2 Pus lana talhitakꞌaixtokpa ju lapanacni ju laꞌixchakaꞌ ju Jesús.

Chai ni na va ilhuꞌan ixtajunita pus jantuch lai ixtalhijun ju lacachakaꞌ.

Pus ixchaꞌantach ju lapanacni lacamalhtich acsni ixꞌalacmasuni ju ixchivinti Dios ju Jesús.

3 Pus lhimincancha pumatam takꞌankꞌan ju va ixlacalhtuculunta.

Ixlhipumatꞌatꞌiꞌan lapanacni tachꞌixlhichaꞌalh ju lacachakaꞌ junta ixvi ju Jesús.

4 Para jantu jintaꞌ talhitaju junta laich catapumanu lacachakaꞌ junta ixvi ju Jesús ni na isꞌaktsamcanta.

Pus tatocꞌalh laꞌixꞌucxni chakaꞌ chai taꞌucxmakꞌalh junta ixlhivi ju Jesús.

Chai anch ju tapumakꞌalhtaju lacalona ju anuꞌ takꞌankꞌan.

5 Chai ju Jesús ni cꞌatsa ni na ixtalhilacaꞌanta ju yuchi ju anuch ixpumatꞌatꞌiꞌan lapanacni pus junich ju takꞌankꞌan:

―Quintsꞌalh macꞌacxanikꞌocantach ju mintalakꞌalhin.

6 Pus ixtavilanalh vachuꞌ ju na ixtalhatalanininta ju ixlhamapꞌaksinꞌan ju istꞌaꞌisraelitanin.

Chai ju yuꞌunch chani istapastacta laꞌixꞌalhunutꞌan:

7 “Tas ni va ta chivimpalai ju ani ya lapanac.

Na macxcai chivinti ju najun ni tachi ju va Dios ju jumputun.

Jantu xamatiꞌ lai macꞌacxai ju talakꞌalhin.

Va yuchi ju Dios”.

8 Para ju Jesús lana cꞌatsa tuchi istapastꞌacꞌa ju anuch lapanacni.

Chai alacjuni:

―Tajuch ni va chunch ju pꞌastꞌacꞌatꞌit lamiꞌalhunutꞌan.

9 Ni acjunilh ni macꞌacxanicalh ju ixꞌalactuꞌunti pus jantu lai apꞌucꞌatsꞌayaꞌitꞌit ni vasalh alin ju quintachaput u jantu.

Para ni acjunilh ni cakꞌostavi chai caꞌalhtanalh pus ju chunch lai apꞌucꞌatsꞌayaꞌitꞌit ni alin ju quintachaput.

10 Pus alaktsꞌintꞌit ju ani ju acnaviyaꞌ chai laich apꞌucꞌatsꞌayaꞌitꞌit ni alinch ju quintachaput ju ani lacamunutpaꞌ ni lai icmacꞌacxani ju talakꞌalhin.

Quitꞌin ju quimalakachatachilh Dios ni lapanac actsucuyaꞌ ju ani.

Chai ju acsnich ju Jesús junich ju takꞌankꞌan:

11 ―Uxintꞌi ju icjunan.

Akꞌostꞌaꞌulh.

Asactꞌich ju mimputaman.

Aꞌinchich ju laminchakaꞌ.

12 Pus ju anuꞌ takꞌankꞌan ixjunita taya.

Saclh ju ixputaman.

Chai taxtulh laꞌixꞌalacꞌavantiꞌan chux ju lapanacni.

Chai ju yuꞌunch na talhamakꞌaninilh.

Talakꞌaya ju Dios.

Chai talaclajuni:

―Jantu tavanan laktsꞌintau tuꞌuꞌ ju chunch.

13 Pus aktam taxtuchokopa ju Jesús.

Alh laꞌixquilhtuꞌ ju atantsꞌin.

Pus chux ju lapanacni talakchaꞌankꞌochokopa chai ju yuchi ixꞌalacmalani.

14 Chai acsni tavanan anchokolh ju Jesús ju lakꞌachakꞌan pus laktsꞌilh pumatam achꞌiniꞌ ju Leví ixjuncan.

Istsꞌalh ju Alfeo.

Ju yuchi ixvi junta amapalanancan.

Chai ju Jesús juni:

―Aqꞌuinchꞌakꞌokꞌach.

Pus lana taya ju Leví.

Chꞌakꞌokꞌalh ju Jesús.

15 Pus ju aktam ju Jesús ixtꞌajun venaꞌ laꞌixchakaꞌ ju Leví.

Chai vachuꞌ na lhu tachaꞌalh ju achꞌinin chai vachuꞌ ju aliꞌin alactuꞌunu lapanacni.

Chai va kꞌaixtam tatꞌatavi ju Jesús chai ju ixꞌalacmamakaꞌuich lacamixa ni na lhu ixtachꞌakꞌokꞌai ju Jesús.

16 Pus ju na ixtalhatalaninintach ju ixlhamapꞌaksin ju istꞌaꞌisraelitanin chaich ju ixtalhilacaꞌan ju ixlhamapꞌaksinꞌan ju fariseonin talaktsꞌilh ju Jesús ni ixꞌalactꞌavajin ju taꞌachꞌinin chai ju alactuꞌunin.

