JU CHIVINTI IXLACATA JU CRISTO JU TSꞌOKLH JU LUCAS
Ju Lucas najun tajuch ni va xatsꞌokꞌulai ju ani alhiqui
1
Na lhu lapanacni tatsꞌokꞌulata tijtamin taxtokni ju cꞌatsacan ni vasalh tapasata junta tꞌonau ju quijnanꞌan ju lhilacaꞌantauch ju Jesús.
2 Chai ju yuꞌunch chai ju quitꞌin ictsꞌokꞌulatauch tachi ju quintajunin ju yuꞌunch ju talaktsꞌilh tuchi tapasalh chai ju yuꞌunch ju tamasulh ju chivinti ixlacata ju Jesús.
3 Pus vachuꞌ na kꞌox iclhiula ju quitꞌin ni acꞌatsꞌoknunin ju uxintꞌi ji xakꞌai Teófilo chai sok acjunin ta yu xalhiꞌucxꞌanch.
Para pꞌulan kꞌox icmachakxa tachi chun ju taxtokni ju tapasalh tus laꞌixputaiꞌulacan.
4 Ju chunch lai palai apꞌumispꞌayaꞌ ni stavasalanti ju chivinti ju masunicꞌantꞌa.
Lucas 1.1-25
Noncan ni catsucuyaꞌ ju Xivan
5 Acsni gobernador ixjunita ju Herodes ju laxaꞌestado Judea pus ixtꞌajun pumatam pali ju Zacarías ixjuncan.
Ju yuchi makyuꞌunch ixjunita ju ixlapanacni ju Abías.
Chai quilhmaktamin ju yuꞌunch ixtachꞌalhcatnan lacpujitat tachi ixꞌalhcanican.
Chai ixꞌalin ju ixꞌamachakaꞌ ju ixpapanti ixjunita ju pꞌulhnan xakꞌai pali ju Aarón ixjuncan.
Chai ju yuchi Elisabet ixjuncan.
6 Chai ixtꞌiyunꞌan na lackꞌoxin lapanacni ixtajunita laꞌixmacni Dios.
Si ixtaquiclacaꞌikꞌojui tachi ju najun laꞌixlhamapꞌaksin chai laꞌixchivinti Dios chai jantu xamatiꞌ lai ixꞌamucꞌani tuꞌuꞌ ixtalakꞌalhinꞌan.
7 Para matiꞌ ixjunita ju isꞌaskꞌatꞌaꞌan ni va jantu lai ixꞌalin ju isꞌaskꞌatꞌa ju Elisabet chai ju acsnich na papanin ixtajunita.
8 Para lakatam avilhchan acsni ixtachꞌalhcatnan ixlapanacni ju Abías junta ixlakꞌayacan ju Dios pus vachuꞌ ixchꞌalhcatnan ju Zacarías.
9 Chai tachi ju aktsꞌiya ixtalhilanita ju ixlhipaliꞌan pus istasacxtui pumatam pali ju catanuyaꞌ pulacni laꞌixpujitatꞌan ju istꞌaꞌisraelitanin chai anch ju caxavayach ju pum.
Pus ju acsnich avilhchan yuchi ju Zacarías ju isacxtucanta ni caxavayach ju pum.
Pus ju yuchi tanulh laꞌixpujitatꞌan.
10 Chai acsni ixtꞌajun xavanaꞌ ju pum ju Zacarías pus ixtalhavatꞌan lapanacni ixtatꞌajun tꞌachivinin ju Dios makspaꞌ.
11 Pus talacasunilh ixꞌanquilh Dios ju Zacarías.
Tayachilh laꞌixlhicana ju mixa junta xavacan ju pum.
12 Pus ju Zacarías acsni laktsꞌilh ju anquilh lana na lhamakꞌaninilh chai na talhanalh.
13 Para ju anquilh chani junilh:
―Jantu atꞌalhan ji Zacarías.
