―Atsꞌucꞌukꞌalhitꞌi ji xaꞌucxtin israelitanin.

Chai slivasalh ixtalacasamai.

4 Ju acsnich ju gobernador Pilato taxtuchokopa ju makspaꞌ.

Ajunich ju lapanacni:

―Anich iclalhiminitau ni laich apꞌucꞌatsꞌayaꞌitꞌit ni jantu tuꞌuꞌ talakꞌalhin xaclhitajuni ju ani ya lapanac.

5 Pus ju Jesús lana taxtulh ju makspaꞌ.

Ixlacpatanunch ju ixcorona ju si alhtucunuꞌ.

Chai ixlakchꞌitach ju smumu pumpuꞌ.

Chai ju gobernador Pilato ajunich:

―Alaktsꞌintꞌitch ju ani ya lapanac.

6 Acsni talaktsꞌilh ju xalackꞌajin palijni chai ju ixtaropajni pus pꞌas talacnaulh:

―Amaqꞌuilhtꞌatꞌich ju lacacurus ju anuꞌ lapanac.

Para ju Pilato ajuni:

―Alai uxijnan alhipꞌinchitꞌitch.

Amaqꞌuilhtꞌachitꞌitch uxijnan.

Ju quitꞌin jantu tuꞌuꞌ xaclhitajuni ju ixtalakꞌalhin.

7 Chai taꞌakꞌalhtayanalh ju israelitanin:

―Ju quijnan alin ju quilhamapꞌaksin quincꞌan.

Chai ju laquilhamapꞌaksin quincꞌan najun ni tasqꞌuini ni canilh ju ani ya ni va ixnajun ni istsꞌalh Dios junita.

8 Pus ju Pilato acsni kꞌasmatlh ju ani chivinti palai na talhanalh.

9 Tanuchokopa aktam ju laꞌixpuꞌucxtin chai sacmichokopa ju Jesús ni ixtanumachokolhch ju yuchi:

―Tꞌas anchach ju xatꞌanachiꞌ.

Para ju Jesús jantu tuꞌuꞌ lhakꞌalhtayanalh.

10 Ju acsnich ju gobernador Pilato junich:

―Ja jantu tuꞌuꞌ aqꞌuinlhikꞌalhtꞌayaꞌ.

Ja jantu cꞌatsꞌai ni alin ju quintachaput ni lai aclhinaulh ju mimaquilhtaca ju lacacurus.

Chai alin ju quintachaput ni laich acmakꞌalhtaxtun.

11 Chai akꞌalhtayanalh ju Jesús:

―Jantu lai tuꞌuꞌ xaqꞌuintꞌinavitꞌi ni jantu cava Dios ju xalakꞌaꞌi ni aqꞌuimamakꞌalhkꞌajniyaꞌich.

Chai ju quitꞌin yuchi iclhijunan ni palai kꞌai talakꞌalhin ju lhiꞌan ju xaquimakꞌaxtꞌakꞌa ju lamimacni.

Palai jantu ju uxintꞌi.

12 Pus ju acsnich ixnajunch ju gobernador Pilato ni lai caꞌixmakꞌalhtaxtulh ju Jesús.

Para ju israelitanin pꞌas ixtajuni ju Pilato:

―Ni amakꞌalhtꞌaxtꞌuyaꞌ ju ani ya lapanac pus jantu ixꞌamigoꞌat ju César ju xakꞌai tucan lamilhiꞌuxijnan ju romanonin untꞌatꞌit.

Ju va kꞌaya kꞌostayai chai cajumputulh kꞌai ucxtin chux ju lacatꞌun pus ixtꞌalaxcaich junita ju César.

13 Chai ju gobernador Pilato acsni kꞌasmatlh junima chivinti pus maxtuchokopa makspaꞌ ju Jesús.

Tavi lacapuꞌucxtin junta ixmamacanta cemento.

Lacalhihebreo ju anch ixjuncan Gabata.

14 Pus ju ixlhicutanch ixtapasata ju ixlaccꞌatanitꞌan ju israelitanin acsni taꞌulh ju ixborregoꞌan.

Chai acsni tuncunchokolh acsnich ju makꞌosaspitlh ju Jesús ju Pilato.

Chai ju israelitanin vachuꞌ acsnich ju ixtalakasilakꞌoxiꞌulai ju ixvaitiꞌan ni paꞌastacni cajunaꞌ ni catuncunchokoyaꞌ.

Pus vatsꞌisin tsucucalh makꞌosaspitca ju Jesús.

Chai ju Pilato chani ajuni ju israelitanin:

―Alaktsꞌintꞌitch ju xakꞌai miꞌucxtinꞌan.

15 Para ju yuꞌunch pꞌas tanaulh:

―Amakꞌosutꞌich.

Amaqꞌuilhtꞌatꞌich ju lacacurus.

Chai ju Pilato ajunich ju lapanacni:

―Ja acmaquilhtayaꞌ ju miꞌucxtinꞌan ju lacacurus.

