―Makꞌosucantach ju ixlacatuna ju lijunto quiꞌucxtinꞌan junta ixmakꞌacanta.

Jantu iccꞌatsayau ta anchach ju xalhiꞌancan.

3 Chai lana tꞌataxtulhch ju Pitaluꞌ ju ixtꞌatamakaꞌun.

Taꞌalh laktsꞌinin junta ixmakꞌacanta ju ixlacatuna ju lijunto Jesús.

4 Chai lana pꞌas ixtaꞌatsꞌalaꞌanta.

Para ju anuꞌ pumatam ixtamamakaꞌun ju Jesús palai vatsꞌalhti chaꞌalh.

Astan chaꞌalh ju Pitaluꞌ.

5 Pus ju pꞌulhnan chaꞌalh ni lhan tantama talacnu pus va yuchi ju laktsꞌilhch ju ixpulakapachꞌicanta ju Jesús ni va yuchi ju ixma.

Para ju yuchi jantu tanulh.

6 Chai chinchalh chavai ju Simón Pitaluꞌ ni yuchi ju ixtꞌalataimatach ju pꞌulhnan chaꞌalh.

Pus ju yuchi lana tanu junta ixmamacanta ju ixlacatuna ju lijunto Jesús.

Vana va yuꞌ ju laktsꞌimpa ju ixpulakapachꞌicanta ju Jesús ni va yuchi ju ixma.

7 Vachuꞌ laktsꞌilh ju pumpuꞌ ju ixpulakapachꞌinicanta isꞌaktsulh ju Jesús.

Ju yuchi jantu vanin ixtꞌama ju lhman pumpuꞌ.

Lacatam ixpachꞌiꞌulacanta.

8 Acsnicaꞌ ju tanulh ju anuꞌ pumatam ixtamamakaꞌun ju Jesús ju pꞌulhnan ixchaꞌanta.

Chai acsni laktsꞌilhch ju yuchi pus lana lacaꞌi ni vasalh ixlokꞌonchokota ju Jesús.

9 Va jantucaꞌ kꞌox ixtamachakxai ju atsꞌoknut junta najunch ni tasqꞌuini ni cataꞌacxtuchokoyaꞌ ju Jesús junta ixmakꞌacanta ixlacatuna.

10 Ju acsnich ju ixꞌalacmamakaꞌui ju Jesús lana taꞌanchokolh laꞌixlacchakaꞌan.

11 Pus ju yuchi ju Malia va makspaꞌ ixya.

Vanin junta ixmakꞌacanta ju ixlacatuna ju lijunto Jesús.

Va ixkꞌalhuyalhch.

Chai acsni ixtꞌajun kꞌalhunuꞌ pus talacnu ju pulacni junta lhucucu lactalhpa.

12 Chai laktsꞌilh pumatꞌui anquilhnin ju ixtavilanalh.

Ixtalakchꞌita lacxnapapa ixpumpuꞌan.

Ju pumatam ixvi junta ixlacpatai ju lijunto Jesús.

Chai ju pumatam ixvi junta ixchꞌanꞌanta ju Jesús.

13 Tajunich ju Malia:

―Chakoꞌulh tꞌas ni va kꞌalhumpꞌalai.

Ju Malia ajunich acsni akꞌalhtailh ju anquilhnin:

―Pus va talhiꞌalhch ju lijunto quiꞌucxtin chai jantu iccꞌatsai ta anchach ju xatalhiꞌan.

14 Acsni alactꞌachivinkꞌolh ju anuch anquilhnin ju Malia pus talakaspꞌitlich chai laktsꞌilh ni vanin ixya ju Jesús.

Para jantu ismispai ni yuchi cava.

15 Ju Jesús junich ju Malia:

―Chakoꞌulh tꞌas ni va kꞌalhumpꞌalai.

Tis chavaich ju pꞌuxcꞌaꞌui.

Pus ju Malia va naulh laꞌixꞌalhunut ni ca va islhistacnaꞌ ju anuꞌ puꞌolivos.

Chai junich:

―Cumpari ni uxintꞌi ju xalhipꞌin aqꞌuiꞌunch tas anchach ju xalhichꞌipꞌin ju ixlacatuna ju lijunto Jesús.

Aclhiꞌanach.

16 Ju Jesús junich:

―Malia.

Pus ju Malia ni talakaspꞌitchokolh xakꞌala lacalhihebreo chai juni:

―Raboni.

Ju chunch nomputunch:

“Quiꞌamamakaꞌunuꞌ”.

17 Ju Jesús junich:

―Tun aqꞌuilacꞌachꞌapꞌa ni jantucaꞌ icꞌan laktsꞌiniꞌ ju quimpai.

Para apꞌinchich alaktsꞌiniꞌ ju quilhiꞌalakꞌavin.

Aꞌunchich ni acꞌanaꞌ laktsꞌiniꞌ ju quimpai chai ju mimpaiꞌan Dios.

Acꞌanaꞌ laktsꞌiniꞌ ju quiDios chaich ju miDiosꞌan.

18 Pus lana anchokolh ju lakꞌachakꞌan ju Malia amachakaꞌ Magdala.

Chai acsni chaꞌalh chani alacjunich ju ixꞌalactꞌatamakaꞌui:

―Iclaktsꞌilhch ju quiꞌucxtinꞌan.

