JU CHIVINTI IXLACATA JU CRISTO JU TSꞌOKLH JU MARCOS
Ju Xivan ju amakpaxanaꞌ ixꞌamalani ju lapanacni ju lacamacni
1
Chani ju xataiꞌulai ju amalaninti ixlacata ju Jesucristo istsꞌalh Dios.
Marcos 1:1-13
2 Pus ju Isaías ju anuꞌ makꞌaniya lapanac ju ixnajun ixchivinti Dios chani ju tsꞌoklh ixlacata ju Jesús:
Ju Dios ma najun ni acsni tucaꞌ min ju yuchi ju ani lacamunutpaꞌ pus isꞌakstu ju Dios ma camalakachatachilh ju ixlapanac.
Chai ju yuchi ma caꞌalacjunach ju lapanacni ni catalakꞌoxilh ju ixꞌatalacpastꞌacꞌatꞌan ni caminaꞌ ju ixꞌucxtinꞌan.
3 Chai ju anuꞌ ixlapanac ma pꞌas cachivinaꞌ ju makat lacamacni.
Ma caꞌalacjunaꞌ ju lapanacni ni catalakꞌoxilh ju ixꞌatalacpastꞌacꞌatꞌan ni caminaꞌ ju ixꞌucxtinꞌan.
Ma chach salaka va ju ixꞌalhunutꞌan.
4 Pus yuchi lhimilh ju Xivan.
Yuchi ju anuꞌ ixlapanac Dios ju lhichivinilh ju Isaías.
Chai ju yuchi ixꞌamakpaxanan ju lacamacni chai ixꞌalacjuni ju lapanacni:
―Amacꞌaꞌuntꞌit ju miꞌalactuꞌuntiꞌan chai aꞌakpꞌaxtꞌit.
Ju chunch catamacꞌacxaniyan ju miꞌalactuꞌuntiꞌan ju Dios.
―Chunch ixꞌajuni ju lapanacni.
5 Pus ju amachakꞌan ju xaꞌestado Judea chai ju amachakꞌan ju lakꞌachakꞌan Jerusalén ixtalakꞌan ju Xivan ni ixtakꞌasmatniputun ju ixchivinti.
Chai ju Xivan amakpaxakꞌo ju anuch kꞌai xcan Jordán acsni ixtanajun ni catamaconaꞌ ju ixꞌalactuꞌuntiꞌan.
6 Ju ixpumpuꞌ ju Xivan ispaksiucanta ixꞌapamat camello.
Chai lakatam takꞌaixtꞌakꞌan ixtankꞌaijucalh.
Chai ixꞌui ju tuꞌuꞌ tachi ju silek chai ju xatꞌaxcat lacaqꞌuivin.
7 Ju yuchi chani ixꞌalacjuni ju lapanacni:
―Mintacha astan ju palai xakꞌai.
Palai jantu ju quitꞌin.
Ju quitꞌin jantu tuꞌuꞌ ju quintapalhni.
Jantu laich actichꞌanxkꞌotlh nin mas va yuchi ju samusni ixchꞌanxtꞌakꞌan.
8 Pus ju quitꞌin lacaxcan ju iclamakpaxau.
Para ju yuchi cataxtakniyan ju Spiritu Santu ju catsucuyach lamiꞌalhunutꞌan.
Ju Jesús makpaxacalh
9 Pus ju acsnich ju Jesús mincha lakꞌachakꞌan Nazaret laxaꞌestado Galilea chai ju Xivan vachuꞌ makpaxa ju yuchi lacakꞌai xcan Jordán.
10 Chai ju Jesús acsni tacutlh ju lacxcan lana laktsꞌilh ju lactꞌiyan ni talhtekꞌa.
Chai laktsꞌilh ni milh ju Spiritu Santu tachi ju tuꞌuꞌ lakꞌaxkꞌavan.
Chai lakmilh ju yuchi.
