Ju Pitaluꞌ chai ju Xivan lacapuꞌucxtin
4
Acsni ixtatꞌachivinin ju lapanacni ju Pitaluꞌ chai ju Xivan pus lana tsꞌanan taminkꞌo ju ixpalijniꞌan ju istꞌaꞌisraelitaninꞌan chai ju saduceonin chai ju ixꞌucxtinꞌan ju taropajni ju ixtachꞌalhcatnan lacakꞌai ixpujitatꞌan.
2 Na ixtatalhkꞌaman ju yuꞌunch ni ixꞌamalanican ju lapanacni chai ixꞌajuncan ni taꞌacxtuchokolh ju Jesús junta ixmacnucanta chai ixlhiyuchi cꞌatsacan ni aktsꞌiya catataꞌacxtuchokotachilh ju tanitach.
3 Pus lana tachꞌapalh ju Pitaluꞌ chai ju Xivan.
Chai ni na ixtokꞌoxatach chai jantu lai tuꞌuꞌ tanavilh ju acsnich pus alactꞌalhnucalh.
Ixtanajun ni catalhiꞌanaꞌ lacapuꞌucxtin ni catuncunach.
4 Para aktsꞌiya na lhu ju takꞌasmatlh ju chivinti talacaꞌilh.
Chai chux ju ixtalhilacaꞌanta ju Jesús chaꞌalh tachi lakaquis milh jokꞌatni.
Jantu aputekꞌecalh ju chakolun chai ju askꞌatꞌan.
5 Acsni tuncunchokolh tatakꞌaixtoklh ju lakꞌachakꞌan Jerusalén ixꞌucxtinꞌan ju israelitanin chai ju xalacpaꞌitnich ju israelitanin chai ju na ixtalhitamakaꞌutach ju ixlhamapꞌaksinꞌan ju istꞌaꞌisraelitanin.
6 Vachuꞌ ixvi ju Anás ju xakꞌai pali ixjunita.
Chaich ju Caifás,
Xivan,
Alejandro chai ju aliꞌin ixlhiꞌalakꞌavin ju xakꞌai pali.
7 Chai ju acsnich talhinaulh ixmaxtuca lacapulachꞌin ju Pitaluꞌ chai ju Xivan.
Alacyajucalh laꞌixlacaitat ju lapanacni ju anch ixtavilanalh chai alacsacmicalh tichi chavaich ju xaꞌaxtakni ju ixtachaputꞌan ni laich palai xatanavi ju anuꞌ lapanac.
Vachuꞌ asacmicalh tichi chavaich ju xaꞌajuni ni chunch catalalh.
8-9 Pus ju acsnich ju Spiritu Santu lana soko xtaknilh ju Pitaluꞌ ju chivinti ju canonaꞌ.
Chai chani ju ajuni ju yuchi:
―Xalackꞌajin ju ani lakꞌachakꞌan chai ju lhinonatꞌit sia quijnanꞌan ju israelitanin juntau ju chavai icchivimakꞌancantau va ixlacaꞌatalh ju kꞌox amapaininti ju icnavinitau pumatam takꞌankꞌan.
Chai ju uxijnan va cꞌatsꞌapꞌutꞌunatꞌit tijuch ju palai xapujun ju takꞌankꞌan.
10 Pus acꞌatsꞌatꞌitch chux ju uxijnan chai chux ju aliꞌin israelitanin ni laꞌixtachaput ju Jesucristo amachakaꞌ Nazaret palaich xapujun ju ani lapanac ju ya lamiꞌucxlacapuꞌan.
Yuchach ju anuꞌ Jesucristo ju maqꞌuilhtꞌatꞌit lacacurus para ju Dios malokꞌoni laꞌixꞌaninti.
11 Ju uxijnan chun untꞌatꞌit tachi ju ixyonin chakaꞌ ju tamakꞌalh ju anuꞌ chiux ju astan valh ju chiux ju makꞌastumucꞌacanta chakaꞌ junta tsꞌokcanta tuchi cꞌatach ju yocanta.
Ju uxijnan makꞌantꞌatꞌit ju Jesús mas yuchi ju palai maktasqꞌuinican laquiꞌatsucuntiꞌan.
12 Pus matich apumatam ju lai aquintamakꞌalhtaxtun.
Tachi chun ju lapanacni ju ani lacamunutpaꞌ va yuchach ju quintaxtaknitan ju Dios ni lai aquintamakꞌalhtaxtun.
―Chunch ju ajuni ju xalackꞌajin ju Pitaluꞌ.
