Jantu tavanan lai talacaꞌi ju isꞌapꞌisekꞌen ju Jesús
7
Acsni tapasalhch ju ani taxtokni pus ju Jesús lacꞌantsuculhch junta lacvi lakꞌachakꞌanixni ju laxaꞌestado Galilea.
Jantu ixꞌamputun amalaniniꞌ ju laxaꞌestado Judea ni va ixtamakniputun ju istꞌaꞌisraelitanin.
2 Chai vaninch ixjunita ju ixcꞌatanꞌan ju israelitanin acsni ixtatꞌajun va laꞌixpacꞌatsꞌaꞌan.
3 Pus ju isꞌapꞌisekꞌen ju Jesús chanich tajuni:
―Atꞌaxtꞌuch ju ani.
Apꞌinchich ju laxaꞌestado Judea.
Ju chunch ni laich catalaktsꞌinanta ju miꞌamamakaꞌunti amachakꞌan anch ju tuchꞌi laich navi.
4 Ju tam lapanac ni jumputunch tachi tam xakꞌai pus jantu va catatankꞌanu.
Pus ni laich navi ju ani taxtokni amalacꞌasunikꞌoch tachi chun ju lakꞌachakꞌanixni.
―Tucaꞌ chin ju avilhchan ju iclhcanicanta.
Para ju uxijnan va tuchi horach lai naviyatꞌit ju pꞌastꞌacꞌatꞌit.
7 Ju lapanacni ju ani lacamunutpaꞌ jantu lai talhitsꞌiꞌinan ju uxijnan.
Para ju quitꞌin yuchi jantu quintalhilaktsꞌimputun ni icꞌajuni ni na macxcai ju tanavi.
8 Ju uxijnan apꞌinchitꞌitch junta lai cꞌatan.
Ju quitꞌin tucaꞌ lai actiꞌalh ju anch ni jantucaꞌ chin ju avilhchan ju iclhcanicanta.
9 Acsni ajunilh ju ani chivinti pus tavilhcaꞌ ju Jesús ju xaꞌestado Galilea.
Ju Jesús ixꞌucxuntꞌajun ju laxacꞌatan acsni ixtatꞌajun laꞌixlacpacꞌatsꞌaꞌan
10 Acsni taꞌalh ju isꞌapꞌisekꞌen pus astan alh ju Jesús junta lai cꞌatan.
Jantu lacatalhavat ju alh.
Tachi ju va jantu ixlacasqꞌuin ni xamatiꞌ cacꞌatsa.
11 Pus ju israelitanin ixtapuxcajuich ju Jesús junta lai cꞌatan.
Ixtanajunch:
―Ta xaꞌanch nuꞌ ju anuꞌ lapanac.
12 Ju ixlacata ju Jesús na lhu ixꞌalin ju chivinti ju va sek ixtanajun ju lapanacni.
Ju aliꞌin ixtanajunch ni na kꞌox lapanac ju yuchi.
Ju aliꞌin ixtanajun:
―Jantu vasalh kꞌox lapanac.
Va aꞌokxchokꞌoi ju lapanacni.
13 Pus ju anuch lapanacni ni va ixtatalhonich ju xaꞌucxtinin ju israelitanin pus va sek ixtalhichivinin ixlacata ju Jesús.
14 Acsni chaꞌalh paitat cꞌatan ju Jesús alh ju laꞌixpujitatꞌan ju istꞌaꞌisraelitanin chai tsuculh amalaniniꞌ.
15 Pus va ixtalhamakꞌaninin ju istꞌaꞌisraelitanin.
Ixtanajunch:
―Ju ani tas lhimispaich ju atalaninti ni jantu xamatiꞌ xamalani.
16 Chai akꞌalhtayanalh ju Jesús.
Alacjuni:
―Ju tuchi icꞌamalaninin jantu quiꞌanuꞌ.
Ixꞌanuꞌ ju xaquimacamin.
17 Ni xamatiꞌ naviputun ixkꞌachat ju Dios pus cacꞌatsayach ta anchach ju xaminacha ju ani atalaninti.
U Dios ju xaquixtakni u va laquiꞌakstu ju icnajun.
18 Ju va laꞌisꞌakstu najun ju tuꞌuꞌ va lacasqꞌuin ni catanaulh ju lapanacni ni xakꞌai ju yuchi.
Para ju lacasqꞌuin ni catanaulh ju lapanacni ni yuchi ju xakꞌai ju tichi macaminta pus yuchi ju najun ju stavasalanti.
Matich ju aꞌokxchokꞌonti laꞌixmacni ju yuchi.
19 Vasalh ni taxtaknitan ju lhamapꞌaksin ju Moisés.
Para nin tachi pumatam ju milhiꞌuxijnan ju lai stunin camuctaxtukꞌo ju anuꞌ lhamapꞌaksin.
