Ju Jesús chaich ju Nicodemo
3
Ju pumatam lapanac Nicodemo ixjuncan.
Chai ju yuchi xaꞌucxtin israelitanin ixjunita.
Chai na ixlacaꞌi vachuꞌ ju ixlhamapꞌaksinꞌan ju fariseonin.
2 Ju yuchi tsꞌis ju quilaktsꞌilh ju Jesús.
Chaich chani juni acsni lakchaꞌalh:
―Amamakaꞌunuꞌ iccꞌatsayauch ni laꞌixmacni Dios ju tꞌantꞌa amamakaꞌunuꞌ.
Va icpucꞌatsayauch chunch ni jantu xamatiꞌ ju lai canavi ju ani lhamakꞌan ju tuchꞌi navich ju uxintꞌi ni jantu cava Dios ju aktaijuyan.
3 Chai akꞌalhtayanalh ju Jesús.
Junich:
―Slivasalh ju icjunan.
Ju jantu catsucuchokoyaꞌ aktam jantu lai catiꞌalh junta lhinajun ju Dios.
4 Ju Nicodemo naulh:
―Tas calhitalacatꞌicstꞌichokolh ju na papach chai catsucuchokolh.
Ja laich catanuchokolh ju laꞌixpulacni ixnati chai calokꞌonchokolhch.
5 Pus akꞌalhtayanalh ju Jesús.
Junich:
―Slivasalh ju icjunan.
Ju tam lapanac ju akpaxta va ixlacaꞌatalh ni tam xajun ju isꞌatsucunti pus tachi ju va tsucuchokolhcaꞌ.
Chai acsni tanui ju Spiritu Santu laꞌisꞌatsucunti tam xamatiꞌ pus vana tachi ju va tsucuchokolhcaꞌ.
Para ju lapanacni ju jantu tam junita ju isꞌatsucuntiꞌan chai ju jantu tapacxanta ju Spiritu Santu laꞌixꞌalhunutꞌan pus jantu lai catitatanu junta lhinajun ju Dios.
6 Ju uxijnan maklokꞌoncꞌantꞌatꞌit ju ani laꞌixtachaput ju mimpaiꞌan minatiꞌan.
Para puꞌamaklhtayanancan ju sastꞌi miꞌatsucuntiꞌan laꞌixtachaput ju Spiritu Santu.
7 Jantu alhamakꞌanin ni xacjunan ni aktsꞌiya tasqꞌuini ni atsꞌucꞌuchꞌokꞌoyaꞌ.
8 Ju un vanta anchach ju lai.
Chai kꞌasmatcan ju istꞌasat.
Para jantu cꞌatsacan ta anchach ju minacha nin lai cacꞌatsacalh ta anchach ju anta.
Vana va chun ju tam lapanac ju alin sastꞌi isꞌatsucunti ju xaxtakni ju Spiritu Santu.
Ju akꞌantam ju jantucaꞌ lhilaksi ju Dios jantucaꞌ cꞌatsai tuchi ju xapuꞌalinch ju chunch sastꞌi atsucunti.
9 Ju Nicodemo chanich juni:
―Pus tas lhiꞌucxꞌantach ju ani.
10 Chai chanich lhikꞌalhtailh ju Jesús ju Nicodemo.
Junich:
―Ja jantu uxintꞌich pumatam ju amamakaꞌui ju mintꞌaꞌisraelitanin chai ixlaquilhtu jantu lai machꞌakxai ju ani.
11 Slivasalh ju icjunan.
Ju tuchi icmispayauch icnonauch.
Ju tuchi iclaktsꞌintau icmavasalayauch.
Para ju uxijnan jantu lai quilalacaꞌiniyau ju tuchi icnonauch.
12 Ni icjuntan ju va ixlacata saꞌatsucunti ju ani lacamunutpaꞌ chai jantu lacꞌaꞌi ju quinchivinti tas alhilacꞌaꞌiyaꞌich ni acjunin ixlacata ju atsucunti ju xtꞌakꞌa ju Dios ju vilhcha lactꞌiyan.