13 Pus ju xalackꞌajin acsni talaktsꞌilh ju Pitaluꞌ chai ju Xivan ni jantu lana ixtatalhanan chai ixtacꞌatsai ni jantu tuꞌuꞌ ixtapalhniꞌan ixjunita chai jantu tavanan ixtaquilata lacascuela pus na talhamakꞌaninilh.
Acsnicaꞌ ju tapastaclh ni ixtatꞌaꞌucxuntꞌajun ju Jesús.
14 Chai ni talaktsꞌilh ni anch ixya ju anuꞌ lapanac ju palaich ixnavicanta pus jantu lai xatamucꞌani tuꞌuꞌ ixtalakꞌalhinꞌan ju Pitaluꞌ chai Xivan.
15 Pus lana alactixcoxtucalh pantsꞌiquis lacapuꞌucxtin.
Chai va isꞌakstuꞌan ju xalackꞌajin tatsuculh lacchivinin.
16 Chani ixtalaclajunich:
―Tas catꞌalayauch ju ani lapanacni ni slivasalh kꞌai lhamakꞌan ju tamalacasuta ju yuꞌunch chai jantu lai catinompalau ni jantu tanavita.
Tacꞌatsakꞌo ju amachakꞌan ju lakꞌachakꞌan Jerusalén.
17 Para ni jantu palai lhu catacꞌatsayaꞌ ju tuchi xatanavi caꞌajuniu ni jantu xamatiꞌ catajunilh tuꞌuꞌ ixlacata ju Jesús.
Chai ni tuꞌuꞌ catajunilh xamatiꞌ pus isꞌakstuꞌan tacꞌatsai.
18 Pus atꞌasanichokocalh.
Ajunicalh ni jantuch lai vana catajunilh tam xamatiꞌ nin cataꞌamasuninilh ixlacata ju Jesús.
19 Pus ju acsnich ju Pitaluꞌ chai ju Xivan takꞌalhtailh ju ucxtinin.
Chanich tajuni:
―Anaꞌuntꞌitch.
Tasmalhch ju palai kꞌox calhiulayaꞌ ju Dios.
Ni aclaquiclacaꞌiu ju uxijnan u yuchi ju Dios ju acquiclacaꞌiu.
20 Para ju quijnan jantu tavanan actimacaju ju va jantuch acnaju ju tuchi iclaktsꞌintauch ju navilh ju Jesús chai ju tuchi ickꞌasmatꞌauch ju naulh ju Jesús.
―Chunch tajuni ju Pitaluꞌ chai ju Xivan.
21 Pus ju ucxtinin chani ajuni:
―Va yuchi ni amasunipꞌalatꞌit laꞌixtapakaꞌut ju Jesús.
Chai acsni tajuni ju chunch lana amacaulh.
Pus ju ucxtinin lana jantu lai xatalhitajui ta yu laich caꞌamamakꞌalhkꞌajni va ixlacaꞌatalh ju lapanacni.
Tachi chun ju lapanacni ixtanajun ni yuchach ju xakꞌai ju Dios ni lai palai xanavi ju anuꞌ lapanac.
22 Pus ju anuch lapanac ju navinicanta lhamakꞌan ni palaich ixnavicanta ixtapasatach tꞌupꞌuxam cꞌata.
Tapaininicalh ju Dios ni caꞌaꞌaktaiju ni jantu catatalhanalh
23 Pus ju Pitaluꞌ chai ju Xivan acsni amacajuncalh lana talakꞌanchokolh ju aliꞌin ju ixtalhilacaꞌanta ju Jesús.
Chai tanonkꞌo tuchi ixꞌajuni ju xalackꞌajin palijni chai ju ucxtinin.
24 Chai ju yuꞌunch acsni takꞌasmatlh ju ixchivintiꞌan pus va chꞌanxtam tatꞌachivinilh ju Dios.
Chani tajuni:
―Quiꞌucxtin uxintꞌi ju Diosꞌat.
Uxintꞌi ju navitꞌa ju lactꞌiyan chai ju lacatꞌun chai ju alama chai tachi chun ju taxtokni ju alin.
25 Ju David makꞌaniya milapanac ixjunita.
Pus ju miSpiritu Santu juni ni ma chani catsꞌokꞌulalh lacaꞌalhiqui:
Ma va kꞌaya talucununch ju lapanacni ju jantu israelitanin tajunita.
Chai ju israelitanin ma va kꞌaya tapastꞌacꞌa ju taxtokni ju jantu lai tanavi.
