Palai navicalh pumatam ju va ixchꞌantakꞌalhitach
3
Pus ju lakatam avilhchan ju Pitaluꞌ chai ju Xivan ixtaꞌanta lacakꞌai ixpujitatꞌan ju istꞌaꞌisraelitanin.
Lakatꞌutu hora atokꞌoxanaꞌ ixjunita.
Acsnich ju ixtaꞌan ju lapanacni tꞌachivinin ju Dios.
2 Chai ixꞌalin pumatam lapanac ju va ixchꞌantakꞌalhita.
Chunch ixjunita tus laꞌixpulakꞌau.
Chai chux avilhchan ixchꞌixlhiꞌancanta chai ixꞌulacanta laxamalhtich ju anuꞌ pujitat.
Pus ju anuꞌ malhtich ju lapanacni ixtanajun ni yuchach ju na cꞌus.
Pus taꞌulalh ju takꞌankꞌan anch ni laich casqꞌuiniyach ju tumin tachi chun ju ixtatanuich lacpujitat.
3 Chai ju anuꞌ lapanac acsni alaktsꞌilh ju Pitaluꞌ chai ju Xivan ni ixtatanuputun lacpujitat pus lana asqꞌuinilh lamapainin ni tuꞌuꞌ cataxtaknilh lacatsꞌunin.
4 Pus ju acsnich ju Pitaluꞌ chai ju Xivan lana taskotutulh.
Chai ju Pitaluꞌ juni:
―Aquilalaktsꞌiuch.
―Matich ju quintumin.
Para ju tuchi icpacxanta yuchach ju acxtakniyan.
Laꞌixtachaput ju Jesucristo amachakaꞌ Nazaret atꞌaich.
Alhtꞌanch.
7 Pus ju acsnich ju Pitaluꞌ makchꞌapalh ju anuꞌ lapanac laꞌixlhicana.
Makꞌostola.
Chai lana takꞌoxinilh ixchꞌajaꞌ chai ixpixtuꞌ ixchꞌajaꞌ.
8 Pus ju yuchi alhtujnutayalhch.
Alhtanalhch chai kꞌaixtam alactꞌatanu lacpujitat.
Alhtanaꞌanta.
Alhtujnuꞌanta.
Chai ixlakꞌayai ju Dios.
9 Pus chux ju lapanacni talaktsꞌilh ni alhtanaꞌanta chai takꞌasmatlh ni ixlakꞌayai ju Dios.
10 Chai tamispalh ni yuchi ju ixtolai laxamalhtich ju kꞌai pujitat junta na cꞌus ixjuncan chai isqꞌuin tumin.
Pus lana va talhamakꞌaninilh ni talaktsꞌilh tuchi tapasalh ju anuꞌ lapanac.
Ju Pitaluꞌ axakꞌala ju lapanacni laꞌismakspaꞌ pujitat
11 Pus ju anuꞌ lapanac ju palaich navicalh lana jantu maconiputulh ixmacaꞌan ju Pitaluꞌ chaich ju Xivan.
Pus tachi chun ju lapanacni taꞌatsꞌalalakmilh ju yuꞌunch junta ixtayanalh laꞌismakspaꞌ pujitat junta ixꞌanuꞌ Salomón ixjuncan.
Va talhamakꞌaninilh.
12 Pus ju Pitaluꞌ ni laktsꞌilh ni ixtaꞌatsꞌalaminta ju lapanacni pus lana chani alacjuni:
―Quintꞌaꞌisraelitanin tajuch ni va lhamakꞌanininatꞌit ju ani.
Tajuch ni va quilaskotutuyau ju quijnan.
Tachi ju va nonatꞌit ni laquintachaput quincꞌan ju xacmalhtanayau ju ani ya lapanac.
U tachi ju va nonatꞌit ni va ixlacaꞌatalh ni ixlhichux ju quiꞌalhunut quincꞌan icchꞌakꞌokꞌayauch ju Dios palaich xacpunaviyau ju ani ya lapanac.
Para jantu.
13 Alai Dios ju palai xanavi.
Yuchi ju vachuꞌ isDios ixjunita ju makꞌaniya quimpaiꞌan Abraham chaich ju Isaac chai ju Jacob.
Chai yuchi ju xakꞌai xanavi ju istsꞌalh ju Jesús juncan.
Para ju uxijnan makꞌaxtꞌaknitꞌit ju ucxtinin.
Chai ju Pilato mas ixkꞌotputun para ju uxijnan jantu lacꞌasqꞌuintꞌit.
14 Ju Jesús na salaka ixjunita ixꞌalhunut chai na soknicꞌa ixjunita ju isꞌatsucunti.
Para ju uxijnan jantu lacꞌasqꞌuintꞌit ju yuchi.
Alai yuchi ju sqꞌuintꞌit ni camacajuncalh ju amakniniꞌ.
