Ju Jesús atalacasunilh ixpumatujunꞌan ixꞌamamakaꞌuta
21
Astan acsni atalacasunichokolh ju Jesús ju ixꞌamamakaꞌui ju laxaꞌatantsꞌin Tiberias pus chanich lhiꞌucxꞌalh.
2 Kꞌaixtam ixtavilanankꞌo ju Simón Pitaluꞌ chaich ju Tumax ju ixjuncan Cuate chaich ju Natanael amachakaꞌ Caná lhiGalilea chai ixtꞌiyunꞌan istsꞌalan ju Zebedeo chaich ju aliꞌin ixtꞌiyunꞌan ixꞌamamakaꞌui ju Jesús.
3 Ju Simón ajunich:
―Acꞌanaꞌ chꞌapanaꞌ ju pamata.
Chai ju aliꞌin tanaulhch:
―Aclatꞌaꞌanau vachuꞌ ju quijnan.
Pus talatꞌaꞌankꞌo.
Tatajulh lacabarco.
Para ju anuꞌ atatsꞌisni jantu tuꞌuꞌ tachꞌapalh.
4 Acsni ixtꞌajun tuncuntilanaꞌ pus ju Jesús tayacha laꞌixquilhtuꞌ ju atantsꞌin.
Para ju ixꞌamamakaꞌui jantu ixtamispai ni yuchi cava ju Jesús.
5 Ju Jesús ajunich:
―Tsꞌalan ja chꞌapꞌatꞌitch lacatsꞌunin ju pamata.
―Amacꞌapꞌitꞌitch ju minchꞌokxniꞌan laxalhicana ju mimbarcoꞌan.
Anch ju lai alhitꞌaꞌuyaꞌitꞌit ju pamata.
Pus tamacaꞌalh ju ixchꞌokxniꞌan chai jantu lana lai ixtamacutui ju chꞌokxni ju lacxcan ni na va ixtatsꞌinqꞌuitach ju pamata.
7 Ju acsnich ju anuꞌ ixtamamakaꞌun ju Jesús ju na ixmapaini junich ju Pitaluꞌ:
―Yuchi ju quiꞌucxtinꞌan.
Pus ju Simón Pitaluꞌ acsni kꞌasmatlh ni najuncalh ni ixꞌucxtinꞌan pus lana lakchꞌichokolh ju ixpumpuꞌ ni va ixmaxtutach ju lakatam ixpumpuꞌ.
Lana taju lacxcan.
Makꞌanxqꞌuivitnitacutlh.
8 Junta mactai amacontilalh ju ixtꞌaꞌalhtanin jantuch makat ixjunita ju lakꞌakxixni.
Va tachi tam cientos metro.
Pus ju aliꞌin ixtꞌaꞌalhtanin ju Pitaluꞌ tapumilh ju ixbarcoꞌan ni va ixtapuxakꞌamalhimintach ju ixchꞌokxniꞌan ni na lhuch ixtanun ju pamata.
9 Chai acsni tavanan tatacutcha ju laꞌixquilhtuꞌ atantsꞌin pus talaktsꞌilhch ju lacaꞌayakꞌanaꞌ ni tampꞌutꞌach kꞌantam pamata.
Vachuꞌ talaktsꞌilh ju vati.
10 Chai ju Jesús ajunich:
―Alhitꞌatꞌitch ju aliꞌ pamata ju xachꞌapꞌayatꞌit chavai.
11 Pus lana taju ju Simón Pitaluꞌ ju lacabarco chai taxakꞌamacutulh ju ixchꞌokxniꞌan.
Na lhu ixtanun ju lackꞌai pamata.
Ixchaꞌanta tam cientos a cincuenta y tres pamata.
Para mas na lhu ju ixtanun ju pamata jantu talackꞌexlh ju chꞌokxni.
12 Ju Jesús ajunich ju ixꞌamamakaꞌui:
―Asokꞌotꞌitch.
Caꞌuch.
Pus jantu xamatiꞌ ju laich cajunilh:
“Tis chavaichꞌat” ni ixtacꞌatsaich ni ixꞌucxtinꞌan ixjunita.
13 Chai ju Jesús milh junta tꞌampꞌucanta ju pamata.
Macutulh ju vati chai axtaknilh.
Vachuꞌ axtaknilh ju pamata.
14 Pus ju ani ixlhikꞌalhpaktꞌutuch ju atalacasunilh ju Jesús ju ixꞌamamakaꞌui acsni ixtaꞌacxtuchokotach junta ixmacnucanta.
Alhistꞌactꞌich ju quilapanacni ju tachi borregojni tajunita
15 Acsni tavailh pus ju Jesús junich ju Simón Pitaluꞌ:
―Simón istsꞌalh Jonás ja palai qꞌuimapꞌaini ju uxintꞌi.
Ja palai jantu ju ani tavilanalh.
Ju Pitaluꞌ junich ju ixꞌucxtin:
―A.
Kꞌoxich cꞌatsꞌai ni icmapainiyan ji quiꞌucxtin.
