Lakaquis milh ju amava ju Jesús
6
Astan ju Jesús alh ju lhimakꞌantacutni ju atantsꞌin Galilea junta vachuꞌ juncan Tiberias.
2 Na lhu lapanacni tachꞌakꞌokꞌalh ju Jesús ni ixtalaktsꞌinch ju lhamakꞌan ju ixꞌanavini ju takꞌankꞌanin.
3 Pus ju Jesús alh ju lactalhpa chai anch alactꞌatolhcha ju ixꞌamamakaꞌui.
4 Quilhpaminta ixcꞌatanꞌan ixjunita ju istꞌaꞌisraelitanin acsni ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin.
5 Acsni lacaꞌanchokolh ju Jesús junta pumilh pus laktsꞌilh ni na lhu ixtaminta ju lapanacni.
Pus ju Jesús junich ju Pilipe:
―Tas anchach ju lai catamaꞌu ju vaiti ni camavauch ju lapanacni.
6 Para ju chunch punaulh ju Jesús va ixpulaktsꞌintanuputun ju Pilipe.
Ju Jesús isꞌakstu iscꞌatsai tuchi ju canaviyaꞌ.
7 Pus akꞌalhtayanalh ju Pilipe.
Najunch:
―Mas aclhitamaulh ju vaiti xatalhaja lakatꞌui cientos avilhchan ca jantu catitalhilalh mas va lactsꞌunin ju acꞌaxtaknilh ju lapanacni.
8 Pus ju pumatam ixtamamakaꞌun ispꞌisekꞌe ju Simón Pitaluꞌ ixjunita.
Ju yuchi ixjuncan Tilix.
Ju yuchi junilh ju Jesús:
9 ―Ani ya pumatam tsꞌalh ju chꞌapata aksquis xavati cebada chai lakatꞌui pamata.
Va yuchi ni va lacatsꞌunin.
Ju lapanacni na ilhuꞌan.
10 Ju acsnich ju Jesús ajunich ju ixꞌamamakaꞌui:
―Aꞌunitꞌitch ju lapanacni ni catatavilhch.
Pus na ixma atsꞌin junta tatavilhch ju lapanacni.
Ixtachaꞌanta lakaquis milh jokꞌatni.
11 Ju Jesús acsni chꞌapalh ju anuꞌ vati pus xtaknilh lhakꞌailaktsꞌiuch ju Dios.
Astan ju axtaknilh ju ixꞌamamakaꞌui.
Pus ju anuch ixꞌamamakaꞌui tamakpitsilh laꞌixtalhavat lapanacni ju ixtavilanalhch lacatsꞌinan.
Vana va chun navicalh ju pamata.
Chai taꞌulhch tachi ju talacasqꞌuilhch.
12 Acsni talhilalhch pus ju Jesús ajunich ju ixꞌamamakaꞌui:
―Asactꞌitch ju vaiti ju xajacha.
Ju chunch jantu tuꞌuꞌ catsꞌankꞌayaꞌ.
13 Pus acsni tasaclh chaꞌalh lakacautꞌui tankꞌalin ju xajchalh ju anuꞌ aksquis xavati cebada.
Yuchi ju tamaxajnichalh ju taꞌulh ju ixtalhavat lapanacni.
14 Ju anuch lapanacni acsni talaktsꞌilh ju anuꞌ lhamakꞌan ju navilh ju Jesús pus tanaulh:
―Ju ani slivasalh ca yuchach ju anuꞌ lapanac ju caminach nonaꞌ ixchivinti Dios ju ani lacamunutpaꞌ.
15 Ju Jesús acsni machakxalh ni va tapꞌastu ixtanaviputun kꞌai ucxtin pus alackꞌosmakꞌalh ju lapanacni.
Alh tolhnaꞌ lactalhpa.
Ju Jesús alhtanalh laꞌixꞌucxni xcan
16 Acsni ixtꞌajunch tokꞌoxanaꞌ pus taꞌalh ju lacaꞌatantsꞌin ju ixꞌamamakaꞌui ju Jesús.
17 Chai tataju ju lacabarco.
Va ixtaꞌamputunch lhimakꞌantacutni ju atantsꞌin junta ixvilhcha ju lakꞌachakꞌan Capernaum.
