―Ja vasalh chunch tachi ju tanajun.

2 Chai ju Stipan chani akꞌalhtayanalh:

―Quintꞌalapanacni.

Quiꞌalakꞌavin.

Xalacpaꞌitnich ju ani lakꞌachakꞌan.

Aquilakꞌasmatniuch.

Na kꞌaich ju Dios.

Chai yuchach ju talacasunilh ju makꞌaniya quimpaiꞌan Abraham acsni ixvilhchacaꞌ ju xalacatꞌun Mesopotamia acsni tucaꞌ ixꞌan tsucunuꞌ ju lakꞌachakꞌan Harán.

3 Chai ma chani junicalh ju Abraham:

“Atꞌaxtꞌuch ju lamintꞌun.

Amacꞌoꞌulatꞌi ju milhiꞌalakꞌavin.

Apꞌinchich ju lacatꞌun junta acmasuniyan ju quitꞌin”.

Ma chunch ju juni ju Dios ju Abraham.

4 Pus ju Abraham taxtulh ju xalacatꞌun Caldea.

Alh tsucunuꞌ ju lakꞌachakꞌan Harán.

Chai acsni nichalh ju ixpai pus ju Abraham taxtuchokolh chai ju Dios kꞌailhimilh ju ani lacatꞌun junta tꞌonau ju chavai.

5 Para ju Dios jantu xtaknilh ju Abraham ju ani lacatꞌun ju acsni.

Nin lacatsꞌunin tachi ju lai calhijunlh ixchꞌajaꞌ.

Para ju Dios ixjunita ni ma ixꞌanuꞌ cajunaꞌ ju ani lacatꞌun chai ma ixꞌanuchꞌan cajunaꞌ ju isꞌaskꞌatꞌan astan.

Ma chunch ju juni ju Dios mas maticaꞌ ixjunita isꞌaskꞌatꞌa ju acsnich.

6 Ju Dios juni ni ma alacatam lacatꞌun catatsucuyanta ju ixꞌapapanatnich chai ma va xalapanacni catajunaꞌ ju yuꞌunch.

Chai ma calaclhimakchapucanaꞌ tachi lakatꞌatꞌi cientos cꞌata.

7 Chai ju Dios juni ni ma isꞌakstu ju camamakꞌalhkꞌajniyaꞌ ju amachakꞌan ju anuꞌ lakꞌachakꞌan junta va xalapanacni catajunaꞌ.

Chai ju astanch ma catataxtuyaꞌ ju ixꞌapapanatnich ju Abraham chai ma catalakꞌayayaꞌ ju Dios ju ani.

Ma chunch ju juni ju Dios ju Abraham.

8 Pus ju Dios lhitꞌatakꞌoxilh lakatam chivinti ju Abraham chai juni ni ma cachꞌucꞌunicalh ju ixꞌaxtꞌakꞌa isꞌakstu ju Abraham chai ixꞌaxtꞌakꞌa tachi chun ju istsꞌalan.

Ma va ispupastaccan ni ixlhitꞌatakꞌoxita ju chivinti ju Dios ju Abraham.

Pus acsni tavanan tsuculh ju istsꞌalh ju Isaac ixjuncan pus ju Abraham chꞌucꞌunilh ju ixꞌaxtꞌakꞌa ixlhilakatsajin avilhchan.

Chai ju Isaac acsni alilh ju istsꞌalh ju Jacob ixjuncan vana chꞌucꞌunilh ixꞌaxtꞌakꞌa ju yuchi.

Chai ju Jacob acsni alilh ju isꞌaskꞌatꞌa vachuꞌ chunch anavikꞌo ju ixpumacautꞌuiꞌan istsꞌalan.

Pus ju anuꞌ ixpumacautꞌuiꞌan xapaꞌitnich tava ju quilhmaccautꞌui ju quintꞌaꞌisraelitaninꞌan.

9 Pus ju pumatam ixlhipumacautꞌuiꞌan istsꞌalan Jacob José ixjuncan.

Chai ju ixꞌalakꞌavin ju José na taxcailich ju yuchi.

Tastꞌanilh ju aliꞌin lapanacni ju talhiꞌalh alacatam lacatꞌun junta Egipto juncan.

Para Dios ju ixtꞌaꞌanta ju yuchi.

10 Chai astan ju Dios makꞌosunikꞌo tachi chun ju ixmakꞌalhkꞌajnat.

Chai ju Dios ni na aktaijulh ju José pus ju xakꞌai ucxtin Egipto ju Faraón ixjuncan na kꞌoxich lapanac lhiula.