Tajuch ni va quilamakniputunauch ju quitꞌin.
20 Chai taꞌakꞌalhtayanalh ju lapanacni.
Tajunich:
―Va pꞌacxantꞌa lhacaticuru.
Tis chavaich ju makniputunan.
21 Pus ju Jesús akꞌalhtailh:
―Va lakatam lhamakꞌan xacnavi.
Chai minchuxꞌan va lhamakꞌanininatꞌit.
22 Slivasalh ni Moisés ju xtakta ju lhamapꞌaksin ixlacata ju achꞌucꞌunti.
Chai ju avilhchan paꞌastacni vana acsni ju chꞌucꞌuniyatꞌit ixꞌaxtꞌakꞌa ju tam tsꞌalh.
Jantiyuꞌ ju Moisés ju pꞌulhnan naulh ni cachꞌucꞌucalh ju tam tsꞌalh.
Yuꞌunch ju makꞌaniya lapanacni ju pꞌulhnanch tanavilh ju chunch.
23 Mas avilhchan paꞌastacni chꞌucꞌucanch ju tam tsꞌalh va ixlacata ni acsni ju uctaxtui tachi ju lhcaꞌulai ju laꞌixlhamapꞌaksin ju Moisés.
Ni naviyatꞌit chunch tajuch ni va quilalhixcayauch ni palaich xacnavi ju anuꞌ lapanac ju acs avilhchan paꞌastacni.
24 Jantu aꞌulanitꞌit ixtalakꞌalhin tam xamatiꞌ ni jantu pꞌulhnan kꞌox cꞌatsꞌayatꞌit tuchi navita.
Ja yuchi ju ani ju Cristo
25 Ju aliꞌin amachakꞌan Jerusalén ixtanajunch:
―Ja jantiyuꞌ ju ani ju puxcocan ju tamakniputun.
26 Ju chavai ni tꞌompalai chiviniꞌ laꞌixꞌucxlacapuꞌan ju lapanacni.
Chai ju yuꞌunch ni jantu tuꞌuꞌ tajumpalai.
Ju ucxtinin ja tacꞌatsai nuꞌ ni yuchi ju Cristo.
27 Para ju ani mispayauch tas amachakꞌach.
Acsni caminaꞌ ju Cristo jantu xamatiꞌ catimispa ta anchach ju caminanta.
28 Pus ju Jesús pꞌas chivinilh acsni ixtꞌajun amalaniniꞌ laꞌixpujitatꞌan ju istꞌaꞌisraelitanin.
Ixꞌajunich:
―Quilamispayau ju quitꞌin.
Chai cꞌatsꞌayatꞌit ta anchach ju icmintacha.
Para jantu va laquiꞌakstu icminta.
Ju quimacaminta yuchi ju najun ju stavasalanti chai ju yuchi jantu mispꞌayatꞌit ju uxijnan.
29 Ju quitꞌin icmispai ju yuchi ni anch ju xacminacha.
Chai yuchi ju xaquimacamin.
30 Ju acsnich lana tapastaclich ixchꞌapaca.
Para jantu xamatiꞌ lai chꞌapalh ni tucaꞌ ixchin ju ixꞌavilhchan.
31 Na lhu lapanacni talhilacaꞌalh ju yuchi.
Ixtanajunch:
―Ju Cristo acsni caminaꞌ ja palai lhu ixpulacaꞌican canaviyaꞌ.
Ja palai jantu ju ani.
Ju fariseonin tamalakacha ju ixpulasiyajni ni caꞌixtachꞌapalh ju Jesús
32 Ju fariseonin ixtakꞌasmatꞌach ni na ixtalhilacchivininch ju Jesús ju lapanacni.
Pus ju xalackꞌajin palijni chai ju fariseonin tamalakachalh ju pulasiyajni ni cataꞌalh chꞌapanin ju Jesús.
33 Ju Jesús naulh:
―Va pantsꞌiquis ju ictilatꞌaꞌucxuntꞌonau.
Ju astan aclakꞌanchokoyach ju quimalakachatachilh.
34 Ju uxijnan aquilapuxcoyau.
Para jantu lai aquilalhitajuyau.
Junta acꞌanaꞌ ju uxijnan jantu lai aquintilachꞌakꞌokꞌau.
35 Pus ju istꞌaꞌisraelitanin tanaulh va laꞌisꞌakstuꞌan:
―Tas anchach ju cachaꞌanaꞌ ju yuchi junta jantuch lai calhitajuyau.
Ja va calakꞌanach ju istꞌaꞌisraelitanin ju amakpitsicanta laꞌixtꞌunꞌan ju griegonin.
