Ju Xivan amalani ju lapanacni
3
Acsni ixtailhiꞌanta ju lakacauquisi cꞌata laꞌixpuꞌucxtin ju Tiberio ju xakꞌai tucan ixjunita pus Poncio Pilato gobernador ixjuntacha ju xaꞌestado Judea.
Chai ju Herodes ixlhinajun ju xaꞌestado Galilea.
Chai ixlakꞌau ju Herodes ju Pilipe ixjuncan yuchi ju gobernador ixjuntacha ju xalacatꞌun Iturea chai ju lacatꞌun Traconite.
Chai ju Lisanias gobernador ixjuntacha ju xalacatꞌun Abilinia.
Lucas 3.1-4.13
2 Chai ju Anás chai ju Caifás yuꞌunch ju xalackꞌajin palijni ixtajunita.
Pus acsni ixtatꞌajun ju ani xalackꞌajin chai ju ani palijni pus acsnich ju xakꞌala ju Dios ju Xivan junta ixvilhcha junta va aseknicꞌa.
Yuchi ju Xivan ju istsꞌalh Zacarías ixjunita.
3 Pus ju yuchi ucsuntsuculh chux ju xalacatꞌun laꞌixquilhtuꞌ ju kꞌai xcan Jordán.
Ixꞌajuni ju lapanacni ni catamacaulh ju ixꞌalactuꞌuntiꞌan chai cataꞌakpaxlh.
Chai ju chunch ju Dios caꞌamacꞌacxaniyaꞌ ixꞌalactuꞌuntiꞌan.
4 Chai acsni chunch ju lalh ju Xivan pus uctaxtulh ju ixchivinti ju Isaías ju makꞌaniya lapanacni ixjunita.
Pus ju yuchi ixnajun ixchivinti Dios chai chani ju xatsꞌokꞌulai:
Pꞌas chivinin pumatam junta aseknicꞌa junita.
Chai chani najun:
“Alakꞌoxitꞌit ju miꞌalhunutꞌan ni caminaꞌ ju ucxtin.
Alasoknicꞌatꞌit ju miꞌatsucuntiꞌan junta jantu sok junita.
5 Tachi chun ju tacꞌacxniyan laꞌixmacni Dios ma axtꞌaknicꞌanaꞌitꞌit.
Chai tachi chun ju tuꞌuꞌ kꞌai u ju tuꞌuꞌ mas va lacatꞌicstꞌi ju tasastucniyan lamiꞌatsucuntiꞌan ma amakꞌosunicꞌanaꞌitꞌit.
Chai tachi chun ju jantu soknicꞌa lamiꞌatsucuntiꞌan ma alasoknicꞌanaꞌitꞌit.
Chai tachi chun ju macxcai ju alincaꞌ laꞌisꞌatsucuntiꞌan ju talhilacaꞌanta ju Jesús ma camakꞌosunicanaꞌ.
6 Chai tachi chun ju lapanacni ma catalaktsꞌinaꞌ ju macaminta ju Dios ni laich catatakꞌalhtaxtuyaꞌ ju yuꞌunch”.
Chunch ju naulh ju makꞌaniya lapanac ju Isaías ixjuncan.
7 Pus ju Xivan chani ixꞌajuni ju lapanacni ju ixtalakmin ni va ixtaꞌakpaxputun laꞌixmacni ju yuchi:
―Chunch ju lapꞌutꞌunatꞌit tachi ju tuꞌuꞌ lu.
Ju yuchi va acsnich ju atsꞌalai acsni xavacan ju achꞌitin junta tꞌajun.
Pus vachuꞌ chun ju lapꞌutꞌunatꞌit ju uxijnan.
Va acsnich ju tamch pꞌastꞌacpꞌutꞌunatꞌit ni xakꞌasmatꞌatꞌit ni catamamakꞌalhkꞌajniyan ju Dios.
Tis chavaich ju xatajunan ni anaviyaꞌitꞌit tuꞌuꞌ ni jantu catamamakꞌalhkꞌajniyan ju Dios acsni cachinaꞌ ju anuꞌ avilhchan.
