Ju Pitaluꞌ ajuni ju lapanacni amachakꞌan Jerusalén tuchi ixtapasata
11
Pus ju ixtamalakachan ju Jesús chai ju aliꞌin ju vachuꞌ ixtalhilacaꞌanta Jesús ju ixtavilanancha ju xaꞌestado Judea takꞌasmatlh ni vachuꞌ talacaꞌinilh ixchivinti Dios ju yuꞌunch ju jantu israelitanin ixtajunita.
2 Chai acsni tavanan anchokolh ju Jerusalén ju Pitaluꞌ pus ju aliꞌin istꞌaꞌisraelitanin ju vachuꞌ ixtalhilacaꞌanta Jesús tatꞌalakꞌailh.
3 Tajunich:
―Tajuch ni va xalakpꞌinch ju lapanacni ju jantu quintꞌaꞌisraelitaninꞌan tajunita chai laich va lakputam xaꞌalactꞌavaꞌin.
4 Pus ju Pitaluꞌ lana ajunkꞌo tachi chun ju ixtapasatach.
Alacjuni:
5 ―Ju quitꞌin xacvilhcha ju lakꞌachakꞌan Jope.
Xactꞌajun tꞌachiviniꞌ ju Dios.
Chai iclaktsꞌilh tuꞌuꞌ tachi ju va kꞌai pumpuꞌ.
Makꞌastutꞌatꞌi ixchꞌinicanta.
Chai makꞌalhtajucalh ju lactꞌiyan.
6 Pus ju quitꞌin na icskotutulh chai iclaktsꞌilh ni anch ixtatajumanalh ju atapacxat chai ju maktilin chai ju lu chai ju tsꞌokꞌo.
7 Chai ickꞌasmatlh lakatam chivinti junta quijuni ni ma ackꞌostavi.
Ma acꞌamaknilh ju anuꞌ ixtayanalh atapacxat chai ma acꞌulh.
8 Para ju quitꞌin icjunich:
“Jantuch ji quiꞌucxtin.
Ju quitꞌin jantu tavanan icquilhcꞌatsata ju tuꞌuꞌ ju jantu lai ucan tachi ju iclhilanitauch ju quijnan ju israelitanin icjuntau”.
Chunch icjuni.
9 Para aktam quinkꞌalhtaichokocalh tus lactꞌiyan.
Chai quijuni ni ma jantu acnaulh ni jantu lai ucan tuꞌu acsni najuntach ju Dios ni lai ucan.
10 Paktꞌutuch xaquijuni ju Dios ju chunch chai astan lhiꞌanchokocalh ju anuꞌ kꞌai pumpuꞌ ju lactꞌiyan.
11 Pus ju acsnich lana tachilh ixpumatꞌutuꞌan lapanacni ju lacachakaꞌ junta xacvi.
Amachakꞌan Cesarea ixtajunita.
Quiꞌamalakachanicanchilh.
12 Pus ju Spiritu Santu quijunilh ni acꞌalactꞌaꞌalh chai jantu actilhamakꞌaninilh.
Pus icꞌalactꞌaꞌalh chai ju ani ixpumachaxanꞌan quiꞌalakꞌavinꞌan quintatꞌaquilalh.
Pus ictanuchauch laꞌixchakaꞌ ju anuch lapanac ju xaquintꞌasanita.
13 Chai ju yuchi quintajunin ni ma ixlaktsꞌinta pumatam anquilh laꞌixchakaꞌ.
Ma anch ixya chai ma juni ni ma camalakachalh ju ixlapanacni ni ma cataꞌalh ju lakꞌachakꞌan Jope.
Ma calhinaulh quintꞌasanica ju quitꞌin.
14 Ma quitꞌin ju acꞌajunach ju chivinti ju lai cataputakꞌalhtaxtuyaꞌ ju yuchi chai chux ju tatanun laꞌixchakaꞌ.
15 Chai acsni ictsuculh chiviniꞌ pus vachuꞌ alakmilh ju Spiritu Santu ju yuꞌunch tachi ju quintalakminch ju quijnanchꞌan ju makꞌanch.
16 Pus ju acsnich icpastaclich ju ixchivinti ju quiꞌucxtinꞌan Jesús acsni quintajunin ni ma slivasalh amakpaxanalh lacaxcan ju Xivan.
Para ju quijnan ma acꞌamaklhtayananau ju Spiritu Santu tachi ju aliꞌin taꞌamaklhtayanalh ju xcan acsni taꞌakpaxlh.
Ma chunch quintajunin ju Jesús.
17 Pus Dios ju alacxtaknilh vachuꞌ ju Spiritu Santu ju yuꞌunch tachi ju quintaxtaknitan ju quijnanꞌan acsni lhilacaꞌantauch ju quiꞌucxtinꞌan Jesucristo.
Chai ni chunch ju xalai pus tis chavaich ju quitꞌin ni lai acsaspitlh ju Dios.
―Chunch ajuni ju lapanacni ju Pitaluꞌ.
18 Pus acsni takꞌasmatlh junima chivinti lana sek tatavi ju ixtamalakachan ju Jesús chaich ju aliꞌin.
Tatsuculh lakꞌayanin ju Dios.