13 Jantu xamatiꞌ ju quilata ju lactꞌiyan ni laich cacꞌatsa ta yu junitach ju anch.
Va quitꞌin ju iccꞌatsai ta yu junitach ju anch ni anch ju xacminacha ju lactꞌiyan.
Chai anch ictꞌajun ju lactꞌiyan.
Quitꞌin ju quimalakachatachilh ju Dios ni lapanac actsucuyaꞌ ju ani.
14 Tachi ju Moisés ni maquilhta ju lu junta aseknicꞌa pus chunchach vachuꞌ tasqꞌuini ni aquimaquilhtacalh ju quitꞌin ju quimalakachatachilh ju Dios ni lapanac actsucuyaꞌ ju ani.
15 Acsni chunch acnavicanach pus tachi chun ju aquilhilacaꞌanach jantu catsꞌankꞌayaꞌ.
Alinch isꞌatsucunti ju conkꞌalhiyanta ju lactꞌiyan.
Na amapaini ju Dios ju lapanacni ju ani lacamunutpaꞌ
Ju Jesús tailhiꞌalh ju ixchivinti chai juni ju Nicodemo:
16 ―Ju Dios chunchach ju apumapaini ju lapanacni ju ani lacamunutpaꞌ ni quilhitapꞌuxlh ju quitꞌin ju lakatami istsꞌalh icjunita.
Ju chunch tachi chun ju aquintalhilacaꞌanach jantu catsꞌankꞌayaꞌ.
Alin isꞌatsucuntiꞌan ju conkꞌalhiyanta lactꞌiyan.
17 Ju Dios jantiyuꞌ quilhimacamilh ju ani lacamunutpaꞌ ni va acꞌulanilh ixtalakꞌalhinꞌan ju lapanacni.
Para alai va quilhimacamilh ni laquimacni cataputakꞌalhtaxtuyach ju lapanacni.
18 Ju quilhilacaꞌan pus tus ani jantuch mucꞌanican ju ixtalakꞌalhin.
Para ju jantu quilhilacaꞌan pus tus ani mucꞌanicanta ju ixtalakꞌalhin va ixlacata ni jantu quilhilacaꞌanta ju laquintapakaꞌut ju lakatami istsꞌalh Dios icjunita.
19 Icminta ju ani lacamunutpaꞌ ju quitꞌin ju tachi maclhcu icjunita ni icꞌamalacpucujunuꞌ.
Para ju lapanacni jantu tuꞌuꞌ quintalhiula.
Va palai kꞌox talhiula ni tachi ju va lacaꞌatatsꞌisni catatsuculh mas tuncujuntach.
Tachi ju va lacaꞌatatsꞌisni ju tatꞌajun ni va tanaviputun ju macxcai.
Chai yuchi alhimucꞌanicanta ixtalakꞌalhinꞌan.
20 Chai tachi chun ju tanavitꞌajun ju jantu kꞌox pus jantu kꞌox quintalhiulai ju quitꞌin ju tachi maclhcu icjunita ni icꞌamalacpucujunuꞌ.
Chai jantu quintalakmin ju laquimacni va ixlacata ni jantu catasu tuchi tanavich.
21 Para ju navi ju stavasalanti quilakmin ju quitꞌin ju tachi maclhcu icjunita ni icꞌamalacpucujunuꞌ.
Ju chunch laich calaktsꞌincanaꞌ tuchi navich ni laꞌixtachaput Dios ju navi.
Ixꞌamigo ju tamakꞌaxtꞌokꞌa
22 Acsni tapasakꞌolhch ju ani taxtokni pus astan ju Jesús alactꞌamilh ju ixꞌamamakaꞌui laxaꞌestado Judea.
Chai acsni ixꞌalactꞌavilhcha ju anch pus ixtaꞌamakpaxananch ju ixꞌamamakaꞌui.
