Ju Saulo alhimakchꞌapulh ju ixtalhilacaꞌanta ju Jesús
8
Ju Saulo na lhikꞌachalh acsni maknicalh ju Stipan.
Chai ju acs avilhchan vachuꞌ na amamakꞌalhkꞌajnicalh ju amachakꞌan Jerusalén ju ixtalhilacaꞌanta ju Jesús.
Pus ixlhiyuchi taꞌakpitsikꞌo.
Taꞌalh ju xaꞌestado Judea chai ju Samaria.
Va yuꞌunch ju ixtamalakachan ju Jesús ju jantu xatataxtui.
2 Pus ju aliꞌin lapanacni ju ixlhichux ixꞌalhunutꞌan ixtalhilacaꞌanta ju Dios taquimacnulh ju Stipan.
Chai slivasalh na ixtalhikꞌalhun.
3 Para ju Saulo tailhiꞌalh ixmamakꞌalhkꞌajnica ju ixtalhilacaꞌanta ju Jesús.
Ju yuchi ixtanui lakꞌachakꞌanixni chai ixꞌaxakꞌamaxtui ju jokꞌatni chai tꞌacunin chai alacquimakꞌaxtakcalh lacapulachꞌin.
Ajuncan ju amachakꞌan Samaria ixchivinti Dios
4 Para tachi chun ju taꞌakpitsilh ixtalacquilhuntꞌajun ixchivinti Dios vanta anchach ixtachaꞌan.
5 Pus pumatam sia yuꞌunch Pilipe ixjuncan.
Ju yuchi alh lakatam lakꞌachakꞌan laxaꞌestado Samaria chai alacjunich ju amachakꞌan anch ixlacata ju yuchi ju ixnoncan camalakachatachilh Dios.
6 Pus tatakꞌaixtoklh ju lapanacni chai ixlhichux ixꞌalhunutꞌan takꞌasmatnilh ju tuchi ixnajunch ju Pilipe.
Vachuꞌ ixtalaktsꞌinch ju lhamakꞌan ju ixnavi.
7 Ju anch na lhu ixꞌalin ju lapanacni ju ixtanun ju lhacaticurulhni laꞌixꞌalhunutꞌan.
Chai acsni alackꞌajicalh pus ju lhacaticurulhni tsꞌau ixtalactꞌasai chai ixtataxtui laꞌixlacatunaꞌan ju lapanacni.
Chai na lhu palai ixꞌanavicanta ju va ixtalaclhtuculunta chai ju aliꞌin ju jantu lai ixtaꞌalhtanan.
8 Pus yuchi na ixtalhikꞌachan ju amachakꞌan Samaria.
9 Para ixtꞌajun ju anch pumatam lapanac ju ixjuncan Simón.
Ju yuchi alhicujnuꞌ ixjunita ju anuch lakꞌachakꞌan tus makꞌanchich.
Chai na ixꞌaꞌokxchokꞌoi ju amachakꞌan anch.
Ju yuchi ixtalacasui tachi ju tam xakꞌai.
10 Pus tachi chun ju lapanacni na ixtaquiclacaꞌini ju ixchivinti.
Mas yuꞌunch ju askꞌatꞌan chai ju palai lackꞌajin.
Va ixtanajunch ni Dios ju xaxtakni ju kꞌai ixtachaput.
11 Na ixtaquiclacaꞌitach ni na makꞌanch ju xaꞌalacꞌokxchokꞌolhitꞌajun laꞌixꞌalhicujnut.
12 Para acsni quilacha ju Pilipe chai ajuni ni Dios lhinomputun laꞌisꞌatsucuntiꞌan ju lapanacni chai ajuni ixlacata ju Jesús ju ixnoncan camalakachatachilh ju Dios pus taquiclacaꞌilh ju jokꞌatni chai ju tꞌacunin chai taꞌakpaxlich.
13 Chai vachuꞌ lacaꞌilh ju Simón chai akpaxlh.
Chai tꞌaꞌalhtanatsuculh ju Pilipe.
Chai na ixlhamakꞌaninin acsni ixlaktsꞌin ju kꞌai lhamakꞌan ju ixnavi ju Pilipe chai acsni ixnavi ju tuꞌuꞌ ju lai catapucꞌatsalh ju lapanacni ni vasalh Dios ju xamalakachayachilh.
14 Pus ju ixtamalakachan ju Jesús ju ixtavilanancha Jerusalén acsni takꞌasmatlh ni ixtaꞌamaklhtayananta ju ixchivinti Dios ju amachakꞌan Samaria pus alacmalakachacancha ju Pitaluꞌ chai ju Xivan.