15 Pus ju uxijnan maknitꞌit ju anuꞌ ju lai xtꞌakꞌa ju atsucunti ju conkꞌalhiyanta lactꞌiyan.
Para ju Dios malokꞌonichokolh laꞌixꞌaninti.
Chai ju quijnan iclaktsꞌiuch acsni ixmalokꞌonichokotach.
16 Pus ju ani ya lapanac ju laktsꞌinatꞌit chai mispꞌayatꞌit tachapuchokolh va ixlacata ni iclhilaksiyau ju ixtachaput ju Jesús.
Ni iclhilacaꞌanau ju Jesús yuchi lhitakꞌoxinilh ixchꞌajaꞌ ju ani ya lapanac lamiꞌalacꞌavantiꞌan minchuxꞌan ju uxijnan.
17 Pus ji quintꞌalapanacni iccꞌatsai ni lana jantu ixmachꞌakxayatꞌit tuchꞌi ixnaviyatꞌit ju uxijnan acsni maknitꞌit ju Jesús.
Nin yuꞌunch ju miꞌucxtinin jantu tamachakxa.
18 Para chunch ju uctaxtulh tachi ju ixnajunta ju Dios ju makꞌanch.
Ju yuchi ixꞌajuni tachi chun ixlapanacni ju ixtanajun ixchivinti ni catanaulh ni aktsꞌiya camakꞌalhkꞌajnanach ju yuchi ju camalakachacanachilh ju ani lacamunutpaꞌ.
19 Pus ju chavai amacꞌaꞌuntꞌit ju miꞌalactuꞌuntiꞌan.
Alhilacꞌapꞌitꞌit ju Dios.
Ju chunch ju Dios cataxacaniyanch ju mintalakꞌalhinꞌan chai kꞌox atsucunti cataxtakniyan ju quiꞌucxtin Jesús.
20 Chai ju chunch laich camalakachachokotachilh ju Jesús aktam.
Yuchach ju makꞌanchich ixnoncan camalakachatachilh ju ani lacamunutpaꞌ ju quilacataꞌan.
21 Para ju chavai aktsꞌiya tasqꞌuini ni catolhchacaꞌ lactꞌiyan ju Jesús tus acsni cachinaꞌ ju avilhchan acsni catasastꞌikꞌoyaꞌ tachi chun ju taxtokni.
Chunch ju naulh ju Dios ju makꞌanchich chai ju ixlapanacni ju na salaka ixjunita ixꞌalhunutꞌan chai ju ixtachivinin ju ixchivinti ajunicalh ni vachuꞌ chunch catanaulh.
22 Chunch ju tanaulh tachi ju naulh ju makꞌaniya lapanac ju Moisés ixjuncan.
Ju yuchi ma chani ajuni ju lapanacni ju ixtatꞌajun ju acsnich:
“Ju kꞌai ucxtin Dios ma catamalakachanichin pumatam lamilhiꞌuxijnan ju canonach ixchivinti.
Ju Dios ma camalakachayach ju yuchi tachi ju quimalakachalh ju quitꞌin.
Pus ma akꞌasmatnitꞌit ju yuchi tachi chun ju catajunan.
23 Chai ma tachi chun ju lapanacni ju ma jantu cakꞌasmatniyaꞌ ju tuchi canonaꞌ ju anuꞌ lapanac ju canonaꞌ ixchivinti Dios pus ma jantu ixmakxalapanac Dios cajunaꞌ chai ma camacaꞌancanaꞌ lacamakꞌalhkꞌajnat junta jonkꞌalhita”.
Ma chunch ju ajunilh ju lapanacni ju Moisés.
24 Pus iclajunau ni Samuel chai tachi chun ju aliꞌin lapanacni ju ixtanajun ixchivinti Dios ju ixtatꞌajun ju acsnich tus chavai si talhichivinilh ju chavai avilhchan acsni tꞌonau ju quijnanꞌan.
25 Chai tachi chun ju tanaulh ju anuch makꞌaniya lapanacni si milacataꞌan ju chavai.
Chai ju anuꞌ chivinti ju alaclhitꞌatakꞌoxilh ju Dios ju makꞌaniya quimpaiꞌan pus ju chavai milacataꞌan junita.
Chai ju chavai uxijnan ju amaklhtꞌayananaꞌitꞌit ju tuchi juni ju Dios ju Abraham acsni lhitꞌatakꞌoxilh ju ixchivinti.
Ju yuchi ixjunita ju Abraham ni ma kꞌoxich catatsucuyaꞌ tachi chun ju lapanacni ju ani lacamunutpaꞌ ma va ixlacaꞌatalh pumatam ixꞌapapanatnich.
26 Ju Dios acsni malakachachilh ju istsꞌalh ju ani pus quijnanꞌan ju pꞌulhnan quintamalakachanichin.
Chai quintamalakachanichin ju quijnanꞌan ni lai lhikꞌach catsucuyau acsni aquintamamaconiyan ju macxcai quiꞌatsucuntiꞌan.
―Chunch ju ajunilh ju lapanacni ju Pitaluꞌ.