞌ.

36 Pus acsnicaꞌ ju takꞌachalh ixchuxꞌan chai vachuch tavailh.

37 Xacjuntau tachi lakatꞌui cientos a setenta y seis lapanacni ju lacabarco.

38 Chai acsni talhilakꞌo pus tatsuculh munin lacxcan ju trigo ju ixlhiꞌanta ju barco.

Ju chunch palai chapakꞌa cava ju barco.

39 Chai acsni tunculh talaktsꞌilh ju tꞌun para jantu istamispai taꞌanchach.

Para talaktsꞌilh laꞌixquilhtuꞌ tꞌun ni jantu na ixlucunun ju xcan chai na ixꞌalin ju cucu.

Pus anchach ju ixtalhiꞌamputun ju barco ni va laich caꞌixlalh.

40 Pus ju anuꞌ tsasnat ju ixtajuya lacxcan ni cachꞌapayaulh ju barco tachakxnilh.

Anch ju tajukꞌalhi ju lacxcan.

Chai taxkꞌotlh ju anuꞌ lacqꞌuiu ju sok ixtapumalhtanai ju barco.

Va ixtanajun ni sok ixtalhiꞌalh ju barco ju lacacucu.

Chai ju anuꞌ kꞌai pumpuꞌ tamamakꞌastꞌanilh lasaꞌaktsulh ju barco ni laich catanu ju un.

Chai ju barco tsuculh anaꞌ junta jantu na pꞌas ixlucunun ju xcan.

41 Para anchach talapakxtoklh lakatꞌui xcan chai na kꞌalhtankꞌai ixjunita ju cucu.

Pus ju barco taquincaꞌacnulh lacacucu.

Chai ju laꞌixlhiꞌaktsulh na pꞌas tavi chai laꞌixtampꞌin ixtalaklhvak laꞌixtachaput ju alama.

42 Pus ju taropajni ixtanajunch ni caꞌamaknicalh ju tachꞌinin.

Ju chunch jantuch xamatiꞌ camakꞌanxqꞌuivitnitacutlh chai caꞌatsꞌalalh.

43 Para ju xacapitán ixmakꞌalhtaxtuputun ju Pablo.

Yuchi jantu alhilakaꞌinilh ni caꞌalakmaknicalh.

Va ajunich ni pꞌulhnan catajuyaꞌ lacxcan tachi chun ju lai camakꞌanxqꞌuivitnilhch.

Chach tacutcha lacatꞌun.

44 Pus ju jantu lai xamakꞌanxqꞌuivitnin tapuꞌalh ju tuꞌuꞌ lhtꞌakꞌalaqꞌuiu.

Ju aliꞌin tachꞌapalh ju xalacqꞌuiu barco chai tapuꞌalh yuchi.

Pus chunch icputakꞌalhtaxtukꞌojuch chai ictacutchauch quinchux quincꞌan ju lacatꞌun.