Chꞌapacalh ju Jesús
18
Ju Jesús acsni nonkꞌo ju ani chivinti alactꞌataxtulh ju ixꞌamamakaꞌui.
Alactꞌaꞌalh ju lhimakꞌantacutni ju xaxkꞌati Cedrón junta ixchꞌancan xaqꞌuiu ju olivo.
Anch ju alactꞌatanuchalhch ju Jesús ju ixꞌamamakaꞌui.
2 Chai vachuꞌ ju anuꞌ lapanac ju Judas ixjuncan ismispaich ju anuꞌ puꞌolivos.
Yuchi ju Judas ju camakꞌaxtꞌakꞌach ju ixꞌucxtin.
Pus ni na paklhu ju ixꞌalactꞌaquilata ju anch ju Jesús ju ixꞌamamakaꞌui pus yuchi ixlhimispaich ju Judas ju anuꞌ puꞌolivos.
3 Judas ju apꞌulhnilh ju ixtaropajni ju kꞌai ucxtin chai ixtaropajni ju xalackꞌajinch palijnich chai ju fariseonin.
Pus ju yuꞌunch ixtalhiꞌanta ixlacmaclhcuꞌan chai ixkꞌaꞌichiꞌan chai ixmachitaꞌan.
4 Ju Jesús ni iscꞌatsakꞌojuich tachi chun ju taxtokni ju catapasayach laꞌisꞌatsucunti pus va kꞌoxiya quiꞌapakxtoklh.
Ajunich:
―Tis chavaich ju pꞌuxcꞌoyatꞌit.
5 Chai tajunich:
―Yuchi icpuxcoyau ju Jesús ju amachakaꞌ Nazaret.
Chai ju Jesús ajunich:
―Pus quitꞌinch ju quilapuxcoyau.
Ju Judas ju xaꞌamakꞌaxtaknaꞌ ixꞌalactꞌamintach.
6 Chai acsni naulh ju Jesús ni yuchach pus lana tin tapuꞌalh ixpulacanꞌan chai lana tatamakꞌocha.
7 Aktam asacmichokopa ju Jesús.
Ajunich:
―Tis chavaich ju pꞌuxcꞌoyatꞌit.
Tanonchokopa ju taropajni:
―Yuchi ju Jesús amachakaꞌ Nazaret.
8 Chai aktam ajunchokopa ju Jesús:
―Ni iclajumpalauch ni quitꞌinch.
Pus ni quitꞌinch ju quilapuxcoyau pus chach taꞌancha ju ani tayanalh.
9 Chunch ju puꞌuctaxtulh ju chivinti ju ixnajunta ju Jesús acsni chani naulh:
“Ju yuꞌunch ju qꞌuixtꞌaknitꞌach jantu xamatiꞌ icmakꞌatsꞌankꞌata”.
10 Ju acsnich ju Simón Pitaluꞌ ni ixchꞌapata ju ixmachita pus lana xakꞌaxtulh laxaꞌaxtꞌakꞌan.
Lana catuchakxlh ju ixlapanac ju xakꞌai pali.
Pꞌuxnilh ju ixꞌakꞌaxkꞌolh laꞌixcatucana.
Chai ju yuchi ixlapanac ixjunita ju xakꞌai pali ju Malco ixjuncan.
11 Ju acsnich ju Jesús junilhch ju Pitaluꞌ:
―Amakꞌachꞌokꞌoch ju mimachita laxaꞌaxtꞌakꞌan.
Ju anuꞌ na tsꞌinqꞌui makꞌalhkꞌajnat ju quilhilhcatach ju quimpai ja va naꞌun ni jantu acmuctaxtuyaꞌ.
Ju Jesús lhiꞌancalh laꞌixꞌucxlacapuꞌ ju xakꞌai pali
12 Ju acsnich ju taropajni chai ju xacomandante chai ju xataropajnich ju israelitanin lana tachꞌapalh ju Jesús.
Tachꞌin tanavi.
13 Pꞌulhnan talhiꞌanilh laꞌixpuꞌucxtin ju Anás.
Ju yuchi ixputꞌijokꞌat ixjunita ju Caifás.
Yuchi ju xakꞌai pali ixjunita ju acsni cꞌata.
14 Ju ixjuncan Caifás yuchi ju ixꞌamapꞌaksi ju istꞌaꞌisraelitanin.
Ixꞌajunich ni aktsꞌiya istasqꞌuini ni canilh pumatam jokꞌat ixlacataꞌan ju lapanacni.
