Ju lapanacni ju ixtalhatalaninin ju stꞌacu taquilaktsꞌilh ju askꞌatꞌa Jesús
2
Ju Herodes gobernador ixjunita ju xaꞌestado Judea acsni tavanan tsucuchalh ju Jesús ju lakꞌachakꞌan Belén lhiJudea.
Chai ju acsnich tachincha lakꞌachakꞌan Jerusalén aliꞌin lapanacni ju ixtalhatalanininta ju stꞌacu.
Tamincha lhichꞌatoꞌanta.
2 Chai taꞌasacminilh.
Tanaulh:
―Tas anchach ju vi ju ixꞌucxtinꞌan ju israelitanin ju va tsuculhcaꞌ.
Pus laquintꞌun quincꞌan iclaktsꞌiuch ju stꞌacu ju tasu chai ju nomputun ni tsuculh ju yuchi.
Chai ju quijnan icmintau ni va iclakꞌayaputunau.
3 Para acsni kꞌasmatlh ju gobernador Herodes ju ani chivinti pus na talhanalh.
Chai vachuꞌ chunch talalh tachi chun ju amachakꞌan ju lakꞌachakꞌan Jerusalén.
4 Pus ju acsnich ju gobernador alactꞌasanikꞌo chux ju xalackꞌajin palijni chai ju yuꞌunch ju ixtalhatalanininta ju ixlhamapꞌaksinꞌan ju istꞌaꞌisraelitanin chai asacmi ta ixnajunch ju ixchivinti Dios ju istsꞌokcanta makꞌanchich.
Ma tas anchach ju catsucuyanta ju Cristo ju anuꞌ ju ixnoncan ni camalakachatachilh ju Dios.
5 Chai ju yuꞌunch tajunilh:
―Pus ju yuchi catsucuyanta ju lakꞌachakꞌan Belén laxaꞌestado Judea.
Icpunonau chunch ni chanich ju xanajun pumatam makꞌaniya ixlapanac Dios laꞌisꞌatsꞌoknut:
6 Jantu lai actinaulh ni va palai jantu tuꞌuꞌ ju ixtapalhni ju lakꞌachakꞌan Belén laxaꞌestado Judea.
Palai tuꞌuꞌ ju aliꞌin lakꞌachakꞌan ju ani lacatꞌun.
Jantu lai chun actinaulh ni anchach ju catsucuyanta pumatam kꞌai ucxtin.
Chai yuchi ju calhistꞌacꞌaꞌ ju israelitanin ju ixlapanacni Dios tajunita.
Chunch ma naulh ju ixlapanac Dios.
7 Pus ju acsnich ju Herodes sekch alactꞌasanilh ju anuch lapanacni ju ixtalhatalaninin ju stꞌacu.
Va iscꞌatsaputun ju ixtavasalanti tavananch ju tasulh ju anuꞌ stꞌacu.
8 Chai acsni cꞌatsa pus amalakachalh ju lakꞌachakꞌan Belén chai ajuni:
―Inchitꞌit puxconin anch ju askꞌatꞌa.
Chai acsni alhitꞌaꞌuyaꞌitꞌit pus aquiminau lajuninin.
Acꞌananta vachuꞌ lakꞌayanaꞌ.
9 Pus ju yuꞌunch takꞌasmatnilh ju gobernador chai taꞌalh.
Chai acsni taꞌalh ju lacati pus apꞌulhnilh ju anuꞌ stꞌacu ju ixtalaktsꞌintacha laꞌixtꞌunꞌan.
Apꞌulanalh tus acsni chaꞌalh junta ixtanun ju askꞌatꞌa Jesús.
Chai anchach ju astacnalh.
10 Pus ju anuch lapanacni ni talaktsꞌilh ju stꞌacu pus na takꞌachalh.
11 Chai acsni tatanu lacachakaꞌ talaktsꞌilh ju askꞌatꞌa chai ixnati ju Malia ixjuncan.
Pus tataꞌaktsokotanilh chai talakꞌayalh.
Chai tapaxkꞌotlh ju ixtalhiminta chai taxtaknilh ju lhakꞌailaktsꞌin ju oro chai ju pum chai ju xakꞌalhchꞌat lakatam qꞌuiu ju na cꞌus acamin.
12 Chai acsni taꞌanchokolh laꞌixtꞌunꞌan kꞌankꞌatam ti tapuꞌanchokolh.
Chunch ju talalh ni Dios xaꞌajuni laꞌixꞌaklakꞌavantiꞌan ni jantu catalakꞌanchokolh ju Herodes.
