Tsuculh ju Jesús
2
Pus ju acsnich ju kꞌai ucxtin Augusto lhinaulh isꞌatsꞌokꞌulaca chux ju lapanacni ixlhilacaputsꞌun ju lacamunutpaꞌ.
Lucas 2.1-20
2 Chai ju ani yuchi ju xapꞌulhnan atsꞌokꞌulanti ixjunita ju ixtalhavat lapanacni.
Chai ju acsnich Cirenio xagobernador ixjunita ju xaꞌestado Siria.
3 Chai chux ju lapanacni anch ju ixtaꞌanchokoi istsꞌokꞌulacaꞌan junta aktsꞌiya ixtꞌunchꞌan ixjunita ju pumatamin.
4 Pus ju José vachuꞌ taxtulh ju lakꞌachakꞌan Nazaret laxaꞌestado Galilea.
Alh ju lakꞌachakꞌan Belén laxaꞌestado Judea.
Pus ju Belén ixtꞌun ixjunita ju makꞌaniya lapanac ju David ixjuncan.
Chai ju José makꞌaniya ixpapanti ixjunita ju David chai yuchi lhiꞌalh ju anch.
5 Chai acsni alh tatsꞌoknuꞌ ju José pus tꞌaꞌalh ju Malia ju ixꞌamachakaꞌ ixjunita.
Para tachi ju va isꞌasqꞌuininticaꞌ ju ixlaktsꞌin.
Pus tꞌaꞌalh ju Malia chai ju yuchi ixꞌakꞌainanta.
6 Chai acsni ixtavilanancha anch pus chaꞌalh ju avilhchan acsni ixlokꞌomputunch.
7 Chai maklakꞌaulich lakatami istsꞌalh.
Chai pachꞌilh lacapumpuꞌ chai mujulh junta ixtavajin ju caballo.
Anchach ju satsucui ju Jesús ni va jantuch lai ixtalhijun ju lacachakaꞌ junta laich catatavi.
Ju ixlhistacnin borregojni talaktsꞌilh ju anquilhnin
8 Chai ixtaꞌalin ju ixlhistacnin borregojni vanin ju lakꞌachakꞌan Belén.
Chai ju yuꞌunch ixtatꞌajun lhistacnin ju ixborregoꞌan ju anuꞌ atatsꞌisni acsni tsuculh ju Jesús.
9 Chai acsni talhicꞌatsanalh chincha ju ixꞌanquilh Dios junta ixtavilanalh.
Chai na xlapꞌapꞌa ixmaktajita junta ixtavilanalh ju ixlhistacnin borregojni.
Pus lana na tatalhanalh.
10 Para ju anquilh chani ajuni:
―Jantu atꞌalhanantꞌit ni va iclajumputunau lakatam chivinti ju kꞌox alhiulayaꞌitꞌit.
Chai ixlacata yuchi slivasalh akꞌachꞌanaꞌitꞌit ju uxijnan chai tachi chun ju lapanacni.
11 Pus chavai tsuculh ju miꞌamakꞌalhtaxtunuꞌan ju ani laꞌixlakꞌachakꞌan David.
Yuchi ju ixnoncan camalakachatachilh ju Dios.
Yuchi ju miꞌucxtinꞌan.
12 Chai chani ju apꞌumispꞌayaꞌitꞌit.
Pus alhitꞌaꞌuyaꞌitꞌit ju askꞌatꞌa ni pachꞌicanta lacapumpuꞌ chai mucanta junta vajin ju caballo.
―Chunch ju ajunilh ju anquilh.
13 Chai lana va tam pantsꞌiquis na lhu xatatꞌatalacasui ju ixtꞌaꞌanquilhnin.
Chai ixtalakꞌayai ju Dios chai chani ixtanajun:
14 ―Chach lakꞌayacalh ju Dios ju vilhcha talaclhman.
Chai ju ani lacatꞌun caꞌalinaꞌ ju akꞌoxamixnit ixlacataꞌan ju xaꞌanavini lamapainin ju Dios ―chunch ju tanaulh ju ixtalhavat anquilhnin.
15 Chai astan ju anquilhnin taꞌanchokolh ju lactꞌiyan.
Pus ju acsnich ju ixlhistacnin borregojni talaclajunich ju sia yuꞌunch:
―Caꞌauch ju chavai ju lakꞌachakꞌan Belén.
