JU TUCHI TANAVILH JU IXTAMALAKACHAN JU JESÚS
Ajunicalh ni caꞌaxtaknicanaꞌ ju Spiritu Santu
1
Ju anuꞌ alhiqui ju pꞌulhnan icꞌatsꞌoknulh ji Teófilo anch ju icnaulh tachi chun ju taxtokni ju ixnavich chai ju ixꞌamalaninin ju Jesús tus acsni taiꞌulatacha ju ixlhichꞌalhcat.
2 Chai chunch ju tailhiꞌalh tus acsnich avilhchan ju anchokolh ju lactꞌiyan.
Ni tucaꞌ ixꞌanchokoi ju lactꞌiyan axtaknilh ju ixlhamapꞌaksin laꞌixtachaput ju Spiritu Santu ju ixtamalakachan ju ixꞌalacsacxtutach.
3 Acsni nilh ju Jesús pus ju astan ju yuchi atalacasunichokolh xalakꞌajun ju ixtamalakachan.
Tꞌupꞌuxam avilhchan na paklhu ju talaktsꞌilh.
Chai chun ju aputalacasunilh ta yu laich catacꞌatsayaꞌ istavasalanti ni ixtꞌajun ju yuchi.
Chai ixꞌajunich ta yu lhinomputun ju Dios laꞌisꞌatsucuntiꞌan ju lapanacni.
4 Pus acsni va kꞌaixtam ixꞌalactꞌatavilhcaꞌ alacmapꞌaksi ni jantuch catataxtulh ju lakꞌachakꞌan Jerusalén para catapacxalh ju Spiritu Santu ju xanajun ju xapai ni caꞌamacaminiyach.
Chai vachuꞌ isꞌakstu ju Jesús ixꞌalacjuni ni caꞌaxtaknicanaꞌ ju anuꞌ Spiritu Santu.
5 Amapꞌastꞌacꞌani ju Jesús ni va lacaxcan xaꞌamakpaxanan ju Xivan.
Chai ajuni ni jantu lhu avilhchan ju ixticꞌacx tus cataꞌamaklhtayananaꞌ ju yuꞌunch ju Spiritu Santu tachi ju aliꞌin lapanacni ixtaꞌamaklhtayanan ju xcan acsni ixtaꞌakpax.
Ju Jesús anchokolh ju lactꞌiyan
6 Pus ju yuꞌunch ju ixꞌalactꞌatakꞌaixtokta ju Jesús taquilhasacmich.
Chanich tajuni:
―Quiꞌucxtin ja aquilaꞌaktaijuyau ju chavai ni laich calhinonchokopalau quiꞌakstuꞌan ju laquilacatꞌunꞌan ju quijnanꞌan ju israelitanin juntau.
7 Pus chanich alacjuni ju Jesús:
―Pus ju uxijnan jantu milhicꞌatsatꞌan tuchi ju catapasayaꞌ ju tamin cꞌata u tamin malhquiyuꞌ.
Va yuchi ju quimpaiꞌan Dios ju canonaꞌ tavananch ju catapasayaꞌ ju tuꞌuꞌ.
8 Para acꞌatsꞌatꞌit ju ani.
Catanuyaꞌ ju lamiꞌalhunutꞌan ju uxijnan ju Spiritu Santu chai ju yuchi cataꞌaktaijuyan ni jantu atꞌalhananaꞌitꞌit.
Chai uxijnan ju anonaꞌitꞌit ju quilacata ju lakꞌachakꞌan Jerusalén chai chux ju xaꞌestado Judea chai ju xaꞌestado Samaria chai chux ju lacamunutpaꞌ.
9 Acsni nonkꞌo junima chivinti ju Jesús pus talaktsꞌilh ju ixtamalakachan ni lhiꞌancalh lactꞌiyan.
Chai acsni tanulh ju lacaꞌataputsꞌi pus jantuch lai talaktsꞌilh aliꞌ.
10 Acsni istaskotutui ju lactꞌiyan ni ixꞌantacaꞌ ju Jesús pus pumatꞌui anquilhnin alactꞌatayalhch ju yuꞌunch.
Chai ju anuch ixpumatꞌuiꞌan ixtalakchꞌita xnapapa ixpumpuꞌan.
11 Chai chani tajuni ju ixtamalakachan ju Jesús:
―Ju uxijnan ji lapanacni amachakꞌan Galilea va kꞌaya skꞌotꞌutꞌuyatꞌitch ju lactꞌiyan.
Ju Jesús anchokolh junta vilhcha ju ixpai.
Para ju ani Jesús ju xaꞌanchokoi lactꞌiyan lamiꞌalacꞌavantiꞌan vana va chunch caminchokopalaꞌ tachi ju xalaktsꞌinatꞌit ni xaꞌan ju lactꞌiyan.
―Chunch ju ajunicalh ju ixtamalakachan ju Jesús.
Sacxtucalh ju Matías ni ixꞌokxtapalh cava ju Judas
12 Pus ju yuꞌunch lana tatakꞌalhtajulh ju anuꞌ akstijun junta ixchꞌancanta ju qꞌuiu ju olivo juncan.
Taꞌanchokolh ju lakꞌachakꞌan Jerusalén.