Pus tamaklhtatsꞌislich ju lacaꞌatantsꞌin chai ju Jesús ju acsni tucaꞌ sip ixlai.
18 Pus ju xcan na pꞌas ixtꞌajun lucunuꞌ ni na pꞌas ixlai ju kꞌai un.
19 Acsni taꞌalhtanalh tachi lakaquis u lakachaxan kilometro pus talaktsꞌistuclich ju Jesús ni ixꞌalhtanamintach laꞌixꞌucxni xcan.
Vaninch ixminta ju lacabarco.
Pus lana na tatalhanalh.
20 Para ju Jesús ajunich:
―Quitꞌin.
Jantu aquilatalhoniu.
21 Ju acsnich va lhikꞌach taꞌamaklhtayanalh ju lacabarco.
Pus lana va tsꞌalhti tacutcha ju barco.
Tachaꞌalh ju anuꞌ lacatꞌun junta ixtaꞌanta.
Ju lapanacni na ixtapuxcajui ju Jesús
22 Ni tuncunchokopa ju anuꞌ lapanacni ju tatamacontolhcha ixlhilakꞌantacutni ju atantsꞌin tapastaclich ni va lakatam ixjunita ju barco.
Chai ixtalaktsꞌinch ju Jesús ni jantu alactꞌaꞌalh ju ixꞌamamakaꞌui acsni taꞌalh ju lacabarco.
Para va isꞌakstuꞌan ju taꞌalh.
23 Para ju aliꞌ barco tamincha ju lakꞌachakꞌan Tiberias.
Taꞌastacnalh vanin junta ixtakta lakꞌailaktsꞌiuch ju Dios ju Jesús junta amavalh ju lapanacni.
24 Pus ju lapanacni acsni talaktsꞌilh ni jantu anch ixvi ju Jesús nin yuꞌunch ju ixꞌamamakaꞌui pus vachuꞌ tatajulh ju yuꞌunch ju lacabarco.
Taminchokolh ju lakꞌachakꞌan Capernaum.
Va ixtapuxcajui ju Jesús.
Ju Jesús tachi xavaiti atsucunti junita
25 Acsni talhitaju ju Jesús ju lhimakꞌantacutni ju atantsꞌin tajuni:
―Amamakaꞌunuꞌ tas vananch ju xachꞌitꞌan ju ani.
26 Chai akꞌalhtayanalh ju Jesús.
Ajunich:
―Slivasalh ju iclajunau.
Ju uxijnan quilalhipuxcoyau ni utꞌit ju vati chai lhilatꞌit.
Jantiyuꞌ quilalhichꞌakꞌokꞌayau ni laktsꞌintꞌatꞌit ju lhamakꞌan.
27 Tun tꞌichꞌalhcꞌatnantꞌit va ixlacata ju vaiti ju va takꞌalhi.
Para achꞌalhcꞌatnantꞌit ixlacata ju tumpa vaiti ju xtꞌakꞌa ju atsucunti jonkꞌalhi.
Yuchach ju aclaxtakniyau ju quitꞌin ju quimalakachatachilh ju Dios ni lapanac actsucuyaꞌ ju ani.
Chai quimpai Dios ju xaquixtakni ju quintachaput ni laich acxtaklh ju anuꞌ vaiti.
28 Pus tajunich ju Jesús:
―Tijuch ju acnaviyau ni laich acnaviu ju ixlhichꞌalhcat ju Dios.
29 Akꞌalhtayanalh ju Jesús.
Ajunich:
―Yuchach ju ani ju ixlhichꞌalhcat ju Dios ni aquilalhilacaꞌau ju quitꞌin ju quimacaminta ju Dios.
30 Ju acsnich tajunich:
―Pus tijuch ju lai aquilamalacasuniyau chai laich aclaktsꞌinau chai laich aclapulacaꞌiniyauch ju uxintꞌi.
Tijuch ju lai navi ju uxintꞌi.