Chai ni laktsꞌilh ni na kꞌox ixjunita ixꞌatalacpastꞌacꞌat pus ulalh ju José lacatꞌicstꞌi ucxtin ju lakꞌachakꞌan Egipto.

Vachuꞌ junilh ni ixꞌucxtinꞌan cajunaꞌ tachi chun ju ixtachꞌalhcatnan laꞌixchakaꞌ.

11 Chai ju acsnich alilh kꞌai chavan chai kꞌai makꞌalhkꞌajnat tachi ixlhilacaputsꞌun ju xatꞌun Egipto chai ju xatꞌun Canaán.

Pus ju quilacpaꞌitniꞌan jantuch lai ixtalhitajui ju tuchi cataꞌulh.

12 Para ju Jacob ni kꞌasmatlh ni ixꞌalin ju vaiti ju anch ju Egipto pus alacmalakachalh ju istsꞌalan.

Pus ju yuꞌunch makꞌaniya quilacpaꞌitniꞌan tajunita.

13 Chai ju yuꞌunch acsni taquiꞌilh ju vaiti ju ixlhipaktꞌuich pus ju José ajunilh ni ixlakꞌauchꞌan ixjunita.

Vachuꞌ ju Faraón alacmispalh ju ixꞌalakꞌavin ju José.

14 Chai ju acsnich ju José alacmalakachachokolh ixꞌalakꞌavin laꞌixtꞌunꞌan.

Lhinaulh istꞌasanica ju ixpaiꞌan ju Jacob ixjuncan.

Vachuꞌ ajuni ni catalhimilh tachi chun ju ixtatanumanalh laꞌixchakaꞌan.

Pus ixtachaꞌanta setenta y cinco lapanacni.

15 Pus yuchi lhiꞌalh tsucunuꞌ ju Jacob ju xalacatꞌun Egipto.

Chai anch ju nichalh ju yuchi chai lhu ju makꞌaniya quilacpaꞌitniꞌan.

16 Chai acsni tani alhiꞌancalh lakꞌachakꞌan Siquem.

Anch ju amakꞌacalh ju ixlacatunaꞌan junta lhucucu talhpa ixjunita.

Anch junta tamaulh ju Abraham.

Ju yuchi ixꞌaxtaknita tumin ju istsꞌalan ju Hamor amachakꞌan Siquem ni yuꞌunchach ju tastꞌalh.

17 Para acsni vaninch ixchimputunch ju avilhchan ni caꞌuctaxtuyach ixchivinti Dios ju ixmavasalanicanta ju Abraham pus ju ixꞌapapanatnich ju Israel slivasalh tatalhavalhch ju xalacatꞌun Egipto.

18 Chai astan apumatam tavilh lacapuꞌucxtin ju xalacatꞌun Egipto.

Pus ju yuchi jantu iskꞌasmatꞌa ixlacata ju José ni makꞌanchich ixnita ju yuchi.

19 Pus ju anuꞌ kꞌai ucxtin aꞌokxchokꞌolh ju quintꞌaꞌisraelitaninꞌan chai alaclhimakchapulh ju makꞌaniya quilacpaꞌitniꞌan.

Amapꞌaksi ni catamacaꞌalh makspaꞌ ju istsꞌalan acsni tavanan catatsuculh.

Ju chunch ixnajun ni caꞌixtanikꞌo ju tsꞌalan.

20 Pus ju acsnich lakꞌaulh ju Moisés chai na kꞌoxich lhiula ju Dios.

Pus lakatꞌutu malhquiyuꞌ xatakꞌayai laꞌixchakaꞌ ju ixpai.

21 Para astan acsni ixmakꞌancanta ju anuꞌ tsꞌalh pus istsiꞌ ju Faraón ju saclh.

Lakꞌayalhch.

Laktsꞌilh tachi ju va istsꞌalh.

22 Pus ju Moisés lhaꞌatalaninilh tachi chun ju ixtalhaꞌatalaninintach ju amachakꞌan Egipto.

Chai na lai ixchivinin chai na lai ixnavi ju tuꞌuꞌ.

23 Acsni laktsa tꞌupꞌuxam cꞌata ju Moisés pus ju yuchi pastaclich laꞌixꞌalhunut ni caꞌalh laktsꞌiniꞌ ju ixtꞌaꞌamachivinti.

