JU CHIVINTI IXLACATA JU CRISTO JU TSꞌOKLH JU XIVAN
Ju juncan Chivinti tapala lapanac
1
Ju yuchi ju Chivinti juncan ixtꞌajunch acsni maticaꞌ tuꞌuꞌ ixjunita.
Chai ju yuchi va lakputam ixtꞌatꞌajun ju Dios.
Chai isꞌakstu ju Dios ixjunita.
2 Ju Dios va lakputam ixtꞌatꞌajun ju yuchi tus acsni maticaꞌ tuꞌuꞌ ixjunita.
3 Tachi chun ju taxtokni si laꞌixmacni ju navikꞌojuta.
Ni jantu cava ju yuchi pus matiꞌ cava ju lacamunutpaꞌ nin yuchi ju taxtokni.
4 Ju atsucunti laꞌixmacni yuchi ju ixtꞌajun.
Chai yuchi ju malacpucujui ju laꞌixtacꞌatsanꞌan ju lapanacni.
5 Ju yuchi ju malacpucujui laꞌixtacꞌatsanꞌan ju lapanacni chunch junita tachi ju tuꞌuꞌ maclhcu ju mapulhcui junta na tsꞌista.
Para ju anuꞌ ju alhtanan junta putsꞌista jantu lai alhajanalh.
6 Pus alilh pumatam lapanac ju malakachachilh ju Dios.
Ju yuchi ixjuncan Xivan.
7 Yuchi lhimilh ni canonach ju tuchi cꞌatsaich.
Yuchi ju calhichivinach ju yuchi ju lai malacpucujui ju laꞌixtacꞌatsanꞌan ju lapanacni.
Ju chunch chux ju lapanacni laich catalhilacaꞌanaꞌ tichi chavaich ju lhichivinin ju Xivan.
8 Para jantiyuꞌ ixjunita ju Xivan ju anuꞌ ju lai malacpucujui ju laꞌixtacꞌatsanꞌan ju lapanacni.
Ju yuchi va ixmalakachacantachilh ni caxtꞌakꞌach ju chivinti ixlacata ju anuꞌ ju lai malacpucujui ju laꞌixtacꞌatsanꞌan ju lapanacni.
9 Ju anuꞌ ju istavasalanti amalacpucujunun quilachilh ju ani lacamunutpaꞌ.
Ju yuchi amalacpucujuni laꞌixtacꞌatsanꞌan tachi chun ju lapanacni.
10 Ju yuchi ixtꞌajun ju ani lacamunutpaꞌ.
Chai ju lacamunutpaꞌ laꞌixmacni ju alinta.
Para ju amachakꞌan ju ani lacamunutpaꞌ jantu tamispa.
11 Quilakquilachilh ju ixlacatꞌun.
Para ju ixtꞌaꞌamachivinti ixtajunita acsni ixtꞌajun ju ani lacamunutpaꞌ jantu tuꞌuꞌ talhiula.
12 Para ju yuchi axtaknilh ixtachaputꞌan ni catavalhch isꞌaskꞌatꞌan Dios tachi chun ju lhikꞌach taꞌamaklhtayanalh chai talhilaksi.
13 Ju isꞌaskꞌatꞌan Dios jantu tapujunita chun tachi ju tapujunita ju isꞌaskꞌatꞌan tam xamatiꞌ ju ani lacamunutpaꞌ.
Alai va si laꞌixkꞌachat Dios tapujunita isꞌaskꞌatꞌan.
14 Chai ju anuꞌ ju Chivinti juncan lapanac quitsucuchilh ju ani.
Chai quintaquitꞌaꞌalhtananchin pantsꞌiquis.
Chai ju yuchi na lhu ixnavi ju lamapainin.
Chai stavasalanti ju ixnajun.
Chai iclaktsꞌiuch ni vasalh xakꞌai junita tachi ju junita ju ixpai Dios.
Chai ni lakatami istsꞌalh Dios junita pus yuchi xakꞌai lhijunita.
