Ju Bernabé chai ju Saulo taꞌalh ajuninin ju lapanacni ixlacata ju Jesús
13
Sia yuꞌunch amachakꞌan Antioquía ju ixtalhilacaꞌanta Jesús ixꞌalin ju lapanacni ju ixtanajun ixchivinti Dios chai ju aliꞌin amamakaꞌunin ixtajunita.
Yuꞌunch ju Bernabé chai ju Simón ju ixjuncan Niger chai ju Lucio amachakaꞌ Cirene chai ju Saulo chai ju Manaén ju ixtꞌatakꞌayanaꞌ ju kꞌai ucxtin Herodes ixjunita.
2 Pus ju lakatam avilhchan acsni ixtatꞌajun lakꞌayanin ju kꞌai ixꞌucxtinꞌan Dios chai ixtatascajai pus ju Spiritu Santu chani alacjuni:
―Amalakꞌachꞌatꞌit ju Bernabé chai ju Saulo lacalhichꞌalhcat ju tuchi icꞌalhitꞌasanitach.
3 Pus ju acsnich tatascajalh aliꞌ chai tatꞌachivinichokolh ju Dios.
Chai astan tamokslanilh ixmacaꞌan laꞌisꞌaktsulhꞌan chai amalakachalh lacalhichꞌalhcat.
Ju ixtamalakachan Jesús tajunilh ju amachakꞌan Chipre ixlacata ju Jesús
4 Pus ju Spiritu Santu alacmalakachalh ju Bernabé chai ju Saulo ju lakꞌachakꞌan Seleucia.
Chai ju anch tatajulh lacabarco.
Taꞌalh ju xalacatꞌun Chipre.
Ju Chipre va lacatꞌicstꞌi lacatꞌun junita lacaꞌalama.
5 Pus acsni tachaꞌalh ju xalacatꞌun Chipre anch ju tatacutlh ju lakꞌachakꞌan Salamina.
Chai tatsuculh nonin ixchivinti Dios laꞌixlacpujitatꞌan ju istꞌaꞌisraelitanin.
Pus ju Xivan ixꞌalactꞌaꞌanta ju Bernabé chai ju Saulo ni ixꞌaꞌaktaijui ju yuꞌunch.
6 Talacaputocꞌakꞌo ju lakꞌachakꞌan ju alin ixlhilacaputsꞌun ju anuꞌ lacatꞌun tus tachaꞌalh ju lakꞌachakꞌan Pafos.
Ju anch talhitaju pumatam lapanac ju alhicujnuꞌ ixjunita.
Ju yuchi israelita ixjunita chai ixjuncan Barjesús.
Pus ju yuchi va taꞌaklhtamani lapanac ixjunita.
Ixꞌajuni ju lapanacni ni yuchach ixchivinti Dios ju ixnajun mas jantu.
7 Pus ju yuchi ixlapanac ixjunita ju kꞌai ucxtin Sergio Paulo.
Pus ju anuꞌ kꞌai ucxtin na ixꞌacꞌatsananta.
Chai ju yuchi alactꞌasanilh ju Bernabé chaich ju Saulo.
Va ixꞌalackꞌasmatniputun ju ixchivinti Dios.
8 Pus ju anuꞌ alhicujnuꞌ ju vachuꞌ Elimas ixjuncan alactꞌalakꞌailh ju Bernabé chaich ju Saulo.
Va jantu ixlacasqꞌuin ni calacaꞌilh ixchivinti Dios ju kꞌai ucxtin.
9 Pus ju Saulo vachuꞌ Pablo ixjuncan chai ju Spiritu Santu ixlhinonkꞌojui laꞌisꞌatsucunti ju yuchi.
Pus ju Pablo skotutulh ju anuꞌ alhicujnuꞌ.
10 Chai chani juni:
―Tꞌis tꞌiꞌaꞌokxchꞌokꞌonankꞌoꞌuich ju uxintꞌi.
Chai navitꞌi tachi chun ju macxcai.
Istsꞌalhꞌat ju lhacaticuru.
Ixtꞌalaxcaiꞌat tachi chun ju soknicꞌa.
Ja jantu amamactꞌayaꞌ ju ixnajunca ni jantu kꞌox ni chꞌakꞌokꞌacan ju kꞌai ucxtin Jesús.