Ja va caꞌanaꞌ amalaniniꞌ ju griegonin.
36 Tijuch ju nomputun ju ixchivinti ni najun:
“Ju uxijnan aquilapuxcoyau para jantu aquilalhitajuyau”.
Ni va nompalai.
Chai ni najun:
“Junta acꞌanaꞌ ju uxijnan jantu lai aquintilachꞌakꞌokꞌau”.
Ju ani tachi kꞌai xcan ju xtꞌakꞌa atsucunti
37 Acsni ixlakꞌoputunch ju cꞌatan chai acsni na kꞌai cꞌatan ixjunita pus ju Jesús taya chai na pꞌas chivinilh.
Naulh:
―Ni alin xamatiꞌ ju quicxixa laꞌixꞌalhunut chach quilakmilh ju quitꞌin.
Chach kꞌotlh ju xcan ju icxtꞌakꞌa.
38 Ju quilhilacaꞌanta quitꞌin pus cataxtuyaꞌ ju laꞌixꞌalhunut tachi kꞌai xcan ju lakꞌajunta.
Tachi ju najunch lacaꞌatsꞌoknut.
39 Ju Jesús ixlhichivinin ju Spiritu Santu.
Yuchi ju cataꞌamaklhtayananach ju talhilacaꞌanta ju Jesús.
Tucaꞌ lai ixmin ju Spiritu Santu ni tucaꞌ ixꞌanchokota ju lactꞌiyan ju Jesús.
Quilhmactꞌui tava ju lapanacni
40 Acsni takꞌasmatlh ju ani chivinti pus ju aliꞌin laꞌixtalhavat lapanacni ixtanajunch:
―Slivasalh ni yuchi ju ani ju lapanac ju najun ixchivinti Dios.
41 Ju aliꞌin ixtanajun:
―Ju ani yuchi ju Cristo ju noncan camalakachatachilh Dios.
Ju aliꞌin ixtanajun:
―Para ja laxaꞌestado Galilea ju caminanta ju Cristo.
42 Ja jantu najun lacaꞌatsꞌoknut ni makꞌaniya isꞌaskꞌatꞌa David cajunaꞌ ju Cristo.
Chai anch catsucuyanta ju lakꞌachakꞌan Belén laꞌixtꞌun ju makꞌaniya quimpaiꞌan David.
43 Pus chunchach quilhmactꞌui va ixtalhavat lapanacni va ixlacata ju Jesús.
44 Ju aliꞌin ixtachꞌapaputunch.
Para jantu xamatiꞌ lai chꞌapalh.
Jantu tavanan xamatiꞌ chunch cachivinilh tachi ju ani lapanac
45 Pus ju pulasiyajni taꞌanchokolh juninin ju xalackꞌajin palijni chai ju fariseonin.
Chai ju yuꞌunch taꞌasacminilh:
―Tajuch ni jantu xalhitꞌanatꞌit.
46 Pus ju pulasiyajni taꞌakꞌalhtayanalh:
―Jantu xamatiꞌ ju chunch chivinin tachi ju ani lapanac.
47 Ju acsnich ju fariseonin taꞌakꞌalhtayanalh:
―Ja vachuꞌ va okxchꞌokꞌocꞌantꞌatꞌit ju uxijnan.
48 Ju sia yuꞌunch ju xalackꞌajin ja xamatiꞌ cꞌuꞌu lacaꞌita.
U sia yuꞌunch ju fariseonin ja xamatiꞌ cꞌuꞌu ju lacaꞌita.
49 Para ju ani tontojni lapanacni ju jantu tamispai ju ixlhamapꞌaksin ju Moisés catamakꞌalhkꞌajnanaꞌ.
50 Pus ju Nicodemo ju quilalh tsꞌis junta ixvi ju Jesús vachuꞌ makfariseo ixjunita.
Ju yuchi ajunich:
51 ―Ja lhijun ju quilhamapꞌaksinꞌan ni acꞌulanilh ju ixtalakꞌalhin tam xamatiꞌ ju jantucaꞌ tuꞌuꞌ kꞌasmatnican chai ju jantucaꞌ cꞌatsanican ni caꞌalilh ju ixtalakꞌalhin.
52 Taꞌakꞌalhtayanalh.
Tajuni ju Nicodemo:
―Ja vachuꞌas amachakaꞌat Galilea.
Alacꞌavanch.
Alaktsꞌinaꞌ ni jantu xamatiꞌ tꞌajun kꞌostayanaꞌ ju laxaꞌestado Galilea ju najun ixchivinti Dios.
53 Pus tataxtulh ju lacapuꞌucxtin chai pumatamin taꞌalhch ju laꞌixlacchakaꞌan.