Junta ixvi xcan anch ixma ju va ixlakatumi
5
Acsni tapasalh ju ani taxtokni pus ju Jesús alh ju lakꞌachakꞌan Jerusalén chai ju acsni ixcꞌatanꞌan ixjunita ju israelitanin.
2 Ju lakꞌachakꞌan Jerusalén ixꞌalin lakatam malhtich junta ixꞌapumanucan ju borregojni.
Chai anch ixvi lakatam tanque ju ixjuncan lacalhihebreo Betesda.
Chai ixꞌalin lakaquis samakspaꞌ.
3 Ju anch na lhu ixꞌamamacanta ju takꞌankꞌanin.
Ju aliꞌin va alakꞌachꞌix ixtajunita.
Ju aliꞌin va ixchꞌantakꞌalhita.
Ju aliꞌ va ixtaxixta laꞌixlacatunaꞌan.
Sich yuꞌunch ju ixtapacxanch ni calucunulh ju xcan.
4 Aktamixnin pumatam anquilh ixmalucuni ju anuꞌ xcan.
Chai ju pꞌulhnan catajuyaꞌ ju lacatanque acsni lucununtach ju xcan pus palai ixjun mas va tuchi takꞌankꞌat cachꞌapalh.
5 Chai ixma pumatam lapanac ju ixpacxanta ixtakꞌankꞌat lakapꞌuxamcautsajin cꞌata.
6 Ju Jesús laktsꞌilh junta ixma.
Chai cꞌatsalh ni na makꞌaniya takꞌankꞌat ju ixchꞌapata.
Pus junich:
―Ja lacꞌasqꞌuin ni palai aꞌuntꞌi.
7 Pus akꞌalhtayanalh ju anuꞌ takꞌankꞌan.
Junich:
―Quiꞌamigo matiꞌ xamatiꞌ ju lai aquimuju ju lacxcan acsni tꞌajun lucunuꞌ.
Acsni ictajuputun ju quitꞌin akꞌantamch tajumapa.
8 Ju Jesús junich:
―Akꞌostꞌaꞌulhch.
Asactꞌich ju mimputaman chai alhtꞌanch.
9 Ju acsnich lana palai va ju lapanac.
Saclh ju ixputaman chai alhtanalh.
Ju acsnich avilhchan paꞌastacni ixjunita.
10 Ju acsnich ju xalackꞌajin israelitanin chani tajuni ju anuꞌ takꞌankꞌan ixjunita:
―Ju chavai avilhchan paꞌastacni junita.
Jantu lhijun lacalhamapꞌaksin ni lai acꞌucꞌa ju mimputaman.
11 Pus ju takꞌankꞌan ixjunita alackꞌalhtailich.
Ajunich:
―Ju palai xaquinavi isꞌakstu ju xaquijuni ni acsaclh ju quimputaman chai acꞌalhtanalh.
12 Pus palai taquilhasacmi.
Tajuni:
―Tis chavaich ju xajunan ni asactꞌich ju mimputaman chai alhtꞌanch.
13 Pus ju anuꞌ ju palai ixnavicanta jantu ismispai tichi chavaich ju palai ixnavita.
Ju Jesús ixmakpulacnatꞌajun laꞌixtalhavat lapanacni ju ixtayanalh anch.
14 Chai ju astan lacpujitat ju tꞌalapakxtoklh ju Jesús ju anuꞌ ixcꞌuchꞌuta.
Chai junich:
―Alaktsꞌich.
Palaich unitꞌa.
Tun alactꞌuꞌunumpꞌalh.
Tun palai macxcai camilh ju mimakꞌalhkꞌajnat.
15 Ju anuꞌ lapanac alh ajuniniꞌ ju xalackꞌajin israelitanin ni yuchach ju Jesús ju palai ixnavita.
16 Pus ixlhiyuchach talhixcailich ju Jesús ju xalackꞌajin israelitanin.
Chai ixtalhimakniputunch ni ixnavich ju ani taxtokni ju va avilhchan paꞌastacni.
17 Ju Jesús akꞌalhtayanalh:
―Ju quimpai tus chavai ju chꞌalhcatnan.
Chai vachuꞌ ju quitꞌin icchꞌalhcatnan.
18 Pus acsnich ju palai ixtalhimakniputun ju israelitanin ju Jesús.
Para jantu va yuchi ju ixtalhimakniputun ni va chꞌalhcatnalh ju anuꞌ avilhchan paꞌastacni para vachuꞌ ixlacaꞌatalh ni va ixnajunch ni Dios ju ixpai.