26 Ju xaꞌucxtinin ju ani lacamunutpaꞌ ma va lakatam tava.
Chai ju xalackꞌajinch ma tatakꞌaixtokta.
Ma va tatꞌalaxcayan ju uxintꞌi ji ucxtin Dios chai ju noncan amalakꞌachꞌatꞌachꞌitꞌa.
Ma chunch ju naulh ju David.
27 Chai ji quimpai Dios slivasalh ni tatakꞌaixtoklh ju ani lakꞌachakꞌan ju Herodes chaich ju Poncio Pilato chaich ju yuꞌunch ju jantu israelitanin chai ju aliꞌin quintꞌaꞌisraelitanin quincꞌan.
Va tatꞌalaxcailh ju mintsꞌalh Jesús ju na salaka ixꞌalhunut.
Chai yuchi ju sacxtꞌutꞌach ju uxintꞌi.
28 Chai ni chunch ju talalh pus uctaxtulh tachi ju aktsꞌiya ixnaꞌuntꞌa ju uxintꞌi chai tachi ju ispꞌastꞌactꞌa ni catapasayaꞌ.
29 Pus ju chavai ji quiꞌucxtin alaktsꞌich ju tuchi quintajunan ju aquintaꞌulhtuyan.
Para ju quijnan ni milapanacni icjuntau pus aquilaꞌaktaijuch ni laich acꞌajunau ju lapanacni ju minchivinti chai jantu actalhananau.
30 Chai aquilaxtakniuch ju mintachaput ni laich palai acnaviyau ju takꞌankꞌanin chai lai acnaviyau ju lhamakꞌan chai ju tuꞌuꞌ ju lai catapucꞌatsayaꞌ ju lapanacni ni vasalh milapanacni icjuntau.
Chux ju ani acnaviyau laꞌixtachaput ju mintsꞌalh Jesús ju na salaka ixꞌalhunut.
―Pus chunch ju tatapaininilh ju Dios.
31 Chai acsni tatꞌachivinkꞌolh ju Dios pus tataclh ju anuꞌ chakaꞌ junta ixkꞌaixtokcan chai ixchuxꞌan ju anch ixtavilanalh axtaknikꞌo palai lhu ixtachaput ju Spiritu Santu chai tatailhiꞌalh ixnajunca ixchivinti Dios chai jantu ixtatalhanan.
Ju lapanacni ju ixtalhilacaꞌanta Jesús talaꞌaktaijulh laꞌismaktasqꞌuinitꞌan
32 Chai tachi chun ju ixtalhilacaꞌanta Jesús va lakatam ixjunita ixꞌalhunutꞌan chai va lakatam ixjunita ixtacꞌatsanꞌan.
Chai jantu xamatiꞌ ixnajun:
―Ju quiꞌalinta va quiꞌanuꞌ quiꞌakstu.
Para tachi chun ju taxtokni ixtalaxtakni tachi ju ixmaktasqꞌuini pumatam pumatam.
33 Pus ju ixtamalakachan ju Jesús lacakꞌai tachaput tatailhiꞌalh ixꞌajunica ju lapanacni ni vasalh lokꞌonchokolh ju ucxtin Jesús junta ixmacnucanta.
Chai ju Dios axtaknilh kꞌox isꞌatsucuntiꞌan ixchuxꞌan.
34 Pus jantu xamatiꞌ ju sia yuꞌunch ju ixmaktasqꞌuini tuꞌuꞌ.
Para tachi chun ju ixpacxanta ju ixlacatꞌunꞌan u ixchakaꞌan tastꞌalh chai talhiminkꞌo ju ixtapalh ju isꞌastꞌantiꞌan.
35 Pus yuꞌunch ju ixtamalakachan ju Jesús ju axtaknicalh ju anuꞌ tumin chai ju yuꞌunch taxtaknilh ju ixꞌalin ixmaktasqꞌuinitꞌan.
36 Chunch ixtalai ju lapanacni tachi ju lalh ju José.
Ju yuchi vachuꞌ ixlhilacaꞌanta ju Jesús chai ju ixtamalakachan ju Jesús Bernabé ixtalhimapakaꞌuta.
Ju chunch va nomputan ni na lai ixmakꞌankꞌachai xamatiꞌ.
Pus ju yuchi ixꞌapapanatnich ixjunita ju makꞌaniya lapanac ju Leví ixjuncan.
Chai amachakaꞌ Chipre ixjunita.
37 Pus ju yuchi stꞌalh ju ixlacatꞌun chai lhimilh ju ixtapalh.
Alacxtaknilh ju ixtamalakachan ju Jesús.