Ju Ananías chai ju Safira taꞌalactuꞌunulh
5
Para ixꞌalin vachuꞌ apumatam lapanac ju Ananías ixjuncan.
Chai ju ixꞌamachakaꞌ Safira ixjuncan.
Pus ju yuꞌunch tastꞌalh ju ixlacatꞌunꞌan.
2 Chai ju Ananías chꞌapalh lacatsꞌunin ju anuꞌ tumin.
Jantu axtaknikꞌo ju ixtamalakachan ju Jesús mas ixmalacasui tachi ju vasalh ixtakkꞌota.
Vachuꞌ cꞌatsalh ju ixꞌamachakaꞌ tuchi ixnavich ju ixpapa.
3 Para ju Pitaluꞌ chanich juni ju Ananías:
―Ananías tajuch ni va xalacꞌaꞌitꞌi ni catanu lamintanquilhacni ju lhacaticuru.
Yuchach ju xamapastꞌacꞌaniyan ni laich xalhitꞌaꞌaklhtꞌamai ju Spiritu Santu ni laich xamakꞌai lacatsꞌunin ixtapalh ju milacatꞌun.
4 Acsni tucaꞌ istꞌai ju milacatꞌun ja jantu miꞌanuꞌ ixjunita.
Ju astan ja jantu lamimacaꞌ ixmamatꞌa ju tumin.
Pus tajuch ni va xapꞌastꞌacꞌa lamiꞌalhunut ni laich xanavi ju chunch.
Jantu anau ni lapanacni ju xalhitꞌaꞌaklhtꞌamai.
Alai Dios ju xalhitꞌaꞌaklhtꞌamai.
5 Pus ju Ananías acsni kꞌasmatlh junima chivinti taꞌaktalh.
Lana lhtucu nilh.
Chai tachi chun ju takꞌasmatlh ju tuchi ixtapasata na kꞌox talactalhanalh.
6 Pus ju va paitat lapanacni ju anch ixtavilanalh tataya.
Tapachꞌilh lacapumpuꞌ ju lijunto.
Tamaxtulh lacachakaꞌ.
Taquimacnu.
7 Pus ni tapasalh tachi lakatꞌutu hora lana tanucha ixꞌamachakaꞌ ixjunita.
Ju yuchi jantucaꞌ iscꞌatsai tuchi ixtapasatach.
8 Pus ju acsnich ju Pitaluꞌ chani juni:
―Aqꞌuiꞌunch.
Ja chunch xalhistꞌayatꞌit ju milacatꞌunꞌan.
Chai ju anuꞌ chakoꞌulh naulh:
―A.
Chunch.
9 Chai ju Pitaluꞌ chani jumpa:
―Jantu kꞌox xalayatꞌit ni va chꞌanxtam ju xapꞌinatꞌit ni va islaktsꞌimpꞌutꞌunatꞌit ni tuꞌuꞌ catanaviyan ju iSpiritu Santu ju kꞌai ucxtin Dios.
Vanin lacamalhtich taminchokota ju xataquimacnui ju mimpapa.
Chai catamaxtuyanch vachuꞌ ju uxintꞌi.
10 Pus lana tin tamacha junta ixya ju Pitaluꞌ ju anuꞌ chakoꞌulh chai nilh.
Chai acsni tatanuchokocha ju ixtaquimacnuta ju ixpapa pus talaktsꞌilh ni nitach chai tamaxtulh.
Taquimacnu vanin junta tamama ju ixpapa.
11 Pus tachi chun ju ixtalhilacaꞌanta ju Jesús chai tachi chun ju aliꞌin ju takꞌasmatlh ju tuchi xatapasai lana na talactalhanalh.
Na lhu lhamakꞌan navicalh chai ju tuꞌuꞌ ju lai catapuꞌalacpastacnalh ju lapanacni
12 Chai ju ixtamalakachan ju Jesús na lhu ixtanavi ju lhamakꞌan chai ju tuꞌuꞌ ju laich caꞌixtapucꞌatsalh ju lapanacni ni vasalh ixlapanacni Jesús ixtajunita.
Laꞌixꞌucxlacapuꞌan ju lapanacni ju tanavi.
Chai tachi chun ju ixtalhilacaꞌanta Jesús va chꞌanxtam ixtatakꞌaixtꞌokꞌa laꞌixquilhtalacxtuch ju kꞌai ixpujitatꞌan ju israelitanin.
Ju anuch ixquilhtalacxtuch ixꞌanuꞌ Salomón ixjuncan.
13 Para ju aliꞌin lapanacni jantu xamatiꞌ ju ixtatalacasuputun ni makyuꞌunch cava ni na ixtatalhoni.
Chunch ixtalai mas na kꞌox ixꞌalhichivincan ju yuꞌunch ju ixtalhilacaꞌanta ju Jesús.
14 Para aktsꞌiya na lhu ju chakolun chai ju jokꞌatni talhilacaꞌalh ju ucxtin Jesús.
15 Chai ixtamamai ju takꞌankꞌanin lacatijixni.
Laꞌixputamanꞌan u laꞌixtꞌakꞌatꞌan ju ixꞌapumacan.
