Ju Saulo lhilacaꞌalh ju Jesús
9
Chai ju acsnich ju Saulo va tachi ispastactꞌajun ixꞌamaknica ju ixtalhilacaꞌanta ju kꞌai ucxtin Jesús.
Pus yuchi lhilakꞌalh ju xakꞌai ixpalijni ju istꞌaꞌisraelitanin.
2 Sqꞌuinilh lakatam alhiqui ju laich calhiꞌalh laꞌixpujitatꞌan ju istꞌaꞌisraelitanin ju amachakꞌan Damasco.
Ju chunch ni calhitajulh tam jokꞌat u tam chakoꞌulh ju chꞌakꞌokꞌata ju Jesús pus laich calhimilh tachꞌin ju lakꞌachakꞌan Jerusalén.
3 Para acsni ixꞌanta ju lacati chai vanin ixchaꞌamputun ju lakꞌachakꞌan Damasco pus lana mapulhcu junta ixꞌanta ju Saulo.
Lactꞌiyan ju xatapulhcuyacha ju anuꞌ maclhcu.
Tapulhcukꞌo chux ju lacatꞌun.
4 Pus ju Saulo lana tin taꞌaktalh ju lacatꞌun.
Chai kꞌasmatlh lakatam chivinti ju chani juni:
―Saulo.
Saulo.
Jantu alhimakchꞌapꞌu ju quilapanacni.
Acsni chun ju lai tachi ju va jun quitꞌin ju qꞌuilhimakchꞌapꞌui.
5 Chai ju Saulo kꞌalhtailh.
Chai juni:
―Tis chavaichꞌat ji ucxtin.
Chai ju anuꞌ ixtꞌajun chiviniꞌ kꞌalhtayanalh.
Chani juni:
―Quitꞌin ju icJesús ju na qꞌuimamakꞌalhkꞌajni.
Para acsni sastꞌucꞌa ju ixtaxtokni Dios alai miꞌakstu ju mamakꞌalhkꞌajnichꞌokꞌocꞌan.
―Chunch ju junilh ju Jesús.
6 Pus ju Saulo lana na alhqꞌuipꞌipꞌitnilh.
Na ixtalhanantach.
Chai chani juni:
―Quiꞌucxtin tijuch ju lacꞌasqꞌuin ju acnavi.
Chai ju ucxtin Jesús chani juni:
―Atꞌaich.
Aꞌinchich ju lakꞌachakꞌan.
Aꞌuncꞌantꞌachich tuchꞌi ju anaviyaꞌich.
7 Pus ju jokꞌatni ju ixtatꞌaꞌanta ju Saulo va sek talactaya.
Takꞌasmatlich vasalh ju chivinti para jantu xamatiꞌ ixtalaktsꞌin.
8 Pus ju Saulo lana kꞌostavi ju lacatꞌun.
Para acsni talacpokꞌa jantu lai ixlaktsꞌin tuꞌuꞌ.
Pus va macchꞌapalhiꞌancalh ju lakꞌachakꞌan Damasco.
9 Chai lakatꞌutu avilhchan jantu lai ixꞌalacꞌavanan.
Chai jantu vailh nin tuꞌuꞌ cakꞌotlh.
10 Pus ju anuch lakꞌachakꞌan Damasco ixtꞌajun pumatam lapanac ju Ananías ixjuncan.
Ju yuchi ixlhilacaꞌanta ju Jesús.
Pus ju ucxtin Jesús atalacasunilh tachi ju va laꞌixꞌaklakꞌavanti.
Chai xakꞌala.
Chai ju Ananías akꞌalhtayanalh.
Juni:
―Tijuch ji quiꞌucxtin.
11 Pus ju acsnich ju kꞌai ucxtin Jesús chani juni:
―Apꞌinchich ju lacati ju Soknicꞌa juncan.
Apꞌuxcꞌochiꞌ laꞌixchakaꞌ Judas pumatam ju Saulo juncan.
Ju yuchi amachakaꞌ Tarso junita.
Ju yuchi va quintꞌachivinin.