15 Ju Xivan naulh tuchi iscꞌatsai ixlacata ju anuꞌ ju chivinti juncan.
Chai acsni tavanan ixlhaktꞌasajunun pus pꞌas ju ixchivinin.
Chanich ixnajun:
―Ju mintacha astan yuchi ju xakꞌai.
Jantu quitꞌin.
Yuchach ju xaclalhaktꞌasajuyau ju uxijnan.
16 Chai ni na lhu ju ixꞌamapaininti pus yuchi ju puꞌamaklhtayananauch quinchuxꞌan na lhu lamapainin ju quintanavinitan.
17 Ju lhamapꞌaksin ixlacata ixtaxtokni Dios yuchi ju ixtakta ju ixjuncan Moisés.
Para ju lamapainin ju quintanavinitan chai ju stavasalanti laꞌixmacni Jesucristo ju tasukꞌo.
18 Ju Dios jantu xamatiꞌ laktsꞌinta tavanan.
Ju lakatami istsꞌalh Dios slivasalh ixmapaini.
Yuchach ju putalacasulh ta junitach ju Dios.
Chani ju chivinilh ju Xivan ju amakpaxanaꞌ
19 Ju xalackꞌajin israelitanin tamalakachalh ju xapalijni.
Chai alactꞌamalakachacalh ju levitanin junta ixvilhcha ju Xivan.
Lakꞌachakꞌan Jerusalén ju ixtamintacha.
Chai kꞌalhtayanalh ju Xivan acsni sacmicalh tichi chavaich ju yuchi.
20 Pus ju yuchi lhilatavi ju stavasalanti.
Lana amavasalanilh ni jantiyuꞌ ju Cristo ju noncan camalakachatachilh ju Dios.
21 Chai aktam tasacmichokopa:
―Pus tis chavaichꞌat.
Ja uxintꞌi ju Elíasꞌat.
Pus naulh ju yuchi ni jantiyuꞌ.
―Ja uxintꞌi ju anuꞌ lapanacꞌat ju canonach ixchivinti Dios.
―Pus tis chavaichꞌat.
Aquilajuniuch ni lai acmacꞌatsanitachau ju xaquintamalakachayachin tichi chavaichꞌat ju uxintꞌi.
23 Pus naulh ju Xivan:
―Ju quitꞌin va yuchi ni na pꞌas ju icchivinin junta aseknicꞌa.
Va iclajunau ni alakꞌoxinitꞌit ju miꞌalhunutꞌan ju miꞌucxtinꞌan Cristo ni caminach.
Tachi ju naulh ju anuꞌ lapanac ju Isaías ixjuncan ju ixchivinin ixchivinti Dios.
24 Pus ju anuꞌ lapanacni ju ixꞌamalakachacanta sia lhifariseonin ixtajunita.
25 Chai tajunich ni tasacmi ju Xivan:
―Tajuch ni amakpꞌaxananch ni jantu uxintꞌi ju Cristoꞌat nin Elíasꞌat nin uxintꞌi ju lapanacꞌat ju canonach ixchivinti Dios.
26 Pus ju Xivan acsni alackꞌalhtailh alacjunich:
―Ju quitꞌin va lacaxcan ju icꞌamakpaxanan.
Para junta tꞌonatꞌit tꞌajun pumatam ju jantu mispꞌayatꞌit.
27 Ju yuchi astan caminaꞌ.
Para yuchi ju xakꞌai.
Jantu quitꞌin.
Pus ju quitꞌin jantu tuꞌuꞌ ju quintapalhni.
Jantu lai actichꞌanxkꞌotlh nin mas va yuchi ju samusni ixchꞌanxtꞌakꞌan.
28 Lhimakꞌantacutni xakꞌai xcan Jordán ixꞌalin ju lakꞌachakꞌan ju ixjuncan Betábara.
Anchach ju tapasacha ju ani taxtokni.
Anch ju ixꞌamakpaxanan ju Xivan.
