Ju Jesús taꞌacxtuchokolh
16
Acsni tapasalh ju avilhchan paꞌastacni pus ju Malia amachakaꞌ Magdala chai ju Salomé chai ju Malia ixnati ju Jacobo tatamaulh ju tuꞌuꞌ achꞌitin ju na cꞌus acamin.
Va ixtalacamucꞌaputun ju ixlacatuna ju lijunto Jesús ni chunch ixtalhilanita.
Marcos 16:1-20
2 Pus vatsꞌisin ju lhitumincu acsni ixtꞌonachilh xajchiniꞌ ju avilhchan ju yuꞌunch tachaꞌalh junta ixmacnucanta ju lijunto Jesús.
3 Ixtalaclajuni ixlhiꞌakstuꞌan acsni ixtaminta ju lacati:
―Tis chavaich ju aquintamakꞌosunin ju kꞌai chiux ju quicyocanta junta acnui ju lijunto.
4 Para acsni talacaꞌalh talaktsꞌilh ju chiux ni makꞌosucanta.
Chai ju anuꞌ chiux na kꞌai ixjunita.
5 Chai acsni tatanu junta ixmacnucanta ju ixlacatuna ju Jesús pus talaktsꞌilh pumatam tsꞌalh.
Ju yuchi ixvi laꞌixlhicanaꞌan junta ixtayanalh ju chakolun.
Chai ixmakꞌanchꞌita lhman pumpuꞌ ju na xnapapa ixjunita.
Pus ju chakolun na tatalhonilh.
6 Para ju yuchi alacjuni:
―Jantu atꞌalhanantꞌit.
Ju uxijnan pꞌuxcꞌoyatꞌit ju Jesús amachakaꞌ Nazaret ju maquilhtacalh lacacurus.
Pus taꞌacxtuchokolh.
Jantu ani vi.
Alaktsꞌintꞌit junta ixmamacanta ju ixlacatuna.
7 Pus aꞌinchꞌokꞌochitꞌit.
Aꞌunaꞌitꞌit ju Pitaluꞌ chai ju aliꞌin ixꞌalacmamakaꞌui ju Jesús ni capꞌulhꞌanach ju Jesús ju laxaꞌestado Galilea.
Astan apꞌinaꞌitꞌit ju uxijnan chai anchach ju alaktsꞌintꞌachitꞌit tachi ju xatajunan acsni tucaꞌ ixmaknican.
8 Pus ju yuꞌunch taꞌatsꞌalataxtulh junta ixmacnucanta ixlacatuna ju Jesús acsni tucaꞌ ixlokꞌonchokota.
Na ixtaꞌaxqꞌuipꞌipꞌitnintach ni na ixtatalhanan.
Chai jantu tuꞌuꞌ xatajuni xamatiꞌ ni va ixtatalhananch.
Ju Jesús talacasunilh ju Malia amachakaꞌ Magdala
9 Pus ju Jesús na vatsꞌisin lhitumincu ju taꞌacxtuchokolh junta ixmakꞌacanta.
Pus talacasunilh pꞌulhnan ju Malia amachakaꞌ Magdala.
Yuchi ju ixmaxtunicanta pumatujun lhacaticurulhni laꞌixlacatuna.
10 Chai ju yuchi alh amacꞌatsaniniꞌ ju ixꞌalactꞌaꞌucxuntꞌajun ju Jesús acsni tucaꞌ ixmaknican.
Pus ju yuꞌunch na va ixtalacꞌamakꞌaninin chai na ixtalackꞌalhuvilanalh.
11 Para mas takꞌasmatlh ni taꞌacxtuchokolh ju Jesús chai tꞌajun ju chavai chai ni ixlaktsꞌintach ju yuchi ju Malia para jantu lai ixtalacaꞌi.
Ju Jesús atalacasunilh ixpumatꞌuiꞌan ixꞌalacmamakaꞌui
12 Ju astanch ju Jesús atalacasunilh ixtꞌiyunꞌan lapanacni acsni ixtaꞌalhtanaꞌanta ju lacati.
Para jantu chun ju atalacasunilh ju yuꞌunch tachi ju talacasunilh ju Malia.
13 Pus ju yuꞌunch taꞌanchokolh amacꞌatsaninin ju aliꞌin ixtꞌatamakaꞌui ju Jesús.
Para nin yuꞌunch jantu aquiclacaꞌicalh.
Ju Jesús amalakachalh ju ixꞌalacmamakaꞌui
14 Astan ju Jesús alactalacasunilh ixpumacautamꞌan acsni ixtatꞌajun venin.
Pus alhilakꞌakꞌaima ni na pꞌas ixjunita ixꞌalhunutꞌan chai lana jantu lai ixtalhilaksita ju ixchivinti ju ixꞌajunita acsni tucaꞌ ixmaknicanta.
Vachuꞌ alhilakꞌakꞌaima ni jantu tavanan ixtaquiclacaꞌita ju yuꞌunch ju ixtalaktsꞌinta ju Jesús acsni ixtaꞌacxtuchokota junta ixmacnucanta.
15 Vachuꞌ alacjunich:
―Apꞌinchitꞌit ixlhilacaputsꞌun ju lacamunutpaꞌ.
Aꞌunaꞌitꞌit chux ju lapanacni ta yu lai putakꞌalhtaxtucan ni jantu ancan ju lacajipi.
16 Ju calacaꞌiyaꞌ chai caꞌakpaxach catakꞌalhtaxtuyaꞌ.
Para ju jantu calacaꞌiyaꞌ camucꞌanikꞌalhicanaꞌ ju ixtalakꞌalhin.
17 Chai ju catalacaꞌiyaꞌ laich catanaviyaꞌ ju ani taxtokni ju capucꞌatsacanaꞌ ni vasalh quilapanacni tajunita.
Laquintapakaꞌut cataxcomaxtuyach ju lhacaticuru laꞌixlacatunaꞌan ju lapanacni.
Chai catachivinaꞌ ju tumpa chivinti ju jantu aktam tachivininta.
18 Chai ni cataꞌokspꞌalalacachꞌapalh ju lu u ni catakꞌotꞌaꞌ ju taxtokni ju va lhinican jantu tuꞌuꞌ catitapasayaꞌ.
Chai catamucꞌayaꞌ ixmacaꞌan laꞌixlacatunaꞌan ju takꞌankꞌanin chai palaich catanaviyaꞌ.
Ju Jesús alh lactꞌiyan
19 Astan acsni alactꞌachivinkꞌo ju ixꞌalacmamakaꞌui pus ju kꞌai ixꞌucxtinꞌan Jesús lana lhiꞌancalh tus lactꞌiyan chai tavi vanin junta vi ju Dios.
20 Pus ju ixꞌalacmamakaꞌui taꞌalh vanta anchach nonin ta yu laich putakꞌalhtaxtucan.
Chai isꞌakstu ixꞌucxtinꞌan Jesús ixꞌalactꞌachꞌalhcatnan.
Ju yuchi ixmavasalai ju chivinti ju ixtanajun ju ixꞌalacmamakaꞌui.
Ixpumavasalai lacakꞌai lhamakꞌan ju ixtanavi ju ixꞌalacmamakaꞌui.
Chunch vasalh ixlai.