Maknicalh ju Jacobo chai tꞌalhnucalh ju Pitaluꞌ
12
Ju acsnich avilhchan ju kꞌai ucxtin Herodes tsuculh amamakꞌalhkꞌajniniꞌ ju aliꞌin ju ixtalhilacaꞌanta Jesús.
2 Ju yuchi lhinaulh ixmaknica ju Jacobo ixlakꞌau ju Xivan.
Maknicalh lacaspada.
3 Chai acsni laktsꞌilh ni na kꞌoxich talhiula ju israelitanin pus vachuꞌ lhinaulh ixchꞌapaca ju Pitaluꞌ.
Pus ju acsnich xacꞌatan ixjunita acsni ixtaꞌui ju xkapavati ju jantu ixtalhiyajuta ju xatꞌin.
4 Pus acsni tachꞌin navicalh ju Pitaluꞌ lana tꞌalhnucalh.
Chai quilhmaktꞌatꞌi taropajni ju ixtalhistꞌacꞌa.
Pumatꞌatꞌin ju xalhcayocanta.
Ju kꞌai ucxtin ixnajunta ni astan caꞌixmaxtulh chai laꞌixꞌucxlacapuꞌan ju lapanacni caꞌixmakꞌosaspitlh chai caꞌixlhinaulh ixmaknica.
Ixnajunta ni acsnich ju chunch ixlalh acsni ixtapasata ju anuꞌ cꞌatan acsni ixtaꞌui ixborregoꞌan ju israelitanin ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya ixlacpaꞌitniꞌan.
5 Pus ju taropajni na kꞌox ixtalhistꞌacꞌa ju Pitaluꞌ junta ixtꞌalhnucanta.
Para ju lapanacni ju ixtalhilacaꞌanta Jesús va tachi ixtatapainini ju Dios ixlacata ju yuchi.
Ju Dios maxtulh ju Pitaluꞌ lacapulachꞌin
6 Pus ju anuꞌ atatsꞌisni acsni ixnajunta ju Herodes ni camaxtuyaꞌ ju Pitaluꞌ ni catuncunach pus ju Pitaluꞌ ilhtatai.
Pictutamin ixtamanalh ju taropajni.
Chai ju Pitaluꞌ ixmakchꞌicanta lacalakatꞌui cadena.
Chai ju aliꞌin ju ixtalhistꞌacꞌa ixtayanalh laꞌixquilhtalacxtut ju pulachꞌin.
7 Pus lana chincha pumatam ixꞌanquilh ju kꞌai ucxtin Dios chai na putuncujun va ju lacapulachꞌin.
Pus ju anquilh piclalh ju Pitaluꞌ laꞌixpakꞌaxtiꞌ.
Macuju chai chanich juni:
―Akꞌostꞌaꞌulhch vatsꞌalhti.
Pus ju cadena ju ixpumakchꞌicanta lacpatajunilh laꞌixmacaꞌ ju Pitaluꞌ.
8 Chai ju anquilh chani junich ju Pitaluꞌ:
―Alakꞌoxitꞌich ju micinturón.
Achꞌantꞌanutꞌich ju minchꞌanxtꞌakꞌan.
Chai chunch ju navilh ju Pitaluꞌ.
Chai junichokocalh ju Pitaluꞌ:
―Amakꞌanchꞌitꞌich ju mimakatanut.
Aqꞌuinchꞌakꞌokꞌach.
9 Pus ju Pitaluꞌ tꞌataxtulh ju anquilh.
Chꞌakꞌokꞌalh.
Para ju yuchi jantu iscꞌatsai ni vasalh cava ju tuchi ixnavi ju anquilh.
Ju yuchi va ixnajunch ni ca va aklakꞌavanalh.
10 Pus tatapasalh junta ixtayanalh ju taropajni ju alhistacnin chaich ju alacatam junta ixtayanalh ju alhistacnin.
Chai tachaꞌalh laxamalhtich si tsasnat junta putaxtucan lacapulachꞌin.
Puꞌancan ju lakꞌachakꞌan.
Chai ju anuꞌ malhtich va isꞌakstu talhtekꞌa chai ju yuꞌunch tataxtulh.
Taꞌalhtanalh tus tachaꞌalh junta kꞌankꞌatꞌiyui ti chai ju acsnich ju anquilh lana macaulh ju Pitaluꞌ.
11 Ju acsnich chilh ju ixꞌatalacpastꞌacꞌat ju Pitaluꞌ chai ju yuchi chani naulh:
―Ju chavai icmachakxai ni slivasalhch ni xamalakachayachilh ju ixꞌanquilh ju quiꞌucxtin Dios chai quimakꞌalhtaxtulh laꞌixmacaꞌ ju Herodes chai jantu chunch actitapasayaꞌ ju chavai tachi ju ixtalacasqꞌuin ju aliꞌin quintꞌaꞌisraelitanin.