11 Pus ju chavai ju kꞌai quiꞌucxtin Dios camamakꞌalhkꞌajniyan.
Jantu lai atꞌilaktsꞌi ju atuncunuꞌ tachi lakatꞌui lakatꞌutu avilhchan.
Pus lana soko maklakatsꞌislh chai jantu lai laktsꞌilh tuꞌuꞌ.
Chai alhtanatsuculh ixpuxcajuca tichi chavaich ju camakchꞌapalhiꞌalh laꞌixmacaꞌ.
12 Pus ju acsnich ju kꞌai ucxtin acsni laktsꞌilh tuchi tapasalh lhilacaꞌalh ju Jesús.
Na lhamakꞌaninilh acsni tajuni ju Bernabé chai ju Pablo ixlacata ju kꞌai ixꞌucxtinꞌan Jesús.
Ju Pablo chai ju Bernabé ixtavilanancha ju Antioquía xalacatꞌun Pisidia
13 Pus ju astan ju Pablo chai ju ixtꞌaꞌalhtanin tataxtucha ju lakꞌachakꞌan Pafos.
Tatajuchokolh lacabarco.
Taꞌalh ju lakꞌachakꞌan Perge laxatꞌun Panfilia.
Para ju Xivan alactꞌalamacaulh.
Ju yuchi anchokolh ju Jerusalén.
14 Ju Pablo chai ju Bernabé tataxtuchokolh ju Perge.
Tachaꞌalh tus Antioquía laxalacatꞌun Pisidia.
Chai acsni chaꞌalh ju avilhchan paꞌastacni pus ju yuꞌunch tatanucha laꞌixpujitatꞌan ju istꞌaꞌisraelitanin chai tatavi.
15 Chai acsni laktsꞌinkꞌocalh ju ixlhamapꞌaksin Dios chai ju ixchivinti ju makꞌaniya lapanacni ju ixtanajun ixchivinti Dios pus ju xaꞌucxtinin lacpujitat tamalakachalh chivinti junta chani tajuni ju Pablo chaich ju Bernabé:
―Quintꞌalapanacni ni pꞌacxantꞌatꞌit tuꞌuꞌ chivinti ju alhimapꞌaksipꞌutꞌunatꞌit ju lapanacni laich anaꞌuntꞌit ju chavai.
16 Pus ju acsnich ju Pablo taya.
Chꞌixlh ixmacaꞌ ni va sek catatavi ju lapanacni chai ajunich:
―Quintꞌaꞌisraelitanin chai tachi chun ju uxijnan ju vachuꞌ tꞌalhoniyatꞌit ju Dios aquilakꞌasmatniuch.
17 Ju quiDiosꞌan ju lakꞌayayau ju quijnanꞌan ju israelitanin juntau yuchach ju sacxtulh ju makꞌaniya quilacpaꞌitniꞌan chai na alalhava tus na lhu tava acsni ixtavilananchacaꞌ ju laxalacatꞌun Egipto mas jantu anch laꞌixtꞌunꞌan ixjunita.
Chai astan yuchi ju amaxtulh ju anuch lacatꞌun laꞌixtachaput.
18 Ju Dios va tastucnikꞌo tachi chun ju ixtanavi ju makꞌaniya quintꞌaꞌisraelitaninꞌan acsni ixtaꞌucxuntꞌajun tꞌupꞌuxam cꞌata junta va aseknicꞌa ixjunita.
19 Chai astan malaccꞌacxa ju lapanacni amachakꞌan lakatujun lacatꞌun ju lhiCanaán.
Chai ju ixlacatꞌunꞌan ju yuꞌunch axtaknikꞌo ju makꞌaniya quilacpaꞌitniꞌan.
20 Astan tachi lakatꞌatꞌi cientos a tꞌupꞌuxam cꞌata ju Dios axtaknilh ju makꞌaniya quilacpaꞌitniꞌan ju xalactꞌicstꞌi ixꞌucxtinin ju talhinaulh ju sia yuꞌunch.
Chunch ju tailhiꞌalh tus acsni ixtꞌajun ju Samuel ju ixnajun ixchivinti Dios.