Ixtanajun ju lapanacni ni mas va ixmakꞌantsastꞌilit ju Pitaluꞌ calakchaꞌanilh acsni catapasayach pus palaich catapujunaꞌ.
16 Vachuꞌ tamilh ju amachakꞌan lakꞌachakꞌanixni junta va lhivaninch ju lakꞌachakꞌan Jerusalén.
Ixtalhiminch ju takꞌankꞌanin chai ju ixtanun ju lhacaticuru laꞌixtanquilhacniꞌan.
Chai tachi chun ju yuꞌunch pektu palai anavicalh.
Alhimakchꞌapucalh ju Pitaluꞌ chai ju Xivan
17 Pus ju acsnich talhacchaꞌanilh ixtachaputꞌan ju xakꞌai pali chai ju lapanacni ju xaꞌalactꞌavi ju ixtalhilacaꞌanta ju ixlhamapꞌaksinꞌan ju saduceonin.
18 Pus lana lhinaulh ixꞌachꞌapaca ju ixtamalakachan ju Jesús chai lhinaulh ixꞌalactꞌalhnucalh lacapulachꞌin.
19 Para ju anuꞌ atatsꞌisni pumatam ixꞌanquilh ju kꞌai ucxtin Dios malhtekꞌa ju xamalhtich lacapulachꞌin.
Amaxtulh ju Pitaluꞌ chai ju Xivan chai chani ajuni:
20 ―Aꞌinchitꞌitch lacakꞌai ixpujitatꞌan ju mintꞌaꞌisraelitaninꞌan.
Aꞌunaꞌitꞌitch ju lapanacni chux ju chivinti ixlacata ju ani sastꞌi atsucunti.
21 Pus ju Pitaluꞌ chai ju Xivan acsni takꞌasmatnilh ju ixchivinti ju anquilh talacaꞌi.
Na vatsꞌisincaꞌ tatanucha lacpujitat chai tatsuculh amalaninin.
Pus vachuꞌ ju acsnich ju xakꞌai pali chai ju ixtamakꞌanta yuchi tamakꞌaixtoklh ju xalacpaꞌitni ju israelitanin.
Yuꞌunch ju ixtalhinajun ju anch.
Lhinaulh ixꞌatꞌasanica ju ixtamalakachan Jesús lacapulachꞌin.
22 Para ju pulasiyajni acsni tachaꞌalh lacapulachꞌin jantu xamatiꞌ talhitaju.
Va chunch tataspꞌitchokocha.
Taquijunilh ju ucxtinin.
23 Chani tajuni:
―Acsni icchaꞌauch ju lacapulachꞌin kꞌox ixvilhnilh ju xacandado.
Chai ju xaꞌalhistacnin anchach ixtayanankꞌo laxamalhtich.
Para acsni tavanan icmalhtekꞌau jantu xamatiꞌ iclhitaju ju pulacni.
―Chunch tajuni ju ucxtinin.
24 Pus acsni takꞌasmatlh ju ani chivinti ju xakꞌai tucan pali chai ju xaꞌucxtin taropajni ju ixtachꞌalhcatnan lacakꞌai ixpujitatꞌan ju israelitanin chai ju aliꞌinch xalackꞌajin palijni va talhamakꞌaninilh.
Talaclajuni ju sia yuꞌunch:
―Tijuch nuꞌ ju nomputun ju ani.
25 Pus ju acsnich lana chincha pumatam ju quiꞌamacꞌatsanininchilh tuchi alinch.
Chani ajuni ju ucxtinin:
―Ju anuch lapanacni ju xatꞌalhnutꞌatꞌit pus ju chavai tatanumanalh lacakꞌai quimpujitatꞌan.
Tatꞌompalai alacmasuninin ju lapanacni.
26 Pus ju acsnich ju xaꞌucxtin taropajni ju ixtachꞌalhcatnan lacakꞌai pujitat alactꞌaꞌalh ju pulasiyajni.
Para va lhikꞌox talhimilh ju Pitaluꞌ chaich ju Xivan ni va ixꞌatalhonican ju lapanacni.
Ju taropajni ixtanajunta ni jantu va kꞌox ju caꞌixꞌalhimilh pus jantu xcai ni ixtaꞌalacatꞌalhmanalh ju lapanacni.
27 Pus acsni alhimincalh aꞌulacalh junta ixtavilanalh ju ucxtinin.
Chai ju acsnich ju xakꞌai pali chani ajuni:
28 ―Ja jantu xaclajunau ni jantuch vana laich amasutꞌitch ixlacata ju Jesús.
Para ixlaquilhtu malaniyatꞌit chux ju amachakꞌan Jerusalén ju miꞌatalanintiꞌan ju uxijnan.
Chai vachuꞌ quilamucꞌaniputunau ju quijnan quintalakꞌalhin quincꞌan ixlacata ixꞌacꞌalhni ju anuꞌ lapanac.
29 Pus ju acsnich ju Pitaluꞌ chai ju aliꞌin ixtamalakachan Jesús taꞌakꞌalhtayanalh.
Chani tajuni:
―Aktsꞌiya tasqꞌuini ni pꞌulhnan acquiclacaꞌiu ju Dios.