15 Chai ju yuꞌunch acsni tachaꞌalh tatapaininilh ju Dios ixlacaꞌatalhꞌan ju amachakꞌan anch ni laich catanu vachuꞌ laꞌixꞌalhunutꞌan ju yuꞌunch ju Spiritu Santu.
16 Pus tucaꞌ ixtanui ju Spiritu Santu laꞌixꞌalhunutꞌan ju yuꞌunch.
Va yuchi ni ixtaꞌakpaxtach ni ixtanajun ni ixtalhilacaꞌamputun ju ixꞌucxtinꞌan Jesús.
17 Pus ju acsnich ju Pitaluꞌ chai ju Xivan tamokslanilhch ixmacaꞌan laꞌixlacatunaꞌan ju yuꞌunch chai lanach tanu laꞌixꞌalhunutꞌan ju Spiritu Santu.
18 Pus ju Simón acsni amaklaktsꞌilh ju ixtamalakachan ju Jesús ni ixtamokslai ixmacaꞌan laꞌixlacatuna apumatam chai lana tanulh ju Spiritu Santu laꞌixꞌalhunut pus akꞌalhtasunilh ju tumin.
19 Chai chani ajuni:
―Aqꞌuixtꞌakninch vachuꞌ junima tachaput.
Ju chunch va tichi chavaich ju acmokslaniyaꞌ ju quimacaꞌ laꞌixlacatuna catanuyaꞌ ju Spiritu Santu laꞌixꞌalhunut.
20 Para ju Pitaluꞌ chanich juni:
―Ju uxintꞌi chai ju mintumin apꞌinaꞌitꞌit lacajipi ni laich naꞌun ni laich tamocan lacatumin ju tuꞌuꞌ ju xtꞌakꞌa ju Dios.
21 Ju uxintꞌi jantu lai atꞌimaknavitꞌi ju ani ixlhichꞌalhcat ju Dios.
Chai jantu lhijun ni anavitꞌi ni jantu salaka ju miꞌalhunut laꞌixmacni Dios.
22 Pus ju chavai amacꞌauch ju macxcai miꞌatalacpastꞌacꞌat.
Atꞌapꞌaininin ju ucxtin Dios ni camacꞌacxanin ju macxcai miꞌatalacpastꞌacꞌat ju alin lamiꞌalhunut.
23 Ju quitꞌin iccꞌatsai ni na tꞌalasai ju ixtaxtokni Dios ju uxintꞌi.
Chai ju miꞌalactuꞌunti tachi ju va tachꞌin navitan.
―Chunch ju junicalh ju Simón.
24 Pus ju acsnich akꞌalhtayanalh ju Simón.
Chanich ajuni:
―Asqꞌuinitꞌit ju uxijnan ju quiꞌucxtinꞌan Dios ju quilacata ni jantu chun actapasalh tachi ju quilajunau.
25 Pus ju Pitaluꞌ chai ju Xivan alacjuni ju lapanacni tuchi ixtalaktsꞌin ju ixnavi ju Jesús chai alacjuni ixlacata ju kꞌai ixꞌucxtinꞌan Jesús.
Chai acsni tataxtulh ju anch tatapasatilalh lakatamin lakatamin lakꞌachakꞌan tus tachaꞌalh ju lakꞌachakꞌan Jerusalén.
Para acsni ixtapasatilai ju lakatamin lakꞌachakꞌan ju alin ju xalacatꞌun Samaria ixꞌajuni ju amachakꞌan anch ta yu laich putakꞌalhtaxtucan ni jantu ancan ju lacajipi.
Ju Pilipe chai ju amachakaꞌ Etiopía
26 Chai acsni tapasalh ju ani taxtokni pus pumatam ixꞌanquilh ju kꞌai ucxtin Dios xakꞌala ju Pilipe chai chani juni:
―Ju chavai apꞌinchich ju lhisur.
Apꞌupꞌitꞌi ju xati lakꞌachakꞌan Gaza ju tachꞌapai ju lapanacni acsni taminacha ju lakꞌachakꞌan Jerusalén.
―Chunch ju juni.
Pus ju anuꞌ ti yuchach ju tapasata junta jantu xamatiꞌ tꞌajun.
27 Pus ju Pilipe taxtulh.
Alh.
Chai anch ju lacati ixtaimai pumatam lapanac amachakaꞌ Etiopía.
Pus ju yuchi xakꞌai ixjunita laxalacatꞌun Etiopía junta xaꞌucxtin ixjunita ju chakoꞌulh ju Candace ixjuncan.
Chai ju anuꞌ lapanac yuchi ju ixmalhistacni ju ixtumin ju anuꞌ kꞌai ucxtin.