21 Ju astan tasqꞌuinlh ju kꞌai ixꞌucxtinꞌan.
Pus ju Dios axtaknilh ju Saul istsꞌalh Cis.
Ju yuchi ixtamaskꞌatꞌanti Benjamín ixjunita.
Pus ju Saul tanulh laꞌixpuꞌucxtin tꞌupꞌuxam cꞌata.
22 Chai acsni tavanan makꞌosucalh ju yuchi pus ju Dios axtaknilh ju David ju kꞌai ixꞌucxtinꞌan.
Chai isꞌakstu ju Dios ju lhichivinilh ju David istsꞌalh ju Isaí.
Ma naulh ni ma chunch ixjunita ju ixꞌatalacpastꞌacꞌat ju David tachi ju ixꞌanuch ju Dios.
Chai ju yuchi ma canavikꞌoyach tachi chun ju calacasqꞌuinach ju Dios.
23 Pus ju Dios ixꞌajunita ju makꞌaniya quilacpaꞌitniꞌan ni aquintaxtakniyan ju aquintamakꞌalhtaxtuyan ni jantu caꞌanau ju lacajipi.
Yuchach ju Jesús.
Chai ju yuchi acsni tavanan quitsucuchilh ju ani pus makꞌaniya ixꞌapapanatnich David va.
24 Para acsni tucaꞌ ixtaiꞌulata ixlhichꞌalhcat ju Jesús pus ju Xivan ixꞌajuni ju quintꞌaꞌisraelitaninꞌan ni catamacaulh ju ixꞌalactuꞌuntiꞌan chai cataꞌakpaxlich.
25 Chai acsni ixnavikꞌoputun ju ixlhichꞌalhcat ju Xivan ma chani alacjuni ju lapanacni:
“Ju uxijnan nonatꞌit ni quitꞌinch ju quilapacxanau.
Para jantu.
Ju astan caminaꞌ pumatam ju xakꞌai chai ju quitꞌin jantu tuꞌuꞌ quintapalhni.
Jantu lai actichꞌanxkꞌotlh nin mas va yuchi ju samusni ju ixchꞌanxtꞌakꞌan”.
Ma chunch ju naulh ju Xivan.
26 Pus ji quiꞌalakꞌavin ju vachuꞌ ixꞌapapanatnich Abraham untꞌatꞌit chai tachi chun ju uxijnan ju lakꞌayayatꞌit ju Dios pus quijnanꞌan ju xtaknicantauch ju ani chivinti junta najun ta yu lai takꞌalhtaxtucan ni jantu ancan ju lacajipi.
27 Pus ju ixtatꞌonachalhch ju Jerusalén chaich ju xalackꞌajinch jantu istamispaich ju Jesús tichi chavaich ixjunita.
Sin catamachakxa ju ixchivintiꞌan ju makꞌaniya lapanacni ju ixtanajun ixchivinti Dios mas takꞌasmatlh acsni ixlaktsꞌincan chux avilhchan paꞌastacni.
Para acsni tavanan tasqꞌuinlh ixꞌaninti ju Jesús pus isꞌakstuꞌan tamuctaxtulh tachi ixtanajun ju anuꞌ makꞌaniya lapanacni.
28 Mas jantu tuꞌuꞌ talhitajunilh ixtalakꞌalhin ju tuchi lai catalhimakni para ju lapanacni tasqꞌuinilh ju Pilato ni camaknicalh ju Jesús.
29 Chai acsni tamaknilh pus ju chunch uctaxtukꞌo tachi chun ju taxtokni ju ixꞌalhitsꞌokcanta ju Jesús ju makꞌanchich.
Pus ju acsnich tapꞌuxlh ju lacacurus chai taquimacnu.
30 Para ju Dios malokꞌonichokolh laꞌixꞌaninti.
31 Chai na lakalhu avilhchan ju Jesús atalacasunilh ju yuꞌunch ju kꞌaixtam ixꞌalactꞌataxtuta ju laxaꞌestado Galilea chai ixꞌalactꞌaminta ju Jerusalén.
Chai ju chavai yuꞌunch ju tajuni ju lapanacni ixlacata ju Jesús.