Alin pumatam lapanac ju tachi ixborrego Dios cajunaꞌ
29 Ni tuncunchokopa acsnich ju laktsꞌilhch ju Xivan ju Jesús ni ixlakmintach.
Chai ajunich ju lapanacni:
―Alaktsꞌintꞌitch ju anuꞌ mintacha lapanac.
Tachi ixborrego Dios cajunaꞌ.
Yuchach ju camapalaꞌ ju alactuꞌunti lhichux.
30 Yuchach ju xaclhichivinin acsni xaclajunau ni astan caminaꞌ pumatam lapanac.
Yuchach ju xakꞌai.
Jantu quitꞌin ni yuchi ju pꞌulhnan ixtꞌajun.
Jantu quitꞌin.
31 Nin quitꞌin jantu xacmispai.
Para yuchi iclhimilhch amakpaxanaꞌ ju lacaxcan ni chunchach ju catapumispayach ju quintꞌaꞌisraelitanin ju yuchi.
32 Xivan ju xtaklh ju chivinti.
Chanich ixnajun:
―Iclaktsꞌilh ju Spiritu Santu acsni mincha ju lactꞌiyan tachi ju tuꞌuꞌ lakꞌaxkꞌavan acsni tavi laꞌixlacatuna ju Jesús.
33 Pus ju quitꞌin jantu xacmispai.
Para xaquijunitach ju anuꞌ quimalakachachilh ni acꞌamakpaxananaꞌ lacaxcan ni ma xamatiꞌ aclaktsꞌinaꞌ ni calakꞌanaꞌ ju Spiritu Santu chai ni ma catocꞌaniyach laꞌixlacatuna ma yuchach ju caꞌamakpaxananaꞌ lacaSpiritu Santu.
34 Chai quitꞌin ju iclaktsꞌilh ju tuchi tapasalh.
Chai iclajunauch ni yuchach ju ani ju istsꞌalh ju Dios.
Ju xapꞌulhnan ju tachꞌakꞌokꞌalh ju Jesús
35 Acsni tuncunchokopa pus aktamch ixꞌalactꞌayapa ju ixtꞌiyunꞌan ixlapanacni ju Xivan.
36 Chai ju yuchi laktsꞌimpa ju Jesús junta ixꞌanta.
Chai ajunich ju ixlapanacni:
―Alaktsꞌintꞌitch ju anuꞌ lapanac ju tachi ixborrego Dios cajunaꞌ.
37 Chai ju anuꞌ ixtꞌiyunꞌan ixlapanacni ju Xivan acsni takꞌasmatlh ju tuchi ixnajunch pus lana tachꞌakꞌokꞌalh ju Jesús.
38 Chai acsni talakaspꞌitlh ju Jesús alaktsꞌilh ju ixtachꞌakꞌokꞌata.
Ajunich:
―Tijuch ju pꞌuxcꞌoyatꞌit.
Chai tajunilh:
―Amamakaꞌunuꞌ tas anchach ju tꞌaꞌun.
39 Pus ajunich:
―Asokꞌotꞌitch.
Alaktsꞌinaꞌitꞌitch junta ictꞌajun.
Chai tatꞌaꞌalh.
Talaktsꞌilh junta ixtꞌajun.
Pus ju acsni avilhchan tatꞌatolhcha ni tachi lakatꞌatꞌi hora atokꞌoxanaꞌ ixjunita.
40 Chai ju anuꞌ ixtꞌiyunꞌan ju ixtakꞌasmatꞌach ixchivinti ju Xivan ju tachꞌakꞌokꞌalh ju Jesús pus pumatam ixjuncan Tilix.
Yuchi ju ispꞌisekꞌe Pitaluꞌ Simón ixjunita.
41 Pus ju Tilix lana lhitaju ju ixlakꞌau tucan ju ixjuncan Simón.
Chai junich ju ixlakꞌau:
―Iclhitajuch ju Mesías.
