Alilh lakatam lacvaiti ju lakꞌachakꞌan Caná
2
Chai ixlhilakatꞌutu avilhchan ixtailhiꞌanta.
Acsnich ju alilhch tamakꞌaxtꞌokꞌat ju lakꞌachakꞌan Caná laxaꞌestado Galilea.
Anchach ju ixvilhcha ju ixnati ju Jesús.
2 Chai vachuꞌ alactꞌatꞌasanicalh ju Jesús ju ixꞌamamakaꞌui junta tamakꞌaxtokcalhch.
3 Acsni cꞌacxtaya ju vino pus ju ixnati ju Jesús chanich juni ju istsꞌalh:
―Matich ju vino.
4 Chai ju Jesús chani lhikꞌalhtailh.
Junich:
―Apꞌacxacaꞌ ji quinati.
Iccꞌatsaich tuchi acnaviyaꞌ.
Tucaꞌ chin ju pantsꞌiquis ni lai tuꞌuꞌ acnavi.
5 Pus ju ixnati chanich ajuni ju ixtamakchꞌalhcatnan anch:
―Anaviniyaꞌitꞌitch tachi chun ju catajunanch ju yuchi.
6 Chai ixlacvi lakachaxan lackꞌai akchoko lhinavicanta chiux.
Anchach ju ixtamujuich ju xcan ju ixtalhilacchꞌakꞌai ixlaccꞌaꞌulhꞌan chai ju ixtalhimacchꞌakꞌaich ju israelitanin ni chunch ixtalhilanitach.
Va ixtanajun ni salaka catajunlh ju chunch.
Chai ju lakatamin akchoko ixmujui tam cientos litros.
7 Ju Jesús chanich alacjuni:
―Alaktsꞌamatꞌitch ju xcan ju ani lacvi akchoko.
―Amacꞌutꞌuchꞌokꞌotꞌitch ju xcan.
Alhipꞌinichitꞌitch ju tꞌajun xtaknaꞌ ju vaiti.
Chai taquixtaknilh.
9 Pus ju anuch ixtꞌajun xtaknaꞌ ju vaiti acsni quilhcꞌatsalh ju anuꞌ xcan ju tapala vino canch lhiula.
Para jantu iscꞌatsai taꞌanchach ju lhimincancha.
Va yuꞌunch ju ixtacꞌatsai ju ixtamakchꞌalhcatnanch anch ni yuꞌunchach ju ixtamacutui ju xcan.
Pus ju anuꞌ ixtꞌajun xtaknaꞌ ju vaiti lhinaulh istꞌasanica ju anuꞌ tsꞌalh ju tamakꞌaxtoklh.
10 Chanich juni:
―Tachi chun ju jokꞌatni pꞌulhnan cataxtꞌakꞌaꞌ ju kꞌox vino.
Chai acsni lhilacanch cataxtꞌakꞌach ju palai jantuch can.
Para ju uxintꞌi makꞌatꞌa ju kꞌox vino tus chavai.
11 Ju ani lhamakꞌan navilh ju Jesús ju lakꞌachakꞌan Caná ju laxaꞌestado Galilea.
Yuchach ju pꞌulhnan lhamakꞌan ju navilh ju Jesús.
Chunchach ju apumalacasunilh ju lapanacni ju ixtachaput.
Pus acsnich ju palai talhilacaꞌalh ju Jesús ju anuch ixꞌamamakaꞌui.
12 Chai ju Jesús astan alhch ju lakꞌachakꞌan Capernaum.
Yuchach chai ju ixnati chai ju isꞌapꞌisekꞌen chai ju ixꞌamamakaꞌui.
Chai ju anch tatolhcha lakatam lakatꞌui avilhchan.
Ju Jesús pulacpꞌalh ju pujitat
13 Chai vanin ixjunita ju ixcꞌatanꞌan ju israelitanin acsni alh ju Jesús ju lakꞌachakꞌan Jerusalén.
Yuchach ju anuꞌ cꞌatan ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin.
