5 Ju yuchi milh ju lakꞌachakꞌan junta ixjuncan Sicar laxaꞌestado Samaria.

Vanin tꞌalachꞌapata ju ixtꞌun ju anuꞌ makꞌaniya israelita ju ixjuncan Jacob.

Anch junta lhikꞌailaktsꞌinta ju istsꞌalh ju ixjuncan José.

6 Chai ju anch ixvi ju pos ju ixꞌanuch ixjunita ju Jacob ju makꞌanchich.

Pus anchach ju astacnalh ju Jesús ni na ixkꞌoptach ni na makat ju ixꞌalhtananta.

Chai ixtꞌajunch kꞌatuncunuꞌ.

7 Chai chaꞌalh pumatam chakoꞌulh amachakaꞌ Samaria.

Va ixꞌiputun ju xcan.

Pus ju Jesús junich:

―Aqꞌuintꞌakꞌotꞌich lacatsꞌunin ju mixcan.

8 Pus ju ixꞌamamakaꞌui ju Jesús ixtaꞌanta ju lakꞌachakꞌan tamonin ju vaiti.

9 Pus ju anuꞌ chakoꞌulh ju amachakaꞌ Samaria ixjunita chanich lhikꞌalhtayanalh:

―Ju uxintꞌi ni va israelitaꞌat tajuch ni va qꞌuisqꞌuinipꞌalai ju xcan.

Ju quitꞌin ni icꞌamachakaꞌ Samaria.

Ju israelitanin jantu lai tatꞌalaxakꞌalai ju amachakꞌan Samaria.

10 Chai akꞌalhtayanalh ju Jesús.

Junich:

―Ju uxintꞌi jantu mispꞌai ju ixlhakꞌailaktsꞌin Dios.

Chai jantu qꞌuimispꞌai tichi chavaich ju quitꞌin ju icjunan ni aqꞌuintꞌakꞌotꞌich ju mixcan.

Ni xaqꞌuimispꞌatꞌi cava pus alai uxintꞌi xaqꞌuisqꞌuinin chai xacxtaknin ju xcan ju xtꞌakꞌa ju atsucunti.

11 Pus ju chakoꞌulh chani lhikꞌalhtayanalh:

―Ji compari matiꞌ ju apꞌuꞌitꞌi ju xcan.

Ju pos ni na putalhman.

Tas anchach ju lai aꞌiyaꞌ ju mixcan ju xtꞌakꞌa ju atsucunti.

12 Ju uxintꞌi ja xakꞌaiꞌat.

Ja palai jantu ju makꞌaniya quimpaiꞌan Jacob ju quintaxtaknitan ju ani pos.

Anich ju kꞌotlh ju yuchi chai ju isꞌaskꞌatꞌan chaich ju ixꞌatapacxat.

13 Ju Jesús chani lhikꞌalhtayanalh:

―Va tichi chavaich ju cakꞌotꞌaꞌ junima xcan caquicxixchokoyaꞌ.

14 Para va tichi chavaich ju cakꞌotꞌaꞌ ju xcan ju acxtakniyaꞌ quitꞌin jantu tavanan catiquicxixchokolh.

Ju anuꞌ xcan ju acxtakniyaꞌ quitꞌin tachi kꞌai pos cajunaꞌ laꞌixꞌalhunut ju jantu tavanan caxixaꞌ.

Chai yuchi ju capuꞌalinach isꞌatsucunti ju conkꞌalhiyanta tus lactꞌiyan.

15 Pus ju chakoꞌulh chanich juni:

―Pus ji compari aqꞌuixtꞌakninch ju anuꞌ xcan.

Ju chunch jantuch acquicxixchokoyaꞌ.

Chai jantu acminaꞌ iniꞌ ju ani.

16 Chai ju Jesús chanich juni ju anuꞌ chakoꞌulh:

―Aꞌinchich tꞌasaniniꞌ ju mimpapa.

Kꞌaixtamch atꞌatꞌanaꞌ.

17 Chai ju chakoꞌulh chani lhikꞌalhtayanalh:

―Matiꞌ ju quimpapa ju quitꞌin.

Chai ju Jesús chani juni:

―Stavasalantich ju naꞌun ni matiꞌ ju mimpapa.

18 Pumaquisich lapanacni ju tꞌatsꞌucꞌumakꞌantꞌa.

Chai ju chavai tꞌatꞌaꞌun jantuch yuꞌ ju mimpapa.

Stavasalantich ju naꞌun.

19 Pus ju chakoꞌulh chani lhikꞌalhtailh:

―Compari iccꞌatsaich ni laich vachuꞌ naꞌun ixchivinti Dios.

20 Ju quilacpai quincꞌan anch ju anuꞌ lactalhpa ju ixtaꞌan lakꞌayanin ju Dios.

Para ju uxijnan ju israelitanin untꞌatꞌit nonatꞌit ni va anch ju lakꞌachakꞌan Jerusalén ju lai acꞌalh lakꞌayanaꞌ ju Dios.

21 Pus ju Jesús chani lhikꞌalhtailh:

―Chakoꞌulh aqꞌuilacꞌaꞌininch ju acjunan.