24 Chai ju anch ju yuchi laktsꞌilh pumatam amachakaꞌ Egipto ju ixtꞌajun lhimakchapunuꞌ pumatam istꞌaꞌisraelita.

Pus ju Moisés lhikꞌalhtsaulh.

Maknilh ju amachakaꞌ Egipto.

Ixnajunch ni chunch camalacchoyaꞌ tachi ixꞌulhtui ju anuꞌ lapanac.

25 Pus ju Moisés ixnajunch ni caꞌixtamachakxa ju istꞌaꞌisraelitanin ni Dios ju xamalakachai ni caꞌamaxtuyaꞌ laꞌixmakꞌalhkꞌajnatꞌan.

Para ju yuꞌunch jantu tamachakxa.

26 Ni tuncunchokopa aktam anchokopa ju Moisés chai ju acsnich laktsꞌilh ixtꞌiyunꞌan istꞌaꞌisraelitanin ju ixtatꞌajun lasanin.

Pus ju Moisés ixꞌalhvakputun chai chani alacjuni:

“Quintꞌalapanacni ju uxijnan ni va lhiꞌalakꞌavin umpꞌalhtꞌatꞌit.

Tas ni va lalhimakchꞌapꞌupꞌalatꞌit milhiꞌuxijnan”.

27 Pus ju acsnich ju ixtꞌajun tꞌalakꞌainaꞌ ixtꞌatolhnaꞌ pꞌok samakꞌalh ju Moisés chai juni:

“Tis chavaich ju xaꞌulatan quiꞌucxtin quincꞌan chai ixlakꞌoxiniꞌ quilhamakꞌan quincꞌan.

28 Ja vachuch va qꞌuimaknipꞌutꞌun tachi ju navitꞌi cutanch ju amachakaꞌ Egipto”.

29 Pus acsni kꞌasmatlich ju ani chivinti ju Moisés atsꞌalalh.

Alh tsucunuꞌ alacatam lacatꞌun junta Madián ixjuncan.

Chai ju anch tamakꞌaxtokchalhch chai alilh pumatꞌui istsꞌalan.

30 Acsni tapasalh tꞌupꞌuxam cꞌata pus ju Moisés ixvi junta va aseknicꞌa.

Anch ixvi vanin ju anuꞌ talhpa ju Sinaí juncan.

Chai anchach ju talacasunilh pumatam ixꞌanquilh ju kꞌai ucxtin Dios.

Ixtꞌajun lhcunuꞌ lakatam achꞌitin chai anch lacaꞌalapnaꞌ talacasunilh ju anquilh.

31 Pus ju Moisés ni laktsꞌilh va lhamakꞌaninilh chai lakꞌalh.

Va islaktsꞌimputun tuchi ixtalakxtuch.

Para lana kꞌasmatnilh ju ixchivinti ju kꞌai ucxtin Dios.

32 Chai ju yuchi ma juni ni ma yuchach ju Dios.

Ma yuchi ju talhilaksilh ju makꞌaniya ixlacpaꞌitni Moisés ju Abraham chai Isaac chai Jacob ixꞌajuncan.

Chunch ma juni ju Dios.

Pus ju acsnich ju Moisés lana na alhqꞌuipꞌipꞌitnilh acsni laktsꞌilh.

Jantuch lacaꞌamputulhch.

33 Chai ju kꞌai ucxtin Dios ma junchokopa ni ma cachꞌanmaxtulh ju ixchꞌanxtꞌakꞌan ni ma ixya laꞌixꞌucxlacapuꞌ ju Dios chai ma yuchach ju tucan Dios.

34 Ju yuchi ma laktsꞌilh ju ixmakꞌalhkꞌajnat ju ixlapanacni ju ixtavilanancha Egipto.

Chai ma kꞌasmatlh ni na ixtalactꞌasai.

Ma yuchi ixlhiminta amakꞌalhtaxtunuꞌ.

Chai ma juni ni ixmalakachaputun ju Moisés ju Egipto.

Ma chunch ju juni ju Dios.

35 Pus ju Dios malakachalh ju Moisés chai ju anuꞌ anquilh ju talacasunilh lacaꞌachꞌitin aktaijulh ni lai xajun ucxtin chai lai xaꞌamakꞌalhtaxtui ju istꞌaꞌisraelitanin ju xalacatꞌun Egipto.

Ju Dios amalakachanilh ju Moisés ju istꞌaꞌisraelitanin mas jantu kꞌox ixtalhiulai ju pꞌulhnan.

