Alakmilh ju lapanacni ju Spiritu Santu
2
Alin ixcꞌatanꞌan ju israelitanin ju Pentecostés juncan.
Pus acsni chilh ju anuch cꞌatan va chꞌanxtam ixtavilanalh ixchuxꞌan ju ixtalhilacaꞌanta ju Jesús.
2 Chai acsni talhicꞌatsanalh takꞌasmatlh tachi ju va pꞌas ixminta ju un.
Mincha lactꞌiyan chai kꞌasmatcalh chux ju lacachakaꞌ junta ixtavilanalh ju yuꞌunch.
3 Ju acsnich talaktsꞌilh lhu tuꞌuꞌ tachi ju jipi chai lhvakpitsilh chai tavilh laꞌixꞌucxni ixlacatunaꞌan ju pumatamin ixtavilanalh anch.
4 Chunch ju putanulh ju Spiritu Santu laꞌixꞌalhunutꞌan ni calhinonkꞌoyaꞌ laꞌisꞌatsucuntiꞌan.
Chai lana laich ixtachivinin ju chivinti tachi ju tachivinin aliꞌin lapanacni.
Chunch ju tachivinilh tachi ju ajuni ju Spiritu Santu.
5 Pus ju acsnich ju lakꞌachakꞌan Jerusalén ixtavilanalh ju israelitanin.
Ju yuꞌunch na ixtalhilacaꞌanta ju Dios.
Ixtataxtutacha tachi chun ju lacatꞌun ju alin ju ani lacamunutpaꞌ.
6 Chai acsni takꞌasmatlich ni na ixlacchivincanch pus tatakꞌaixtoklh lhu ju lapanacni chai na ixtalhamakꞌanininch ni ixtakꞌasmatꞌa ixchivinti pumatamin ju anch ixtavilanalh.
7 Chai va sekch tatavi.
Na ixtalhamakꞌaninin.
Ixtalaclajuni:
―Ja jantu si amachakꞌan Galilea ju yuꞌunch ju tatꞌajun chivinin.
8 Pus tas laich tanompalai tachi iclanitauch ju quilhitalactꞌicstꞌin quincꞌan.
9 Ju aliꞌin quijnan ni amachakꞌan Partia juntau chaich ju aliꞌin amachakꞌan Media,
amachakꞌan Elam,
amachakꞌan Mesopotamia,
amachakꞌan Judea,
amachakꞌan Capadocia,
amachakꞌan Ponto,
chai amachakꞌan Asia,
10 amachakꞌan Frigia chai amachakꞌan Panfilia chai amachakꞌan Egipto chai amachakꞌan ju xalacatꞌun Africa ju lhiꞌavinti vilhcha ju lakꞌachakꞌan Cirene.
Ju aliꞌin quijnan amachakꞌan Roma juntau chai sia quijnanꞌan alin ju quintꞌaꞌisraelitaninꞌan chaich vachuꞌ alin ju talhilacaꞌanta ju Dios tachi ju layau ju quijnanꞌan ju israelitanin juntau mas jantu israelitanin tajunita ju yuꞌunch.
11 Ju aliꞌin amachakꞌan Creta juntau chai amachakꞌan Arabia.
Ickꞌasmatꞌauch laquinchivinti quincꞌan ni navita ju Dios ju kꞌai lhamakꞌan.
―Chunch ju talaclajunich.
12 Chai ixchuxꞌan va sekch tatavi.
Jantu lai ixtamachakxai tis ixtalakxtuch ixtꞌajun tapasanaꞌ.
Ixtalaclajuni sia yuꞌunch:
―Tijuch nuꞌ ju nomputun ju ani.
13 Para ju aliꞌin lapanacni va ixtalhitsꞌiꞌinch.
Ixtanajun:
―Ju ani tayanalh lapanacni va talactꞌakꞌapꞌan.
Ju Pitaluꞌ axakꞌala ju ixtalhavat lapanacni
14 Pus ju acsnich ju Pitaluꞌ alactꞌataya ju ixpumacautamꞌan ixtamalakachan ju Jesús.
Chivinilh ju Pitaluꞌ chai chani alacjunich:
―Quintꞌaꞌisraelitanin chai tachi chun ju tꞌonatꞌit ju ani lakꞌachakꞌan Jerusalén aquilakꞌasmatniuch tuchi aclajunau chai amachꞌakxatꞌit.