Chai tanaulh:
―Ni sala chunch ju xatapasai pus ju Dios aktsꞌiya lacasqꞌuin ni vachuꞌ caꞌalilh ju isꞌatsucuntiꞌan ju lactꞌiyan ju yuꞌunch ju jantu israelitanin tajunita acsni va catamacaulh ju ixꞌalactuꞌuntiꞌan.
Ju lapanacni amachakꞌan Antioquía talhilacaꞌalh ju Jesús
19 Acsni tavanan maknicalh ju Stipan pus tsucucalh mamakꞌalhkꞌajninin ju aliꞌin ju vachuꞌ ixtalhilacaꞌanta ju Cristo chai taꞌatsꞌalalh ju yuꞌunch.
Ju aliꞌin sia yuꞌunch taꞌalh tus laxalacatꞌun Fenicia chai ju xalacatꞌun Chipre chai ju lakꞌachakꞌan Antioquía.
Pus ju anch jantu xamatiꞌ ixtajuni ju ixchivinti Dios.
Va yuꞌunch ju istꞌaꞌisraelitanin.
20 Para ju sia lhiyuꞌunch ixtamakminta vachuꞌ amachakꞌan Chipre chai Cirene.
Pus ju yuꞌunch acsni tatanucha ju lakꞌachakꞌan Antioquía vachuꞌ alacjuni ju jantu israelitanin ni laich catatakꞌalhtaxtulh chai jantu cataꞌalh ju lacajipi ni catalhilacaꞌalh ju kꞌai ucxtin Jesús.
21 Pus ju kꞌai ucxtin Jesús na alacꞌaktaijulh chai ixlhiyuchi na pumalhu tamacaulh tachi aktsꞌiya ixtalhilanitach chai talhilacaꞌalh ju kꞌai ixꞌucxtinꞌan Jesús.
22 Pus acsni takꞌasmatcha ju amachakꞌan Jerusalén ju vachuꞌ ixtalhilacaꞌanta Jesús ju tuchi ixtꞌajun tapasanaꞌ ju lakꞌachakꞌan Antioquía pus lana tamalakachalh ju Bernabé ni caꞌalh ju anch.
23 Chai acsni chaꞌalh ju yuchi pus laktsꞌilh ni na lhu ixꞌaꞌaktaijuta ju Dios laꞌixꞌamapaininti chai na lhikꞌachalh.
Chai alakmapꞌaksilh ixchuxꞌan ni ixlhichux ixꞌalhunutꞌan catachꞌakꞌokꞌakꞌalhilh ju kꞌai ixꞌucxtinꞌan Jesús.
24 Ju Bernabé na kꞌox lapanac ixjunita chai ju Spiritu Santu ixlhinonkꞌojui laꞌisꞌatsucunti chai ixlhichux ixꞌalhunut ixlhilacaꞌanta ju Jesús.
Pus ju lapanacni acsni takꞌasmatnilh ju ixchivinti na lhu talhilacaꞌalh ju kꞌai ucxtin Jesús.
25 Pus ju astanch ju Bernabé taxtulh.
Alhch ju lakꞌachakꞌan Tarso.
Alh puxconaꞌ ju Saulo.
Chai acsni lhitajucha tꞌamilh ju yuchi ju lakꞌachakꞌan Antioquía.
26 Chai tam cꞌata tatꞌatolhcha ju amachakꞌan anch ju ixtalhilacaꞌanta ju Jesús.
Chai na lhu lapanacni amalanicalh ixchivinti Dios.
Pus ju lakꞌachakꞌan Antioquía anchach ju pꞌulhnan alhimapakaꞌucanchalhch ju ixtalhilacaꞌanta Jesús laꞌixtapakaꞌut ju Cristo.
27 Chai acsni ixvilhcha ju Bernabé ju Antioquía pus tataxtucha ju Jerusalén ju lapanacni ju ixtanajun ixchivinti Dios.
Tamilh ju lakꞌachakꞌan Antioquía.
28 Pus ju pumatam sia yuꞌunch Agabo ixjuncan.
Chai lakatam avilhchan acsni ixtatakꞌaixtokta ju ixtalhilacaꞌanta Jesús pus ju yuchi taya chai ju Spiritu Santu juni ni caꞌajunilh ju lapanacni ni caꞌalinaꞌ ju kꞌai chavan ixlhilacaputsꞌun ju lacamunutpaꞌ.
Chai vasalh chunch ju tapasalh acsni kꞌai ucxtin ixjunita ju Claudio.
29 Pus ju ixtalhilacaꞌanta Jesús ju amachakꞌan Antioquía tanaulh ni catamakꞌaixtꞌokꞌaꞌ ju tumin ju laich caꞌaxtaknicanaꞌ ju amachakꞌan Judea ju vachuꞌ ixtalhilacaꞌanta Jesús.
Ixtanajun ni pumatamin pumatamin caxtꞌakꞌaꞌ tachi ju ixmaktasuich.
30 Pus chunch ju tanavi.
Chai tamalakachalh ju Bernabé chai ju Saulo ni catalhiꞌalh ju tumin chai cataxtaknilh ju xalackꞌajin ju ixtalhinajun sia yuꞌunch ju ixtalhilacaꞌanta Jesús.