Ju Pitaluꞌ naulh ni jantu mispai ju Jesús
15 Ju Simón Pitaluꞌ chai ju apumatamch ixtꞌatamakaꞌun yuꞌunchach ju ixtachꞌakꞌokꞌata ju Jesús acsni lhiꞌancalh tachꞌin.
Chai ju xakꞌai pali na ixtꞌalamispaich ju anuꞌ pumatam chai yuchi lhitꞌamapasacalh ju Jesús ju yuchi laꞌixpulacni junta ixlakachakꞌaxnucanta ju ixchakaꞌ ju xakꞌai pali.
16 Para ju Pitaluꞌ va makspaꞌ taya laxamalhtich.
Pus taxtuchilh ju anuꞌ ixtꞌatamamakaꞌun.
Ju yuchi ni na ixtꞌalamispaich ju xakꞌai pali pus tapaininilh ju anuꞌ atsiꞌ ju ixlhistacnaꞌ ju malhtich.
Chai acsnicaꞌ ju tanulh ju Pitaluꞌ.
17 Ju acsnich ju anuꞌ atsiꞌ ju ixlhistacnaꞌ ju malhtich junich ju Pitaluꞌ:
―Ju uxintꞌi ja jantu vachuꞌ ixlapanacꞌat ju anuꞌ jokꞌat.
Pus ju Pitaluꞌ naulh ni jantu.
18 Chai ixtayanalh ju xalapanacnich anch chai ju ixtaropajni ju xalackꞌajin palijni.
Chai ixtamalhculata ni na lhicꞌasnin ixjunita.
Va ixtalacskꞌonvilanalh.
Chai ju Pitaluꞌ vachuch anch maktaya ni va iskꞌomputunch.
Ju Anás makꞌosaspitlh ju Jesús
19 Ju xakꞌai pali sacmilh ju Jesús ixlacata ju ixꞌamamakaꞌui chai tuchi ju ixꞌalhimalanich ju lapanacni.
20 Ju Jesús akꞌalhtayanalh:
―Ju quitꞌin xacchivinin laꞌixꞌucxlacapuꞌan ju ixtalhavat lapanacni.
Chai lamilacpujitatꞌan chai lacakꞌai mimpujitatꞌan xacꞌamalani ju ixchivinti Dios junta aktsꞌiya ixtatakꞌaixtꞌokꞌach ju quintꞌaꞌisraelitaninꞌan.
Jantu tuꞌuꞌ ju va sek xacnajun.
21 Tajuch ni va qꞌuisacmipꞌalai.
Asacmitꞌich ju lapanacni ju takꞌasmatꞌach ju tuchi xacꞌajunich.
Ju yuꞌunch tacꞌatsaich tuchi ju xacꞌajunich.
22 Acsni naulh ju chunch ju Jesús pus ju pumatam taropa ju ixmakyalh anch lanach paknisalh ju Jesús.
Junich:
―Ja chunchach ju alhikꞌalhtꞌayaꞌ ju xakꞌai pali.
23 Chai akꞌalhtayanalh ju Jesús:
―Ni jantu sok ju xacnajun pus anauch tas anchach ju jantu soknicꞌa.
Para ni soknicꞌa ju xacnajun tꞌas ni va xaqꞌuiꞌulanich.
24 Ju acsnich ju Anás tachꞌin malakachachokopa ju Jesús junta ixvilhcha ju Caifás ju xakꞌai pali.
Ju Pitaluꞌ nonchokopa ni jantu mispai ju Jesús
25 Pus ju Simón Pitaluꞌ anch ixyakꞌalhi junta ixtꞌajun skꞌonuꞌ.
Tajunich:
―Ja jantu vachuꞌ uxintꞌi ju ixtamamakaꞌunꞌat ju anuꞌ lapanac.
Para ju Pitaluꞌ naulh ni jantu.
26 Chai ju pumatam ixlapanac ju xakꞌai pali ixlhilakꞌau ixjunita ju anuch ju catuchakxpꞌuxlh ju Pitaluꞌ.
Yuchach ju sacmichokopa ju Pitaluꞌ.
Junich:
―Ja jantu iclaktsꞌinchan ju lacapuꞌolivos junta ixvilhcha ju anuꞌ lapanac.
27 Pus ju Pitaluꞌ aktam nonchokopa ni jantu mispai.
Chai lanach tꞌasalh ju puyux.
Ju Jesús laꞌixpuꞌucxtin Pilato
28 Chai lana maxtucalh ju Jesús ju laꞌixchakaꞌ ju Caifás.
Talhiꞌalhch laꞌixpuꞌucxtin ju xagobernador Roma.
Vatsꞌisincaꞌ ixjunita.