15 Ju quijnan jantu ni va ictꞌakꞌapꞌatauch tachi ju nonatꞌit ju uxijnan ni va lakanajatsicaꞌ hora ju vatsꞌisin.
16 Para tachi ju tꞌajun tapasanaꞌ ju chavai va uctaxtui tachi ju naulh ju Joel ju makꞌaniya ixlapanac Dios ju ixnajun ju ixchivinti.
Ju yuchi ma chani naulh:
17 Ju Dios ma najun ni ma chanich cajunaꞌ ju avilhchan acsni caꞌaclayach ju lacamunutpaꞌ.
Ma caꞌaxtakniyaꞌ ju iSpiritu Santu tachi chun ju lapanacni chai ju mintsꞌalan chai ju miꞌatsiꞌin ma catanonach ixchivinti.
Chaich ju paitat lapanacnich ma tachi ju va laꞌixꞌaklakꞌavantiꞌan catalaktsꞌinaꞌ ju tuchi catapasayaꞌ.
Chai ju lackꞌajin jokꞌatni ma caꞌaxakꞌalacanaꞌ laꞌixꞌaklakꞌavantiꞌan.
18 Chai ju ixlapanacni ju Dios chai ju atsiꞌin ju tachꞌalhcatnan laꞌixmacni pus ju anuꞌ avilhchan ma caꞌaxtakniyaꞌ ju iSpiritu Santu chai ma catanonach ju ixchivinti.
19 Chai ju yuchi ju Dios ma camalacasuyach kꞌai lhamakꞌan ju lactꞌiyan.
Chai ju ani lacatꞌun ma caꞌalinaꞌ ju tuꞌuꞌ ju lai catapuꞌalacpastacnalh ju lapanacni.
Ma caꞌalinaꞌ ju lasat chai na lhu cataxtuyaꞌ ju acꞌalhni.
Chai ma caꞌalinaꞌ ju kꞌai jipi.
Chai ma caꞌalinaꞌ ju jin ju na kꞌalhtankꞌai cajunaꞌ tachi ju va ataputsꞌi.
20 Chai ju avilhchan ma va smalaka cajunaꞌ.
Chai ju malhquiyuꞌ ma catasuyach tachi ju va acꞌalhni ni na lapulh cajunaꞌ.
Ma chunch cajunaꞌ acsni cachaꞌamputunach ju anuꞌ avilhchan ju lhcaꞌulata ni caminchokoyaꞌ ju kꞌai ucxtin Dios.
Chai ju acsnich ma na kꞌai avilhchan cajunaꞌ.
Chai ma catasuyaꞌ ni yuchach ju avilhchan ju lhcata ju Dios.
21 Chai ma tachi chun ju catapaininiyaꞌ ju kꞌai ucxtin Dios ma catatakꞌalhtaxtuyach chai ma jantu catitaꞌalh ju lacajipi.
Ju Joel ma na makꞌanch ixnajun ni ma chunch ixnajun ju Dios.
22 Chai acsni nonkꞌo ju chunch ju Pitaluꞌ pus tailhiꞌalh ju ixchivinti.
Naulh:
―Pus aquilakꞌasmatniuch ji quintꞌaꞌisraelitanin.
Ju Dios tamalacasunitan ni laꞌixmacni yuchi xaminacha ju Jesús amachakaꞌ Nazaret.
Talhitalacasuninch ni anch ju xaminacha ni isꞌakstu Dios ju xtaknilh ixtachaput ju Jesús ni laich xanavi lamiꞌucxlacapuꞌan ju kꞌai lhamakꞌan chai ju taxtokni ju jantu xamatiꞌ apumatam lai navi chai ixnavi tuꞌuꞌ ju caꞌixtapucꞌatsa ju lapanacni ni vasalh Dios ju xamalakachayachilh.
Chai ju uxijnan kꞌoxich cꞌatsꞌayatꞌit tuchi ixnavich.
23 Para ju Dios aktsꞌiya ixlacasqꞌuin chai iscꞌatsai ta yu caꞌulhtucanaꞌ ju Jesús.
Pus ju yuchi lakꞌaꞌilh ni makꞌaxtakcalh ju Jesús lamimacaꞌan ju uxijnan.
Chai acsni tachꞌin tanavilh ju alactuꞌunin lapanacni pus uxijnan ju xanonatꞌit ni catamakni acsni tamaquilhta ju lacacurus.