Caminaꞌ avilhchan ni jantu atꞌilakꞌayatꞌit ju xapai Dios nin yuchi ju ani lactalhpa nin anch ju lakꞌachakꞌan Jerusalén.

22 Ju uxijnan jantu cꞌatsꞌayatꞌit tuchꞌi ju lakꞌayayatꞌit.

Ju quijnan iccꞌatsayau tuchi ju iclakꞌayayau ni laquilhiquijnan ju israelitanin icjuntau ju caꞌalinaꞌ ju amakꞌalhtaxtunuꞌ.

23 Cachinach ju avilhchan ju vasalh nomputun ni xakꞌai ju xapai Dios catanonach laꞌixlhichux ixꞌalhunutꞌan chai calakꞌayayaꞌ tachi ju kꞌachani ju yuchi.

Chai mas chavaich chunch catalalh.

Pus ju xapai Dios lacasqꞌuin ni cataꞌalilh ju lapanacni ju chunch catalakꞌaya.

24 Ju Dios matiꞌ ixlacatuna.

Ju talakꞌayaich ju yuchi tasqꞌuini ni catalakꞌaya laꞌixꞌalhunutꞌan chai tachi ju kꞌachani ju yuchi.

25 Ju chakoꞌulh chani juni:

―Iccꞌatsaich ni caminaꞌ ju noncan camalakachatachilh ju Dios.

Yuchi ju talhimapakaꞌui Cristo.

Chai acsni caminaꞌ ju yuchi aquintamavasalanikꞌoyan chux ju taxtokni.

26 Akꞌalhtayanalh ju Jesús:

―Quitꞌinch ju icCristo ju ictꞌachivinan.

27 Acsnich ju tachincha ju ixꞌamamakaꞌui ju Jesús.

Pus na talhamakꞌaninilh ni va ixtꞌajunch tꞌachiviniꞌ ju anuꞌ chakoꞌulh ju Jesús.

Para jantu xamatiꞌ ju lai casacminilh ju laich cajunilh:

“Tijuch ju sasacmi” U “Tijuch ju xalhitꞌachꞌivinin ju chakoꞌulh”.

28 Pus ju chakoꞌulh macauꞌula ju ixꞌakxau chai anchokolh ju lakꞌachakꞌan.

Alh alacjuniniꞌ ju amachakꞌan anch.

Ajunich:

29 ―Caꞌauch laktsꞌinin ju anuꞌ lapanac ju xaquijuni tachi chun ju icnavitach.

Ja jantiyuꞌ nuꞌ ju Cristo ju noncan camalakachatachilh ju Dios.

30 Pus ju acsnich lana tataxtucha ju lapanacni ju lakꞌachakꞌan chai talakmilh ju Jesús.

31 Acsni tucaꞌ ixtachaꞌan ju lapanacni pus ju ixꞌamamakaꞌui ju Jesús takꞌasilhijunich ju vaiti.

Tajuni:

―Amamakaꞌunuꞌ avaich.

32 Para ju yuchi chani alhikꞌalhtailh:

―Ju quitꞌin alin ju tuchi icꞌui.

Para ju uxijnan jantu cꞌatsꞌayatꞌit tis talakxtuch.

33 Ju acsnich ju ixꞌamamakaꞌui ju Jesús talaxakꞌalalh ju ixlhiꞌakstuꞌan.

Talajunich:

―Ja xamatiꞌ nuꞌ ju xalhimini ju ixvaiti.

34 Ju Jesús ajunich:

―Tachi ju uxijnan ni tachapun jun ju milacatunaꞌan acsni venatꞌit pus vana va chun ju quitꞌin.

Tachapun jun ju quintacꞌatsan acsni icnavini ju ixkꞌachat ju quimacaminta chai ni acnavinikꞌo ju ixlhichꞌalhcat.

35 Chai jantu anaꞌuntꞌit ju uxijnan ni ticꞌacxacaꞌ lakatꞌatꞌi malhquiyuꞌ tus acsni cachinaꞌ ju paꞌaxkꞌan.

Iclajunau:

Alacꞌavanantꞌit.

Alacꞌapꞌitꞌit ju lacacuxtun.

Na lacxixtach.

Laich acꞌaxkꞌanalh.

Pus vana va chun ju ani taminta lapanacni.

Na lhu ju takꞌasmatputun ixchivinti Dios chai catalacaꞌiyach.

36 Pus ju camavasalayach ju quilacata alin ju ixtalhaja chai aꞌaktaijui lhu lapanacni ni laich catalacaꞌiyach chai caꞌalinaꞌ isꞌatsucuntiꞌan ju conkꞌalhiyaꞌ tus lactꞌiyan.

Ju pꞌulhnan canonaꞌ ju chivinti cakꞌachanach.

Chai ju xamavasalanaꞌ ju tuchi catalacaꞌiyaꞌ vachuꞌ cakꞌachanaꞌ.

37 Ju ani chivinti mavasalai ni stavasalanti tachi ju noncan:

“Pumatam ju achꞌananan.

Chai apumatam ju caꞌaxkꞌananaꞌ”.