Ju Dios kꞌasmatnin ju tuchꞌi sasqꞌuini chai ju miꞌamachakaꞌ camaklokꞌoniyan lakatam istsꞌalh chai alhimapꞌakꞌaꞌuyaꞌich Xivan.
14 Chai alhikꞌachꞌanaꞌitꞌit chai na kꞌox alhiulayaꞌitꞌit.
Chai vachuꞌ na lhu ju aliꞌin lapanacni catalhikꞌachanaꞌ acsni calokꞌonaꞌ.
15 Chai ju yuchi xakꞌai cajunaꞌ laꞌixmacni Dios.
Chai jantu cakꞌotꞌaꞌ ju vino nin tuꞌuꞌ atumpa pinquin.
Chai ju Spiritu Santu calhinonkꞌoyaꞌ laꞌisꞌatsucunti tus acsni camaklokꞌoncanach.
16 Chai ju yuchi caꞌamalhilacaꞌanichokoyaꞌ ju ixꞌucxtinꞌan Dios na lhu ju istꞌaꞌisraelitanin.
17 Chai ju mintsꞌalh capꞌulhniyaꞌ ju Dios ju astan catalacasuyaꞌ.
Chai chunch cajunaꞌ ju isꞌatsucunti chai ixtachaput tachi ju ixjunita ju makꞌaniya ixlapanac Dios ju Elías ixjuncan.
Chai ju yuchi tamch caꞌamalacaꞌiniyaꞌ ixꞌalhunutꞌan ju xalacpaꞌitnich ni catamapainiyaꞌ ju isꞌaskꞌatꞌanꞌan.
Chai ju israelitanin ju jantu lai talacaꞌini ixchivinti Dios pus ju yuchi tamch caꞌamalacaꞌiniyaꞌ ju ixꞌalhunutꞌan ni kꞌox cajunaꞌ ixtacꞌatsanꞌan tachi ju ixjunita ixtacꞌatsanꞌan ju makꞌaniya lapanacni ju soknicꞌa ixtajunita.
Chai ni chunch ju canaviyaꞌ ju mintsꞌalh pus kꞌox cajunaꞌ ixꞌalhunutꞌan ju lapanacni chai cataꞌamaklhtayananaꞌ ju Dios acsni tavanan caminaꞌ.
―Chunch ju junilh ju anquilh.
18 Chai ju Zacarías chani akꞌalhtayanalh.
―Tas acpucꞌatsayaꞌ ni vasalh chunch catapasayaꞌ tachi ju xaqꞌuiꞌuni.
Pus ju quitꞌin ni na icpapach chai ju quiꞌamachakaꞌ na tꞌacuch.
19 Chai ju anquilh akꞌalhtayanalh.
Junich:
―Ju quitꞌin icGabriel chai icnavini ixlhichꞌalhcat ju Dios.
Chai yuchi ju quimalakachachilh ni actꞌachivininch chai acjunin ju ani kꞌox chivinti.
20 Para ju uxintꞌi anunulayaꞌ.
Jantu lai atꞌichꞌivin tus acsni jantu chin ju avilhchan acsni caꞌuctaxtuyaꞌ ju ani taxtokni.
Chunch aꞌunaꞌ ni va jantu xalacꞌaꞌi ju quinchivinti mas caꞌuctaxtuyaꞌ ju tuchi xacjunan acsni cachinaꞌ ju avilhchan ju lhilhcata ju Dios.
―Chunch ju junilh ju anquilh.
21 Pus ju ixtalhavat lapanacni ju ixtayanancha makspaꞌ ixtapacxan ju Zacarías chai na ixtalhamakꞌanininch ni jantu sai ixtaxtui lacpujitat.
22 Para acsni tavanan taxtulh ju Zacarías pus jantuch lai axakꞌala ju lapanacni tachi ju aktsꞌiya ixtalai ju palijni.
Alai va atamacyonilh ni jantu lai lana ixchivinin.
Pus ju lapanacni tapumachakxa ni ca va tuꞌuꞌ xalaktsꞌin ju lacpujitat.