Ma va chani ixtajunich:

“Tis chavaich ulatan quiꞌucxtin quincꞌan chai ixlakꞌoxiniꞌ ju quilhamakꞌan quincꞌan”.

Ma chun ixtajuni.

36 Pus ju Moisés navilh lhu kꞌai lhamakꞌan chai lhu tuꞌuꞌ ju lai catapucꞌatsalh ju lapanacni ni vasalh Dios ju xamalakachayachilh.

Anchach ju laxalacatꞌun Egipto ju xanavi ju lhamakꞌan chai anch ju laxaꞌalama junta slapulh juncan.

Vachuꞌ lhu xanavi ju kꞌai lhamakꞌan junta va aseknicꞌa junita.

Anch junta ixtalacꞌucxuntꞌajun ju quintꞌaꞌisraelitaninꞌan tꞌupꞌuxam cꞌata.

37 Yuchach ju Moisés ju alacjuni ju quintꞌaꞌisraelitaninꞌan ni ma casacxtuyaꞌ ju kꞌai ucxtin Dios pumatam ju sia yuꞌunch tachi ju sacxtucanta ju yuchi.

Chai ju yuchi ni ma canonaꞌ ixchivinti Dios pus ma catakꞌasmatnilh.

38 Yuchach ju Moisés ju ixꞌalactꞌavi ju quintꞌaꞌisraelitaninꞌan junta aseknicꞌa.

Chai yuchach ju tꞌachivinilh ju anquilh ju laxatalhpa Sinaí chai astan alacjuni ju makꞌaniya quilacpaꞌitniꞌan ju ixchivinti Dios.

Yuchach vachuꞌ ju xtaknicalh ju chivinti ixlacata ju atsucunti lactꞌiyan ni laich vachuꞌ cacꞌatsayau ju quijnanꞌan.

39 Para ju makꞌaniya quilacpaꞌitniꞌan jantu ixtakꞌasmatniputun ju Moisés.

Jantu ixtalacasqꞌuin ni ixꞌucxtinꞌan cava ju yuchi.

Va ixtaꞌanchokoputun ju xalacatꞌun Egipto.

40 Pus ju Moisés ixvilhchacaꞌ ju laxatalhpa Sinaí acsni tajuni ju Aarón ju quintꞌaꞌisraelitaninꞌan ni ma caꞌanavinilh tuꞌuꞌ ju ma isdiosꞌan cajunaꞌ chai ju ma caꞌapꞌulhniyach ju lacati.

Ma jantu ixtacꞌatsai tuchi ixtapasata ju anuꞌ Moisés ju amaxtulh laxalacatꞌun Egipto.

Ma chunch tajuni ju Aarón.

41 Pus ju acsnich taxapalaxtulh lakatam askꞌatꞌa vacax chai tamakninilh ju borregojni.

Na talhikꞌachalh ju anuꞌ ixtalaktsꞌinta tachi isdiosꞌan ju ixtanavita laꞌixmacaꞌan.

42 Pus yuchi alhimacaulh ju Dios chai lakꞌaꞌilh ni chach talhilacaꞌalh ju xataxtokni ju lactꞌiyan tachi ju avilhchan chai ju malhquiyuꞌ chai ju stꞌacu.

Pus tachi ju talalh tsꞌokcanta laꞌixꞌalhiquiꞌan ju lapanacni ju ixtanajun ixchivinti Dios.

Ju anch najun ni ma chani naulh ju Dios:

44 Pus ju makꞌaniya quilacpaꞌitniꞌan acsni ixtaꞌucxuntꞌajun junta aseknicꞌa ixtanavita lakatam lona chakaꞌ junta ixtamakꞌata ju chiux junta istsꞌokcanta ixlhamapꞌaksin ju Dios.

Chunch ju tanavilh ju anuꞌ chakaꞌ tachi ju lhinaulh ju Dios.

Chun tachi ju masunicalh ju Moisés.

45 Chai astan ju makꞌaniya quilacpaꞌitniꞌan ju ixtatꞌajun acsni kꞌai ucxtin ixjunita ju Josué vachuꞌ tachꞌixlhiꞌalh ju anuꞌ lona chakaꞌ acsni taquitaiꞌinilh ixlacatꞌunꞌan ju jantu istꞌaꞌisraelitaninꞌan ixtajunita.

Dios ju axcoxtulh ju amachakꞌan anch.