Ju chunch ixnomputun ni va ixtꞌachunchach ixjunita ju Dios.
Ixpuꞌucxtin istsꞌalh Dios
19 Chai akꞌalhtayanalh ju Jesús.
Ajunich:
―Slivasalh ju iclajunau.
Ju quitꞌin ni va icsaꞌaskꞌatꞌa pus jantu lai icnavi tuꞌuꞌ ju va laquiꞌakstu.
Yuchi ju icnavich ju icmaklaktsꞌinch ju quimpai.
Ju chunch tachi chun ju navi ju quimpai vachuch yuchi ju icnavi ni istsꞌalh ju quitꞌin.
20 Ju quimpai na quimapaini ni istsꞌalh ju quitꞌin.
Chai quimalacasunikꞌojuta tachi chun ju taxtokni ju navi ju yuchi.
Chai aquimalacasuniyaꞌ palai kꞌai lhamakꞌan ni laich alhamakꞌanininaꞌitꞌit.
21 Tachi ju quimpai ni lai malokꞌoni ju nitach chai xtaknichokoi ju isꞌatsucunti pus chunchach vachuꞌ ju quitꞌin ni istsꞌalh icjunita.
Vachuꞌ lai acxtakniyaꞌ ju isꞌatsucunti va tichi chavaich ju acxtakniputunach.
22 Ju quimpai jantu laktsꞌintanui xamatiꞌ.
Para quixtaknita quimpuxakꞌai ni lai acꞌalaktsꞌintanu ju lapanacni.
23 Pus yuchi aquintalhilakꞌayayach tachi chun ju lapanacni tachi ju talakꞌayaich ju quimpai.
Ju jantu quilakꞌayai ju quitꞌin ni istsꞌalh icjunita pus sin quimpai jantu lakꞌayai ni yuchi ju quimalakachatachilh.
24 Slivasalh ju iclajunau.
Ju cakꞌasmatꞌaꞌ ju quinchivinti chai ju calhilacaꞌanach tichi chavaich ju quimalakachatachilh pus alinch isꞌatsucunti jonkꞌalhita lactꞌiyan.
Ju yuchi jantuch calaktsꞌintanucanaꞌ ixlacata ixtalakꞌalhin.
Chai jantu catiꞌalh junta jonkꞌalhita makꞌalhkꞌajnat.
Alai tus chavai lana alinch isꞌatsucunti ju conkꞌalhiyanta tus lactꞌiyan.
25 Slivasalh ju iclajunau.
Ju atipuꞌanta u mas chavai ju jantucaꞌ talhilaksi ju Dios aquintakꞌasmatniyach ju quinchivinti ni istsꞌalh ju Dios ju quitꞌin.
Chai tachi chun ju aquintakꞌasmatniyach catatsucuchokoyach.
26 Tachi ju quimpai ni lai axtakni ju isꞌatsucuntiꞌan ju lapanacni pus chunchach vachuꞌ ju quitꞌin ni istsꞌalh icjunita.
Ju yuchi quixtaknita ju quintachaput ni lai acꞌaxtakniyaꞌ isꞌatsucuntiꞌan ju lapanacni.
27 Pus vachuch quixtaknilh ju quimpokꞌai ni laich icꞌalaktsꞌintanui ju lapanacni ni quitꞌinch ju quimalakachatachilh ju Dios ni lapanac actsucuyaꞌ ju ani.
28 Jantu alhamakꞌaninintꞌit ju ani.
Caminaꞌ ju avilhchan acsni catakꞌasmatꞌach ju quinchivinti tachi chun ju taꞌacnununta.
29 Chai catataꞌacxtuyach.
Ju tanavita kꞌox caꞌaxtaknicanach isꞌatsucuntiꞌan jonkꞌalhita lactꞌiyan.
Ju tanavita ju talakꞌalhin caꞌaxtaknicanach ixmakꞌalhkꞌajnatꞌan junta jonkꞌalhita.
Ixnonin ixlacata ju Cristo
Ju Jesús tailhiꞌalh ju ixchivinti chai chani ajunilh ju istꞌaꞌisraelitanin:
30 ―Jantu lai icnavi tuꞌuꞌ ju va quiꞌakstu.
Tachi ju icjuncanch chunchach ju icmucꞌai ju talakꞌalhin.
Chai mas icmucꞌai ju talakꞌalhin ju quitꞌin para soknicꞌa ju icnavi ni jantu va quinkꞌachat quiꞌakstu icpuxcajui.
