Asacxtucalh ju ixpumatujunꞌan ju caꞌaꞌaktaijununaꞌ ju quilhpatinin
6
Ju acsnich avilhchan na ixtatalhavata ju lapanacni ju ixtalhilacaꞌanta ju Jesús.
Pus alilh lakatam laklakꞌaiti ju sia yuꞌunch.
Pus ju israelitanin ju ixtachivinin ju lhigriego tatꞌalakꞌailich ju israelitanin ju ixtachivinin ju lhihebreo.
Ju yuꞌunch ju ixtachivinin ju lhigriego talhitalhkꞌamalh ta yu aꞌulhtucalh ju tꞌacunin sia yuꞌunch ju ixꞌanimacontilacanta.
Ixtanajun ni ma va lacatsꞌunin ixꞌaxtaknican ju vaiti ju ixmakpitsican chux tuncujun.
2 Pus ju acsnich ju ixpumacautꞌuiꞌan ixtamalakachan ju Jesús tamakꞌaixtoklh ju aliꞌin ju ixtalhilacaꞌanta ju Jesús chai chani tajuni:
―Ca jantu kꞌox cativa ni va acmacaju ismasuca ju ixchivinti Dios ju quijnan chai acmakpitsiyau ju vaiti.
3 Pus ji quiꞌalakꞌavin yuchi iclalhijunau ni apꞌuxcꞌaꞌutꞌit pumatujun jokꞌatni ju milhiꞌuxijnan ju kꞌox lapanacni alhiulacanta chai ju makꞌaxtaknikꞌota isꞌatsucuntiꞌan ju Spiritu Santu chai ju na taꞌacꞌatsananta.
Yuꞌunchach ju laich catanaviyaꞌ ju anuꞌ lhichꞌalhcat.
4 Chai ju quijnan va tachi actꞌachivininauch ju Dios chai acꞌamalaniniyau ju ixchivinti.
―Chunch ajunicalh ju ixtalhavat lapanacni.
5 Pus ju ixtalhavat lapanacni na kꞌox talhiula ju anuꞌ chivinti chai tasacxtulh ju Stipan.
Ju yuchi ixlhilacaꞌanta ju Jesús ixlhichux ixꞌalhunut chai ixmakꞌaxtaknikꞌota ju isꞌatsucunti ju Spiritu Santu.
Vachuꞌ tasacxtulh ju Pilipe chaich ju Prócoro chaich ju Nicanor chai ju Timón chai ju Parmenas chai ju Nicolás amachakaꞌ Antioquía.
Ju yuchi jantu israelita ixjunita para acsni tucaꞌ ixlhilacaꞌanta ju Jesús ixlhilacaꞌanta ju Dios tachi ju ixtalai ju israelitanin.
6 Pus ju anuꞌ ixpumatujunꞌan akꞌailhiminicalh ju ixtamalakachan ju Jesús.
Chai ju yuꞌunch tasqꞌuinilh ju Dios ixlacataꞌan chai tamamanilh ixmacaꞌan laꞌixlacatunaꞌan ju ixpumatujunꞌan.
7 Pus palai ixmakpitsican ju ixchivinti Dios chai na lhu lana va ju ixtalhilacaꞌanta ju Jesús ju lakꞌachakꞌan Jerusalén.
Vachuꞌ na ilhuꞌan ju ixpalijni ju israelitanin ju talhilacaꞌalh ju Jesús.
Tachꞌin navicalh ju Stipan
8 Pus ju Dios na lhu ixꞌaktaijui ju Stipan chai ixtaknita ju ixtachaput.
Pus ju yuchi ixnavi kꞌai lhamakꞌan chai ju tuꞌuꞌ ju lai catapuꞌalacpastacnalh ju lapanacni.
Ixꞌanavi laꞌixꞌucxlacapuꞌan ju lapanacni.
9 Pus ju acsnich ixꞌalin ju lapanacni ju ixtataxtutach laꞌixpuxalapanacꞌan chai ixtayajuta ixpujitatꞌan.
Chai sia yuꞌunch vachuꞌ ixꞌalin ju amachakꞌan Cirene chai amachakꞌan Alejandría.
Pus ju yuꞌunch chai ju amachakꞌan xalacatꞌun Cilicia chai ju amachakꞌan ju xalacatꞌun Asia tatꞌalakꞌailh ju Stipan.
10 Para jantu lai tavanan tatꞌalalhajalh ni yuchi ju Spiritu Santu ju xaxtakni ju Stipan ju kꞌox ixtacꞌatsan.
11 Ju acsnich axtaknicalh tumin ju aliꞌin lapanacni ni va catapunaulh taꞌaklhtamat.
Catanaulh ni takꞌasmatlh ju Stipan ni ma canaulh macxcai chivinti ixlacata ju Moisés chai ixlacata ju Dios.
12 Pus chunch tapumaktalhkꞌamalh chux ju lapanacni chaich ju xalacpaꞌitni ju israelitanin chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin.
Chai ju yuꞌunch talakꞌalh ju Stipan.
Tachꞌapalh chai talhiꞌalh lacapuꞌucxtin.
13 Chai talhiꞌalh vachuꞌ ju lapanacni ju catanonach taꞌaklhtamat.
Chanich ixtanajun:
―Ju ani lapanac jantu mamactai ju ixnajunca ju macxcai chivinti ixlacata ju ani ixpujitat Dios chai ixlacata ju quilhamapꞌaksinꞌan.
14 Ickꞌalhakꞌasmatꞌauch ni ixnajun ni ma yuchi ju Jesús amachakaꞌ Nazaret ju ma camaktayaꞌ ju ani kꞌai quimpujitatꞌan chai ma camapaxayaꞌ ju tuchi ixꞌajuni ju Moisés ju makꞌaniya quilacpaꞌitniꞌan ni catanavi chai tus chavai naviyau.
―Chunch ixtanajun ju taꞌaklhtamanin lapanacni.
15 Chai ju acsnich chux ju ucxtinin chai chux ju ixtavilanalh lacapuꞌucxtin va taskotutulh ju Stipan.
Talaktsꞌilh ju ixꞌucxpuꞌ ni na ixꞌalin ju atuncunuꞌ tachi ju junita ixꞌucxpuꞌ ju tam anquilh.