Ju Pablo junilh ju kꞌai ucxtin Agripa tuchi ixnavita
26
Ju acsnich ju kꞌai ucxtin Agripa junilh ju Pablo:
―Laich achꞌivin miꞌakstu.
Pus ju Pablo chꞌixlh ju ixmacaꞌ chai tsuculh chiviniꞌ.
Junich:
2 ―Na iclhikꞌachan ji ucxtin Agripa ni laich acjunan ju uxintꞌi ju stavasalanti ixlacata ju talakꞌalhin ju quintasamucꞌani ju quintꞌaꞌisraelitanin.
3 Yuchi iclhikꞌachan ni iccꞌatsai ni machꞌakxakꞌoꞌui chux tachi ju iclhilanitauch ju quijnan ju israelitanin icjuntau.
Chai vachuꞌ machꞌakxaich tuchi iclalhilakꞌayauch.
Pus yuchi iclhitapaininiyan ni va lacsni aqꞌuinkꞌasmatninch.
Ju Pablo juni ta yu ixjunita isꞌatsucunti acsni tucaꞌ ixlhilacaꞌanta Jesús
4 Chux ju quintꞌaꞌisraelitanin tamispai ju quiꞌatsucunti tus quilhitalacatꞌicstꞌinti acsni ictakꞌayacha laquilakꞌachakꞌan chai acsni xacvi ju lakꞌachakꞌan Jerusalén.
5 Ju yuꞌunch makꞌanch quintamispaich chai laich catanaulh ni va catanomputulh ni tus quilhitalacatꞌicstꞌinti makfariseo xacjunita.
Chai ju quilhamapꞌaksin quincꞌan ju fariseonin icjuntau yuchi ju palai tsꞌinqꞌui tachi chun ju quilhamapꞌaksin quincꞌan ju israelitanin icjuntau.
6 Chai ju chavai iclhichivimakꞌancantach va ixlacaꞌatalh ni iclacaꞌi ni caꞌamacxtuchokoyaꞌ ju Dios ju tanita ni chunch ju alaclhitꞌatakꞌoxita ju makꞌaniya quilacpaꞌitni quincꞌan.
7 Chux ju quilhmaccautꞌui ju quintꞌaꞌisraelitanin talacaꞌi ni camuctaxtuyaꞌ ju Dios ju tuchi xanajun chai caꞌamacxtuchokoyaꞌ ju tanitach.
Chai yuchi iclhilakꞌayayau chai iclhichꞌalhcatnaniyau ju Dios tuncuj chai tsꞌis.
Para ji kꞌai ucxtin Agripa yuchi jumpalat ju quintalhichivimakꞌanan ni vachuꞌ chun ju iclacaꞌi ju quitꞌin.
8 Ju uxijnan tajuch ni na va xcaich lhiulayatꞌit ni laich camaxtuchokolh ju Dios ju tanitach.
Ju Pablo juni ta yu ixlhimakchꞌapui ju lapanacni ju ixtalhilacaꞌanta Jesús
9 Pus ju makꞌanch ju quitꞌin vachuꞌ xacnajun ni na istasqꞌuini ni na acmamakꞌalhkꞌajni ju ixtachꞌakꞌokꞌai ju Jesús amachakaꞌ Nazaret.
10 Chai chunch xacnaviyacha ju lakꞌachakꞌan Jerusalén.
Chai ju xalackꞌajin palijni xaquintaxtaknita ju alhiqui junta najun ni laich acꞌatꞌalhnu ju talhilacaꞌanta Jesús.
Chai na lhu ju icꞌatꞌalhnu.
Chai acsni ixꞌamakniputun pus vachuꞌ quitꞌin xacmaknajun ni lhijun ni chunch caꞌulhtucalh.
11 Chai na paklhu icꞌamamakꞌalhkꞌajni ju ixtatanui laꞌixpujitatꞌan.
Tapꞌastu xacꞌajuni ni catalhitsꞌiꞌilh ju Jesús chai catanaulh ni jantu vana catachꞌakꞌokꞌalh.
Chunch xacnavi acsni xacꞌan lakatamin lakatamin lakꞌachakꞌan laꞌixpujitatꞌan.
Chai ni slivasalh na xacꞌaxcaji pus xacꞌalacchꞌakꞌokꞌaxmai tus alakatam lacatꞌun ni laich acꞌamamakꞌalhkꞌajni.
