Pitaluꞌ chai Cornelio
10
Pus ixꞌalin pumatam lapanac amachakaꞌ Cesarea ju Cornelio ixjuncan.
Ju yuchi xaꞌucxtin tam cientos taropajni ixjunita chai ju anuch taropajni Italiano ixꞌajuncan.
2 Pus ju yuchi chai chux ju ixtatanumanalh laꞌixchakaꞌ ixtalhilacaꞌanta ju Dios chai ixtalakꞌayai.
Chai ju yuchi na lhu ixꞌaxtakni ju tumin ju quilhpatinin sia yuꞌunch ju israelitanin mas jantu israelita ixjunita ju yuchi.
Chai va tachi ixtꞌachivinin ju Dios.
3 Pus lakatam avilhchan tachi lakatꞌutu hora atokꞌoxanaꞌ ju Cornelio laktsꞌilh pumatam ixꞌanquilh ju Dios.
Para tachi ju va laꞌixꞌaklakꞌavanti ju laktsꞌilh.
Chai ju anuꞌ anquilh mapakaꞌulh ju Cornelio.
4 Pus ju Cornelio lana va skotutukꞌalhi chai talhanakꞌalhtailh:
―Tijuch ji quiꞌucxtin.
Chai chani juncanch ju Cornelio:
―Ju Dios pastacnikꞌo acsni ixtꞌachꞌivinin ju yuchi chai ixlacata ju tumin ju pꞌuꞌaktꞌaiꞌui ju quilhpatinin.
5 Pus ju chavai amalakꞌachꞌatꞌich ju lapanacni lakꞌachakꞌan Jope.
Chach taꞌalh tꞌasaniniꞌ pumatam lapanac ju Simón juncan.
Ju yuchi vachuꞌ Pitaluꞌ juncan.
6 Ju yuchi tꞌajun laꞌixchakaꞌ pumatam ju vachuꞌ Simón juncan.
Yuchi ju alakꞌoxiniꞌ axtꞌakꞌan.
Ju yuchi amachakꞌananta vanin laꞌixquilhtuꞌ alama.
Pus yuchi ju cajunanch tuchi ju anaviyaꞌich.
7 Pus acsni anchokolh lactꞌiyan ju anuꞌ anquilh ju quitꞌachivininchilh ju Cornelio pus ju yuchi tꞌasanilh pumatꞌui ixlapanacni chai pumatam ixtaropa ju ixnavini ixlhichꞌalhcat.
Pus ju anuꞌ taropa vachuꞌ ixlhilacaꞌanta ju Dios.
8 Pus ju Cornelio ajunkꞌo tuchi ixtapasata chai amalakachalh ju lakꞌachakꞌan Jope.
9 Ni tuncunchokopa ixtaꞌanta ju lacati chai acsni ixkꞌatuncumputun pus vanin ixtachaꞌamputun ju lakꞌachakꞌan Jope.
Pus lana acsnich ju tocꞌalh lacasotea ju Pitaluꞌ.
Va ixtꞌachivimputun ju Dios.
10 Para slivasalh na ixchavanita chai na ixvemputunch.
Chai acsni ixtꞌoncan lakꞌoxinica ju ixvaiti pus ju yuchi lana laktsꞌilh tuꞌuꞌ tachi ju va laꞌixꞌaklakꞌavanti.
11 Laktsꞌilh ju lactꞌiyan ni talhtekꞌa chai takꞌalhtajulh tuꞌuꞌ tachi lakatam kꞌai pumpuꞌ.
Makꞌastutꞌatꞌi ixchꞌinicanta.
Takꞌalhtaju tus lacatꞌun junta ixvi ju Pitaluꞌ.
12 Chai laktsꞌilh ni anch ju ixtatanumanankꞌo tachi chun ju atapacxat ju alhtanan ju ani lacamunutpaꞌ.
Vachuꞌ ixtatanumanalh ju lu chaich ju tsꞌokꞌo.
13 Chai ju acsnich ju Pitaluꞌ kꞌasmatlh ixchivinti pumatam ju chani juni:
―Akꞌostꞌaꞌulhch ji Pitaluꞌ.