24 Para ju Dios macxtuchokolh ju Jesús junta ixmacnucanta.
Makꞌostolachokolh acsni xani ni jantu lai catinikꞌalhi ju yuchi.
25 Pus jantu lai xanikꞌalhi ju Jesús ni tsꞌokꞌulacanta tuchi ixnajun ju yuchi.
Yuchi ju makꞌaniya ixlapanac Dios ju David ixjuncan ju xatsꞌokꞌulai ixchivinti ju Jesús.
Pus ju Jesús ma naulh:
Iccꞌatsai ni aktsꞌiya quintꞌavi ju quiꞌucxtin Dios.
Chai ni va tachi quiꞌaktaijui pus jantu tavanan actitalhanalh.
26 Pus ixlhiyuchi na ickꞌachan.
Chai laquinquilhni iclakꞌayai ju Dios.
Chai ju quilacatuna acsni camacnucanaꞌ lhikꞌach caꞌastacnanaꞌ ni iclhilaksich ju ixchivinti Dios.
27 Iclhilaksi ju Dios ni jantu tavanan camaconaꞌ ju quintacuvin junta taꞌan ju alasanin nin calacꞌasqꞌuinaꞌ ni capuchꞌilh ju quilacatuna ju quitꞌin ju quimalakachatachilh ju Dios.
28 Yuchi ju Dios ju aquixtaknichokoyaꞌ ju quiꞌatsucunti.
Chai slivasalh ackꞌachanaꞌ acsni laꞌixꞌucxlacapuꞌ actꞌatolaꞌ.
Chunch ju tsꞌokꞌula ju David ni ma chunch ju xanajun ju Jesús.
29 Pus ji quintꞌalapanacni aktsꞌiya cꞌatsacan ni nilh ju makꞌaniya quimpaiꞌan David chai macnucalh.
Chai tus chavai lai laktsꞌinau junta taꞌacnu.
30 Pus ju David ixnajun ixchivinti Dios chai iscꞌatsaich ni Dios ixmavasalanita ixchivinti ni laꞌixꞌamaskꞌatꞌanti caputasuyanta ju anuꞌ ju ixnoncan camalakachatachilh ju Dios.
Chai ju yuchi catolaꞌ laꞌixpuꞌucxtin ixjunita ju David.
31 Pus ju David acsni ixtꞌajuncaꞌ ixmacꞌatsanican ni cataꞌacxtuchokotachilh ju anuꞌ ju ixnoncan camalakachatachilh ju Dios.
Yuchi lhinaulh ni jantu tavanan camaconaꞌ ju ixtacuvin junta taꞌan ju alasanin nin capuchꞌiyaꞌ ju ixꞌacanit.
32 Pus ju lhichivinilh ju David yuchi ju Jesús ju malokꞌonichokolh ju Dios.
Chai chux ju quijnan iclaktsꞌiuch acsni ixmalokꞌonichokocantach.
33 Pus ju Dios lakꞌaya acsni ulalh vanin junta vi yuchi.
Chai ju Jesús amaklhtayanalh ju Spiritu Santu tachi ixjunitach ju Dios.
Chai quintamalakachanichin ju quijnan.
Chai tachi chun ju ani ju laktsꞌinatꞌit ju uxijnan chai tuchꞌi kꞌasmatꞌatꞌit si laꞌixtachaput ju anuꞌ Spiritu Santu ju navicanta.
34 Pus jantiyuꞌ ju David ju alh ju lactꞌiyan laꞌixlacatuna.
Para isꞌakstu ju David ma chani naulh:
Ju ucxtin Dios junilh ju quiꞌucxtin ni catavi vanin junta vi ju yuchi.
35 Anch ju catavi tus acsni catꞌalalhajayaꞌ ju ixtꞌalaxcai.
Ma chunch ju naulh ju David.
36 Pus acꞌatsꞌatꞌit ju ani tachi chun ju uxijnan ju quintꞌaꞌisraelitanin untꞌatꞌit.
Ju anuꞌ Jesús ju maknitꞌatꞌit lacacurus ju Dios kꞌai ucxtin xanavi.
Chai yuchach ju ixnoncan camalakachatachilh ju Dios.
―Pus chunch ju ajuni ju lapanacni ju Pitaluꞌ.
37 Pus ju lapanacni acsni takꞌasmatlh ju ixchivinti ju Pitaluꞌ na xcanilh ixꞌalhunutꞌan.
Chani tajuni ju Pitaluꞌ chaich ju aliꞌin ixtamalakachan ju Jesús:
―Quintꞌalapanacni tas calayauch ju chavai.