11 Chai lana chivincancha ju lactꞌiyan chai kꞌasmatcalh ju lacatꞌun junta ixya ju Jesús.
Chai chani junicalh ju Jesús:
―Ju uxintꞌi quintsꞌalhꞌat.
Slivasalh na icmapainiyan.
Na iclhikꞌachananch.
Ju lhacaticuru ixꞌamalactuꞌuniputun ju Jesús
12 Pus ju Spiritu Santu lana kꞌai lhiꞌalh ju Jesús lacamacni.
13 Tꞌupꞌuxam avilhchan tolhcha lacamacni ju Jesús.
Chai ju anch na ixꞌalin ju maktilin.
Chai ju lhacaticuru navilh ju talacmaskꞌatinti ni tsꞌa ma laich caꞌixmalactuꞌuni ju Jesús.
Chai ju astan ju anquilhnin talhiminilh ju ixvaiti ju Jesús.
Ju Jesús taiꞌula ixlhichꞌalhcat ju xaꞌestado Galilea
14 Acsni tꞌalhnucalh ju Xivan pus astan ju Jesús alh ju xaꞌestado Galilea.
Ixꞌalacjuni ju lapanacni ni lhinomputun ju Dios laꞌisꞌatsucuntiꞌan.
Marcos 1:14-45
―Vaninch minta ju avilhchan acsni calhinonaꞌ ju Dios.
Tamch alacpꞌastꞌactꞌit lamiꞌalhunutꞌan chai alacꞌaꞌitꞌit ju chivinti junta najun ta yu laich apꞌutꞌakꞌalhtꞌaxtꞌuyaꞌitꞌit.
―Chunch ixꞌalacjuni.
Ju Jesús atꞌasanilh ixpumatꞌatꞌiꞌan ju ixchꞌapanin pamata ixtajunita
16 Chai ju Jesús ixꞌalhtanan laꞌixquilhtuꞌ ju xaꞌatantsꞌin Galilea acsni alaktsꞌilh ju Simón ju vachuꞌ ixjuncan Pitaluꞌ chai ispꞌisekꞌe ju Tilix ixjuncan.
Va ixtatꞌajun munin ixchꞌokxniꞌan lacaꞌatantsꞌin ni ixchꞌapanin pamata ixtajunita.
17 Chai ju Jesús alacjuni:
―Aquilachꞌakꞌokꞌauch.
Chai tachi ju ixmakꞌaixtꞌokꞌatꞌit ju pamata pus vana va chun aclaxtakniyau ju lhichꞌalhcat ni amakꞌaixtꞌokꞌaꞌitꞌit ju lapanacni ju aquintalhilacaꞌanaꞌ.
―Chunch ju alacjuni.
18 Pus lana tamacaulh ixchꞌokxniꞌan chai tachꞌakꞌokꞌalh ju yuchi.
19 Chai ni alhtanampa alacatsꞌunin ju Jesús pus alaktsꞌilh ju Jacobo chai ispꞌisekꞌe ju Xivan ixjuncan.
Istsꞌalan ju Zebedeo.
Ju yuꞌunch ixtatajumanalh laꞌixbarcoꞌan.
Va ixtatꞌajun lacyonin ixchꞌokxniꞌan.
20 Pus lana alactꞌasanilh ju Jesús.
Chai ju yuꞌunch tamacaulh ju ixpaiꞌan ju Zebedeo ixjuncan.
Tatꞌamacaulh ju ixlapanacni ju lacabarco.
Chai ju Jacobo chai ju Xivan tachꞌakꞌokꞌalh ju Jesús.
Ju lhacaticuru ixtanun laꞌixlacatuna pumatam lapanac
21 Astan ju Jesús chai ju ixlapanacni tatanucha ju lakꞌachakꞌan Capernaum.
Chai chaꞌalh ju avilhchan paꞌastacni acsni lhikꞌalhtsꞌaulh ju lhamapꞌaksin ni catachꞌalhcatnalh ju lapanacni.
