JU CHIVINTI IXLACATA JU CRISTO JU TSꞌOKLH JU MATEO
Ju makꞌaniya ixlacpaꞌitni ju Jesús
1
Ju ani yuchi ixtapakaꞌutꞌan ju makꞌaniya ixlacpaꞌitni ju Jesucristo acsni tavanan quitsucuchilh ju ani tachi lapanac.
Pus ju yuchi makꞌaniya ixpapanti ixjunita ju David chai ju Abraham.
2 Pus ju Abraham alilh ju istsꞌalh chai lhimapakaꞌulh Isaac.
Chai ju Isaac alilh ju istsꞌalh chai lhimapakaꞌulh Jacob.
Chai ju Jacob alilh ju istsꞌalh chai lhimapakaꞌulh Judá.
Vachuꞌ alilh ju aliꞌin isꞌapꞌisekꞌen.
3 Chai ju Judá tꞌaꞌamaskꞌatꞌanalh ju Tamar.
Alhimapakaꞌulh ju istsꞌalan Fares chai ju Zara.
Pus ju Fares alilh ju istsꞌalh chai lhimapakaꞌulh Esrom.
Chai ju Esrom alilh ju istsꞌalh chai lhimapakaꞌulh Aram.
4 Chai ju Aram alilh ju istsꞌalh chai lhimapakaꞌulh Aminadab.
Chai ju Aminadab alilh ju istsꞌalh chai lhimapakaꞌulh Naasón.
Chai ju Naasón alilh ju istsꞌalh chai lhimapakaꞌulh Salmón.
5 Chai ju Salmón tꞌaꞌamaskꞌatꞌanalh ju Rahab.
Chai lhimapakaꞌulh ju istsꞌalh Booz.
Pus ju Booz tꞌaꞌamaskꞌatꞌanalh ju Rut.
Lhimapakaꞌulh ju istsꞌalh Obed.
Chai ju Obed alilh ju istsꞌalh chai lhimapakaꞌulh Isaí.
6 Pus ju Isaí alilh ju istsꞌalh chai lhimapakaꞌulh David ju valh kꞌai ucxtin.
Pus ju kꞌai ucxtin David tꞌaꞌalilh istsꞌalh ju ixꞌamachakaꞌ ixjunita ju lijunto Urías.
Chai talhimapakaꞌulh istsꞌalh Salomón.
7 Chai ju Salomón alilh ju istsꞌalh chai lhimapakaꞌulh Roboam.
Chai ju Roboam alilh ju istsꞌalh chai lhimapakaꞌulh Abías.
Chai ju Abías alilh ju istsꞌalh chai lhimapakaꞌulh Asa.
8 Chai ju Asa alilh ju istsꞌalh chai lhimapakaꞌulh Josafat.
Chai ju Josafat alilh ju istsꞌalh chai lhimapakaꞌulh Joram.
Chai ju Joram alilh ju istsꞌalh chai lhimapakaꞌulh Uzías.
9 Chai ju Uzías alilh ju istsꞌalh chai lhimapakaꞌulh Jotam.
Chai ju Jotam alilh ju istsꞌalh chai lhimapakaꞌulh Acaz.
Chai ju Acaz alilh ju istsꞌalh chai lhimapakaꞌulh Ezequías.
10 Chai ju Ezequías alilh ju istsꞌalh chai lhimapakaꞌulh Manasés.
Chai ju Manasés alilh ju istsꞌalh chai lhimapakaꞌulh Amón.
Chai ju Amón alilh ju istsꞌalh chai lhimapakaꞌulh Josías.
11 Chai ju Josías alilh ju istsꞌalh chai lhimapakaꞌulh Jeconías.
Vachuꞌ alilh ju isꞌapꞌisekꞌen.
Pus acsnich ju tatsuculh ju Jeconías chai isꞌapꞌisekꞌen acsni tachꞌin alhiꞌancalh ju israelitanin ju xalacatꞌun Babilonia.
12 Chai ju anch pus ju Jeconías alilh ju istsꞌalh chai lhimapakaꞌulh Salatiel.
Chai ju Salatiel alilh ju istsꞌalh chai lhimapakaꞌulh Zorobabel.