Amaknitꞌich ju ani tayanalh atapacxat.
Aꞌuyaꞌich.
14 Para ju Pitaluꞌ chani akꞌalhtayanalh:
―Jantu ji quiꞌucxtin.
Ju quitꞌin jantu tavanan icꞌuta tuꞌuꞌ ju jantu lai ucan tachi ju iclhilanitau ju quijnan ju israelitanin icjuntau.
15 Pus xakꞌalachokocalh ju Pitaluꞌ ixlhipaktꞌuich.
Chanich ju juni:
―Ju najuntach ju Dios ni lai ucan tun va anau ni jantu lai ucan.
16 Pus paktꞌutu ju junicalh chunch chai astan ju kꞌai pumpuꞌ lhiꞌanchokocalh ju lactꞌiyan.
17 Pus ju Pitaluꞌ ispastacvi laꞌixꞌalhunut tuchi ju canomputulh ju anuꞌ ju laktsꞌilh tachi ju va laꞌixꞌaklakꞌavanti.
Pus lana acsnich ju talhasacminilh ju ixchakaꞌ ju Simón ju lapanacni ju ixꞌamalakachanicantachilh ju Cornelio.
Ixtachaꞌanta ju laꞌixquilhtalacxtutu ju ixchakaꞌ ju Simón.
18 Tachivinilh.
Taꞌasacminilh ni anch catavi ju Simón ju vachuꞌ juncan Pitaluꞌ.
19 Pus ju Pitaluꞌ vana ixtꞌajun pastacnaꞌ ju tuchi ixlaktsꞌinta tachi ju va laꞌixꞌaklakꞌavanti.
Pus ju acsnich lana chani junilh ju Spiritu Santu:
―Ixpumatꞌutuꞌan lapanacni tapuxcoyan.
20 Akꞌostꞌaꞌulh.
Atꞌakꞌalhtꞌaꞌutꞌich.
Atꞌapꞌinchich chai tun va atꞌilhamakꞌanin ni quitꞌin ju icꞌamalakachanitachin.
21 Pus ju acsnich ju Pitaluꞌ alakꞌalh ju ixtamalakachan ju Cornelio chai chani ajuni:
―Quitꞌinch ju quilapuxcoyau.
Tijuch ju quilhilalakmintauch.
22 Chai ju yuꞌunch chani tajuni:
―Yuchi ju Cornelio ju quintamalakachanitachin.
Ju yuchi xaꞌucxtin tam cientos taropajni junita.
Chai ju yuchi na kꞌox lapanac junita chai na lhilacaꞌanta ju Dios.
Chai tachi chun ju israelitanin na kꞌox lapanac talhiulai.
Pus ju yuchi ma malakachanicanchilh ju ixꞌanquilh Dios chai ju yuchi ma juni ni ma catꞌasaniyan ni ma laich cakꞌasmatnin ju tuchꞌi aꞌunaꞌich.
―Chunch tajuni ju Pitaluꞌ ju anuch lapanacni.
23 Pus ju acsnich ju Pitaluꞌ ajunich ni catatanu pulacni.
Chai anch ju talakacujlich.
Chai acsni tuncunchokopa pus alactꞌaꞌalh.
Vachuꞌ tamakꞌalh aliꞌin amachakꞌan Jope ju vachuꞌ ixtalhilacaꞌanta Jesús.
24 Acsni alakatamch avilhchan jumpa tatanucha ju lakꞌachakꞌan Cesarea.
Pus ju Cornelio na ixꞌalacpacxanvi.
Ixꞌalactꞌasanitach ju ixlhiꞌalakꞌavin chai ju aliꞌin ju palai kꞌox ixꞌamigojni ixtajunita.
25 Chai acsni chaꞌalh ju Pitaluꞌ pus taxtuchilh ju Cornelio ni camacꞌamiyaꞌ.
Taꞌaktsokotanilh vanin laꞌixchꞌajaꞌ.
Va ixlakꞌayaputun.
26 Para ju Pitaluꞌ makchꞌapayaulh.
Chanich juni:
―Atꞌaich.