38 Pus ju Pitaluꞌ chani alacjuni:
―Amacꞌaꞌuntꞌit ju miꞌalactuꞌuntiꞌan pumatamin ju uxijnan chai aꞌakpꞌaxtꞌit laꞌixtapakaꞌut ju Jesús ju ixnoncan camalakachatachilh ju Dios.
Ju chunch ju Dios ma catamacꞌacxaniyan ju mintalakꞌalhinꞌan chai ma amaklhtꞌayananaꞌitꞌit ju Spiritu Santu ju cataxtakniyan ju Dios.
39 Pus ni chunch alatꞌit pus aktsꞌiya axtꞌaknicꞌanaꞌitꞌit ju Spiritu Santu.
Ju Dios xtakta ju ixchivinti ni ma cataxtakniyan ju uxijnan ju Spiritu Santu.
Ma vachuꞌ caꞌaxtakniyaꞌ ju miꞌaskꞌatꞌan chai tachi chun ju lapanacni mas vanta anchach catatsuculh.
Ma caꞌaxtakniyaꞌ tachi chun ju caꞌalactꞌasaniyaꞌ ju kꞌai ucxtin Dios.
―Pus ju Pitaluꞌ ajunich ju lapanacni ni ma chunch ju naulh ju Dios.
40 Chai na lhu chivinti ixꞌajuni chai ixꞌalhimapꞌaksich.
Chai ixꞌalacjuni:
―Chach tamakꞌalhtaxtuyan ju Dios lacamakꞌalhkꞌajnat ju caꞌaxtaknicanaꞌ ju lapanacni ju tatꞌajun ju chavai ju lana jantu sok ju isꞌatsucuntiꞌan.
―Chunch ju ajuni ju lapanacni ju Pitaluꞌ.
41 Pus tachi chun ju talacaꞌinilh ju ixchivinti ju Pitaluꞌ taꞌakpaxkꞌo.
Pus na tatalhavachokolh ju ixtalhilacaꞌanta ju Jesús.
Ju acsnich avilhchan tachi lakatꞌutu milh lapanacni talhilacaꞌalh ju Jesús.
42 Pus ju yuꞌunch talacaꞌikꞌo tuchi ixꞌajuni ju ixtamalakachan ju Jesús.
Chai sich lhilakꞌau ixtajunita.
Chai kꞌaixtam ixtaꞌui ju xkapavati ixpupastaccan ixꞌaninti ju Jesús.
Chai ixtatꞌachivinin ju Dios.
Chani ixjunita ju isꞌatsucuntiꞌan ju lapanacni ju pꞌulhnan talhilacaꞌalh ju Jesús
43 Chai ni na lhu lhamakꞌan ju ixtanavi laꞌixtachaput ju Dios ju ixtamalakachan ju Jesús chai ni ixtanavi ju tuꞌuꞌ ju catapuꞌalacpastacnalh ju lapanacni pus na tatalhanalh tachi chun ju lapanacni.
44 Chai tachi chun ju ixtalhilacaꞌanta ju Jesús slivasalh lhiꞌalakꞌavin ixtajunita.
Chai ju ixꞌalintaꞌan ixtamakpitsi sia yuꞌunchach tachi ixmaktasqꞌuini ju kꞌantam kꞌantam.
45 Istastꞌaich ju ixlacatꞌunꞌan chai ixꞌalintaꞌan.
Chai ju tumin ju ixtaꞌamaklhtayanan ixtalalhvakꞌach tachi ju ixmaktasqꞌuinich pumatam pumatam.
46 Chai tuncujun tuncujun va chꞌanxtam ixtaꞌan lacakꞌai ixpujitatꞌan ju israelitanin.
Chai laꞌixchakaꞌan lhikꞌach ixtaꞌui ju xkapavati ju pupastaccan ju ixꞌaninti ju Jesús.
Chai va lakatam ixjunita ixꞌalhunutꞌan.
47 Ixtalakꞌayai ju Dios chai chux ju lapanacni ixtanajunch ni na lackꞌoxin lapanacni ixtajunita ju yuꞌunch.
Chai tuncujun tuncujun ju kꞌai ucxtin Dios na lhu ixꞌalalhavai ju ixlapanacni ju vachuꞌ ixtalhilacaꞌanta Jesús.