8 Pus ni vasalh tꞌakꞌalhtꞌaxtꞌupꞌutꞌunatꞌit pus amalacꞌasutꞌit lamiꞌatsucuntiꞌan ni macꞌontꞌatꞌit ju miꞌalactuꞌuntiꞌan.
Chai jantuch va kꞌaya anaꞌuntꞌit ju lamiꞌalhunutꞌan ni laich atꞌakꞌalhtꞌaxtꞌuyaꞌitꞌit va ixlacaꞌatalh ni makꞌaniya ixꞌapapanatnich Abraham untꞌatꞌit.
Jantu chun anaꞌuntꞌit ni iclajunau ni va ixlacasqꞌuilh ju Dios ni lhu caꞌalilh ixꞌapapanatnich ju Abraham pus laich caꞌixmalokꞌoni ju ani ma chiux ni caꞌixtava ixꞌapapanatnich ju Abraham.
9 Chai mas chavai va lacatsꞌunin ticꞌacx tus caꞌamamakꞌalhkꞌajniyaꞌ ju lapanacni ju Dios.
Chai tachi chun ju lapanacni ju jantu tasui laꞌisꞌatsucuntiꞌan ni vasalh tamacajunta ju ixꞌalactuꞌuntiꞌan pus caꞌamamakꞌalhkꞌajnicanaꞌ.
10 Pus ju acsnich ju lapanacni tasacmi.
Chani tajuni:
―Ni vasalh tachi ju quilajunau pus tijuch ju acnaviyau.
11 Chai ju Xivan akꞌalhtailh.
Chani ajuni:
―Pus ju alin kꞌalhtꞌui ixpumpuꞌ chach xtaknilh ju matiꞌ ixpumpuꞌ.
Chai ju alin ixvaiti pus vana caxtaknilh lacatsꞌunin ju matiꞌ tuꞌuꞌ ju caꞌulh.
12 Pus vachuꞌ talakmilh ju Xivan ju achꞌinin.
Vachuꞌ va ixtaꞌakpaxputun.
Chai tajuni:
―Amamakaꞌunuꞌ tijuch ju acnaviyau ju quijnan ni jantu acmamakꞌalhkꞌajnicanau.
13 Chai ju Xivan ajuni:
―Jantu na laklhu achꞌinintꞌit tachi ju jantu lhijun ju lacalhamapꞌaksin.
14 Chai taꞌasacminin vachuꞌ ju taropajni.
Tajuni:
―Chai ju quijnan tijuch ju acnaviyau.
Chai ju Xivan ajuni:
―Jantu xamatiꞌ alhimacchꞌapꞌutꞌit va ixmaxtunica ju ixtumin.
Nin yuchi ni va kꞌaya amucꞌanitꞌit ixtalakꞌalhin tam xamatiꞌ ni va maxtꞌupꞌutꞌunatꞌit ixtumin.
Alhikꞌachꞌantꞌit tachi ju mapꞌalhcꞌantꞌit.
15 Pus ju lapanacni na ixtamakpacxan ju ixnoncan camalakachatachilh ju Dios.
Chai ixtanajun laꞌixꞌalhunutꞌan:
“Tsꞌa ma yuchi ju Cristo ju Xivan.
Yuchach ju caminaꞌ noncan”.
16 Para ju Xivan ajuni:
―Ju quitꞌin islivasalh ni va lacaxcan ju iclamakpaxayau ni catacꞌatsayaꞌ ju lapanacni ni macꞌontꞌatꞌit ju macxcai.
Para mintachalhcaꞌ ju palai xakꞌai.
Palai jantu ju quitꞌin.
Pus ju quitꞌin jantu tuꞌuꞌ ju quintapalhni.
Jantu lai actichꞌanxkꞌotlh nin mas va yuchi ju samusni ixchꞌanxtꞌakꞌan.