Ju quitꞌin vachuꞌ va iclapanac.
27 Pus tsuculh tꞌachiviniꞌ chai tꞌatanu laꞌixchakaꞌ.
Chai ju anch alhitaju na lhu lapanacni ju ixtatakꞌaixtokta.
28 Chai chani alacjuni:
―Ju uxijnan cꞌatsꞌayatꞌit ni iclhilanitau ju quijnan ju israelitanin icjuntau ni talakꞌalhin cava ni actꞌalaktanu pumatam ju jantu israelita.
U mas va actanu laꞌixchakaꞌ.
Para ju Dios quimasunita ni jantu xamatiꞌ ju va jantu tuꞌuꞌ ixtapalhni cava.
Chai jantu kꞌox ni acnaulh ni jantu ictꞌaꞌalhtanamputun xamatiꞌ.
29 Pus yuchi iclhimilh acsni qꞌuintꞌasanich chai jantu tuꞌuꞌ xacꞌajuni ju xamalakꞌachꞌayachiꞌ.
Chai ju chavai iclasacmiyau tuchi ju quilalhitꞌasaniyauch.
30 Pus ju Cornelio junich:
―Lakatꞌatꞌich avilhchan xajun acsni xacvi laquinchakaꞌ.
Tachi chavai hora ixjunita.
Jantu tuꞌu xacꞌuta chai xactꞌajun tꞌachiviniꞌ ju Dios.
Chai iclaktsꞌilh pumatam anquilh ju taya laquiꞌucxlacapuꞌ.
Na slamnica ixjunita ju ixpumpuꞌ.
31 Chai quijuni ni ma quinkꞌasmatnitach ju Dios acsni ictꞌachivinilh.
Chai ma pastackꞌojui ju lamapainin ju xacꞌanavinita ju quilhpatinin.
32 Chai quijuni ni ma acmalakachalh ju quilapanacni ju cataꞌalh ju lakꞌachakꞌan Jope.
Ma chach takꞌailhiminan ju uxintꞌi.
Ma anch ju tꞌaꞌun ju laꞌixchakaꞌ akꞌantam Simón ju ixlakꞌoxiniꞌ axtꞌakꞌan.
Ju yuchi ma anch amachakꞌananta vanin laꞌixquilhtuꞌ alama.
Chai ma acsni atꞌanaꞌ pus ma aqꞌuiꞌunaꞌ ju ixchivinti Dios.
Chunch ju quijuni.
33 Pus yuchi vatsꞌalhti iclhimalakachanichan ju quilapanacni.
Chai na kꞌoxich ni xatꞌan.
Pus ju chavai ju Dios quintalaktsꞌinan tachi chun ju quijnan ju anich icvilau chai ickꞌasmatputunau tachi chun ju chivinti ju xajunan ju Dios.
Ju Pitaluꞌ axakꞌala ju lapanacni ju ixtavilanalh laꞌixchakaꞌ ju Cornelio
34 Pus ju acsnich ju Pitaluꞌ chani ajuni:
―Ju chavai icmachakxai ni vasalh vaklhtam chun ju alaktsꞌin ju lapanacni ju Dios.
35 Va tichi lapanac cava ju lakꞌayai chai canavi ju soknicꞌa pus yuchi ju kꞌox lhiulai ju Dios.
U ni quintꞌaꞌisraelita junita u ni jantu.
36 Ju Dios quintamalakachanichin ju ixchivinti ju quijnan ju israelitanin icjuntau.
Quintajunan ni makꞌoxamixican laꞌixꞌalhunut ju Dios acsni lhilacaꞌancan ju Jesús ni yuchach ju ixnoncan camalakachatachilh ju Dios.
Yuchi ju xaꞌucxtin lhichux.
37 Ju uxijnan cꞌatsꞌayatꞌitch ni ixꞌamalaninin ju Xivan chai ixꞌamakpaxanan.
Chai cꞌatsꞌayatꞌit ni astan tsuculh amalaninin ju Jesús.