23 Pus acsni muctaxtukꞌo tachi chun ju avilhchan ju ilhcaꞌulanicanta ni cachꞌalhcatnalh lacpujitat pus ju Zacarías anchokolh laꞌixchakaꞌ.
24 Chai acsni tapasalh lakatam lakatꞌui avilhchan pus ju Elisabet ju ixꞌamachakaꞌ ixjunita ju Zacarías pacxalh ju isꞌaskꞌatꞌa.
Chai ju yuchi tatankꞌanu laꞌixchakaꞌ lakaquis malhquiyuꞌ.
Va ixnajun:
25 “Chunchach ju xaquinavini ju Dios ju chavai avilhchan ni xaquilaktsꞌin ta yu xacjunita.
Va quimakꞌosunilh ju quimaxanti laꞌixꞌucxlacapuꞌan ju lapanacni ni jantu lai ixꞌalin ju quiꞌaskꞌatꞌa”.
―Chunch ju ixnajun ju Elisabet.
Pumatam anquilh naulh ni catsucuyaꞌ ju Jesús
26 Pus ju ixlhilakachaxan malhquiyuꞌ ju Dios malakachachokopa ju anuꞌ anquilh ju Gabriel juncan alakatam lakꞌachakꞌan junta Nazaret juncan.
Ju yuchi anch vi ju xaꞌestado Galilea.
27 Pus ju anquilh lakꞌalh pumatam atsiꞌ ju Malia ixjuncan.
Ju yuchi isꞌasqꞌuininti ixjunita pumatam tsꞌalh ju José ixjuncan.
Chai ju yuchi makꞌaniya ixpapanti ixjunita ju kꞌai ucxtin David.
28 Chai acsni tanucha ju anquilh junta ixvi ju Malia pus chanich xajuni:
―Xanchi.
Slivasalh na kꞌai lamapainin ju xanaviniyan ju Dios ju tꞌavilan.
―Chunch xajuni ju anquilh.
29 Para ju Malia acsni laktsꞌilh pus na lhamakꞌaninilh ju ixchivinti chai pastaclich tuchi canomputulh ju chunch amacꞌaminti.
30 Pus ju acsnich ju anquilh chani juni:
―Jantu atꞌalhan ji Malia ni na kꞌai lamapainin ju tanavinitan ju Dios.
31 Pus ju uxintꞌi apꞌacxanaꞌ ju miꞌaskꞌatꞌa.
Chai amaklokꞌonaꞌ pumatam mintsꞌalh.
Chai alhimapꞌakꞌaꞌuyaꞌich Jesús.
32 Chai ju yuchi xakꞌai cajunaꞌ.
Chai calhimispacanach ni istsꞌalh Dios junita.
Chai ju Dios caxtakniyaꞌ ju ixpuꞌucxtin ixjunita ju makꞌaniya kꞌai ucxtin ju David ixjuncan.
Caxtaknicanaꞌ ju miꞌaskꞌatꞌa ni ixpapanti cajunaꞌ ju yuchi.
33 Chai ju yuchi kꞌai miꞌucxtinꞌan cajunaꞌ ju uxijnan ju israelitanin untꞌatꞌit.
Jantu tavanan caꞌaclayaꞌ ju ixpuꞌucxtin ju yuchi.
―Chunch ju junilh ju anquilh.
34 Pus ju acsnich ju Malia chani junilh ju anquilh:
―Pus tas calhiꞌalinach ju quiꞌaskꞌatꞌa ni matiꞌcaꞌ ju quimpapa.
35 Chai ju anquilh junich:
―Yuchi ju Spiritu Santu ju calakminan chai laꞌixtachaput Dios ju anavicꞌanaꞌ chunch.
Pus ixlhiyuchi ju askꞌatꞌa ju calokꞌonaꞌ salaka cajunaꞌ.
Chai ni chunch junita pus jantu catinavilh ju alactuꞌunti.
Chai calhimispacanaꞌ ni istsꞌalh Dios.