Para ju israelitanin jantu tatanulh ju lacapuꞌucxtin ni jantu ixlhijun ju laꞌixlhamapꞌaksinꞌan ni lai catatanu ni jantu ixlakꞌoxicanta ju anuꞌ puꞌucxtin.
Ni jantu catatanuyaꞌ ju lacapuꞌucxtin pus laich catalhicꞌataniyaꞌ ju ixborregoꞌan ni catuncunchokoyaꞌ chai laich cataꞌuyach.
29 Pus ju gobernador Pilato acsni taxtuchilh ju laꞌixpuꞌucxtin ajunich ju lapanacni:
―Tijuch ju lhichꞌivimakꞌanatꞌit ju ani ya jokꞌat.
30 Chai taꞌakꞌalhtayanalh ju lapanacni.
Tanajunch:
―Ni jantu cava alin ixtalakꞌalhin pus jantu cava xaclamakꞌaxtakniu.
31 Pus ju Pilato chanich ajunich acsni akꞌalhtailh ju lapanacni:
―Alaich alhipꞌinchitꞌit miꞌakstuꞌan.
Alaktsꞌintꞌitch ta yu najunch lamilhamapꞌaksinꞌan.
Para ju israelitanin tanaulh:
―Jantu lhijun ju lhamapꞌaksin ni acmakniu tam xamatiꞌ ju quijnan ju israelitanin icjuntau.
32 Acsni naulh ju chunch pus uctaxtulh ju tuchi ixnajuntach ju Jesús ixlacata tuchi anintich ju capuniyaꞌ.
33 Ju acsnich ju gobernador Pilato tanuchokopa ju laꞌixpuꞌucxtin.
Tꞌasanilh ju Jesús.
Junich:
―Ja uxintꞌich ju xaꞌucxtinꞌat ju israelitanin.
34 Ju acsnich ju Jesús kꞌalhtailh.
Junilh ju Pilato:
―Ja va miꞌakstu xapꞌastꞌacꞌa ju ani xaqꞌuiꞌuni u va xamatiꞌ juntan.
35 Ju Pilato lhikꞌalhtailh:
―Ja icꞌisraelita ni laich acnaulh ni xakꞌaichꞌat.
Yuꞌunch ju mintꞌaꞌamachakꞌan chai ju xalackꞌajin palijni ju xatamakꞌaxtꞌakꞌan ju laquimacni.
Tijuch ju xaꞌanavini.
36 Akꞌalhtayanalh ju Jesús:
―Ju quimpuꞌucxtin jantu xanavin ju ani lacamunutpaꞌ.
Ni ani lacamunutpaꞌ cava ju quimpuꞌucxtin pus caꞌixtalasa ju quilapanacni.
Ju chunch jantu lai caꞌixquintitachꞌapalh ju quintꞌaꞌisraelitanin.
Para jantu ani ju quimpuꞌucxtin.
37 Ju acsnich ju Pilato junich:
―Ja vasalhꞌas ni ucxtinꞌat.
Chai akꞌalhtayanalh ju Jesús:
―Vas ju naꞌun ni icꞌucxtin.
Yuchi xaclhilakꞌajunch ju ani lacamunutpaꞌ.
Chai iclhimilhch ju ani lacamunutpaꞌ ni laich acꞌajunaꞌ ju lapanacni ju stavasalanti.
Tachi chun ju takꞌachani ju stavasalanti takꞌasmatꞌa ju quinchivinti.
38 Chai ju Pilato asacmininch:
―Tijuch ju stavasalanti.
―Juncanch ju Jesús.
Ju Jesús makꞌaxtakcalh laꞌixꞌaninti
Acsni naulh ju ani pus alakꞌanchokopa ju israelitanin ju gobernador Pilato.
Ajunich ju yuꞌunch:
―Jantu tuꞌuꞌ iclhitajuni ixtalakꞌalhin ju ani lapanac.
39 Pus aquilajuniuch tichi tachꞌinch ju aclhinonaꞌ ixmaxtuca ju lacapulachꞌin tachi ju aktsꞌiya lhilanitꞌatꞌit acsni uyatꞌit ju mimborregoꞌan tachi ju chavaich cꞌatan.
Ja lacꞌasqꞌuinatꞌit ni yuchi ju acmaxtulh ju miꞌucxtinꞌan ju uxijnan ji israelitanin.
40 Ju acsnich ixchuxꞌan pꞌas talacchivinchokopa.
Tajunich ju kꞌai ucxtin:
―Jantiyuꞌ ju iclacasqꞌuinau.
Yuchi ju calacamaconcanaꞌ ju Barrabás.
Pus ju Barrabás va akꞌalhonaꞌ ixjunita.