Pus ju yuꞌunch tajunilh ju ixꞌalacmamakaꞌui ju Jesús:

―Ju miꞌamamakaꞌunuꞌan tajuch ni va kꞌaixtam alactꞌavajin ju achꞌinin chai ju alactuꞌunin.

17 Pus ju Jesús acsni kꞌasmatlh ju tuchi ixtanajun chani alacjuni:

―Ju kꞌox tatꞌajun jantu tamaktasqꞌuini ju acꞌuchꞌunuꞌ.

Va yuꞌunch ju talactakꞌankꞌai ju tamaktasqꞌuini ju acꞌuchꞌunuꞌ.

Pus ju quitꞌin jantiyuꞌ iclhiminta ni acꞌalactꞌasanilh ju laquimacni ju tanajun ni na soknicꞌa ju isꞌatsucuntiꞌan.

Alai icminta alactꞌasaniniꞌ ju alactuꞌunin.

18 Pus ju ixꞌalacmamakaꞌui ju Xivan chai ju fariseonin jantu ixtavajin ju anuꞌ avilhchan ni chunch ju ixtalhilanita.

Pus ju acsnich ju aliꞌin lapanacni talakmilh ju Jesús chai tajuni:

―Tajuch ni va tatascajai ju ixꞌalacmamakaꞌui ju Xivan chai ixꞌalacmamakaꞌui ju fariseonin.

Para ju mintamamakaꞌun ju uxintꞌi jantu tatascajai.

19 Pus ju Jesús alackꞌalhtailh.

Alacjuni:

―Tachi chun ju tamakꞌachꞌakꞌokꞌanan junta alin ju tamakꞌaxtꞌokꞌat ja lai jantu catavailh ni alinch ju kꞌachat ni vilhcaꞌ ju anuꞌ tsꞌalh ju catamakꞌaxtꞌokꞌaꞌ.

Acsni vilhcaꞌ ju anuꞌ tsꞌalh ju catamakꞌaxtꞌokꞌaꞌ pus jantu lai tatascajai ju ixꞌamigojni.

20 Pus vana va chun ju quintamamakaꞌun.

Jantu tatascajai ju chavai ni icꞌalactꞌavi.

Para cachinaꞌ avilhchan acsni acmakꞌosucanaꞌ ju ani lacamunutpaꞌ.

Chai acsnich ju catatascajayaꞌ ni na aquintalhamakꞌanininach.

21 Jantu xamatiꞌ lai lhalakyavanan ju pumpuꞌ ju jantu amakpanti chai lai va chunch camucꞌalh ju lacakꞌatꞌili pumpuꞌ.

Pus ni chunch ju calalh pus va palai makat cakꞌexlh acsni talakatumi ju sastꞌi pumpuꞌ.

22 Nin yuchi ni lai acpumuju ju sastꞌi vino lacakꞌatꞌili axtꞌakꞌan ni na kꞌalhpꞌasnicaꞌ.

Ni chunch ju acnavi pus va cakꞌexlh ju axtꞌakꞌan chai capuꞌankꞌo ju vino chai ju axtꞌakꞌan catsꞌankꞌalh.

Alai pumucan ju sastꞌi vino lacasastꞌi axtꞌakꞌan.

Chunch ju ajuni ju Jesús ju lapanacni ni va ixꞌamamachakxaniputun ni jantu lai catilhiyaulh ju makꞌaniya ixlhamapꞌaksin ju Moisés ju ixlhamapꞌaksin ju yuchi.

23 Lakatam avilhchan paꞌastacni ju Jesús tapasalh junta ixchꞌancanta ju trigo.

Chai ixꞌalacmamakaꞌui ixtapꞌuxlhiꞌanta ju trigo chai ixtaꞌuich.

24 Pus ju acsnich ju fariseonin tajunich ju Jesús:

―Alaktsꞌich.

Tajuch ni va chunch tanavi ju miꞌamamakaꞌui ni jantu lai chꞌalhcatnancan ju chavai ni avilhchan paꞌastacni.

25 Para ju Jesús alacjuni:

―Ja lana jantu pꞌastꞌacꞌatꞌit tuchi navilh ju David acsni ixꞌalin ixmaktasqꞌuinit chai acsni chavanilh ju yuchi chai ju ixtatꞌaꞌanta.

26 Ja lana jantu pꞌastꞌacꞌatꞌit ni tanulh ju yuchi junta ixlakꞌayacan ju Dios acsni xakꞌai pali ixjunita ju Abiatar.

Chai ulh ju xkapavati ju ismokslanicanta ju Dios.

Pus ju anuꞌ xkapavati jantu lai va kꞌaya ixꞌucan.

Va yuꞌunch ju palijnin ju lai ixtaꞌui.

Para ju David ni upa chai vachuꞌ alacxtaknipa ju ixꞌalactꞌaꞌanta.

27 Ju Jesús vachuꞌ alacjuni:

―Ju Dios lhcaꞌula ju avilhchan paꞌastacni ixlacata ju lapanacni.

Jantiyuꞌ lhinavilh ju lapanacni ni va catamuctaxtulh ju lhamapꞌaksin ju navilh ju Dios ixlacata ju anuꞌ avilhchan.

28 Pus quitꞌin ju lai icnajun tuchi lai navican ju avilhchan paꞌastacni.

Quitꞌin ju quimalakachatachilh Dios ni lapanac actsucuyaꞌ ju ani.