Taꞌakꞌalhtayanalh ju xalackꞌajin palijni:

―Matiꞌ apumatam quiꞌucxtin quincꞌan.

Va yuchi ju César.

16 Pus ju Pilato acsnich ju makꞌaxtaklh ju Jesús laꞌixmacaꞌan ju lapanacni ni catamaknilh ju Jesús.

Taꞌamaklhtayanalh ju Jesús.

Talhiꞌalhch.

17 Chai tamakxkꞌokꞌalh ju iscurus ju Jesús.

Talhiꞌalhch junta ixjuncan Aktsulh.

Ju lacalhihebreo ixjuncan Gólgota.

18 Anchach ju tamaquilhtachalhch ju Jesús chai ju aliꞌinch ixtꞌiyunꞌan.

Ju pumatam laꞌixlhicana ju maquilhtacalh laꞌiscurus chai ju apumatam laꞌixlhimacx ju maquilhtacalh ju laꞌiscurus.

Chai ju Jesús tamaquilhta laꞌixlacaitati.

19 Ju gobernador Pilato tsꞌoklh lakatam chivinti.

Lhinaulh ixmucꞌanica laꞌisꞌaktsulh ju iscurus ju Jesús.

Ju anuꞌ atsꞌoknut ixnajun:

“Yuchi ju Jesús amachakaꞌ Nazaret.

Yuchi ju kꞌai ixꞌucxtinꞌan ju israelitanin”.

20 Na lhu israelitanin ju ixtalaktsꞌin junima chivinti ni vanin ixvi ju lakꞌachakꞌan junta ixquilhtai ju Jesús.

Ju anuꞌ chivinti istsꞌokcanta lacalhihebreo chai lacalhigriego chai lacalhilatin.

21 Ju xalackꞌajin ixpalijni ju israelitanin tajunich ju gobernador Pilato:

―Jantu atsꞌoktꞌi ni yuchi ju ixꞌucxtinꞌan ju israelitanin.

Palai kꞌox ni canaulh:

“Ju ani ya ixnajun ni xaꞌucxtin israelitanin ixjunita”.

22 Chai akꞌalhtayanalh ju Pilato.

Ajunich:

―Ju tuchi xacꞌatsꞌoknun yuchach.

23 Ju taropajni acsni tamaquilhta ju laꞌiscurus ju Jesús tasacnilh ju ixlacpumpuꞌ ju Jesús junta ixmamanicanta.

Chai ni lakatꞌatꞌi ixjunita ju ixpumpuꞌ pus lakatamin talhiꞌalh ju pumatamin taropajni.

Chai vachuꞌ ixꞌalin lakatam ju ixpumpuꞌ ju Jesús ju jantu isputsꞌapancanta.

Lana va chunch ixlhinavicanta.

Tachi ju va ixmakꞌanchꞌich.

24 Chai talaclajunich ju sia yuꞌunch ju anuch taropajni:

―Jantu catipukꞌexvi ju ani pumpuꞌ.

Alai va calhilaslajvi.

Catasuyach tichi chavaich ixꞌanuch cajunaꞌ.

Ni chunch ju tanaulh pus uctaxtulh ju atsꞌoknut junta chani najun:

“Pumatamin lhiꞌalh ju quimpumpuꞌ.

Chai ju lakatam quimpumpuꞌ talhilaslajlh”.

Pus chunchach talalh ju taropajni.

25 Ju ixnatich ju Jesús chai ju ixlakꞌauch ju ixnati ju ixtalakasilakꞌoxiꞌulai ju ixvaitiꞌan ni paꞌastacni cajunaꞌ ni Cleofas chai ju Malia amachakaꞌ Magdala vanin ixtayanalh junta ixmucꞌacanta laꞌiscurus ju Jesús.

26 Ju Jesús acsni laktsꞌilh ju ixnati chai ju ixtamamakaꞌun ju na ixmapaini ni vanin ixtayanalh pus junich ju ixnati:

―Quinati yuchach ju ani ju mintsꞌalh ju chavai.

27 Astan junich ju ixtamamakaꞌun:

―Yuchach ju ani ju minati ju chavai.

Pus tus acsni avilhchan ju anuꞌ ixtamamakaꞌun ju Jesús malhistacnilh ju ixnati ju Jesús.

28 Chai acsnich ju cꞌatsalhch ju Jesús ni ixnavikꞌota tachi chun ju lhichꞌalhcat ju ilhcanita ju ixpai pus naulh:

―Na icquicxixtach.

Chunchach ju naulh ni capuꞌuctaxtulhch ju atsꞌoknut.

29 Pus ju taropajni ixtaꞌulata tam xalu ju tuꞌuꞌ tachi ju axvicnit.

Pus ju acsnich lana tacatanchꞌimucalh laꞌixquincatiꞌ achꞌitin ju hisopo juncan ju tuꞌuꞌ tachi pꞌulhulh panimac.

Chai tamalaktanunilh ju axvicnit.