Va yuchi ju quimpai icnaviniputun ju ixkꞌachat ni yuchi ju quimacaminta.
31 Pus ni va quiꞌakstu cava ju icnajun ni icxakꞌai pus ju quinchivinti jantu caꞌixlhitapalalh.
32 Para alin pumatam ju xtꞌakꞌa ju chivinti ju quilacata.
Chai iccꞌatsai ni stavasalanti ju tuchi najun.
33 Chai uxijnan miꞌakstuꞌan ju malakꞌachꞌanitꞌit pumatam ju Xivan ju amakpaxanaꞌ ni caquilhasacmi ta lhijunitach.
Chai ju yuchi tajunin ju istavasalanti.
34 Pus ju quitꞌin jantu tuꞌuꞌ iclhiulai ju va ixchivinti lapanac.
Ju iclapujunauch ju ani tsꞌa ma laich atꞌakꞌalhtꞌaxtꞌutꞌit ju uxijnan.
35 Ju Xivan tachi maclhcu ixjunita ju maktaji chai mapulhcui.
Ju uxijnan lhikꞌachꞌantꞌit pantsꞌiquis ni ixtamapulhcuniyan lamintacꞌatsanꞌan.
36 Para ju lhamakꞌan ju icnavi putasui tichi chavaich ju quitꞌin.
Ju yuchi palai lhitapalai.
Palai jantu ju tuchi quilhichivinilh ju Xivan.
Ju quimpai quixtaknilh ju ixlhichꞌalhcat ni acnavinikꞌo.
Chai ju anuꞌ lhichꞌalhcat ju icnavi yuchach ju putasui tichi chavaich ju quitꞌin ni quimpai ju quimalakachatachilh.
37 Chai quimpai ju xaquimalakachayachilh yuchi ju xtakta ju chivinti ju quilacata.
Ju uxijnan jantu tavanan kꞌasmatꞌatꞌit ju ixchivinti nin alaktsꞌintꞌit ta yu junitach.
38 Ju uxijnan jantu pꞌacxantꞌatꞌit ju ixchivinti lamiꞌalhunutꞌan va ixlacata ni jantu quilaquiclacaꞌiyau mas yuchi ju quimalakachatachilh.
39 Tasqꞌuini ni alhitꞌamakꞌaꞌutꞌit kꞌox ju ixchivinti Dios ni nonatꞌitch ni anch ju alhitꞌaꞌuyaꞌitꞌit ju atsucunti ju conkꞌalhiyanta tus lactꞌiyan.
Chai alhitꞌaꞌuyaꞌitꞌit ni vana anch quilhichivinin quilacata.
40 Para ju uxijnan jantu tꞌampꞌutꞌunatꞌit ju laquimacni ni laich apꞌacxantꞌit ju miꞌatsucuntiꞌan ju jonkꞌalhita.
41 Ju quitꞌin jantu iclacasqꞌuin ni canaulh ju va tam lapanac ni icxakꞌai.
42 Iccꞌatsai ni jantu mapꞌainiyatꞌit ju Dios lamiꞌalhunutꞌan ju uxijnan.
43 Ju quitꞌin laꞌixtapakaꞌut ju quimpai icminta.
Chai jantu tuꞌuꞌ quilalhiulayau.
Para ni apumatam camilh laꞌixtapakaꞌut isꞌakstu pus ju yuchi na tuꞌuꞌ alhiulayaꞌitꞌit.
44 Tas laich aquilalhilacaꞌiniyau ju quitꞌin ni va lamilhiꞌakstuꞌan ju laꞌunatꞌit ni na xalackꞌajin untꞌatꞌit.
Jantu lacꞌasqꞌuinatꞌit ni Dios ju canaulh ni xalackꞌajin untꞌatꞌit.
45 Tun va anaꞌuntꞌit ni quitꞌin ju iclachivimakꞌanau ju laꞌixꞌucxlacapuꞌ ju quimpai.
Alin tichi chavaich ju tachivimakꞌanan.
Yuchi ju ixjuncan Moisés mas yuchi ju lhilacꞌapꞌinatꞌit ju uxijnan.
46 Ju uxijnan ni vasalh cava ixlacꞌaꞌinitꞌit ju Moisés pus vachuꞌ xaquilalacaꞌiniuch ju quitꞌin ni quilhiꞌatsꞌoknunta quilacata ju yuchi.
47 Para ni jantu lacꞌaꞌiyatꞌit ju isꞌatsꞌoknut ju Moisés tas alhilacꞌaꞌiyaꞌitꞌitch ju quinchivinti.