Caꞌau laktsꞌinin ju tuchi alinch.
Ju tuchi xaquintamacꞌatsaniyan ju Dios.
16 Pus lana vatsꞌalhti taꞌalh.
Chai talhitajulh ju Malia chai ju José chai ju askꞌatꞌa ni ixtꞌajunch junta vajin ju caballo.
17 Chai acsni talaktsꞌilh pus tamacꞌatsanilh ju lapanacni ju tuchi ixꞌajuncanta ixlacata ju anuꞌ askꞌatꞌa.
18 Chai tachi chun ju ixtakꞌasmatꞌa va talhamakꞌaninilh tuchi ixtanajunch ju ixlhistacnin borregojni.
19 Para ju Malia va ixmakꞌakꞌojuich tachi chun ju ani taxtokni laꞌixꞌalhunut.
Va laꞌisꞌakstu ispastactꞌajun.
20 Chai ju ixlhistacnin borregojni taꞌanchokolh laꞌixlhichꞌalhcatꞌan.
Chai ixtalakꞌayai ju Dios chai ixtajuni lakꞌailaktsꞌiuch ixlacata tachi chun ju ani taxtokni ju ixtakꞌasmatꞌa chai ju ixtalaktsꞌinta.
Pus chunch lana uctaxtukꞌo tachi ju ixꞌajuncanta.
Makꞌaxtaknicalh ju askꞌatꞌa ju Dios
21 Chai acsni chaꞌalh ju ixlhilakatsajin avilhchan pus tachꞌucꞌunilh ju ixꞌaxtꞌakꞌa ju askꞌatꞌa chai lhimapakaꞌucalh Jesús ni chunchach ju ixnajunta ju anquilh mas tucaꞌ ixpacxan ju ixnati.
Lucas 2.21-52
22 Ju laꞌixlhamapꞌaksin ju Moisés ilhcaꞌulani tam chakoꞌulh ju avilhchan acsni calaktsꞌincalh ni tachi ju va lhquiliqui acsni istsucui tam isꞌaskꞌatꞌa.
Pus acsni tavanan taꞌaktsa ju anuꞌ avilhchan ixlacata ju Malia pus talhiꞌalh ju askꞌatꞌa Jesús lacakꞌai ixpujitatꞌan ju istꞌaꞌisraelitanin ju lakꞌachakꞌan Jerusalén.
Anch ju tamakꞌaxtaknilh ju Dios ju askꞌatꞌa Jesús.
23 Pus chunchach ju tanavi ni chunchach ju najun laꞌixlhamapꞌaksin ju Moisés.
Pus chani najun:
“Tachi chun ju xapꞌulhnan askꞌatꞌa ju catsucuyaꞌ ni tsꞌalh pus camispacanach ni ixꞌanuꞌ ju Dios”.
Chunch ju najun laꞌixlhamapꞌaksin Moisés.
24 Chai vachuꞌ najun laꞌixlhamapꞌaksin Moisés ni caxtakniyaꞌ tuꞌuꞌ atapacxat ju Dios ni salaka calaktsꞌinchokocalh tam chakoꞌulh.
Pus ju va quilhpatinin laich cataxtꞌakꞌaꞌ lakatꞌui lakꞌaxkꞌavan.
U ni jantu pus lakatꞌui palumax.
Chai yuchach ju taxtaklh ju Malia chai ju José.
25 Chai ju lakꞌachakꞌan Jerusalén ixꞌalin pumatam lapanac ju Simeón ixjuncan.
Chai ju yuchi na soknicꞌa ixjunita laꞌixmacni Dios chai na ixtalhoni ju Dios.
Chai ju yuchi ixpacxantajich ju anuꞌ ju ixnoncan camalakachatachilh ju Dios ni caꞌamakꞌalhtaxtuyaꞌ ju israelitanin.
Chai ju Spiritu Santu ixlhinajun laꞌisꞌatsucunti.
26 Chai ju Spiritu Santu ixmacꞌatsanita ju Simeón ni jantu catini tus acsni jantucaꞌ laktsꞌin ju yuchi ju camalakachatachilh ju Dios.