12 Acsni pastaclh ju chunch ju Pitaluꞌ pus alh laꞌixchakaꞌ ju Malia ixnati ju Xivan ju vachuꞌ ixjuncan Marcos.
Ju anch na lhu ixtatakꞌaixtokta.
Ixtatꞌajun tꞌachivinin ju Dios.
13 Chai acsni salh ju xamalhtich lacakꞌex ju ixvi lacati pus taxtuchilh pumatam atsiꞌ ju Rode ixjuncan.
Va ismispaputun tichi chavaich ju ixya.
14 Chai ju yuchi ni kꞌasmatnilh ixchivinti ju Pitaluꞌ pus lana mispalh ni yuchi.
Para ni na ixkꞌachan pus jantu lhimalhtekꞌakꞌo ju malhtich.
Lana atsꞌalatanuchokolh lacachakaꞌ.
Quixtaklh ju chivinti ni Pitaluꞌ ixya lacamalhtich.
15 Para ju yuꞌunch va ixtajunich:
―Va lakꞌachꞌapꞌui ju uxintꞌi.
Para ju yuchi pꞌas ixnajun ni vasalh yuchi.
Pus ju acsnich ju yuꞌunch ixtanajunch:
―Ca va yuchi ju anquilh ju lhistꞌacꞌa ju Pitaluꞌ.
16 Pus ju Pitaluꞌ tailhiꞌalh isaca ju malhtich.
Chai acsni xcayama tamalhtekꞌanilh talaktsꞌilh chai talhamakꞌaninilh.
17 Para ju yuchi atamacyonilh ni va sekch catataya.
Chai tsuculh ajuniniꞌ tachi ju navilh ju kꞌai ixꞌucxtinꞌan Dios acsni maxtulh lacapulachꞌin.
Chai alacjuni ni catamacꞌatsanilh ju Jacobo chaich ju aliꞌin ju ixtalhilacaꞌanta Jesús.
Chai acsni nonkꞌo ju ani ju Pitaluꞌ pus taxtulh.
Ampa lhilacatam.
18 Acsni tunculhch jantuch va ti lacatsꞌunin alilh ju ixtalhantiꞌan sia yuꞌunch ju taropajni tuchi amapasalh ju Pitaluꞌ.
19 Pus ju Herodes lhinaulh ixpuxcajuca ju Pitaluꞌ para jantu talhitaju.
Ju acsnich ju Herodes makꞌosaspitlh ju alhistacnin chai ni jantu lai xatajuni tuchi xatapasai pus lhinaulh ixꞌamaknica.
Chai astan ju Herodes taxtulh ju xaꞌestado Judea.
Alhch ju lakꞌachakꞌan Cesarea.
Anch ju tolhcha.
Nilh ju Herodes
20 Pus ju amachakꞌan Tiro chai Sidón anch ixtaꞌi ju ixvaitiꞌan laꞌixtꞌun ju kꞌai ucxtin Herodes.
Para ju acsnich ju Herodes na ixꞌaxcajich.
Pus ju yuꞌunch talakmilh ju Herodes chai tanavilh ixꞌamigoꞌan ju Blasto.
Ju yuchi xakꞌai ixjunita ju anch laꞌixpuꞌucxtin Herodes.
Pus tatꞌatakꞌoxilh ju chivinti ju yuchi ni yuchach ju catapaininilh ju kꞌai ucxtin ni cacaplich ju ixtalhkꞌamti.
21 Pus ju Herodes lhcaꞌula lakatam avilhchan acsni caꞌalactꞌachivinaꞌ.
Chai acsni chilh ju anuꞌ avilhchan pus ju Herodes lakchꞌi ju pumpuꞌ tachi ixtalakchꞌi ju ucxtinin.
Chai tavi lacakꞌai chakaꞌ.
Tsuculh aktꞌasajunuꞌ.
22 Pus ju ixtalhavatꞌan lapanacni pꞌas tachivinilh.
Tanajunch:
―Yuchi ju Dios ju chivinin.
Jantiyuꞌ va quintꞌalapanacꞌan.
23 Pus ju acsnich pantsꞌiquis pumatam ixꞌanquilh ju kꞌai ucxtin Dios lana xtaknilh ju ixtakꞌankꞌat ju Herodes ni lai xalakꞌaꞌi ni tajunilh ju lapanacni ni Dios ixjunita.
Jantu xalakꞌayai ju tucan Dios.
Pus na lhu xatanui ju tsapu laꞌixpajan chai yuchach ju xamakni.
24 Para ixchivinti Dios ixmakpitsikꞌocanta chai na lhu ju taquiclacaꞌilh.
25 Pus ju Bernabé chaich ju Saulo tataspꞌitcha ju lakꞌachakꞌan Jerusalén acsni tamakꞌaxtaklh ju tumin ju ixꞌamalhiꞌanican.
Tatꞌamilh ju Xivan ju vachuꞌ ixjuncan Marcos.