23 Ju Xivan vachuꞌ ixꞌamakpaxanan ju lakꞌachakꞌan Enón ju vanin ixtꞌavi ju lakꞌachakꞌan Salim.
Chai ju ixtachꞌakꞌokꞌaich ju yuchi anch ju ixꞌamakpaxaich ni na lhu ixꞌalin ju xcan ju anch.
24 Ju Xivan tucaꞌ ixtꞌalhnucanta.
25 Pus ju israelitanin ixtalhilanita ni na paklhu ixtalacchꞌakꞌai ixlaccꞌaꞌulhꞌan chai na paklhu ixtakꞌaichꞌakꞌai ni ma chunch salaka caꞌalaktsꞌilh ju Dios.
Pus ju ixꞌamamakaꞌui ju Xivan ni jantu chun ixtanavi tachi ju ixtalhilanitach ju istꞌaꞌisraelitanin pus atꞌalakꞌajicalh ju ixlapanacni ju Xivan.
26 Chai ju ixꞌamamakaꞌui ju Xivan talakmilh ju ixꞌamamakaꞌunuꞌan.
Tajunich:
―Amamakaꞌunuꞌ ju anuꞌ lapanac ju ixtꞌavilhchan lhimakꞌantacutni xaxcan Jordán ju chavai amakpaxananch chai na lhu ju talakxcavataji ju yuchi.
Yuchi ju anuꞌ ju lhichꞌivin.
27 Chai akꞌalhtayanalh ju Xivan.
Ajunich:
―Jantu lai xamatiꞌ amaklhtayanan tuꞌuꞌ tachaput ni jantu lactꞌiyan ju caxtaknicancha.
28 Miꞌakstuꞌan uxijnan ju kꞌasmatꞌatꞌit acsni icnaulhch ni jantu quitꞌin ju icCristo ju noncan camalakachatachilh ju Dios.
Ju quitꞌin va pꞌulhnan icmalakachacantachilh.
Astan mintacha ju yuchi.
29 Junta tamakꞌaxtꞌokꞌa tam tsꞌalh pus anchach vachuꞌ ya ju ixꞌamigo chai ni kꞌasmatꞌa ixchivinti ju anuꞌ ixꞌamigo acsni tꞌachivinin ju isꞌasqꞌuininti pus na kꞌachanch.
Pus vana va chun ju quitꞌin.
Na ickꞌachan acsni takꞌasmatni ixchivinti ju Cristo ju lapanacni.
30 Tasqꞌuini ni cacꞌatsacalh ni yuchi ju xakꞌai.
Para tasqꞌuini ni jantu tuꞌuꞌ quintapalhni cava ju quitꞌin.
Ju lapanac ju mintachalh lactꞌiyan
31 Ju lactꞌiyan mintachalh yuchach ju palai xakꞌai.
Ju va lhilapanac tsucuta pus va lhilapanac tꞌajun chai va ixtaxtokni lacamunutpaꞌ ju lhichivinin.
Para ju lactꞌiyan mintacha yuchi ju palai xakꞌai.
32 Ju tuchi laktsꞌinta ju yuchi chai kꞌasmatꞌach pus yuchach ju najun.
Para jantu xamatiꞌ lacaꞌini ju ixchivinti.
33 Ju lacaꞌini ju ixchivinti mavasalai ni vas najun ju Dios.
34 Ju macaminta ju Dios pus chivinin ixchivinti Dios.
Chunchach chivinin ni jantu va lhcaxtꞌakꞌa ju Dios ju Spiritu Santu.
35 Ju xapai Dios mapaini ju istsꞌalh.
Chai xtaknikꞌota ixtachaput ju istsꞌalh.
36 Ju lhilacaꞌanch ju istsꞌalh Dios alin isꞌatsucunti ju conkꞌalhiyanta tus lactꞌiyan.
Ju jantu tuꞌuꞌ lhiulani ju istsꞌalh Dios jantu catiꞌalilh ju isꞌatsucunti ju conkꞌalhiyanta lactꞌiyan ni va ulanich ixtalhkꞌamti ju Dios ju anuꞌ lapanac.