Chai talhiꞌanilh laꞌixquilhni ju Jesús.

30 Ju Jesús acsni quilhcꞌatsalhch ju anuꞌ tachi axvicnit naulh:

―Uctaxtukꞌolh ju chavai.

Lana lilek navilh ju isꞌaktsulh chai acsnich ju nilh.

31 Ju acsnich ixlakasiꞌulacan ju ixtaxtokniꞌan ju israelitanin ixlacata ju avilhchan paꞌastacni.

Pus ju yuꞌunch jantu talacasqꞌuilh ni va catamakatunculh ju lacacurus ju ixpumatꞌutuꞌan ni paꞌastacni cajunaꞌ ni catuncunaꞌ.

Chai ju anuꞌ avilhchan paꞌastacni kꞌai cꞌatan cajunaꞌ.

Pus talhitapaininilh ju gobernador Pilato ni calaktekꞌenicalh ju ixchꞌajaꞌan ju anuꞌ ixpumatꞌutuꞌan lapanacni ju ixtaquilhtananch ju lacacurus.

Ju chunch lai palai vatsꞌalhti kꞌox cataniyaꞌ chai ni lai caꞌapꞌuxcalh.

32 Pus ju taropajni acsni tachaꞌalh junta taquilhtananch ju anuꞌ lapanacni pus pꞌulhnan tatekꞌenilh ju ixchꞌajaꞌ ju pumatam.

Vana chunch tanavipa ju apumatam ju anuꞌ ju ixꞌatꞌamaquilhtacanta ju Jesús.

33 Para acsni talakꞌalh ju Jesús junta ixquilhtai talaktsꞌilh ni ixnitach ju yuchi.

Pus jantu tachꞌantekꞌelh ju yuchi.

34 Para ju pumatam taropa lana lhtokꞌonilh laꞌixpakꞌaxtiꞌ ju Jesús laꞌislansa.

Pus lana taxtunilh ju ixꞌacꞌalhni.

Va lhiya ju xcan.

35 Pus ju quitꞌin iclaktsꞌilhch chai quitꞌin icnajun tuchi tapasalhch.

Chai ju tuchi icnajun stavasalanti.

Chai ju quitꞌin kꞌoxich iccꞌatsai.

Chai iclajunau ju stavasalanti ni lai apꞌulacꞌaꞌiyaꞌitꞌit vachuꞌ ju uxijnan.

36 Junima taxtokni chunchach ju navicalh ni chunchach ju capuꞌuctaxtuyaꞌ ju atsꞌoknut junta chani najun:

“Ju yuchi jantu catitekꞌenicalh ju ixꞌalucutni”.

37 Vachuꞌ chani najun ju alakatam atsꞌoknut:

“Catalaktsꞌinach ju xatalhtokꞌoich”.

38 Pus ju José amachakaꞌ Arimatea ixtamamakaꞌun ixjunita ju Jesús.

Para va jantu ixlacasqꞌuin ni cacꞌatsacalh ni va ixꞌatalhoni ju xalackꞌajin istꞌaꞌisraelitanin.

Para acsni tapasakꞌolhch ju ani taxtokni pus ju yuchi alh tapainininiꞌ ju gobernador Pilato ni laich capꞌuxlh ju ixlacatuna ju lijunto Jesús.

Chai ju Pilato lacasqꞌuinilh.

Chai ju José lana alh pꞌuxnuꞌ ju ixlacatuna ju lijunto Jesús.

39 Chai vachuꞌ makachꞌakꞌokꞌanalh ju Nicodemo.

Yuchi ju quitꞌachivinilh tsꞌis ju Jesús.

Ixlhiꞌantach ju pokxni ju na cꞌus ixꞌacamin.

Ixlhinavicanta ju xaqꞌuiu mira chai ixlhiya ixkꞌalhchat ju xaqꞌuiu aloes.

Tachi lakapꞌuxamcau kilo istatsꞌinqꞌuita.

40 Pus tapꞌuxlich ixlacatuna ju lijunto Jesús.

Chai acsni ixtatꞌajun lakapachꞌinin ju lacalhman pumpuꞌ pus ixtalacamucꞌaꞌantach ju anuꞌ alakꞌoxinti pokxni ni chunchach ju ixtalhilanitach ju israelitanin acsni ixtalamacnuich.

41 Junta ixmaquilhtacantach ju Jesús ixꞌalin lakatam puꞌolivos.

Chai ju anch lacapuꞌolivos ixꞌalin junta va lhucucu ixjunita lactalhpa.

Ju anch jantucaꞌ tavanan ixmamacanta ixlacatuna xamatiꞌ.

42 Pus anch ju makꞌacalh ixlacatuna ju lijunto Jesús ni vanin ixvi ju anuꞌ junta lhucucu lactalhpa ixjunita.

Va istasokꞌoi ni ixchimputun ju hora acsni jantu lai ixtachꞌalhcatnan ju israelitanin ni paꞌastacni cajunaꞌ.