31 Ju quilacpaiꞌan ju makꞌanch ixtatꞌajun taꞌulh ju anuꞌ ju ixjuncan mana junta aseknicꞌa.
Chunch ju tapasalh tachi ju tsꞌokcanta junta najun:
“Lactꞌiyan ju amacaminicancha ju vati.
Chai taꞌulh”.
32 Pus ju Jesús ajunich:
―Slivasalh ju iclajunau.
Jantiyuꞌ ju Moisés ju xataxtakniyan ju xavati ju lactꞌiyan.
Va yuchi ju quimpai ju taxtakniyan ju anuꞌ tachi vati ju xaminacha lactꞌiyan ju xtꞌakꞌa ju stavasalanti atsucunti.
33 Ju vati ju xtꞌakꞌa ju Dios yuchi ju anuꞌ ju mincha lactꞌiyan chai axtakni isꞌatsucuntiꞌan ju lapanacni.
34 Tajunich:
―Quiꞌamigo pus va tachi aquilaxtakniyauch ju ani vati.
35 Pus ju Jesús ajunich:
―Quitꞌinch ju xavati ju xtꞌakꞌa atsucunti jonkꞌalhi.
Ju minta laquimacni jantuch tavanan cachavanaꞌ laꞌixtacꞌatsan.
Ju quilhilacaꞌantach quitꞌin jantuch tavanan caquicxixchokoyaꞌ ju laꞌisꞌatsucunti.
36 Pus anich iclajunau.
Mas quilalaktsꞌinauch jantu lacꞌaꞌiyatꞌit.
37 Tachi chun ju lapanacni ju quixtaknita ju quimpai aquilakminach ju quitꞌin.
Chai ju minta laquimacni jantu tavanan actixcomakꞌalh.
38 Yuchi iclhitaxtucha ju lactꞌiyan ni acnaviniyach ixkꞌachat ju quimacaminta.
Jantiyuꞌ ni acnavilh ju quinkꞌachat quiꞌakstu.
39 Yuchach ju ani ju ixkꞌachat ju quimacaminta.
Tachi chun ju lapanacni ju quixtaknita ju yuchi jantu actimakꞌatsꞌankꞌa xamatiꞌ.
Para acꞌamalokꞌonichokoyaꞌ ju laꞌixꞌaclanti ju lacamunutpaꞌ.
40 Yuchach ju ani ju ixkꞌachat ju quimpai.
Tachi chun ju quilaktsꞌin ni istsꞌalh Dios ju quitꞌin chai quilhilacaꞌanch pus caꞌalinaꞌ ju isꞌatsucunti jonkꞌalhita.
Chai quitꞌinch ju acmacxtuchokoyaꞌ laꞌixꞌaninti ju laꞌixꞌaclanti ju lacamunutpaꞌ.
41 Ju acsnich ju israelitanin macxcai chivinti talhichivinilh ju Jesús ixlacata tuchi ixnajun acsni tavanan naulh ni yuchach ju xavati ju xamincha lactꞌiyan.
42 Ixtanajunch:
―Ju ani ja jantiyuꞌ ju Jesús ju istsꞌalh José.
Ju ixpai chai ixnati mispayau ju quijnanꞌan.
Tas laich lhinajun:
“Ju quitꞌin lactꞌiyan xacminacha”.
43 Pus ju Jesús akꞌalhtayanalh.
Ajunich:
―Jantu anaꞌuntꞌit macxcai chivinti ju uxijnan.
44 Jantu xamatiꞌ lai quilakmin ju quitꞌin ni jantu cakꞌailhimilh laquimacni ju quimpai ju quimacaminta.
Chai acmalokꞌonichokoyaꞌ laꞌixꞌaclanti ju lacamunutpaꞌ.
45 Chani tatsꞌokꞌula ju makꞌaniya lapanacni ju ixtanajun ju ixchivinti Dios.
Tanaulh:
“Dios ju camalanikꞌoyaꞌ tachi chun ju lapanacni”.
Pus ju quitꞌin icnajun ni tachi chun ju takꞌasmatni ixchivinti ju quimpai chai talani tuchi malani ju yuchi pus cataminach laquimacni.
