Ju Jesús lokꞌonchokolh
28
Pus acsni tapasalh ju anuꞌ avilhchan paꞌastacni chai ixtꞌajun tuncuntilanaꞌ ju lhitumincu pus ju Malia amachakaꞌ Magdala chai ju kꞌantam Malia taꞌalh laktsꞌinin junta ixmacnucanta ju Jesús.
2 Pus na pꞌas tataclh ju lacatꞌun.
Chai ixꞌanquilh ju Dios mincha lactꞌiyan chai makꞌosulh ju chiux ju xamalhtich ixjunita junta ixꞌacnui ju Jesús.
Chai ucxtavilh ju chiux.
3 Pus chunch istasui tachi ju tuꞌuꞌ makꞌalipniꞌ.
Chai ju ixpumpuꞌ slivasalh xnapapa ixjunita tachi ju tuꞌuꞌ miqui.
4 Chai ju taropajni acsni talaktsꞌilh slivasalh na tatalhanalh tus taꞌaxqꞌuipꞌipꞌitnikꞌo.
Chai lana tatatistꞌalh tachi ju va tanilh.
5 Pus ju acsnich ju anquilh axakꞌala ju chakolun chai alacjuni:
―Jantu atꞌalhanantꞌit ju uxijnan.
Iccꞌatsai ni Jesús ju pꞌuxcꞌoyatꞌit ju maquilhtacalh lacacurus.
6 Para jantu ani vi.
Lokꞌonchokotach tachi ju ixnajun.
Atꞌatꞌit.
Alaktsꞌintꞌit junta ixmacnucanta ju ixlacatuna.
7 Chai ju chavai ni cꞌatsꞌayatꞌit ni vasalh lokꞌonchokota pus vatsꞌalhti aꞌinchitꞌit ajuninin ju ixꞌamamakaꞌui ni lokꞌonchokotach ju yuchi mas ixnita.
Vachuꞌ aꞌunaꞌitꞌit ni pꞌulhnan caꞌananta ju xaꞌestado Galilea ju Jesús.
Anchach ju catapacxantachan tus achꞌipꞌinaꞌitꞌit vachuꞌ.
Anchach ju alaktsꞌintꞌachitꞌit.
Yuchach ju iclajunau.
8 Pus ju acsnich ju anuꞌ chakolun tataspꞌitchokocha junta ixmacnucanta ju Jesús.
Na ixtatalhananta ni ixtalaktsꞌinta ju anquilhnin.
Para na ixtakꞌachanch ni tacꞌatsa ni lokꞌonchokotach ju Jesús.
Pus taꞌatsꞌalaꞌalh ajuninin ixꞌamamakaꞌui ju Jesús ni lokꞌonchokota ju yuchi.
9 Para acsni ixtaꞌantacaꞌ ju lacati pus ju Jesús alacpakxtoklh.
Amacꞌami.
Pus ju yuꞌunch lana talakꞌalh chai tachꞌanlakatanu.
Talakꞌaya.
10 Chai ju Jesús alacjuni:
―Jantu atꞌalhanantꞌit.
Aꞌinchitꞌit ajuninin ju quiꞌalakꞌavin ni chach taꞌancha ju xaꞌestado Galilea chai anchach ju aquintalaktsꞌinanta.
Ju taropajni tanaulh ju taꞌaklhtamat ixlacata ju Jesús
11 Chai acsni ixtaꞌanchokota ju lakꞌachakꞌan ju chakolun pus ju aliꞌin sia yuꞌunch ju taropajni ju ixtalhistacni junta ixꞌacnui ju Jesús taꞌalh vachuꞌ ju lakꞌachakꞌan.
Lana taquimacꞌatsani ju xalackꞌajin palijni tachi chun ju taxtokni ju ixtalaktsꞌinta.
12 Pus ju yuꞌunch lana tamakꞌaixtokli chux ju xapapanin israelitanin.
Chai yuꞌunchach ju tatꞌatakꞌoxilh ju chivinti ju taropajni.
Chai na laklhu ju axtaknicalh ju taropajni.
13 Chai chani ajunicalh:
―Anaꞌuntꞌit ni va taquilalh ju tsꞌis ju ixꞌamamakaꞌui ju Jesús chai taquikꞌalhaulh ju ixlacatuna acsni na ilhtꞌatꞌayatꞌit ju uxijnan.
14 Chai ni va catamucꞌaniputunan ju mintalakꞌalhinꞌan ju gobernador ni va ilhtꞌatꞌayatꞌit pus ju quijnan actꞌachivinau ju yuchi chai jantu tuꞌuꞌ catanaviyan.
15 Pus ju taropajni taꞌamaklhtayanalh ju tumin chai chunch ju tajunilh ju lapanacni tachi ju ixꞌalhimapꞌaksicanta.
Chai tus chavai ju israelitanin tanajun ni vasalh chunch ju tapasalh.
Ju Jesús amalakacha ju ixꞌamamakaꞌui
16 Pus ju ixpumacautamꞌan ixꞌamamakaꞌui ju Jesús taꞌalh ju xaꞌestado Galilea.
Taꞌalh ju anuꞌ akstijun junta ixꞌalhimapꞌaksita ju Jesús ni catachaꞌalh.
17 Chai anchach ju atalacꞌasunilh ju Jesús.
Chai ju yuꞌunch acsni talaktsꞌilh talakꞌaya.
Para ju aliꞌin jantu lai ixtalacaꞌi ni vasalh yuchi cava.
18 Pus ju acsnich ju Jesús alakmilh chai axakꞌala.
Alacjuni:
―Iclhinajun ju quitꞌin ju lactꞌiyan chai ju ani lacatꞌun.
19 Pus yuchi iclalhijunau ni apꞌitꞌit ajuninin tachi chun ju lapanacni ixlhilacaputsꞌun ju lacamunutpaꞌ ju chivinti ju quilacata.
Chach vachuꞌ quintachꞌakꞌokꞌalh ju yuꞌunch.
Chai amakpꞌaxayaꞌitꞌit laꞌixtapakaꞌut ju quimpai chai laquintapakaꞌut ju istsꞌalh icjunita chai laꞌixtapakaꞌut ju Spiritu Santu.
20 Chai amasuniyaꞌitꞌit ni catamuctaxtuyaꞌ tachi chun ju chivinti ju iclajuntau ju uxijnan.
Chai ju quitꞌin iclatꞌavilau ju uxijnan chux avilhchan tus laꞌixꞌaclanti ju lacamunutpaꞌ.
Slivasalh chun tachi ju iclajunau.