Ju yuchi ixquilakꞌayata ju Dios ju lakꞌachakꞌan Jerusalén.
28 Chai ju chavai va ixꞌanchokoputun laꞌixchakaꞌ.
Chai acsni ixꞌanta laꞌixcarro ju ixakꞌamai ju caballo pus ixtꞌajun laktsꞌiniꞌ ju alhiqui ju istsꞌokta ju Isaías ju makꞌaniya lapanac ju ixnajun ixchivinti Dios.
29 Pus ju Spiritu Santu chani junilh ju Pilipe:
―Pꞌas apꞌitꞌi.
Vanin atꞌaimatꞌi ju anuꞌ carro.
30 Chai ju Pilipe acsni vanin lakꞌalh ju carro pus kꞌasmatlh ni ixtꞌajun nonaꞌ tachi ju istsꞌokta ju Isaías.
Chai chani juni:
―Ja machꞌakxaich tuchꞌi laktsꞌin.
31 Pus ju acsnich ju yuchi chani juni:
―Tas aclhimachakxalh ni matiꞌ xamatiꞌ ju aquimavasalanilh.
Chai ju acsni tapaininilh ju Pilipe ni catꞌatajulh ju laꞌixcarro.
32 Pus ju lacaꞌatsꞌoknut junta ixtꞌajun laktsꞌiniꞌ chani ixnajun:
Tachi ju tuꞌuꞌ borrego ni lhiꞌancan junta camaknicanaꞌ pus chunch vachuꞌ caꞌulhtucanaꞌ ju yuchi.
Chai tachi ju tuꞌuꞌ saꞌaskꞌatꞌa borrego ni jantu tꞌasai mas sitcanch pus chunchach vachuꞌ ju yuchi.
Lana jantu tuꞌuꞌ canonaꞌ.
33 Na catamamaxaniyaꞌ chai catamakniyaꞌ mas matiꞌ ju ixtalakꞌalhin.
Chai tis chavaich ju lai canonaꞌ ni caꞌalinaꞌ ju catachꞌakꞌokꞌayaꞌ ni camakꞌosunicanaꞌ ju isꞌatsucunti ju ani lacatꞌun.
Chunch ju najun junta ixtꞌajun laktsꞌiniꞌ ju anuꞌ lapanac.
34 Pus ju anuꞌ xakꞌai sacmilh ju Pilipe:
―Lamapainin aqꞌuiꞌunch.
Tis chavaich ju lhichivinin ju lapanac ju ixnajun ixchivinti Dios.
Ja isꞌakstu ju lhichivininchokoi u apumatam.
35 Pus ju acsnich ju Pilipe tsuculh amavasalaniniꞌ.
Pꞌulhnan amavasalanilh tuchi ixnomputun ju chivinti ju ixtꞌajun laktsꞌiniꞌ chai astan junilh aliꞌ ixlacata ju Jesús.
36 Chai acsni taꞌalh ju lacati pus tachaꞌalh junta ixma ju xcan.
Chai ju anuꞌ xakꞌai chani juni ju Pilipe:
―Alaktsꞌich ju xcan.
Ja jantu lai acꞌakpaxlh.
37 Pus ju Pilipe chanich juni:
―Ni lacꞌaꞌich ju ixlhichux ju miꞌalhunut pus laich calayaꞌ.
Chai akꞌalhtayanalh ju anuꞌ xakꞌai.
Chanich juni:
―Iclacaꞌich ni istsꞌalh Dios ju Jesús ju ixnoncan camalakachatachilh Dios.
38 Pus ju acsnich ju anuꞌ xakꞌai lhinaulh ixchꞌapayajuca ju ixcarro.
Chai ju yuchi chai ju Pilipe kꞌaixtamch tꞌataju lacxcan chai ju Pilipe makpaxa ju anuꞌ lapanac.
39 Chai acsni tatacutchokolh ju lacxcan pus ju iSpiritu Santu ju quiꞌucxtinꞌan Dios lana lacatam sokꞌo lhiꞌalh ju Pilipe.
Chai ju anuꞌ xakꞌai jantu laktsꞌinchokolh tavanan.
Para acsni xaꞌanchokoi ju lacati pus na ixkꞌachan.
40 Pus ju Pilipe lhitajucancha ju lakꞌachakꞌan Azoto.
Chai acsni taxtulh ju anch tapasatilalh lakatamin lakatamin lakꞌachakꞌan tus chaꞌalh ju lakꞌachakꞌan Cesarea.
Para acsni ixtapasatilai ju lakatamin lakꞌachakꞌan pus ixꞌajuni ju lapanacni ta yu laich cataputakꞌalhtaxtulh ni jantu cataꞌalh ju lacajipi.