Ju chunch va nomputun:
“Iclhitajuch ju Cristo ju noncan ni camalakachatachilh ju Dios”.
42 Chai ju Tilix lana lhiꞌalh ju Simón junta ixvi ju Jesús.
Acsni alaktsꞌilh ju Jesús junich ju Simón:
―Ju uxintꞌi Simónꞌat.
Istsꞌalhꞌat ju Jonás.
Ju uxintꞌi aꞌuncꞌanaꞌ Cefas.
Pus ju alhimapakaꞌucan Cefas va Pitaluꞌ nomputun laꞌixchivintiꞌan ju anuch lapanacni.
Ju Jesús tꞌasanilh ju Pilipe chaich ju Natanael
43 Chai ni tuncunchokopa ju Jesús naulicaꞌ ni caꞌanach ju xaꞌestado Galilea.
Chai anch ju lhitajucha ju ixjuncan Pilipe.
Chai junich ni cachꞌakꞌokꞌalh.
44 Ju Pilipe amachakaꞌ Betsaida ixjunita.
Laꞌixtꞌunꞌan ju Tilix chaich ju Pitaluꞌ.
45 Ju Pilipe acsni lhitaju ju ixjuncan Natanael chanich juni:
―Iclhitajuch ju Jesús.
Istsꞌalh ju José.
Amachakaꞌ Nazaret.
Yuchach ju ixlhatsꞌoknunta ju Moisés acsni atsꞌoknulh ixchivinti Dios.
Chai vana chun ixtalhatsꞌoknunta ju anuꞌ lapanacni ju ixtanajun ixchivinti Dios.
46 Chai chani naulh ju Natanael ni akꞌalhtayanalh:
―Ja laich cataxtucha ju lakꞌachakꞌan Nazaret tuꞌuꞌ kꞌox.
Pus ju Pilipe junich:
―Pus asokꞌoch.
Anchach ju alaktsꞌintꞌachich.
47 Chai ju Jesús chanich naulh acsni laktsꞌistuclh ju Natanael junta ixmintacha.
Ajunich ju lapanacni:
―Alaktsꞌintꞌitch.
Ani minta pumatam ju vasalh israelita.
Ju yuchi jantu lai aꞌokxchokꞌonun.
48 Chai ju Natanael lana akꞌalhtayanalh.
Naulh:
―Tꞌas qꞌuilhimispꞌaich.
Pus ju Jesús chani lhikꞌalhtailh.
Junich:
―Iclaktsꞌinch acsni ixyachiꞌ ixtankꞌapuꞌ kꞌai qꞌuiu ju higuera juncan.
Acsni tucaꞌ istꞌasaniyan ju Pilipe.
49 Chai akꞌalhtayanalh ju Natanael.
Junich:
―Amamakaꞌunuꞌ ju uxintꞌi istsꞌalh Diosꞌat.
Uxintꞌi ju quiꞌucxtin quincꞌan aꞌunaꞌ ju quijnanꞌan ju israelitanin juntau.
50 Chai acsni akꞌalhtayanalh ju Jesús chanich juni:
―Ja yuchi xaqꞌuilhilhilaksich ni va xacjunanch ni iclaktsꞌintanch acsni ixyachiꞌ ixtankꞌapuꞌ kꞌai qꞌuiu ju higuera juncan.
Pus palai kꞌai lhamakꞌan ju alaktsꞌinaꞌ astan.
51 Pus chanich ajuncan ju lapanacni:
―Slivasalh ju iclajunau.
Ju caꞌanach avilhchan alaktsꞌinaꞌitꞌitch ju lactꞌiyan ni catalhtekꞌayach.
Chai alaktsꞌinaꞌitꞌitch ju ixꞌanquilhnin Dios ni catataꞌakstꞌayaꞌ chai catatakꞌalhtajuyach acsni aquintalakminach ju quitꞌin ju quimalakachatachilh ju Dios ni lapanac actsucuyaꞌ ju ani.