12 Chai ju yuchi laktsꞌintan tachi ju va laꞌixꞌaklakꞌavanti.
Laktsꞌinan ni tachi ju va xatꞌanui ju anch chai tachi ju va mucꞌanitꞌa ju mimacaꞌ laꞌixlakchulh ni laich caꞌalacꞌavananaꞌ.
―Chunch ju junicalh ju Ananías.
13 Para ju Ananías acsni kꞌasmatlh ju chunch pus chani juni ju Jesús:
―Para ji quiꞌucxtin na lhu quintajuni ixlacata ju anuꞌ lapanac.
Tanajun ni na ixꞌamamakꞌalhkꞌajni ju milapanacni ju tavilanancha ju lakꞌachakꞌan Jerusalén.
14 Chai ju chavai minta ju ani chai ju xalackꞌajin palijni tajuni ni laich aquintachꞌapakꞌoyan chux ju quijnan ju iclalhilacaꞌanau ju uxintꞌi.
15 Para ju kꞌai ucxtin Jesús chani juni:
―Aꞌinchich ni icsacxtutach ju yuchi ni canaviyaꞌ ju quilhichꞌalhcat.
Ju yuchi caꞌalacjunaꞌ ju lapanacni ju quilacata.
Caꞌalacjunaꞌ ju istꞌaꞌisraelitanin chai ju jantu israelitanin chai ju xalackꞌajin ucxtinin.
16 Chai quitꞌin ju acmalacasuniyaꞌ ni tasqꞌuini ni camakꞌalhkꞌajnanaꞌ ni aquinaviniyaꞌ ju quilhichꞌalhcat.
―Chunch ju junicalh ju Ananías.
17 Pus ju Ananías alh laꞌixchakaꞌ ju Judas junta ixtanun ju Saulo.
Chai acsni tanucha mucꞌanilh ixlacmacaꞌ laꞌixꞌucxni ixlakchulh ju Saulo chai chani juni:
―Quilakꞌau Saulo yuchi ju kꞌai quiꞌucxtinꞌan Jesús ju talacasunin ju lacati junta ixtꞌantꞌa.
Chai yuchi ju xaquimalakachanitachin ni laich alacꞌavananchꞌokꞌoyaꞌ chai laich calhinonaꞌ ju Spiritu Santu lamiꞌatsucunti.
18 Chai ju acsnich lana makꞌosucalh ju snapapa ataputsꞌi ju ixjucꞌalh laꞌixlakchulh.
Acsnich ju lai xaꞌalacꞌavanan.
Pus ju acsnich ju Saulo taxtulh.
Quimakpaxacalh.
19 Chai astan ju Saulo vailh chai kꞌachanchokolh ju ixlacatuna.
Pus lakatꞌui lakatꞌutu avilhchan alactꞌatavi ju amachakꞌan Damasco ju vachuꞌ ixtalhilacaꞌanta ju Jesús.
Ju Saulo ajuni ju amachakꞌan Damasco ixchivinti Dios
20 Chai lana antsuculh ju Saulo laꞌixpujitatꞌan ju istꞌaꞌisraelitanin.
Ixꞌajuni ju lapanacni ni vasalh istsꞌalh Dios ju Jesús.
21 Pus tachi chun ju takꞌasmatlh va ixtalhamakꞌaninin.
Ixtalaclajuni:
―Ja jantu yuchi ju ani ju na ixꞌalacmamakꞌalhkꞌajni ju amachakꞌan Jerusalén ju talhilacaꞌanta ju Jesús.
Chai ja jantu vachuꞌ yuchi xalhiminch ju ani ni calhiꞌaniyach tachꞌinin ju xalackꞌajin palijni ju amachakꞌan ani ju talhilacaꞌanta ju Jesús.
22 Pus ju Saulo lacsni lacsni palai jantu ixtalhanan acsni ixnajun ixchivinti Dios.
Chai acsni lana vas amavasalanilh ju istꞌaꞌisraelitanin amachakꞌan Damasco ni Jesús yuchach ju ixnoncan camalakachatachilh ju Dios pus jantu lai tuꞌuꞌ xatamapuspitni ju chivinti.