Pus ju yuchi acsni cachinaꞌ cataxtakniyan ju stavasalanti amakpaxanti.
Yuchi ju Spiritu Santu ju catanuyaꞌ lamiꞌalhunutꞌan chai cataxacaniyan chux ju macxcai chai salaka catanaviyan tachi ju lai ju tuꞌuꞌ jipi ni xavakꞌojui tachi chun ju amacxtalh.
17 Chai ju anuꞌ ju caminaꞌ chunch ju caꞌulhtuyaꞌ ju lapanacni tachi ju lai tam lapanac ju lacsunui ju iscebada.
Ju yuchi chꞌapai ju ixpalacsunun laꞌixmacaꞌ chai acsni patajui ju cebada pus ju xaꞌamacxtalh lacatamch tamai.
Chai astan ju amanavin makꞌai ju xacebada laꞌixpacꞌatsꞌa para alacxavai ju xaꞌamacxtalh.
Chai ju chunch salaka jun ju ixchakaꞌ.
Pus vana va chun calayaꞌ ju anuꞌ ju caminaꞌ.
Camakꞌalhtaxtuyaꞌ ju lapanacni ju vasalh talhilacaꞌanta ju yuchi.
Para ju jantu pus camacaꞌancanaꞌ lacajipi junta jantu tavanan lai mamixican.
18 Para jantu va yuchi ni xalakꞌakꞌaimai ju lapanacni ju Xivan.
Para vachuꞌ na tijlhu amapꞌaksinti ju xaꞌaxtakni ju lapanacni chai alacjuni ju yuꞌunch ta yu laich cataputakꞌalhtaxtuyaꞌ.
19 Chai vachuꞌ lakꞌakꞌaima ju gobernador ju Herodes ixjuncan.
Kꞌailh ni ixꞌamachakach navichokolh ju ixꞌamachakaꞌ ixjunita ju ispꞌisekꞌe ju Pilipe ixjuncan.
Pus ju anuꞌ chakoꞌulh Herodías ixjuncan.
Vachuꞌ lhikꞌailh ixlacata tachi chun aliꞌ talakꞌalhin ju ixnavita ju Herodes.
20 Chai ju Herodes palai lalhava ju ixtalakꞌalhin acsni tꞌalhnu ju Xivan.
Makpaxacalh ju Jesús
21 Pus acsni ixꞌamakpaxai ju lapanacni ju Xivan pus vachuꞌ ju Jesús akpaxlh.
Chai acsni ixtꞌachivinin ju Dios ju Jesús pus lana talhtꞌekꞌa ju lactꞌiyan.
22 Chai lana lakmilh ju Spiritu Santu tachi ju tuꞌuꞌ lakꞌaxkꞌavan.
Chai lana chivincancha ju lactꞌiyan chai kꞌasmatcalh ju lacatꞌun junta chani junicalh ju Jesús:
―Ju uxintꞌi quintsꞌalhꞌat.
Chai na icmapainiyan.
Na iclhikꞌachan ju uxintꞌi.
Ju makꞌaniya ixlacpai ju Jesús
23 Ju Jesús acsni tavanan taiꞌula ju ixlhichꞌalhcat ixpacxanta tachi lakapꞌuxamcau cꞌata.
Chai ixtalhimispaich tachi ju va istsꞌalh ixjunita ju José.
Pus ju José istsꞌalh ixjunita ju Elí.
24 Chai ju ixpai ju Elí ixjuncan Matat.
Chai ju ixpai Matat ixjuncan Leví.
Chai ixpai ju Leví ixjuncan Melqui.
Chai ju ixpai ju Melqui ixjuncan Jana.
Chai ju ixpai ju Jana ixjuncan José.
25 Chai ixpai ju José ixjuncan Matatías.
Chai ixpai ju Matatías ixjuncan Amós.
Chai ixpai ju Amós ixjuncan Nahum.
Chai ixpai ju Nahun ixjuncan Esli.
Chai ixpai ju Esli ixjuncan Nagai.