27 Chai ju Spiritu Santu macꞌatsani ni caꞌalh ju acsnich ju lacpujitat.
Chai lana acsnich ju tatꞌaquilalh lacpujitat ju askꞌatꞌa Jesús ju José chai ju Malia.
Va ixtamakꞌaxtakniputun ju askꞌatꞌa ju Dios tachi ju talhilanita lacalhamapꞌaksin.
28 Pus ju Simeón cꞌatsalh ni yuchi junita ju Jesús ju anuꞌ ju ixnoncan camalakachatachilh ju Dios.
Chai ju Simeón lana chꞌixlh ju askꞌatꞌa.
Chai lakꞌaya ju Dios.
Chai chani naulh:
29 ―Ju chavai ji Dios laich alakꞌaꞌitꞌi ni acniyaꞌ ju quitꞌin ju milapanac icjunita ni matiꞌ tuꞌuꞌ ju chavai ju aclhamakꞌanininaꞌ.
Laich acniyaꞌ ju chavai ni iclaktsꞌinta ju yuchi ju qꞌuinkꞌalhtꞌasunitꞌa ni aclaktsꞌinaꞌ acsni tucaꞌ icni.
30 Pus lai lhikꞌach acnilh ju chavai ni iclaktsꞌinta ju yuchi ju xamalakꞌachꞌayachꞌitꞌa ni amakꞌalhtaxtunuꞌ junita.
31 Chai macꞌatꞌantꞌa ju yuchi ni laich catamispayaꞌ tachi chun ju lapanacni.
32 Ju yuchi chunch cajunaꞌ tachi ju tuꞌuꞌ maclhcu ni camapulhcuniyaꞌ ju ixtacꞌatsanꞌan ju jantu israelitanin tajunita.
Chai ixlacata yuchi aclakꞌayacanau ju quijnan ju israelitanin icjuntau ju milapanacni icjuntau ―chunch ju naulh ju Simeón.
33 Chai ju José chai ju ixnati ju Jesús na talhamakꞌaninilh ju taxtokni ju ixnoncan ixlacata ju askꞌatꞌa Jesús.
34 Chai ju Simeón sqꞌuinilh ju Dios ni kꞌox catatsucuyaꞌ chai chani ju junilh ju Malia ixnati ju askꞌatꞌa:
―Ju ani askꞌatꞌa lhcaꞌulacanta ni catapukꞌalhkꞌosaꞌ na lhu ju quintꞌaꞌisraelitaninꞌan chai vachuꞌ na lhu catapukꞌostayayaꞌ.
Chai ixlacata yuchi ju lapanacni catapucꞌatsayaꞌ ni laich catakꞌalhtaxtucanaꞌ.
Para na lhu ju jantu kꞌox catalhiulayaꞌ.
35 Chai ni chunch ju catalayaꞌ ju lapanacni pus camalacasucanach ju ixꞌatalacpastꞌacꞌatꞌan ju alin laꞌixꞌalhunutꞌan na lhu lapanacni.
Chai ju uxintꞌi ji ixnati slivasalh na amakꞌalhkꞌajnanaꞌ ixlacata tachi chun ju ani taxtokni ju catapasayaꞌ.
―Chunch ju naulh ju Simeón.
36 Chai vachuꞌ ixtꞌajun ju acsnich pumatam chakoꞌulh ju ixnajun ixchivinti Dios.
Ju yuchi Ana ixjuncan.
Istsiꞌ ixjunita ju Fanuel chai ixpapanti ju Aser.
Chai ju yuchi na tꞌacuch ixjunita.
Pus acsni tavanan ixꞌicanta pus va lakatujun cꞌata ju tꞌatsuculh ju ixpapa.
37 Chai acsni tavanan nimacontilacalh pus va isꞌakstu ju tsuculh ochenta y cuatro cꞌata.
Pus ju yuchi jantu tavanan ixtaxtui ju lacpujitat.
Para chux tokꞌoxai chai chux tuncujun ixlakꞌayai ju Dios.
Istascajai chai ixtꞌachivinin ju Dios.
38 Pus ju yuchi vachuꞌ acsnich ju alakmilh ju José chai ju Malia.
Chai vachuꞌ junilh lakꞌailaktsꞌiuch ju Dios ixlacata ju askꞌatꞌa.
Chai astan ixꞌalacjuni ixlacata ju Jesús tachi chun ju amachakꞌan Jerusalén ju ixtapacxantaji ju ixputakꞌalhtaxtunꞌan.