Pus ju acsnich ju Jesús alh laꞌixpujitatꞌan ju istꞌaꞌisraelitanin.
Alh amamakaꞌunuꞌ.
22 Pus ju lapanacni ju ixtavilanalh va talhamakꞌaninilh ta yu xaꞌamalaninin ni ixꞌalacmapꞌaksinin tachi tam xakꞌai.
Jantu chun tachi ju ixtaꞌamalaninin ju yuꞌunch ju na ixtalhatalanininta ju ixlhamapꞌaksinꞌan.
23 Pus ju anuꞌ laꞌixpujitatꞌan ixꞌalin pumatam lapanac ju ixtanun ju lhacaticuru laꞌixlacatuna.
Pus ju anuꞌ lapanac lana tsꞌau tꞌasalh acsni laktsꞌilh ju Jesús.
24 Chai ju lhacaticuru puchivinilh ixquilhni ju lapanac acsni chani naulh:
―Tijuch ju quilamintau lhilaktsꞌinin ji Jesús amachakaꞌ Nazaret.
Ja va quilamintauch macaꞌanin lacajipi.
Iccꞌatsai tichi chavaichꞌat.
Ju uxintꞌi salaka istsꞌalh Diosꞌat chai yuchi ju malakachachan ju ani.
25 Pus ju Jesús kꞌailh ju lhacaticuru.
Junich:
―Va sekch ju uxintꞌi.
Atꞌaxtꞌuch ju laꞌixlacatuna ju lapanac.
―Chunch ju juni.
26 Chai ju anuꞌ lhacaticuru lana tin lhineklh ju lapanac.
Lhtucu lhtucu ucxuntama.
Tsꞌau tꞌasalh chai taxtulh lana.
27 Pus tachi chun ju lapanacni va talhamakꞌaninilh chai talasacmilh sia yuꞌunch.
Talaclajunich:
―Tijuch nuꞌ ju ani.
Tis sastꞌi atalaninti nuꞌ ju ani.
Ju ani ya lapanac alin ixtachaput ni lai lhijuni ju lhacaticurulhni chai taquiclacaꞌi.
―Chunch ju talaclajuni.
28 Pus lana cꞌatsakꞌocalh ixlacata ju Jesús tachi chun ju lakꞌachakꞌanixni ju alin ju xaꞌestado Galilea.
Ju Jesús cꞌuchꞌu ixputꞌichakoꞌulh ju Pitaluꞌ
29 Pus ju Jesús chai ju ixꞌamamakaꞌui tataxtucha ju laꞌixpujitatꞌan ju istꞌaꞌisraelitanin.
Tachaꞌalh laꞌixchakaꞌan ju Simón chai Tilix.
Ixtaꞌankꞌota vachuꞌ ju Tiyacu chai ju Xivan.
30 Pus ixputꞌichakoꞌulh ju Simón ixma laꞌixputaman.
Na ixchꞌapata ju iscacat.
Pus lana tajunilh ju Jesús ni na ixtakꞌankꞌai.
31 Pus ju Jesús lana lakꞌalh junta ixma ju takꞌankꞌan.
Chꞌapanilh ju ixmacaꞌ chai makꞌostola.
Lana macaulh ju iscacat chai lana taya chai tsuculh alacmavanaꞌ ju Jesús chai ixꞌamamakaꞌui.
Na lhu lapanacni palaich anavi ju Jesús
32 Chai acsni tokꞌoxalhch lacatsꞌunin acsni ancha ju avilhchan pus tachi chun ju takꞌankꞌanin alhimincalh junta ixvi ju Jesús.
Vachuꞌ alhiminicalh tachi chun ju ixtanun ju lhacaticuru laꞌixlacatunaꞌan.
33 Pus tachi chun ju lapanacni tatakꞌaixtoktayakꞌo laxamalhtich ju ixchakaꞌ ju Simón.
34 Chai ju Jesús na lhu palaich anavi ju takꞌankꞌanin mas na tijlhu takꞌankꞌat ixtapacxanta.
Vachuꞌ akꞌailh ju lhacaticurulhni.