36 Chai vachuꞌ ju milhilakꞌau Elisabet pacxanta ju isꞌaskꞌatꞌa mas na tꞌacuch.
Chai mas ixlhimispacan ni jantu lai ixꞌalin isꞌaskꞌatꞌa para ju chavai lakachaxan malhquiyuꞌ junita ju xapacxanta ju isꞌaskꞌatꞌa.
37 Pus matiꞌ tuꞌuꞌ ju xcai calhiula ju Dios.
―Chunch ju junilh ju anquilh.
38 Pus ju acsnich ju Malia chani junilh:
―Pus ixlapanac Dios icjunita.
Chach quinavi tachi ju ani xaqꞌuiꞌuni.
―Chunch ju naulh ju Malia.
Chai ju acsnich lana taxtulh ju anquilh junta ixvi ju Malia.
Ju Malia alh laktsꞌiniꞌ ju Elisabet
39 Pus acsni tapasalh lacatsꞌunin avilhchan pus ju Malia taxtulh.
Lana soko alh ju xalacatalhpan laxaꞌestado Judea tus chaꞌalh junta ixvi lakatam lakꞌachakꞌan.
40 Chai tanucha laꞌixchakaꞌ ju Zacarías chai macꞌamilh ju Elisabet.
41 Chai acsni tavanan kꞌasmatlh ju Elisabet ju ixꞌamacꞌaminti ju Malia pus lana na lucunulh ju askꞌatꞌa laꞌixpajan.
Chai ju Spiritu Santu lana lhinonkꞌo laꞌisꞌatsucunti ju Elisabet chai mapastꞌacꞌani tuchi canaulh.
42 Pus na pꞌas ju chivinilh chai chani ju junilh ju Malia:
―Palai kꞌox atsucunti ju xaxtakniyan ju uxintꞌi ju Dios.
Palai jantu tachi chun ju mintꞌaꞌatsiꞌin.
Chai vana na kꞌox atsucunti ju xaxtakni ju miꞌaskꞌatꞌa.
43 Chai tis quintalakxtu ni laich xaquilakmin ju quitꞌin ju ixnati ju quiꞌucxtin.
44 Pus acsni tavanan ickꞌasmatnin ju miꞌamacꞌaminti pus lana lucunulh ju askꞌatꞌa laquimpajan ni na ixkꞌachanch.
45 Chai na paxcatꞌat ju uxintꞌi ni xalacꞌaꞌi ju chivinti ju ixꞌuncꞌan.
Chai caꞌuctaxtuyach ju tuchi xajunan ju Dios.
―Chunch ju naulh ju Elisabet.
46 Chai ju acsnich ju Malia chani naulh:
―Slivasalh na iclakꞌayai ju Dios laquintacꞌatsan.
47 Chai na iclhikꞌachanch ju Dios ju quiꞌamakꞌalhtaxtunuꞌ junita.
48 Quimapainilh mas jantu tuꞌuꞌ quintapalhni ixjunita.
Quitꞌin ju ixlapanac icjunita.
Chai tus chavai tachi chun ju lapanacni aquintajunach ni slivasalh na paxcat ju quitꞌin.
49 Pus ju Dios na tachapun chai yuchi ju xaquinavini na kꞌai lhamakꞌan.
Chai ju yuchi na salaka.
50 Chai ju yuchi aꞌaktaijunun lacaꞌamapaininti tachi chun ju tatalhoni ju yuchi mas va tavananch ju catatsuculh.
51 Chai ju tuchi navi ju yuchi putasui ni na tachapun ju yuchi.
Jantu tuꞌuꞌ ixtapalhni anavi ju yuꞌunch ju na ixtalhitakꞌayai ixꞌatalanintiꞌan laꞌixꞌalhunutꞌan.
52 Amakꞌosu ju laꞌixpuꞌucxtinꞌan ju xalackꞌajin.
Chai alakꞌayalh ju jantu tuꞌuꞌ ixtapalhniꞌan ixꞌalaktsꞌincan.