46 Jantu icnomputun ni xamatiꞌ laktsꞌinta ju quimpai.
Va quitꞌin ju iclaktsꞌinta ni laꞌixmacni yuchi ju xactaxtuyacha.
Quitꞌinch ju iclaktsꞌinta ju quimpai.
47 Slivasalh ju iclajunau.
Ju quilhilacaꞌanch quitꞌin alinch isꞌatsucunti jonkꞌalhita lactꞌiyan.
48 Quitꞌinch ju xavati ju xtꞌakꞌa ju atsucunti jonkꞌalhita.
49 Ju makꞌaniya milacpaiꞌan mas taꞌulh ju anuꞌ ju mana ixjuncan junta aseknicꞌa para tanilh.
50 Quitꞌinch ju icxavati ju xacminacha lactꞌiyan.
Chai ni xamatiꞌ caꞌamaklhtayananaꞌ ju quiꞌacanit tachi acsni amaklhtayanancan ju tuꞌuꞌ vaiti pus jantu catiꞌalh junta maktaikꞌalhita ju jipi.
Yuchi iclhimilh ju quitꞌin ju ani.
51 Quitꞌin ju icxavati ju xtꞌakꞌa atsucunti chai xacminacha lactꞌiyan.
Ni xamatiꞌ caꞌamaklhtayananaꞌ ju quiꞌacanit tachi acsni amaklhtayanancan ju tuꞌuꞌ vaiti pus caꞌalinanta isꞌatsucunti jonkꞌalhita lactꞌiyan.
Chai ju anuꞌ vati ju acxtꞌakꞌaꞌ yuchi ju quilacatuna ju acxtꞌakꞌaꞌ.
Yuchi ju laich capuꞌalinaꞌ isꞌatsucuntiꞌan ju lapanacni ju lactꞌiyan.
52 Pus ju acsni ju israelitanin ixtalaclakꞌaji ju sia yuꞌunch.
Ixtanajun:
―Tas laich aquintalhixtakniyan ju ixꞌacanit tachi acsni xtakcan tuꞌuꞌ vaiti.
53 Pus ju Jesús ajunich:
―Slivasalh ju iclajunau.
Ni jantu amaklhtꞌayananaꞌitꞌit ju quiꞌacanit tachi acsni amaklhtayanancan tuꞌuꞌ vaiti chai ni jantu amaklhtꞌayananaꞌitꞌit ju quiꞌacꞌalhni tachi acsni amaklhtayanancan tuꞌuꞌ xcan pus jantu pꞌacxanatꞌit miꞌatsucuntiꞌan jonkꞌalhita ju lactꞌiyan.
54 Pus ju amaklhtayanan ju quiꞌacanit tachi tuꞌuꞌ vaiti chai ju amaklhtayanan ju quiꞌacꞌalhni tachi ju tuꞌuꞌ xcan pus alinch ju isꞌatsucunti jonkꞌalhita.
Chai quitꞌinch ju acmacxtuchokoyaꞌ laꞌixꞌaninti acsni caꞌaclayach ju lacamunutpaꞌ.
55 Ju caꞌamaklhtayananaꞌ ju quiꞌacanit tachi ju tuꞌuꞌ vaiti chai caꞌamaklhtayananaꞌ ju quiꞌacꞌalhni tachi ju tuꞌuꞌ xcan pus capuꞌalinach ju istavasalanti isꞌatsucunti.
56 Pus ju caꞌamaklhtayananaꞌ ju quiꞌacanit tachi ju tuꞌuꞌ vaiti chai caꞌamaklhtayananaꞌ ju quiꞌacꞌalhni tachi ju tuꞌuꞌ xcan pus tꞌajunch ju laquimacni.
Chai ju quitꞌin laꞌixꞌalhunut yuchi ju ictꞌajunch.
57 Tachi ju quimpai ju lakꞌajunta ni quimacamilh chai yuchi ju quixtaknita ju quiꞌatsucunti pus vanach va ixtꞌachunch ju ani.
Ju aquiꞌamaklhtayananaꞌ tachi ju tuꞌuꞌ vaiti pus puꞌamaklhtayanan ju isꞌatsucunti ju jonkꞌalhita.