Ajunilh ni catataxtulh laꞌixlacatunaꞌan lhu ju lapanacni.
Chai tataxtulh.
Para ju Jesús jantu xaꞌalacasqꞌuini ni catachivinilh ju lhacaticurulhni va ixlacata ni istamispai ju Jesús.
Chai ju yuchi va jantu ixlacasqꞌuin ni catajunilh ju lapanacni tichi chavaich ju yuchi.
Ju Jesús amalaninilh ju xaꞌestado Galilea
35 Na vatsꞌisin kꞌostavi ju Jesús.
Istsꞌistacaꞌ acsni taxtulh va isꞌakstu.
Alh ju lacamacni.
Anch ju tꞌachivincha ju Dios.
36 Pus ni tunculh ju Simón chaich ju aliꞌin taꞌalh puxconin.
37 Chai acsni talhitajucha ju Jesús tajuni:
―Chux ju lapanacni tapuxcoyan.
38 Para ju Jesús alacjuni:
―Caꞌauch ju lakꞌachakꞌanixni ju vanin vi ni laich camasunitachau vachuꞌ ixchivinti Dios ni yuchi ju iclhiminta ju quitꞌin.
39 Pus ju Jesús ixlacꞌaktanutꞌajun ixlhilakapokꞌai ju xaꞌestado Galilea.
Ixꞌamalaninin laꞌixlacpujitatꞌan ju xalapanacni anch.
Chai ixꞌalacxcoxtuni ju lhacaticurulhni laꞌixlacatunaꞌan lhu ju lapanacni.
Ju Jesús cꞌuchꞌu pumatam lapanac ju ixpacxanta ju jantu kꞌoxiya tsꞌitsꞌi
40 Pus pumatam lapanac ixpacxanta ju macxcai tsꞌitsꞌi ju ixpuchꞌiꞌan.
Chai ju yuchi lakmilh ju Jesús.
Taꞌaktsokotanilh.
Juni:
―Ni va xaqꞌuincꞌuchꞌupꞌutꞌuch cava pus laich xaqꞌuincꞌuchꞌutꞌi.
41 Pus ju Jesús na mapainilh ju takꞌankꞌan.
Lana mokslanilh ixmacaꞌ laꞌixlacatuna ju takꞌankꞌan chai junilh:
―Iclacasqꞌuinch.
Palaichꞌat ju chavai.
42 Chai acsni naulh ju chunch ju Jesús pus lana vatsꞌalhti lacmacaxnilh ju istsꞌitsꞌi ju anuꞌ lapanac.
43 Chai ju Jesús na mapꞌaksi chai malakachalhch laꞌixlacpujitatꞌan ju istꞌaꞌisraelitanin.
Junich:
44 ―Akꞌasmatꞌich ju icjunan.
Tun xamatiꞌ tꞌiꞌun tuꞌuꞌ.
Inchich talacasuniniꞌ ju pali.
Chai axtꞌakchich ju milhakꞌailaktsꞌin tachi ju najunta ju Moisés lacalhamapꞌaksin.
Ju chunch catacꞌatsayach ju lapanacni ni salaka ju milacatuna.
―Chunch ju junicalh ju takꞌankꞌan ixjunita.
45 Para ju anuꞌ takꞌankꞌan ixjunita acsni taxtucha ju laꞌixꞌucxlacapuꞌ ju Jesús lana lacquilhuntsuculh tuchi ixtapasata.
Chai ni xatacꞌatsakꞌojui ju lapanacni pus ju Jesús jantu lai ixtanui ju tuꞌuꞌ lakꞌachakꞌan va laꞌixꞌucxlacapuꞌan ju lapanacni.
Va lacamacni ixtolacha.
Chai ju anch na lhu lapanacni ixtalakchaꞌan ju vaklhun ixtamintacha.