14 Chai anchach ju ixya ju kꞌai ixpujitatꞌan ju israelitanin.
Chai anchach ju alhitajulhch ju Jesús ju lapanacni ju istastꞌai vacax borrego chai lakꞌaxkꞌavan.
Chai ixtavilanalh vachuꞌ ju ixmapaxanin tumin.
15 Chai ju acsnich ju Jesús navilh lakatam ixpanekni lasu.
Pus lana tsuculh alactixcoxtunuꞌ tachi chun ju istaꞌastꞌananch ju anuꞌ laꞌixpujitatꞌan ju israelitanin.
Chai tachi chun ju borregojni chai vacax atixcoxtukꞌo.
Vachuꞌ alacpumakꞌanikꞌo ju ixtuminꞌan ju amapaxanin.
Chai alacmaktakꞌo ju ixmixaꞌan.
16 Chai alacjunich ju istastꞌaich lakꞌaxkꞌavan:
―Alhipꞌinchitꞌitch ju ani lacvi.
Ju ixchakaꞌ quimpai jantu anavitꞌit va xachakaꞌ paꞌastꞌan.
17 Pus ju anuch ixꞌamamakaꞌui acsnicaꞌ ju tapastacli ni chunchach vasalh ju tsꞌokcanta junta najun:
“Lana na quixcani ji quimpai ni jantu kꞌox tachi ju talai ni ani ju lakꞌayacꞌan”.
18 Pus ju acsnich ju israelitanin chanich tanaulh ni tasacmich ju Jesús:
―Tijuch ju aquilamasuniyau ju acpucꞌatsayauch ni xakꞌaichꞌat ju uxintꞌi ni laich xanavi ju ani taxtokni.
19 Pus ju Jesús chanich alaclhikꞌalhtailh.
Ajunich:
―Amaktꞌatꞌit ju ani ya kꞌai pujitat.
Chai ju quitꞌin va lakatꞌutu avilhchan ju acpulakꞌoxichokoyaꞌ.
20 Ju acsnich taꞌakꞌalhtayanalh ju israelitanin.
Chani tanaulh:
―Ju ani kꞌai pujitat tꞌupꞌuxamchaxan cꞌata ju punavikꞌocalh.
Chai ju uxintꞌi ja va lakatꞌutu avilhchan ju lai apꞌunavichꞌokꞌo.
21 Para ju Cristo ixlhichivinchokoi ju ixlacatuna isꞌakstu ni pujitat ixjunita.
22 Chai acsni tavanan taꞌacxtuchokolh ju Jesús junta ixmacnucanta pus acsnich ju tapastaclich ju ixꞌamamakaꞌui ni ixnajuntach ju ani chivinti.
Pus acsnich ju talacaꞌinilh ju anuꞌ atsꞌoknut chaich ju ixchivintich ju Jesús tuchi ixnajuntach.
Ju Jesús amispanikꞌojui ixꞌatalacpastꞌacꞌatꞌan tachi chun ju lapanacni
23 Na lhu ju talhilacaꞌalh laꞌixtapakaꞌut ju Jesús acsni ixvilhchalhch ju lakꞌachakꞌan Jerusalén ju anuch cꞌatan ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin.
Talhilacaꞌalh ju Jesús ni ixtalaktsꞌinch ju lhamakꞌan ju ixnavich.
24 Para ju Jesús jantu ixꞌalhilaksi ju lapanacni ni ixꞌamispanich ju ixꞌatalacpastꞌacꞌatꞌan ju va lapanacni.
25 Ju va ixlacata apumatam jantu ixmaktasqꞌuini ni xamatiꞌ caꞌalh chivintanuniniꞌ tuꞌuꞌ ni isꞌakstu iscꞌatsai ta yu junita ixꞌalhunutꞌan ju pumatamin lapanacni.