58 Quitꞌin ju icxavati ju xacmincha lactꞌiyan.
Jantu chun tachi ju anuꞌ ju taꞌulh ju makꞌaniya milacpaiꞌan.
Ju yuꞌunch mas taꞌulh ju anuꞌ vati ju mana ixjuncan jantu anch ju tapulhitaju isꞌatsucuntiꞌan ju jonkꞌalhita tus lactꞌiyan.
Para ju aquiꞌamaklhtayananaꞌ tachi ju amaklhtayanancan tuꞌuꞌ vaiti pus caꞌalinaꞌ isꞌatsucunti jonkꞌalhita.
59 Ju Jesús noncha ju ani taxtokni laxapujitat lakꞌachakꞌan Capernaum acsni ixtꞌajun amalaniniꞌ ixlacata Dios.
Lhichivincan ju atsucunti jonkꞌalhita
60 Pus ju aliꞌin ixꞌamamakaꞌui ju Jesús acsni takꞌasmatlh ju ani chivinti tanaulh:
―Na tsꞌinqꞌui ju ani chivinti.
Tis chavaich ju laich camuctaxtu ju chunch chivinti.
61 Pus ju Jesús ni cꞌatsa ju laꞌixꞌalhunut ni jantu kꞌox ixtalhiulai ju ani chivinti ju ixꞌamamakaꞌui pus ajunich:
―Ja jantu lai chꞌixatꞌit ju ani chivinti.
62 Tꞌas anonaꞌitꞌit ni aquilalaktsꞌinau ni actaꞌakstꞌachokoyaꞌ junta xacvilhcha pꞌulhnan.
63 Pus ju Spiritu Santu yuchi ju xtꞌakꞌa ju atsucunti jonkꞌalhita.
Ju tuꞌuꞌ ixlacata ju quilacatunaꞌan jantu lai xtꞌakꞌa ju atsucunti jonkꞌalhi tus lactꞌiyan.
Ju chivinti ju iclamavasalaniyau pus ixlacata ju miꞌalhunutꞌan junita chai yuchach ju xtꞌakꞌa ju atsucunti jonkꞌalhita.
64 Para alin ju milhiꞌuxijnanꞌan ju jantu talacaꞌi.
Pus ju Jesús iscꞌatsai tus laꞌixputaiꞌulacan tichi chavaich ju jantu catalacaꞌiyaꞌ chai tichi chavaich ju camakꞌaxtaknanaꞌ.
65 Pus najunch:
―Yuchi iclalhijunau ni jantu lai xamatiꞌ quilakmin ni jantu xtaknita ju chun atalacpastꞌacꞌat ju quimpai.
66 Ju acsnich na lhu ju ixꞌamamakaꞌui ju Jesús jantu tachꞌakꞌokꞌakꞌalhiputulh.
Lana tamacoyaulh ju yuchi.
67 Ju acsnich ju Jesús alacjunich ju ixpumacautꞌuiꞌan:
―Ja vachuꞌ pꞌimpꞌutꞌunatꞌit ju uxijnan.
68 Akꞌalhtayanalh ju Pitaluꞌ ju ixjuncan Simón.
Junich:
―Quiꞌucxtin tis chavaich ju lai aclakꞌanauch ni uxintꞌi ju pꞌacxantꞌa ju chivinti ju xtꞌakꞌa ju atsucunti jonkꞌalhita.
69 Ju quijnan iclacaꞌiyauch chai iclamispayauch ni uxintꞌich ju Cristoꞌat.
Istsꞌalhꞌat Dios ju lakꞌajunta.
70 Pus ju Jesús alackꞌalhtailh:
―Ja jantu quitꞌin ju iclalhcaꞌulatau ju mimpumacautꞌuiꞌan.
Chai pumatam ju milhiꞌuxijnanꞌan valhch ixlapanac ju lhacaticuru.
71 Yuchach ju ixlhichivincan ju Judas istsꞌalh ju Simón Iscariote ni yuchach ju camakꞌaxtaknanaꞌ.
Yuchi ju pumatam ju ixlhipumacautꞌuiꞌan ixjunita.