26 Chai ixpai ju Nagai ixjuncan Maat.
Chai ixpai ju Maat ixjuncan Matatías.
Chai ixpai ju Matatías ixjuncan Semei.
Chai ixpai ju Semei ixjuncan José.
Chai ixpai ju José ixjuncan Judá.
27 Chai ixpai ju Judá ixjuncan Joana.
Chai ixpai ju Joana ixjuncan Resa.
Chai ixpai ju Resa ixjuncan Zorobabel.
Chai ixpai ju Zorobabel ixjuncan Salatiel.
Chai ju ixpai ju Salatiel ixjuncan Neri.
28 Chai ixpai ju Neri ixjuncan Melqui.
Chai ixpai ju Melqui ixjuncan Adi.
Chai ixpai ju Adi ixjuncan Cosam.
Chai ju ixpai ju Cosam ixjuncan Elmodam.
Chai ixpai ju Elmodam ixjuncan Er.
29 Chai ixpai ju Er ixjuncan Josué.
Chai ixpai ju Josué ixjuncan Eliezer.
Chai ixpai ju Eliezer ixjuncan Jorim.
Chai ixpai ju Jorim ixjuncan Matat.
30 Chai ixpai ju Matat ixjuncan Leví.
Chai ixpai ju Leví ixjuncan Simeón.
Chai ixpai ju Simeón ixjuncan Judá.
Chai ixpai ju Judá ixjuncan José.
Chai ixpai ju José ixjuncan Jonán.
Chai ixpai ju Jonán ixjuncan Eliaquim.
31 Chai ixpai ju Eliaquim ixjuncan Melea.
Chai ixpai ju Melea ixjuncan Mainán.
Chai ixpai ju Mainán ixjuncan Matata.
Chai ixpai ju Matata ixjuncan Natán.
32 Chai ixpai ju Natán ixjuncan David.
Chai ixpai ju David ixjuncan Isaí.
Chai ixpai ju Isaí ixjuncan Obed.
Chai ixpai ju Obed ixjuncan Booz.
Chai ixpai ju Booz ixjuncan Salmón.
Chai ixpai ju Salmón ixjuncan Naasón.
33 Chai ixpai ju Naasón ixjuncan Aminadab.
Chai ixpai ju Aminadab ixjuncan Aram.
Chai ixpai ju Aram ixjuncan Esrom.
Chai ixpai ju Esrom ixjuncan Fares.
Chai ixpai ju Fares ixjuncan Judá.
34 Chai ixpai ju Judá ixjuncan Jacob.
Chai ju ixpai ju Jacob ixjuncan Isaac.
Chai ixpai ju Isaac ixjuncan Abraham.
Chai ixpai ju Abraham ixjuncan Taré.
Chai ju ixpai ju Taré ixjuncan Nacor.
35 Chai ixpai ju Nacor ixjuncan Serug.
Chai ixpai ju Serug ixjuncan Ragau.
Chai ixpai ju Ragau ixjuncan Peleg.
Chai ixpai ju Peleg ixjuncan Heber.
Chai ixpai ju Heber ixjuncan Sala.
36 Chai ixpai ju Sala ixjuncan Cainán.
Chai ixpai ju Cainán ixjuncan Arfaxad.
Chai ixpai ju Arfaxad ixjuncan Sem.
Chai ixpai ju Sem ixjuncan Noé.
Chai ixpai ju Noé ixjuncan Lamec.
37 Chai ixpai ju Lamec ixjuncan Matusalén.
Chai ixpai ju Matusalén ixjuncan Enoc.
Chai ixpai ju Enoc ixjuncan Jared.
Chai ixpai ju Jared ixjuncan Mahalaleel.
Chai ixpai ju Mahalaleel ixjuncan Cainán.
38 Chai ixpai ju Cainán ixjuncan Enós.
Chai ixpai ju Enós ixjuncan Set.
Chai ixpai ju Set ixjuncan Adán.
Chai ju Adán yuchi ju Dios ixpai junita.