Ju yuchi taiꞌulacha ju ixꞌamalaninti ju xaꞌestado Galilea chai lacaputocꞌakꞌo chux ju lakꞌachakꞌan junta ixtatꞌajun ju quintꞌaꞌisraelitanin.
38 Ju uxijnan cꞌatsꞌayatꞌit ni Dios ju xtaknilh ju Jesús amachakaꞌ Nazaret ju Spiritu Santu ju xatanui laꞌixꞌalhunut chai ixlhiyuchi na ixꞌalin ju ixtachaput.
Cꞌatsꞌayatꞌit ni va tachi ixnavitꞌajun ju kꞌox ju Jesús chai ixꞌacꞌuchꞌukꞌojui chux ju ixmamakꞌalhkꞌajni ju lhacaticuru.
Lai chunch xanavi ni yuchi ju Dios ju ixtꞌaꞌalhtanan.
39 Ju quijnan iclaktsꞌiuch tachi chun ju ixnavi ju Jesús ju xalacatꞌun Judea chai ju lakꞌachakꞌan Jerusalén.
Para astan ju lapanacni tamakni.
Tamaquilhta ju lacacurus.
40 Para ju Dios malokꞌoni ixlhilakatꞌutu avilhchan chai quintamalacasunin ju quijnan.
41 Para jantu chux ju lapanacni ju talaktsꞌilh.
Va quijnan ju makꞌanch quintasacxtutanch ju Dios ni acnonauch ju tuchi iclaktsꞌintauch.
Pus ju quijnan ictꞌavajiuch ju yuchi acsni tavanan lokꞌonchokolh laꞌixꞌaninti.
42 Chai yuchi ju pꞌas quintajunan ni acꞌajunau tachi chun ju lapanacni ni Dios ju ulata ju Jesús ni yuchi ju calaktsꞌintanuyach ju lapanacni ju titꞌajuncaꞌ chai ju tanitach.
43 Yuchi ju ixtalhichivinin chux ju makꞌaniya lapanacni ju ixtanajun ixchivinti Dios.
Ju yuꞌunch ixtanajun ni ma camacꞌacxanicanaꞌ ixtalakꞌalhin va tichi chavaich ju calhilacaꞌanaꞌ ju Jesús.
Ju Dios ma camacꞌacxaniyaꞌ va ixlacata ni nilh ju Jesús.
―Chunch ju ajuni ju Pitaluꞌ.
Ju lapanacni ju jantu israelitanin taꞌamaklhtayanalh ju Spiritu Santu
44 Chai acsni ixtꞌajuncaꞌ chiviniꞌ ju Pitaluꞌ pus lana alakmilh ju Spiritu Santu tachi chun ju ixtatꞌajun kꞌasmatnin ju ixchivinti.
45 Pus ju israelitanin ju ixtalhilacaꞌanta ju Jesús ju ixꞌalactꞌamintach ju Pitaluꞌ na talhamakꞌaninilh ni axtaknicalh vachuꞌ ju Spiritu Santu ju yuꞌunch ju jantu israelitanin ixtajunita.
46 Pus ni ixtachivinin atumpa chivinti ju jantu ixtamispai chai ixtanajun ni yuchach ju xakꞌai ju Dios yuchi ixtalhinajun ju ixꞌalactꞌaminta ju Pitaluꞌ ni taꞌamaklhtayanalh ju Spiritu Santu ju anuch lapanacni.
47 Ju acsnich ju Pitaluꞌ ajunich ju ixꞌalactꞌaminta:
―Jantu lai xamatiꞌ catilhikꞌalhtsꞌaulh ju xcan ni jantu cataꞌakpaxlh ju anich tavilanalh ni vachuꞌ taꞌamaklhtayanalh ju Spiritu Santu tachi ju quijnanꞌan.
48 Pus ju acsnich ju Pitaluꞌ alhinaulh ixꞌamakpaxaca ni ixtalhilacaꞌanta ju kꞌai ucxtin Jesús.
Chai astan ju yuꞌunch tatapaininilh ju Pitaluꞌ ni catolhcha lakatꞌui lakatꞌutu avilhchan.