53 Chai ju na tacꞌatsai ni alin ixmaktasqꞌuinitꞌan ni salaka catava pus ju Dios axtaknilh.
Chai ju na va kꞌai tacꞌatsai ju laꞌisꞌatsucuntiꞌan pus ju Dios jantu tuꞌuꞌ axtaknilh ju yuꞌunch.
54 Ju yuchi quintaꞌaktaijun ju quijnanꞌan ju israelitanin juntau ju ixlapanacni juntau.
Chai lhinavilh chunch ni cacꞌatsayau ni jantu ixcapta ju anuꞌ lamapainin ju ixnajunta ni canaviyaꞌ.
55 Chunch tachi ju ajuni ju makꞌaniya quilacpaiꞌan acsni ajuni ni capastꞌacꞌaꞌ ju lamapainin ju kꞌalhtasunilh ju Abraham chai ixꞌamaskꞌatꞌanti.
Chai ju anuꞌ lamapainin ju aquintanaviniyan aquintapuꞌaktaijukꞌalhiyan.
―Chunch ju naulh ju Malia.
56 Pus ju Malia tꞌatolhcha ju Elisabet tachi lakatꞌutu malhquiyuꞌ.
Astan anchokolh laꞌixchakaꞌ.
Tsuculh ju Xivan
57 Pus ju Elisabet acsni chaꞌalh ju ixpulakꞌauch pus maklakꞌaulh pumatam istsꞌalh.
58 Pus acsni takꞌasmatlh ju ixtꞌatolhnin chai ju ixlhiꞌalakꞌavin ni Dios ju xaꞌaktaijui lacakꞌai amapaininti pus na tatꞌakꞌachalh ju yuchi.
59 Chai acsni chaꞌalh ju ixlhilakatsajin avilhchan pus tamilh chꞌucꞌunin ju ixꞌaxtꞌakꞌa ju anuꞌ tsꞌalh tachi ju ixtalhilanita ju israelitanin.
Chai ixtalhixakꞌalaputun Zacarías ni va ixtucai ixtaꞌulaniputun ju ixpai.
60 Para ju ixnati ju askꞌatꞌa lana ajuni:
―Jantu chun cajuncanaꞌ.
Ma Xivan cajuncanaꞌ.
61 Chai ju yuꞌunch tajuni:
―Tajuch.
Jantu xamatiꞌ ju milhiꞌalakꞌavin ju chunch juncan.
62 Pus ju acsnich taxakꞌala ju ixpai.
Va ixtatamacyonich acsni istasacmiputun tis cajuncanach ju istsꞌalh.
63 Chai ju yuchi sqꞌuinlh ju tuꞌuꞌ junta lai caꞌatsꞌoknulh tuchi cajuncanaꞌ ju istsꞌalh.
Chai tsꞌokꞌulalh ni Xivan cajuncanaꞌ.
Pus ixchuxꞌan ju anch ixtavilanalh va talhamakꞌaninilh.
64 Pus lana takꞌoxinilh ju ixquilhni ju Zacarías chai ju yuchi tsuculh chiviniꞌ chai lakꞌayalh ju Dios.
65 Pus na tatalhanalh ju ixtꞌatolhnin.
Chai tachi chun ju lapanacni ju ixtatꞌajun ju xalacatalhpan ju xaꞌestado Judea tacꞌatsakꞌo tachi chun ju ani taxtokni.
66 Chai tachi chun ju takꞌasmatlh ju ani taxtokni va tachi ixtapastactꞌajun laꞌixꞌalhunutꞌan.
Chai ixtalaclajuni:
―Tis atsucunti nuꞌ ju capacxanaꞌ ju anuꞌ askꞌatꞌa.
Chunch ju ixtalaclajuni ju lapanacni ni na ixꞌaktaijui ju anuꞌ askꞌatꞌa ju Dios.
Ju Zacarías lakꞌaya ju Dios
67 Pus ju Spiritu Santu lhinaulh laꞌisꞌatsucunti ju Zacarías ju ixpai Xivan ixjunita.
Chai ju yuchi tsuculh nonaꞌ ixchivinti Dios.