Ju Saulo takꞌalhtaxtulh acsni ixtamakniputun ju istꞌaꞌisraelitanin
23 Para acsni tapasalh na lhu avilhchan pus ju israelitanin tanavilh lakatam chivinti sia yuꞌunch junta ixtanajun ni catamakniyaꞌ ju Saulo.
24 Para mamachakxanicalh ju Saulo ni ixlhiꞌokxchivincan.
Pus ju anuch lapanacni tontacuj chai tontatsꞌisni ixtalhistꞌacꞌa ju xamalhtich junta putaxtucan ju anuch lakꞌachakꞌan.
Va ixtamakniputunch ju Saulo.
25 Para ju aliꞌin ju ixtalhilacaꞌanta ju Jesús tamakꞌalhtaxtulh ju Saulo.
Ixꞌalin ju lacchakaꞌ ju ixtꞌalachꞌapata ju kꞌex ju ixvi ixtalakachoko ju anuꞌ lakꞌachakꞌan.
Pus tsꞌis ju taquimujulh ju Saulo lacakꞌai tankꞌalin chai lacaventana tapumaxtulh lhiꞌavinti lacakꞌex.
Chai ju yuchi atsꞌalalh.
Ju Saulo ixvi ju lakꞌachakꞌan Jerusalén
26 Acsni tavanan chaꞌanchokolh ju Jerusalén ju Saulo pus va kꞌaixtam ixꞌalactꞌaꞌamputun ju aliꞌin ju ixtalhilacaꞌanta ju Jesús.
Para ixchuxꞌan ju yuꞌunch na ixtatalhoni.
Jantu ixtalacaꞌi ni vachuꞌ calhilacaꞌalh ju Jesús ju yuchi.
27 Para ju Bernabé alhiꞌanilh ixtamalakachan ju Jesús.
Chai ajunchalh ta yu pulaktsꞌilh ju kꞌai ucxtin Jesús ju Saulo ju lacati chai tꞌachivinilh.
Vachuꞌ ajuni ni lana jantu ixtalhanan ju Saulo acsni ixꞌajuni ju amachakꞌan Damasco ixlacata ju Jesús.
28 Pus ju acsnich ju Saulo lai ixꞌalactꞌaꞌalhtanan ju ixtamalakachan ju Jesús.
Chai tavilh ju lakꞌachakꞌan Jerusalén.
29 Chai ixꞌajuni ju amachakꞌan anch ixlacata ju kꞌai ucxtin Jesús.
Chai ixꞌalactꞌachivinin chai ixꞌalactꞌalalhajai lacachivinti ju istꞌaꞌisraelitanin ju ixtachivinin ju lhigriego.
Para ju yuꞌunch va ixtapastꞌacꞌa ixmaknica.
30 Para acsni tacꞌatsa ju ixlhiꞌalakꞌavin laꞌixmacni Jesús pus takꞌailhiꞌalh ju Saulo ju lakꞌachakꞌan Cesarea.
Tamalakacha ju lakꞌachakꞌan Tarso.
31 Pus ju acsnich tamamacta ju ixꞌalhixcajicaꞌan tachi chun ju ixtalhilacaꞌanta ju kꞌai ixꞌucxtinꞌan Jesús ju amachakꞌan ju xaꞌestado Judea chai ju xaꞌestado Galilea chai ju xaꞌestado Samaria.
Chai ju yuꞌunch lana ixlhichux ixꞌalhunutꞌan talhilacaꞌalh ju kꞌai ixꞌucxtinꞌan Jesús.
Na ixtaquiclacaꞌitach ju tuchi ixnajunta ju Dios chai na ixtatalhavai.
Yuchach ju Spiritu Santu ju ixꞌaꞌaktaijui.
Palai navicalh ju Eneas
32 Pus ju Pitaluꞌ lacaputocꞌakꞌo junta ixꞌalin ju ixtalhilacaꞌanta Jesús.
Pus vachuꞌ alh alaktsꞌiniꞌ ju ixtalhilacaꞌanta Jesús amachakꞌan Lida.