Ju Pablo juni ta yu lhilacaꞌalh ju Jesús
12 Chai ni xacꞌamamakꞌalhkꞌajniputun ju aliꞌin pus yuchi xaclhiꞌamputun ju lakꞌachakꞌan Damasco.
Chai yuꞌunch ju xalackꞌajin palijni ju xaquintamalakachai chai xaquintaxtaknita ju alhiqui junta najun ni laich tachꞌin acꞌanavi ju talhilacaꞌanta Jesús.
13 Para ji kꞌai ucxtin acsni xacꞌanta ju lacati iclaktsꞌilh lakatam maclhcu ju xatapulhcuyacha ju lactꞌiyan.
Kꞌatuncuj ixjunita para palai tachapun ixjunita ju anuꞌ maclhcu.
Palai jantu ju avilhchan.
Tapulhcuchilh junta xacꞌanta lacati ju quitꞌin chai ju xaquintatꞌaꞌanta.
14 Pus lana tin iclactaꞌaktau ju lacatꞌun quinchux quincꞌan.
Chai ickꞌasmatlh lakatam chivinti ju xaminacha lactꞌiyan.
Chai ju yuchi xaquijuni laquilhihebreo:
“Saulo.
Saulo.
Jantu alhimakchꞌapꞌu ju quilapanacni.
Acsni chꞌun ju lai pus tachi ju va jun quitꞌin ju qꞌuilhimakchꞌapꞌui.
Para alai miꞌakstu ju mamakꞌalhkꞌajnichꞌokꞌocꞌan acsni sastꞌucꞌa ju ixtaxtokni Dios”.
Chunch xaquijuni.
15 Chai icjunich:
“Tis chavaichꞌat ji ucxtin”.
Chai ju yuchi quijuni:
“Quitꞌin icJesús ju qꞌuilhimakchꞌapꞌuich.
16 Para akꞌostꞌaꞌulh.
Atꞌaich.
Ju quitꞌin iclhitalacasuniyan ni anaviyaꞌ ju quilhichꞌalhcat chai ni anonaꞌich ni qꞌuilaktsꞌintꞌach ju lacati.
Chai vachuꞌ anonaꞌich ju tuchi acmalacasuniyanch astanch.
17 Pus ju chavai acmalakachayan ni alakpꞌinaꞌich ju yuꞌunch ju jantu israelitanin tajunita.
Chai acꞌaktaijuyan ni jantu lai catamakniyan ju yuꞌunch nin yuꞌunch ju mintꞌaꞌisraelitanin.
18 Acmalakachayan ni amalakpꞌucꞌuꞌuyaꞌ.
Ju chunch acsni catamaconaꞌ ju macxcai ju tamaputsꞌisini ju ixꞌalhunutꞌan chai catalacaꞌiniyaꞌ ixchivinti Dios pus tachi ju va catuncunach laꞌistacꞌatsanꞌan.
Chai vachuꞌ laich catatakꞌalhtaxtuyaꞌ laꞌixtachaput ju lhacaticuru chai catachꞌakꞌokꞌayaꞌ ju Dios.
Vachuꞌ aquintalhilacaꞌanch ju quitꞌin chai ju chunch camacꞌacxanicanaꞌ ju ixtalakꞌalhinꞌan chai vachuꞌ quilapanacni catajunaꞌ tachi ju aliꞌin ju quintalhilacaꞌanta”.
Chunch xaquijuni.
Ju Pablo quiclacaꞌi tuchi juni ju Dios
19 Pus ji ucxtin Agripa iclacaꞌinikꞌo chux tachi ju quijuni ju Jesús acsni quixakꞌalacha tus lactꞌiyan.
20 Pus pꞌulhnan icꞌajunilh ixchivinti Dios ju amachakꞌan Damasco chai astan ju amachakꞌan Jerusalén.
Chai astan icꞌajunilh ju lapanacni ju ixtatꞌajun ixlhilacaputsꞌun ju xaꞌestado Judea.
Vachuꞌ icꞌajunilh ixchivinti Dios ju yuꞌunch ju jantu israelitanin tajunita.
Icꞌajunkꞌo ni catamacaulh ju macxcai isꞌatsucuntiꞌan chai catachꞌakꞌokꞌalh ju Dios chai catanavilh ju kꞌox.
Ju chunch caputasuyach ni vasalh tamacaulh ju macxcai chai tachꞌakꞌokꞌata ju Dios.