32 Chai ju quijnan vachuꞌ iclajunau ni muctaxtuta ju Dios ju tuchi ixꞌajunita ju makꞌaniya quilacpaꞌitniꞌan.
33 Pus ju quijnanꞌan isꞌaskꞌatꞌan quilacpaꞌitniꞌan juntau chai laktsꞌiuch ni muctaxtulh ixchivinti Dios acsni malokꞌonichokolh ju Jesús laꞌixꞌaninti.
Ju makꞌanchich ju Dios ixlhichivinin ju Jesús.
Chai junta tsꞌokcanta lacasalmos capitaluꞌ lakatꞌui ma chani juni:
“Quintsꞌalhꞌat ju uxintꞌi chai ju chavai icꞌamasunita ju lapanacni ni vasalh quintsꞌalhꞌat”.
Ma juni.
34 Vachuꞌ ju makꞌanchich ju Dios ixnajunta ni camalokꞌonichokoyaꞌ ju Jesús laꞌixꞌaninti chai jantu tavanan catinichokolh.
Chunch ju ixnomputun junta ma chani juni ju Jesús ju lacaꞌatsꞌoknut:
“Acxtaknikꞌoyan ju uxintꞌi tachi chun ju kꞌox.
Acmuctaxtuyaꞌ tachi ju xacjunita ju David”.
Ma juni.
35 Vachuꞌ chunch ju nomputun lacaꞌalakatam atsꞌoknut lacasalmos junta va jun isꞌakstu ju Jesús ju chivinin.
Ma chanich ju juni ju ixpai:
“Ju uxintꞌi jantu alacꞌasqꞌuinaꞌ ni capuchꞌilh ju quilacatuna ju quitꞌin ni mintsꞌalh icjunita chai qꞌuimalakꞌachꞌatꞌachiꞌ ju ani”.
Ma juni.
36 Pus ju David chꞌalhcatnanilh ju lapanacni tachi ju junilh ju Dios.
Chai astan nilh chai macnucalh tachi ju ixꞌalacmacnucanta ju ixlacpaiꞌan chai puchꞌilh ju ixlacatuna.
37 Para ju ixlacatuna ju Jesús jantu puchꞌilh ni malokꞌonichokolh ju Dios.
38 Pus ji quiꞌalakꞌavin tasqꞌuini ni acꞌatsꞌatꞌit ni va ixlacata ju Jesús lai macꞌacxanican ju quintalakꞌalhinꞌan.
Yuchi ju iclajumputunau ju uxijnan.
39 Pus tachi chun ju talhilacaꞌan ju yuchi macꞌacxanican ju ixtalakꞌalhinꞌan.
Para ju talhilacaꞌan ju ixlhamapꞌaksin ju Moisés jantu tavanan catimacꞌacxanicalh ju ixtalakꞌalhinꞌan.
40 Pus alaktsꞌintꞌit ju uxijnan.
Tun chun atꞌapꞌasatꞌit tachi ju ixtanajuntach ju makꞌaniya lapanacni ju ixtanajun ixchivinti Dios.
Ju yuꞌunch chani tanaulh:
41 Ju Dios ma naulh ni ma canaviyaꞌ lakatam lhamakꞌan acsni tꞌonatꞌit.
Chai ju uxijnan ma jantu lana alacꞌaꞌiyaꞌitꞌit mas xamatiꞌ catajunin.
Pus ma alaktsꞌintꞌit ju uxijnan ju jantu tuꞌuꞌ alhiulananatꞌit.
Ma alhamakꞌanintꞌit chai anitꞌit.
Ju Pablo ajuni ju lapanacni ni ma chunch ju naulh ju Dios ju makꞌanchich.
42 Chai acsni tataxtucha ju lacpujitat pus ju yuꞌunch ju jantu israelitanin ixtajunita pꞌas tasqꞌuinlh lamapainin ni laich catakꞌasmatlh ju anuꞌ chivinti alakatam avilhchan paꞌastacni.
43 Chai acsni taꞌakpitsilh ju ixtaquilata ju lacpujitat pus na lhu ju israelitanin tachꞌakꞌokꞌalh ju Pablo chaich ju Bernabé.
Vachuꞌ tamakꞌalh ju aliꞌin ju ixtalakꞌayai ju Dios chai ixtalacaꞌi tachi ju israelitanin mas jantu israelitanin ixtajunita.