33 Chai ju anch ju Pitaluꞌ lhitajulh pumatam lapanac ju Eneas ixjuncan.
Ju yuchi lakatsajin cꞌata ixma laꞌixputaman.
Va ilhtuculuntach.
34 Chai chani junich ju Pitaluꞌ:
―Eneas Jesucristo ju palai canaviyan.
Akꞌostꞌaꞌulh.
Asactꞌich ju mimputaman.
Pus ju Eneas lana kꞌostavi.
35 Pus chux ju amachakꞌan Lida chaich ju amachakꞌan Sarón talaktsꞌilh ju anuꞌ lapanac ni palaich ixnavicanta chai tamacaulh tachi ju aktsꞌiya ixtalhilanita chai talhilacaꞌalh ju kꞌai ucxtin Jesús.
Malokꞌonichokocalh ju Dorcas acsni ixnita
36 Pus ju acsnich ixtꞌajun ju lakꞌachakꞌan Jope pumatam chakoꞌulh ju vachuꞌ ixlhilacaꞌanta Jesús.
Ju yuchi Tabita ixjuncan.
Ju lacalhigriego va Dorcas ixjuncan.
Pus ju anuꞌ chakoꞌulh va tachi ixnavich ju kꞌox chai ixꞌaꞌaktaijui ju quilhpatinin.
37 Chai acsni ixvilhchacaꞌ ju Lida ju Pitaluꞌ pus ju anuꞌ chakoꞌulh takꞌankꞌa chai nilh.
Pus ju lapanacni tapaxa chai talhiꞌalh ixlhitantalaktꞌui lacachakaꞌ.
Anchach ju tamama.
38 Chai ju amachakꞌan Jope ju ixtalhilacaꞌanta Jesús ni tacꞌatsa ni ixvilhcha ju Lida ju Pitaluꞌ pus tamalakachanilh pumatꞌui lapanacni.
Pus ju lakꞌachakꞌan Lida vanin ixtꞌalajunita ju lakꞌachakꞌan Jope.
Pus ju anuch lapanacni tatapaininilh ju Pitaluꞌ ni vatsꞌalhti caꞌalactꞌamilh.
39 Pus ju Pitaluꞌ lana lacataya chai alactꞌaꞌalh ju yuꞌunch.
Chai acsni tachaꞌalh ju lacachakaꞌ talhiꞌalh ixlhitantalaktꞌui lacachakaꞌ junta ixma ju lijunto.
Pus lhmalanch ixtalhitakꞌaixtokta ju chakolun ju va alacnimacontilacantach.
Na ixtalackꞌalhun.
Ixtatꞌajun masuninin ju ixlacvestidoꞌan chai ixlacxcujuꞌan ju ixꞌanavinita ju Dorcas acsni ixtꞌajuncaꞌ.
40 Para ju Pitaluꞌ alactixcoxtukꞌo.
Chai ju yuchi taꞌaktsokotalh.
Tsuculh tꞌachiviniꞌ ju Dios.
Chai acsni lhilacaꞌanilh junta ixma ju lijunto chani juni:
―Tabita akꞌostꞌaich.
Pus ju yuchi lana talacpokꞌa chai acsni laktsꞌilh ju Pitaluꞌ kꞌostavi.
41 Pus ju Pitaluꞌ xtaknilh ixmacaꞌ.
Sayaulh.
Ju acsnich alactꞌasanilh ju vachuꞌ ixtalhilacaꞌanta Jesús chai ju anuch chakolun ju ixꞌalacnimacontilacantach.
Alacmasunilh ju chakoꞌulh ni ixlokꞌonchokotach.
42 Pus ju ani laccꞌatsakꞌocalh ixlhilacaputsꞌun ju lakꞌachakꞌan Jope.
Chai na lhu ju talhilacaꞌalh ju kꞌai ucxtin Jesús.
43 Pus ju Pitaluꞌ na lakalhu avilhchan ixvilhcha ju lakꞌachakꞌan Jope laꞌixchakaꞌ pumatam lapanac ju Simón ixjuncan.
Ju yuchi va ixlakꞌoxiniꞌ axtꞌakꞌan ixjunita.