Pus chani naulh:
68 ―Chach lakꞌayacalh ju quiDiosꞌan ju israelitanin juntau ni quintaquilaktsꞌinchinch chai quintaquimalakxtuchinch ju quijnanꞌan ju ixlapanacni juntau.
69 Ju yuchi quintaxtaknitan pumatam amakꞌalhtaxtunuꞌ ju na tachapun junita.
Chai ju yuchi ixpapanti junita ju David ju ixlapanac Dios ixjunita.
70 Ju Dios naulh ni chunch ju catapasayaꞌ.
Naulich laꞌixchivintiꞌan ju ixlapanacni ju isꞌasacxtuta ni catanonaꞌ ixchivinti tus makꞌanchich.
71 Ju yuchi naulh ni aquintamakꞌalhtaxtuyan laꞌixmacaꞌan ju quintꞌalaxcaiꞌan chai tachi chun ju jantu quintalaktsꞌimputunan.
72 Ju chunch ju Dios amuctaxtuni ju anuꞌ chivinti ju akꞌalhtasunilh ju makꞌaniya quilacpaiꞌan acsni ajuni ni caꞌaꞌaktaijuyach lacaꞌamapaininti.
Chai putasui ni jantu xacꞌapꞌa ju chivinti ju xaꞌatꞌatakꞌoxi ju yuꞌunch.
73 Yuchach ju anuꞌ chivinti ju ixjunita ju makꞌaniya quimpaiꞌan Abraham chai mavasalanilh ni vasalh canaviyaꞌ.
74 Ju yuchi naulh ni aquintamakꞌalhtaxtuyan laꞌixmacaꞌan ju quintꞌalaxcaiꞌan.
Ju chunch ni laich cachꞌalhcatnaniyau ju yuchi chai jantu catalhananau.
75 Chai jantu caꞌalactuꞌununau para va tachi canaviyau ju soknicꞌa.
Chai va tachi chunch ju catsucuyau chux avilhchan acsni tꞌonau ju ani.
76 Chai ju uxintꞌi ji quintsꞌalh alhimispꞌacꞌanaꞌ ni ixlapanac Dios unitꞌa chai anonaꞌ ixchivinti.
Chunch ju alhimispꞌacꞌanaꞌ ni uxintꞌi ju aꞌunaꞌ ju lapanacni ni catalakꞌoxilh ixꞌatalacpastꞌacꞌatꞌan ni caminaꞌ ju ixꞌucxtinꞌan.
Chunch ju alayaꞌ acsni tucaꞌ min ju yuchi.
77 Chai uxintꞌi ju amamachꞌakxaniyaꞌ ju lapanacni ni catatakꞌalhtaxtuyaꞌ acsni caꞌamacꞌacxanicanaꞌ ju ixꞌalactuꞌuntiꞌan.
78 Chai chunchach ju lai caꞌanavicanaꞌ ni quintanavinitan lamapainin ju Dios ni quintamacaminin ju aktsꞌiya ixnoncan ni camalakachatachilh.
79 Chai ju yuchi camapulhcuniyaꞌ laꞌixꞌatalacpastꞌacꞌatꞌan ju yuꞌunch ju tatꞌajuncaꞌ tachi ju va lacaꞌatatsꞌisni chai na taꞌamakꞌaninin ni na tatalhoni ju aninti.
Chai ju yuchi vachuꞌ aquintamalhtanayan ju laxati junta alin ju akꞌoxamixnit laꞌixmacni Dios.
―Pus chunch ju naulh ju Zacarías.
80 Pus ju askꞌatꞌa Xivan takꞌaya.
Chai ixlhichux ixꞌalhunut ixlhilaksi ju Dios.
Chai anch ju ixtꞌajun junta jantu xamatiꞌ ixtꞌajun tus acsni atalacasunilh ju istꞌaꞌisraelitanin ni ixlapanac Dios ixjunita.