13 Chai ju Zorobabel alilh ju istsꞌalh chai lhimapakaꞌulh Abiud.
Chai ju Abiud alilh ju istsꞌalh chai lhimapakaꞌulh Eliaquim.
Chai ju Eliaquim alilh ju istsꞌalh chai lhimapakaꞌulh Azor.
14 Chai ju Azor alilh ju istsꞌalh chai lhimapakaꞌulh Sadoc.
Chai ju Sadoc alilh ju istsꞌalh chai lhimapakaꞌulh Aquim.
Chai ju Aquim alilh ju istsꞌalh chai lhimapakaꞌulh Eliud.
15 Chai ju Eliud alilh ju istsꞌalh chai lhimapakaꞌulh Eleazar.
Chai ju Eleazar alilh ju istsꞌalh chai lhimapakaꞌulh Matán.
Chai ju Matán alilh ju istsꞌalh chai lhimapakaꞌulh Jacob.
16 Chai ju Jacob alilh ju istsꞌalh chai lhimapakaꞌulh José.
Chai yuchach ju valhch ixpapa ju Malia ixnati ju Jesús ju Cristo juncan.
Yuchi ju ixnoncan camalakachatachilh ju Dios.
17 Pus tus acsni tsuculh ju Abraham tus acsni tsuculh ju David quilhmaccautꞌatꞌi va ju tatsuculh ju lapanacni.
Chai aquilhmaccautꞌatꞌi va ju tatsuculh tus acsni tsuculh ju David tus acsni alhiꞌancalh ju israelitanin tachꞌin ju xalacatꞌun Babilonia.
Chai aquilhmaccautꞌatꞌi va ju tatsuculh tus acsni alhiꞌancalh tachꞌin ju israelitanin ju xalacatꞌun Babilonia tus acsni tavanan tsuculh ju Cristo.
Tsuculh ju Jesucristo
18 Acsni tavanan lakꞌaulhch ju Jesucristo pus chanich va.
Pus yuchi ju Malia ju ixnati cajunaꞌ va isꞌasqꞌuininticaꞌ ixjunita ju José.
Para acsni jantucaꞌ ixtalatꞌatsucui acsnich ju cꞌatsacalh ni ixpacxanta ju isꞌaskꞌatꞌa laꞌixtachaput ju Spiritu Santu.
19 Pus ju José na ixnavi tachi ixnajun laꞌixlhamapꞌaksin ju Moisés chai ju anch ixlhikꞌalhtsajui ni xamatiꞌ va kꞌaya calalh.
Pus ixlhiyuchi ju José jantu ixtꞌatamakꞌaxtokputun ju Malia acsni cꞌatsa ta yu ixjunita.
Para jantu ixmamaxaniputun ju Malia lacatalhavat ni va cachivimakꞌalh.
Alai va sekch ixmacoꞌulaputun.
20 Para acsni pastaclich ju chunch pus lana talacasunilh pumatam anquilh laꞌilhtatat chai chani juni:
―José.
Ju uxintꞌi makꞌaniya ixpapanti David unitꞌa.
Jantu atꞌalhan.
Jantu anauch ni jantu navipꞌutꞌun miꞌamachakaꞌ ju Malia.
Pus ju tuchi pacxanta ixꞌanuch ju Spiritu Santu.
21 Chai ju yuchi camaklokꞌonach pumatam tsꞌalh chai alhimapꞌakꞌaꞌuyaꞌich Jesús ni yuchach ju camakꞌalhtaxtuyaꞌ ixlapanacni laꞌixꞌalactuꞌuntiꞌan.
―Chunch ju junicalh ju José.
22 Pus tachi chun ju ani chunch ju tapasalh ni chunch ju puꞌuctaxtulh ju tuchi ixnajunta ju makꞌaniya lapanac ju ixnajun ixchivinti Dios.
Pus chani ixnajun:
23 Ju pumatam atsiꞌ ju va isꞌakstucaꞌ ma capacxanaꞌ ju askꞌatꞌa chai camaklokꞌonaꞌ pumatam tsꞌalh
chai calhimapakaꞌuyach Emanuel.
Pus ju Emanuel va nomputun ni quintatꞌavilanch ju Dios.