Tataxtulh ju José chai ju Malia. Taꞌalh ju xalacatꞌun Egipto
13 Astan acsni ixtaꞌanchokota laꞌixtꞌunꞌan ju anuch lapanacni pus pumatam anquilh talacasunilh ju José laꞌilhtatat chai juni:
―Akꞌostꞌaꞌulh.
Alhipꞌinchich ju askꞌatꞌa chai ixnati ju xalacatꞌun Egipto.
Chai anchach ju atꞌolhchitꞌit tus va acxakꞌalachokoyan.
Apꞌinchitꞌit anch ni calhinonaꞌ ixpuxcajuca ju askꞌatꞌa ju Herodes ni va makniputunch.
14 Pus ju José lana kꞌostavilh.
Lhiꞌalh ju askꞌatꞌa Jesús chai ixnati ju anuch atatsꞌisni.
Taꞌalh ju xalacatꞌun Egipto.
15 Chai tatolhcha anch tus acsni va nilh ju Herodes.
Chai ni chunch ju talalh pus uctaxtulh tuchi ixnajuntach ju makꞌanch ju ixlapanac Dios junta ma chani xanajun:
“Laxalacatꞌun Egipto ictꞌasanilh ju quintsꞌalh”.
Ju gobernador Herodes lhinaulh ixmaknica ju tsꞌalan
16 Pus ju Herodes acsni machakxa ni va taꞌokxchokꞌolh ju anuch lapanacni pus slivasalh na talhkꞌamalh.
Chai lhinaulh ixmaknica tachi chun ju tsꞌalan ju ixꞌalin ju lakꞌachakꞌan Belén chai chux ju aliꞌ lakꞌachakꞌanixni junta vanin ixjunita.
Amaknikꞌo tachi chun ju ixtapacxanta lakatꞌiyun cꞌata chai ju palaicaꞌ lactꞌicstꞌin.
Ixnajun ni caꞌamaknich ju aliꞌin pus tapꞌastu vachuꞌ camakniyaꞌ ju Jesús.
17 Chai ni chunch ju lalh ju Herodes pus uctaxtulh tuchi ixnajunta makꞌanchich ju ixlapanac Dios ju Jeremías ixjuncan.
Ju yuchi ma chani naulh:
18 Ma kꞌasmatcancha ju lakꞌachakꞌan Ramá ju na talactꞌasai.
Ma na lackꞌalhuncan chai slivasalh lactꞌasacan.
Ma tachi ju vasalh yuchi ju Raquel ju kꞌalhun.
Ma va alhikꞌalhun ju istsꞌalan.
Chai ma jantu xamatiꞌ lai amatanꞌulani ixꞌalhunutꞌan ni amaknikꞌocalh ju istsꞌalan.
Chunch ju ma naulh ju Jeremías.
19 Pus acsni nilh ju Herodes pus talacasunichokolh ju anquilh ju José laꞌilhtatat acsni ixvilhchacaꞌ ju lakꞌachakꞌan Egipto chai chani juni:
20 ―Alacꞌatꞌayatꞌich.
Alhipꞌinchꞌokꞌochich ju askꞌatꞌa chai ixnati ju laꞌixtꞌunꞌan ju mintꞌaꞌisraelitanin.
Laich apꞌinchꞌokꞌoyaꞌitꞌit ju chavai ni tanitach ju ixtamakniputun ju askꞌatꞌa.
21 Pus ju José lacataya chai lhiꞌalh ju askꞌatꞌa chai ixnati ju laꞌixtꞌunꞌan ju istꞌaꞌisraelitanin.
22 Para na talhanalh acsni kꞌasmatlh ni Arquelao gobernador va laxaꞌestado Judea acsni nilh ju ixpai ju Herodes ixjuncan.
Pus jantu ixꞌamputun ju anch.
Chai ni junilh ju Dios laꞌilhtatat ni caꞌalh ju xaꞌestado Galilea pus anch ju alaclhiꞌalh ju askꞌatꞌa chai ixnati.
23 Chai acsni tachaꞌalh pus tatsucucha ju lakꞌachakꞌan Nazaret.
Chai ni anch ju taꞌalh pus uctaxtulh tuchi ixtanajunta ju makꞌaniya ixlapanacni Dios acsni tanaulh ni amachakaꞌ Nazaret cajunaꞌ ju Cristo.