Chai yuchi ju xaquijuni ni aclajunau ju ani chivinti.

19 Ju acsnich lhitumincu ixjunita.

Chai acsni tokꞌoxalhch ju anuꞌ avilhchan pus ixtamalacchokꞌotach junta ixtatanumanalh ju ixꞌamamakaꞌui ju Jesús ni va ixtatalhonich ju xalackꞌajin istꞌaꞌisraelitanin.

Chai acsni chincha ju Jesús jantu maklhtꞌekꞌa ju lacamalhtich.

Para ni talhicꞌatsanalh yalhch laꞌixlacaitat junta ixtavilanalhch ju ixꞌamamakaꞌui.

Chai ajunich:

―Jantu calacꞌalh ju miꞌalhunutꞌan ju uxijnan.

20 Acsni naulh ju ani pus alacmalacasunilh ju ixmacaꞌ chai laꞌixpakꞌaxtiꞌ junta ixlaccꞌatsanich.

Chai ju ixꞌamamakaꞌui na talackꞌachalhch acsni talaktsꞌinchokolh ju ixꞌucxtinꞌan Jesús.

21 Aktam ajunchokopa ju Jesús:

―Jantuch calacꞌalh ju miꞌalhunutꞌan.

Tachi ni quimalakachachilh ju quimpai pus vachuꞌ chunch ju quitꞌin iclamalakachayauch ju uxijnan ju laquilhichꞌalhcat.

22 Acsni naulh ju chunch pus lana asunulh.

Ajunich:

―Amaklhtꞌayanantꞌitch ju Spiritu Santu.

23 Ni xamatiꞌ amacꞌacxaniyaꞌitꞌit ju ixtalakꞌalhin pus macꞌacxanicantach.

Ju jantu amacꞌacxaniyaꞌitꞌit uxijnan pus jonkꞌalhitach ju ixtalakꞌalhin.

24 Para ju Tumax ju ixjuncan Cuate ju ixlhipumacautꞌuich ixjunita jantu ixmakvi acsni quilalh ju Jesús.

25 Ju aliꞌin ixtamamakaꞌunti ju Jesús tajunich ju Tumax:

―Iclaktsꞌiuch ju quiꞌucxtinꞌan.

Para ju yuchi alhikꞌalhtailh:

―Ni jantu iclaktsꞌini ju laꞌixlacmacaꞌ junta ixlactanumanilh ju cravos chai ni jantu icmanuni ju quinkꞌelilimacaꞌ junta ixlactanumanilh ju cravos chai ni jantu laquimacaꞌ quiꞌakstu ju acchꞌapanichokolh junta ilhtokꞌonicanta ju laꞌixpakꞌaxtiꞌ pus jantu iclacaꞌi.

26 Ju ixlhimixtujunch junchokolh aktam va lakputam ixtavilanampa ju lacachakaꞌ ju ixꞌamamakaꞌuich ju Jesús.

Chai ju Tumax ixvilhch vachuꞌ anch.

Chai ixtamalacchajuta.

Chai chinchokopa ju Jesús chai vana va chun navichokopa.

Jantu maklhteka ju lacamalhtich.

Para ni talhicꞌatsanalh yachokopalhch laꞌixlacaitat junta ixtavilanalh.

Ajunich:

―Jantuch calacꞌalh ju miꞌalhunutꞌan.

27 Chai lanach juncan ju Tumax:

―Amanutꞌich ju minkꞌelilimacaꞌ ju laquilacmacaꞌ junta ixtanun ju cravos.

Alaktsꞌinaꞌich.

Chai amakpꞌitꞌich ju lhiꞌani.

Atꞌamacnutꞌich ju lhilaquimpakꞌaxtiꞌ junta iclhtokꞌonicanta.

Jantu na pꞌas anavitꞌi ju miꞌalhunut.

Alacꞌaꞌitꞌi ju tuchꞌi uncꞌan.

28 Ju acsnich ju Tumax akꞌalhtayanalh.

Junich ju Jesús:

―Quiꞌucxtinꞌat chai quiDiosꞌat.

29 Ju Jesús junich:

―Ju uxintꞌi ji Tumax va acsnicaꞌ ju lai lacꞌaꞌi ni xaqꞌuilakꞌalaktsꞌinch.

Para palai takꞌachan ju yuꞌunch mas jantu quintalakꞌalaktsꞌinta para talacaꞌich.

―Juncanch ju Tumax.

30 Pus slivasalh na lhu ixpulacaꞌican navilh ju Jesús laꞌixꞌucxlacapuꞌan ju ixꞌamamakaꞌui.

Para jantu si tsꞌokkꞌocanta ju ani lacaꞌalhiqui.

31 Para ictsꞌokꞌulata ju ani ni apꞌulacꞌaꞌiyaꞌitꞌitch ni Jesús yuchi ju Cristo ju ixnoncan camalakachatachilh ju Dios.

Chai apꞌulacꞌaꞌiyaꞌitꞌit ni yuchi istsꞌalh Dios junita.

Chai caꞌalinach ju miꞌatsucuntiꞌan jonkꞌalhita ni alhilacꞌapꞌinaꞌitꞌit ju yuchi.