Pus ju Pablo chaich ju Bernabé ajunich ju yuꞌunch ni ixlhichux ixꞌalhunutꞌan catachꞌakꞌokꞌalh ju Dios.
44 Acsni paꞌastacni xajunchokoi tatakꞌaixtokkꞌo tachi chun ju lapanacni.
Ixtakꞌasmatniputun ixchivinti Dios.
45 Para ju israelitanin ju jantu talacaꞌilh na talhacchaꞌanilh ju Pablo acsni talaktsꞌilh ixtalhavat lapanacni ju ixtakꞌasmatniputun ixchivinti.
Chai ixtanajunch ni jantu slivasalh tuchi ixnajunch ju Pablo chai ixtajunich macxcai chivinti.
46 Pus ju acsnich ju Pablo chaich ju Bernabé lana jantu tatalhanalh.
Alacjuni:
―Aktsꞌiya istasqꞌuini ni pꞌulhnan aꞌuncꞌanaꞌitꞌit ju ixchivinti Dios ju uxijnan ju quintꞌaꞌisraelitanin untꞌatꞌit.
Para ni jantu lacꞌaꞌipꞌutꞌunatꞌit chai nonatꞌit ni jantu lacꞌasqꞌuinatꞌit ju miꞌatsucuntiꞌan ju jonkꞌalhita lactꞌiyan pus ju chavai acꞌajunau ixchivinti Dios ju yuꞌunch ju jantu israelitanin tajunita.
47 Chunch ju aclayau ni chunch ju quintamapꞌaksitan ju kꞌai quiꞌucxtin quincꞌan Dios.
Ju yuchi ma chani quintajunan:
Ju quitꞌin icꞌulatan uxintꞌi tachi ju maclhcu ni laich alacmamachꞌakxanitꞌi ju lapanacni ju jantu israelitanin tajunita ixchivinti Dios.
Chai laich aꞌunaꞌ ju lapanacni ju tatꞌajun ixlhilacaputsꞌun ju lacamunutpaꞌ ta yu laich cataputakꞌalhtaxtulh ni jantu cataꞌalh ju lacajipi.
Pus ju Pablo ajuni ju lapanacni ni ma chunch ju juni ju Dios.
48 Pus ju yuꞌunch ju jantu israelitanin ixtajunita acsni takꞌasmatlh ju ixchivinti Pablo na talhikꞌachalh.
Ixtanajun ni na kꞌox ju chivinti ixlacata ju kꞌai ucxtin Jesús.
Chai talacaꞌi tachi chun ju isacxtuta ju Dios ni laich caꞌalilh ju isꞌatsucuntiꞌan ju lactiyan.
49 Chai ni na lhu ju talacaꞌilh pus ju chivinti ixlacata ju kꞌai ucxtin Jesús ixmakpitsikꞌocanta ixlhilacaputsꞌun ju xalacatꞌun anch.
50 Para ju israelitanin ju jantu talacaꞌilh ixchivinti Dios taꞌamaktalhkꞌamanalh ju aliꞌin chakolun ju na ixtalakꞌayai ju Dios chai ju na lackꞌoxin lapanacni ixtajunita.
Vachuꞌ tamaktalhkꞌamalh ju xalackꞌajin ju anuch lakꞌachakꞌan.
Pus axcaicalh ju Pablo chai ju Bernabé chai alacxcauxtucalh ju anuch lacatꞌun.
51 Pus ju acsnich ju Pablo chaich ju Bernabé alacchꞌancꞌalhapꞌuxlh ju pokxni laꞌixchꞌajaꞌan.
Chai ni chunch ju xatanavi pus va ixꞌajumputun ju lapanacni ni isꞌakstuꞌan catacꞌucꞌayaꞌ ixtalakꞌalhinꞌan.
Jantu ixcuentaꞌan ju Pablo chai ju Bernabé.
Chai astan ju yuꞌunch taꞌalh ju lakꞌachakꞌan Iconio.
52 Para ju amachakꞌan Antioquía ju ixtalhilacaꞌanta ju Jesús na ixtalackꞌachan chai ju Spiritu Santu ixlhinonkꞌojui laꞌisꞌatsucuntiꞌan.