Jantiyuꞌ ju va quintꞌalapanac.
30 Ju uxijnan maknitꞌit ju Jesús acsni maquilhtꞌatꞌit lacacurus.
Para ju Dios ju ixtalhilacaꞌan ju makꞌaniya quilacpaꞌitniꞌan macxtuchokolh junta ixmacnucanta.
31 Chai ju chavai ju yuchi laꞌixtachaput ulalh ju Jesús kꞌai ucxtin chai yuchi ju lai aquintamakꞌalhtaxtuyan laquiꞌalactuꞌuntiꞌan.
Ju chunch tachi chun ju quintꞌaꞌisraelitaninꞌan ni catamacaulh ju ixꞌalactuꞌuntiꞌan tachi ju icmacontauch ju quijnan pus vachuꞌ camacꞌacxanicanaꞌ ju ixtalakꞌalhinꞌan ju yuꞌunch.
32 Pus ju quijnan kꞌoxich iclaktsꞌiuch acsni tapasalh ju ani taxtokni chai ju Spiritu Santu ju axtaknican tachi chun ju taquiclacaꞌini ju Dios vachuꞌ amavasalani laꞌixꞌalhunutꞌan ni vasalh chunch ju tapasalh.
―Chunch ju ajunicalh ju ucxtinin.
33 Pus ju ucxtinin acsni takꞌasmatlh ju ani chivinti lana na tatalhkꞌamalh.
Na ixꞌamakniputun.
34 Para ixꞌalin sia yuꞌunch ju ucxtinin pumatam lapanac ju Gamaliel ixjuncan.
Ju yuchi ixlhilacaꞌani ju ixlhamapꞌaksinꞌan ju fariseonin chai ismasui ju ixlhamapꞌaksin ju Moisés.
Chai chux ju lapanacni ixtanajun ni na kꞌox lapanac ixjunita ju yuchi.
Pus ju yuchi taya chai naulh ni caꞌamaxtucalh makspaꞌ lacatsꞌunin ju ixtamalakachan ju Jesús.
35 Chai chani alacjuni ju ixtꞌaꞌucxtinin:
―Quintꞌaꞌisraelitanin alaktsꞌintꞌitch ju uxijnan tuchꞌi anavipꞌutꞌunatꞌit ju ani ya lapanacni.
36 Apꞌastꞌactꞌit ni ixꞌalin ju makꞌanchich pumatam lapanac ju Teudas ixjuncan.
Ju yuchi ixnajun ni xakꞌai ixjunita.
Chai ixtꞌalasaputun ju kꞌai ucxtin.
Chai na lhu tava ju ixlapanacni.
Tachi lakatꞌatꞌi cientos.
Para ju taropajni tamakni ju yuchi.
Chai tachi chun ju ixtachꞌakꞌokꞌata ju yuchi chux amakpitsikꞌocalh.
Chai anchach ju tamactalh.
37 Chai astan ixꞌalin pumatam amachakaꞌ Galilea ju Judas ixjuncan.
Acsni ixtꞌajun ju yuchi pus ixtꞌoncan atsꞌokꞌulanaꞌ ju lapanacni.
Pus na lhu lapanacni tachꞌakꞌokꞌalh ju yuchi.
Para vachuꞌ maknicalh chai tachi chun ju ixtachꞌakꞌokꞌai amakpitsikꞌocalh.
38 Pus yuchi iclalhijunau ju chavai ni amacꞌaꞌuntꞌit ju ani ya lapanacni.
Jantu xtuꞌuꞌ aꞌulhtꞌutꞌit.
Pus ju ani ixlhichꞌalhcatꞌan ni va xanavin lapanacni junita pus jantu tuꞌuꞌ calhitapalaꞌ.
39 Para ni ixꞌanuꞌ ju Dios pus jantu lai atꞌilakꞌalhitꞌit.
Pus ni va amamactꞌapꞌutꞌunatꞌit jantu xcai ni Dios ju atꞌalasatꞌit.
―Chunch ju ajunicalh ju ucxtinin.
40 Pus ju ixtꞌaꞌucxtinin taquiclacaꞌinilh ju ixchivinti.
Alactꞌasanicalh ju ixtamalakachan ju Jesús.
Chai talhinaulh ixlakanekmaca.
Alhimapꞌaksicalh ni jantu catatailhiꞌalh ixꞌamalanintiꞌan ixlacata ju Jesús.
Chai astan amacajuncalh.
41 Pus ju ixtamalakachan ju Jesús acsni tataxtucha lacapuꞌucxtin na talhikꞌachalh ni tuꞌuꞌ xaꞌalhiulai ju Dios ni xalacasqꞌuin ni caꞌamamaxanicalh ixlacata ju Jesús.
42 Chai chux avilhchan lacakꞌai ixpujitatꞌan ju istꞌaꞌisraelitaninꞌan chai lakꞌachakꞌanixni va tachi ixtaꞌamalani ju lapanacni ni Jesús yuchi ju ixnoncan camalakachatachilh ju Dios.