Taꞌanchokolh ju lakꞌachakꞌan Nazaret
39 Chai acsni tamuctaxtukꞌo tachi chun ju taxtokni tachi ju ixnajun laꞌixlhamapꞌaksin ju Dios pus taꞌanchokolh laxaꞌestado Galilea.
Laꞌixlakꞌachakꞌanꞌan junta Nazaret ixjuncan.
40 Pus ju askꞌatꞌa Jesús takꞌaya chai palai tachapun va.
Chai palai acꞌatsanalh.
Chai va tachi ixnavini lamapainin ju Dios.
Ju Jesús lacpujitat
41 Ju José chai ju Malia ixtaꞌanch chux cꞌata ju lakꞌachakꞌan Jerusalén acsni ixꞌalinacha ju anuꞌ cꞌatan ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin.
42 Chai ju Jesús acsni pacxalh lakacautꞌui cꞌata pus vachuꞌ alactꞌaꞌalh ju yuꞌunch ju lakꞌachakꞌan Jerusalén tachi ju aktsꞌiya ixtalai acsni ixꞌalinacha ju cꞌatan.
43 Chai acsni lakꞌolh ju cꞌatan pus ju José chai ju Malia tataxtuchokolh ju lakꞌachakꞌan.
Ixtaꞌanchokoputun laꞌixchakaꞌan.
Para ju askꞌatꞌa Jesús ixtamacontacha ju lakꞌachakꞌan Jerusalén para jantu istacꞌatsai ju José nin ixnati.
44 Va ixtanajun ni ca anch ixmakꞌanta lacatalhavat.
Pus taꞌalhtanalh tam vilhchan.
Chai astan tasacmi ju ixlhiꞌalakꞌavin chai ju ixtꞌalamispanchꞌan ni ixtalaktsꞌinta ju Jesús.
45 Chai acsni jantu talhitaju pus taꞌanchokopa ju lakꞌachakꞌan Jerusalén.
Va tapuxcolhiꞌalh.
46 Pus lhitajucalh ixlhilakatꞌutuch avilhchan ju laꞌixpujitatꞌan ju istꞌaꞌisraelitanin.
Anch ixmakvi junta ixtavilanalh ju yuꞌunch ju ixtamasui tuchi ixnomputun ju lhamapꞌaksin.
Pus ju Jesús ixtꞌajun akꞌasmatniniꞌ tuchi ixtanajun chai isꞌasacmininch vachuꞌ.
47 Chai tachi chun ju ixtakꞌasmatnich va ixtalhamakꞌaninin ju ixꞌacꞌatsanti ju anuꞌ askꞌatꞌa ni na sok ixꞌakꞌalhtayanan.
48 Para ju José chai ixnati ni talaktsꞌilh na talhamakꞌaninilh.
Chai ju ixnati chani juni:
―Tajuch ji quintsꞌalh ni va chunch xaquilaꞌulhtuyau.
Ju ani mimpai chai ju quitꞌin na iclalhamakꞌanininau ni iclapuxcolhitꞌonauch.
49 Para ju Jesús chani ajuni:
―Tajuch ni jantu iscꞌatsꞌayatꞌit taꞌanchach ju icvi.
Ja va jantu cꞌatsꞌayatꞌit ni tasqꞌuini ni acnavinilh ju ixlhichꞌalhcat ju quimpai.
50 Para ju yuꞌunch jantu lai tamachakxanilh ixchivinti tuchi ju lhakꞌalhtayanalh.
51 Pus ju Jesús lana alactꞌamincha.
Taminchokolh laꞌixchakaꞌan ju lakꞌachakꞌan Nazaret.
Chai ju yuchi aquiclacaꞌinilh ju José chai ju Malia.
Pus ju ixnati va ixmakꞌai tachi chun ju ani taxtokni laꞌixꞌalhunut.
52 Chai ju Jesús palai ixtꞌajun lhitaꞌokslanaꞌ ju ixtacꞌatsanti chai ju ixtakꞌayanti.
Chai ju Dios ismasuni ixꞌamapaininti ju askꞌatꞌa Jesús.
Chai ju lapanacni vachuꞌ na kꞌox talhiula ju askꞌatꞌa.