Chai juncanch ju Pitaluꞌ:
―Amalanitꞌich ju quinchivinti ju lapanacni ju quintalhilacaꞌan.
Ju yuꞌunch chunch tajunita tachi ju tuꞌuꞌ askꞌatꞌa borregojni.
Na tamaktasqꞌuini ni xamatiꞌ caꞌamasunilh ju kꞌox atsucunti.
16 Junchokopa ju ixlhipaktꞌuich:
―Simón istsꞌalh Jonás ja qꞌuimapꞌaini.
Pus ju Pitaluꞌ jumpa ju ixꞌucxtin:
―Ju uxintꞌi kꞌoxich cꞌatsꞌai ni icmapainiyan ji quiꞌucxtin.
Junchokopa:
―Pus alhistꞌactꞌich ju lapanacni ju quintalhilacaꞌan.
Ju yuꞌunch chunch tajunita tachi ju tuꞌuꞌ borregojni ju tamaktasqꞌuini ni xamatiꞌ caꞌalhistaclh.
17 Junchokopa ju ixlhipaktꞌutu:
―Simón istsꞌalh Jonás ja qꞌuimapꞌaini.
Pus ju acsnich na amakꞌaninilh ju Pitaluꞌ ju ixlhipaktꞌutuch acsni quilhasacmi ju Jesús ni ixmapaini.
Chai junich:
―Ju uxintꞌi ji quiꞌucxtin cꞌatsꞌakꞌoꞌui tachi chun ju taxtokni.
Kꞌoxich cꞌatsꞌai ni icmapainiyan.
Pus junich ju Jesús:
―Amalanitꞌich ju quinchivinti ju lapanacni ju quintalhilacaꞌan.
Ju yuꞌunch tachi quimborregojni tajunita.
18 Slivasalh ju icjunan.
Acsni palaicaꞌ askꞌatꞌa ixꞌunitꞌa pus va miꞌakstu ixlakchꞌi ju mimpumpuꞌ.
Chai mas vanta anch ju ixpꞌimpꞌutꞌunch ixpꞌinch.
Para acsni papaꞌ aꞌunaꞌ achꞌixaꞌ ju mimacaꞌ chai akꞌantam camalakchꞌiniyan chai calhiꞌanan junta jantu pꞌimpꞌutꞌun.
19 Pujunicalh chunch ju Pitaluꞌ ni va ixmamachakxanicanch tuchi aninti ju capumalacasuyaꞌ ju Pitaluꞌ ni Dios ju xakꞌai.
Chai acsni nonkꞌo ju Jesús ju ani pus junich ju Pitaluꞌ:
―Aqꞌuinchꞌakꞌokꞌach.
Na ixmapainicanta ju ixꞌamamakaꞌunti ju Jesús
20 Ni talakaspꞌitlh ju Pitaluꞌ laktsꞌilhch ju ixtꞌatamamakaꞌun ju na ixmapainich ju Jesús ni ixꞌachꞌakꞌokꞌanantach vachuꞌ.
Yuchi ju anuꞌ ju vanin ixtꞌatapakstitama ju Jesús acsni tavailh.
Chai yuchi ju quilhasacmi acsni tavanan junilh:
“Quiꞌucxtin tis chavaich ju camakꞌaxtꞌakꞌan”.
21 Ju Pitaluꞌ acsni laktsꞌilh ju ixꞌachꞌakꞌokꞌanan pus junich ju Jesús:
―Quiꞌucxtin ju ani minta tijuch ju canaviyaꞌ.
22 Ju Jesús lhakꞌalhtayanalh:
―Pus ni va aclacasqꞌuilh ni catamacaulh ju yuchi tus acsni acminchokoyaꞌ pus ju anch jantu mincuenta.
Ju uxintꞌi va aqꞌuinchꞌakꞌokꞌach.
23 Yuchi lhiꞌalilh ju chivinti ju sia lhiꞌalakꞌavin ni ca jantu catini ju anuꞌ pumatam ixtꞌatamamakaꞌunꞌan.
Para ju Jesús jantu chun naulh ni va jantu catini.
Va naulh:
“Ni va aclacasqꞌuilh ni catamacaulh ju yuchi tus acsni acminchokoyach pus ju anch jantu mincuenta”.
24 Quitꞌinch ju anuꞌ amamakaꞌunti ju ixnoncanch tachi ju va jantu actini.
Chai quitꞌin ju icnajun ni stavasalanti junima taxtokni.
Chai quitꞌin ju icꞌatsꞌoknunkꞌo tachi chun ju ani taxtokni.
Chai iccꞌatsayauch ni stavasalanti tachi chun ju icnajunta.
25 Na lhu alin ju aliꞌ taxtokni ju navilh ju Jesús.
Ni stunin xactsꞌokꞌulakꞌota tachi chun ju taxtokni pus ca jantu lai ixtilhiva ju ani lacamunutpaꞌ ju atsꞌoknut junta ixlhaꞌatsꞌoknuncalhch ju tuchi navitach ju Jesús.