Pus ju anuꞌ akstijun vanin ixlhilaklacaꞌanita ju lakꞌachakꞌan Jerusalén.
Ixlhimakat tachi xaꞌalhtanti va tam pantsꞌiquis.
13 Acsni tatanucha ju lakꞌachakꞌan Jerusalén taꞌalh ju lacachakaꞌ chai tatocꞌalh ju ixlhitantalactꞌui junta ixtamatsꞌisqꞌuinta.
Ju taꞌalh yuchi ju Pitaluꞌ chai ju Jacobo chai Xivan,
Tilix,
Pilipe,
Tumax,
Bartolomé,
Mateo,
Jacobo istsꞌalh ju Alfeo,
Simón ju makyuꞌunch ixjunita ju cananistanin,
chai ju Judas ispꞌisekꞌe ju Jacobo.
14 Ixchuxꞌan va lakatam ixjunita ixꞌatalacpastꞌacꞌatꞌan chai va tachi ixtatꞌachivinin ju Dios.
Vachuꞌ ixꞌalactꞌavi aliꞌin chakolun chai ju Malia ixnati ju Jesús chai ixꞌapꞌisekꞌen ju Jesús.
15 Ju ixtatakꞌaixtokta ixtachaꞌanta tam cientos a pumapꞌuxam lapanacni.
Chai ju aktam acsni ixtatakꞌaixtokta pus ju Pitaluꞌ taya laꞌixlacaitat junta ixtavilanalh ju lhiꞌalakꞌavin chai chani ajuni:
16 ―Quiꞌalakꞌavin aktsꞌiya istasqꞌuini ni caꞌuctaxtulh tachi ju naulh ju Spiritu Santu laꞌixchivinti Dios ju tsꞌokcanta.
Ju yuchi juni ju David tuchi cajunaꞌ ixlacata ju Judas.
Yuchi ju apꞌulhnilh ju lapanacni ju taquichꞌapalh ju Jesús.
17 Ju Judas ixlhiputekꞌecantau ju quijnan chai kꞌaixtam ixtꞌachꞌalhcatnanau.
18 Para ju yuchi alactuꞌunulh chai laꞌixtalhaja ju ixꞌalactuꞌunti tamocalh lakatam lacatꞌun.
Pus ju Judas ankꞌapatajulh.
Lana pupaklh ju laꞌixpajan chai tachi chun ixpalu taxtunikꞌo.
19 Pus tacꞌatsakꞌo tachi chun ju amachakꞌan Jerusalén.
Chai ju anuch lacatꞌun tamapakaꞌulh laꞌixchivintiꞌan.
Tajunich Acéldama ni lhitamaꞌucalh laꞌixtapalh ixꞌacꞌalhni ju Jesús.
20 Pus chanich ju tsꞌokcanta laxaꞌalhiqui ju Salmos junta ma lhichivinincalh ju Judas:
Chach va isꞌakstu taya ju ixchakaꞌ chai jantu xamatiꞌ catsuculh ju anch.
Chunch ma najun.
Chai alacatam ma chani najun:
Chach tanuchokolh apumatam laꞌixlhichꞌalhcat.
Chunch ma najun junta tsꞌokcanta.
21 Pus ixlhiyuchi tasqꞌuini ni casacxtuyau pumatam ju ixꞌokxtapalh cajunaꞌ.
Casacxtuyau sia yuꞌunch ju kꞌaixtam xaquintatꞌaꞌalhtananan acsni ixtꞌajuncaꞌ ju quiꞌucxtinꞌan Jesús laquilhiquijnanꞌan.
22 Casacxtuyau sia yuꞌunch ju quintatꞌaꞌalhtanantan tus acsni ixꞌamakpaxanan ju Xivan tus acsnich avilhchan acsni amaklhtayananchokocalh ju Jesús ju lactꞌiyan laquiꞌalacꞌavantiꞌan.
Ju chunch ju yuchi vachuꞌ aquintatꞌanonan ni lokꞌonchokolh ju Jesús.
―Chunch ju naulh ju Pitaluꞌ.
23 Pus tasacxtulh pumatꞌui.
Pumatam ixjuncan José.
Ju yuchi vachuꞌ ixjuncan Barsabás chai Justo.
Ju apumatam ixjuncan Matías.
24 Chai tatꞌachivinilh ju Dios.
Chani tajunich:
―Quiꞌucxtin ju uxintꞌi ni lai laktsꞌinkꞌoꞌui ju lakatamin alhunut pus aquilamasuniuch tamalhch ju sacxtꞌutꞌach ju ani tayanalh pumatꞌui lapanacni.
25 Aquilamasuniuch tamalhch ju sacxtꞌutꞌach ju uxintꞌi ni mintamalakachan cava chai caꞌamaklhtayanalh ju laꞌixlhitai ixjunita ju Judas.
Ju Judas ni taxtulh ni va alactuꞌunulh chai ankꞌalhi ju lacajipi junta aktsꞌiya istasqꞌuini ni caꞌalh.
―Chunch ju tajuni ju Dios.
26 Pus taꞌulalh ixtapakaꞌutꞌan lacaꞌalhiqui chai tasacxtulh ju ixtapakaꞌut ju Matías.
Pus lhilaktsacalh pumacautꞌui ju ixtamalakachan ju Jesús.