21 Chai va ixlacaꞌatalh ni chunch xacꞌajuni ju lapanacni quintaquilhichꞌapalh ju quintꞌaꞌisraelitanin lacakꞌai pujitat chai xaquintamakniputun.
22 Para tus chavai quiꞌaktaijuta ju Dios.
Yuchi iclhitailhiꞌanta ixꞌajunica ixchivinti Dios ju xalackꞌajin chai ju yuꞌunch ju jantu tuꞌuꞌ ixtapalhniꞌan.
Chai jantu tuꞌuꞌ icnajun.
Va yuchi icnajun tachi ju ixnajun ju Moisés chai tachi ju ixtanajun ju makꞌaniya lapanacni ju ixtanajun ixchivinti Dios acsni ixtanajun tuchi ju catapasayaꞌ.
23 Pus ju yuꞌunch ixtanajun chai ju quitꞌin vachuꞌ icnajun ni aktsꞌiya istasqꞌuini ni camakꞌalhkꞌajnalh ju anuꞌ ju ixnoncan ni camalakachayachilh ju Dios.
Chai canilh chai yuchi ju pꞌulhnan calokꞌonchokolh laꞌixꞌaninti.
Ju chunch catacꞌatsayaꞌ ju quintꞌaꞌamachivinti chai ju aliꞌin lapanacni ni catatakꞌalhtaxtuyaꞌ chai jantu catitaꞌalh ju lacajipi ju catalhilacaꞌanach ju yuchi.
Ju Pablo ixmalhilacaꞌaniputun ju Jesús ju kꞌai ucxtin Agripa
24 Pus acsni ixtꞌajun nonaꞌ junima chivinti ju Pablo pus ju Festo pꞌas chivinilh.
Juncanch ju Pablo:
―Va lakꞌachꞌapꞌuich ju uxintꞌi.
Na takꞌalhinitach ju miꞌaktsulh ni na lhu xalhitꞌamakꞌaꞌui.
25 Para ju Pablo junich:
―Jantu va iclakachapui ji ucxtin Festo.
Laquintakꞌoxiti ju icchivinin chai stavasalanti ju tuchi icnajun.
26 Ju ani vi kꞌai ucxtin Agripa cꞌatsakꞌojui junima taxtokni.
Yuchi jantu iclhitalhanan acsni icnajun ju chunch laꞌixꞌucxlacapuꞌ ju yuchi.
Iccꞌatsai ni cꞌatsakꞌojui junima taxtokni ni jantu va sek xanavi tuꞌuꞌ ju Jesús.
27 Ju uxintꞌi ji ucxtin Agripa ja lacꞌaꞌich ju ixchivintiꞌan ju makꞌaniya lapanacni ju ixtanajun ixchivinti Dios.
Iccꞌatsai ni lacꞌaꞌich.
28 Pus ju acsnich ju Agripa juni:
―Ju uxintꞌi ca va naꞌunch ni vatsꞌalhti aqꞌuimalacꞌaꞌiniyaꞌ chai aclhilacaꞌanach ju Jesús.
29 Chai ju Pablo junich:
―Kꞌoxich ni vatsꞌalhti ju alacꞌaꞌiyaꞌ.
Chai vana kꞌox mas va lacsnich ju alacꞌaꞌiyaꞌ.
Va yuchi ni calacasqꞌuinach ju Dios ni vachuꞌ alacꞌaꞌitꞌi ju uxintꞌi tachi ju iclacaꞌich ju quitꞌin.
Chai vachuꞌ catalacaꞌilh chux ju quintatꞌajun kꞌasmatninin.
Va yuchi ni jantu iclacasqꞌuin ni tachꞌin aꞌuntꞌit tachi ju icjunita.
30 Pus acsni nonkꞌo junima chivinti ju Pablo pus lana tataya ju tucan xakꞌai Agripa chai ju ucxtin Festo chai ju Berenice chai chux ju anch ixtavilanalh.
31 Chai acsni tataxtulh talaclajunich:
―Ju ani ya lapanac jantu tuꞌuꞌ navita talakꞌalhin ju lai calhimapalalh laꞌixꞌaninti nin lai calhitꞌalhnucalh.
32 Chai ju Agripa chani juni ju Festo:
―Laich ixmacaju ju ani ya lapanac ni jantu cava sqꞌuinlh ni yuchi ju César ju calakꞌoxinilh ju ixlhamakꞌan.