38 Quitꞌin ju xaclamalakachayau ju axkꞌanti junta jantu uxijnan chꞌantꞌatꞌit.

Ju chunch nomputun ni aliꞌin ju pꞌulhnan tanajunta ju chivinti ju quilacata chai uxijnan ju xaꞌamavasalanin ju chivinti untꞌatꞌit chai quintalhilaksilh lhu ju lapanacni.

39 Na lhu ju amachakꞌan Samaria talhilacaꞌalh ju Jesús va ixlacaꞌatalh ju ixchivinti ju anuꞌ chakoꞌulh acsni ajunilh:

“Ju yuchi quijonkꞌoch chux tuchi icnavitach”.

40 Pus ju amachakꞌan Samaria acsni talakꞌalh junta ixvilhcha ju Jesús tatapaininilh ni caꞌalh tsucunuꞌ pantsꞌiquis ju laꞌixlakꞌachakꞌanꞌan.

Pus ju Jesús anch tolhcha lakatꞌui avilhchan.

41 Pus acsnich ju palai lhu talhilacaꞌalh ju Jesús ni takꞌasmatnilh isꞌakstuꞌan ju ixchivinti.

42 Chanich tajuni ju chakoꞌulh:

―Ju chavai jantuch va laminchivinti ju iclacaꞌiyauch.

Ju chavai quiꞌakstu quincꞌan xackꞌasmatꞌau ju ixchivinti ju ani ya lapanac chai iccꞌatsayau ni slivasalh ni yuchach ju Cristo ju ani ya ju noncan ni camalakachatachilh ju Dios.

Yuchi ju caꞌamakꞌalhtaxtuyaꞌ ju lapanacni ju ani lacamunutpaꞌ.

43 Ju ixlhilakatꞌutu avilhchan taxtulh ju Jesús ju anch lakꞌachakꞌan.

Alhch ju laxaꞌestado Galilea.

44 Va isꞌakstu ju Jesús chani ixnajunta:

―Ju tam lapanac ju najun ixchivinti Dios jantu tuꞌuꞌ lhiulacan ju laꞌixtꞌun.

45 Acsni chaꞌalh ju xaꞌestado Galilea pus ju amachakꞌan anch va lhikꞌachach taꞌamaklhtayanalh ju Jesús ni ixtalaktsꞌintach tachi chun ju lhamakꞌan ju ixnavitacha ju lakꞌachakꞌan Jerusalén acsni cꞌatanicanchalh ju anch.

Ju amachakꞌan Galilea vachuch ixtamakquilata junta alilh cꞌatan.

46 Chai aktam anchokopa ju Jesús ju lakꞌachakꞌan Caná lhiGalilea junta ixlakꞌoxitacha ju xcan ju lapala vino.

Chai ju istsꞌalh ju pumatam xakꞌai ixmacha lakꞌachakꞌan Capernaum.

Va ixtakꞌankꞌai.

47 Pus ju anuꞌ lapanac kꞌasmatlh ni taxtutachalh ju Jesús ju xaꞌestado Judea.

Chai cꞌatsalh ni cachinach ju xaꞌestado Galilea.

Pus ju anuꞌ lapanac lakꞌalh ju Jesús.

Tapaininilh ni caꞌalh chai palaich canavi ju istsꞌalh ni va ixtꞌajunch niniꞌ.

48 Ju acsnich ju Jesús juni:

―Jantu tavanan lai lacꞌaꞌiyatꞌit ni jantu laktsꞌinatꞌit tuꞌuꞌ ixpulacaꞌican chai ju tuꞌuꞌ lhamakꞌan.

49 Chai ju anuꞌ xakꞌai junich ju Jesús:

―Quiꞌamigo apꞌitꞌich laktsꞌiniꞌ ju quintsꞌalh ni tucaꞌ ni.

50 Pus ju Jesús junich:

―Aꞌinchich.

Palaich junita ju mintsꞌalh.

Pus ju anuꞌ lapanac lacaꞌinilh ju ixchivinti ju Jesús ju tuchi junilh chai anchokolh laꞌixchakaꞌ.

51 Chai acsni ixꞌanta ju lacati pus taquipakxtokchilh ju ixlapanacni.

Taquimacꞌatsanichilhch ni palaich ju istsꞌalh.

52 Chai ju anuꞌ xapai takꞌankꞌan asacmich ju ixlapanacni tuchi horach ju palai xajun ju istsꞌalh.

Chai ju xalapanacni tajunich:

―Cutanch.

Lakatam hora atokꞌoxanaꞌ ju macaulh ju scacat.

53 Pus ju xapai takꞌankꞌan lana machakxa ni acsnich hora ju naulh ju Jesús ni palaich ju isꞌaskꞌatꞌa.

Pus ju anuꞌ lapanac chai chux ju ixtatanumanalh laꞌixchakaꞌ lana talhilacaꞌalh ju Jesús.

54 Acsni taxtucha ju laxaꞌestado Judea ju Jesús pus chaꞌanchokolh ju laxaꞌestado Galilea.

Chai yuchach ju ani ju ixlhilakatꞌuich ixpulacaꞌican ju navi ju Jesús ju laxaꞌestado Galilea.