Chai ju anuꞌ lona chakaꞌ ixpujitatꞌan ixtanavita ju makꞌaniya quintꞌaꞌisraelitaninꞌan tus acsni tsuculh ju David.

46 Pus ju Dios na kꞌox xalhiulai ju David chai ju David sqꞌuinilh lamapainin ni laich canavi lakatam kꞌai pujitat.

Canavinilh isDios ju vachuꞌ isDios ixjunita ju makꞌaniya lapanac ju Jacob ixjuncan.

47 Para jantu lacasqꞌuinilh ju Dios.

Alai yuchi ju istsꞌalh David ju Salomón ixjuncan ju lhinaulh ixyajuca ju kꞌai pujitat.

48 Para ju vilhcha talaclhman jantu anch ju tꞌajun junta va yocantach lacamacaꞌ.

Vachuꞌ chunch naulh ju makꞌaniya lapanac ju ixnajun ixchivinti Dios.

Ju yuchi chani naulh:

51 Para iclajunau ni na kꞌox pꞌas ju miꞌalhunutꞌan ju uxijnan.

Ju uxijnan mas malacꞌasupꞌalatꞌit tachi ixlapanacni Dios para lana jantu kꞌasmatpꞌutꞌunatꞌit ju ixchivinti.

Lana jantu lacꞌaꞌipꞌutꞌunatꞌit.

Ju uxijnan aktsꞌiya sastꞌucꞌatꞌit acsni taxakꞌalayan ju Spiritu Santu.

Tachi ju ixtalai ju makꞌaniya milacpaꞌitniꞌan chunchach vachuꞌ ju layatꞌit ju uxijnan.

52 Ju makꞌaniya lapanacni ju ixtanajun ixchivinti Dios si alacmamakꞌalhkꞌajnikꞌocalh.

Tamamakꞌalhkꞌajnilh ju milacpaꞌitniꞌan.

Chai vachuꞌ alacmaknikꞌo ju pꞌulhnan taquinonchilh ni ma caminach pumatam ju soknicꞌa ju isꞌatsucunti.

Chai ju chavai ni quilachilh ju yuchi pus ju uxijnan makꞌaxtꞌaknitꞌit ju ucxtinin chai maknitꞌitch.

53 Mas yuꞌunch ju anquilhnin ju xataxtakniyan ju ixlhamapꞌaksin Dios para ixlaquilhtu jantu navitꞌatꞌit.

―Chunch ju ajuni ju ucxtinin ju Stipan.

54 Chai ju ixtavilanalh acsni takꞌasmatlh ju ixchivinti ju Stipan pus lana na tatalhkꞌamalh.

Tamalatantsꞌacakꞌo ju istatsalatꞌan ixtalhkꞌamtiꞌan.

55 Para ju Stipan ni ixlhinonkꞌojui ju Spiritu Santu laꞌixꞌalhunut pus skotutulacaꞌalh ju lactꞌiyan.

Laktsꞌilh ju Dios chai cꞌatsalh ni yuchach ju lhinonkꞌojui chux.

Chai vachuꞌ laktsꞌilh ju Jesús ju ixya laꞌixlhicana ju Dios.

56 Chai chani naulh ju Stipan:

―Alaktsꞌintꞌitch.

Talhtekꞌa ju lactꞌiyan chai iclaktsꞌin ju yuchi ju malakachatachilh ju Dios ni lapanac catsucuyaꞌ ju ani.

Chai ju yuchi ya vanin junta vi ju Dios.

57 Pus ju acsnich ju ucxtinin tsꞌau tsꞌau talactꞌasalh.

Lana alaccꞌatuchꞌapacalh.

Chai talakꞌalh ixchuxꞌan.

58 Tatixcauxtulh ju anuꞌ lakꞌachakꞌan.

Chai acsni tamaxtulh ixcujuꞌan taxtaknilh pumatam tsꞌalh ju Saulo ixjuncan.

Astan talacatꞌalhmalhch ju Stipan.

59 Pus acsni ixtatꞌajun lacatꞌalhmanin ju Stipan pus ju yuchi chani juni ju Dios:

―Quiꞌucxtin Jesús aqꞌuimaklhtꞌaich ju quintacuvin.

60 Acsni nonkꞌo ju chunch pus lana taꞌaktsokotalh.

Na pꞌas chivinilh.

Chani naulh:

―Quiꞌucxtin Dios tun alhimamakꞌalhkꞌajnitꞌi ju ani ya lapanacni ixlacata ju tuchi quintanavi.

Chai acsni naulh ju chunch lana nilh.