Pumatam alactuꞌunu chakoꞌulh
8
Ju Jesús alh ju akstijun junta ixmacha ju lacapuꞌolivos.
2 Chai acsni tuncunchokopa vatsꞌisin anchokolh ju Jesús ju laꞌixpujitatꞌan ju istꞌaꞌisraelitanin.
Chai chux ju lapanacni talakꞌalh ju Jesús.
Chai ju yuchi tavi chai tsuculh amalaniniꞌ.
3 Ju acsnich ju ixtalhatalanininta ju ixlhamapꞌaksinꞌan ju istꞌaꞌisraelitanin chaich ju fariseonin talhiminilh pumatam chakoꞌulh ju lhitajucalh ni ixtꞌaꞌalactuꞌunun pumatam jokꞌat.
Taꞌulalh laꞌixlacaitat junta ixvi ju Jesús.
4 Tajunich:
―Amamakaꞌunuꞌ ju ani chakoꞌulh lhitajucalh ni ixtꞌajun tꞌaꞌalactuꞌunuꞌ pumatam jokꞌat.
5 Pus ju Moisés ju laꞌixlhamapꞌaksin quintajunan ni aclacatꞌalhmauch ju chunchach talai.
Para ju uxintꞌi tꞌas naꞌunch.
6 Ju tapusacmi chunch va ixtalaktsꞌintanuputunch ju Jesús.
Tsꞌa ma laich ixtalhitajunilh tuꞌuꞌ ju laich catalhichivimakꞌalh.
Para ju Jesús lana takꞌentalh.
Tsuculh atsꞌoknuꞌ laꞌixkꞌelilimacaꞌ ju lacatꞌun.
7 Para ni va kꞌasi kꞌasi tasacmich pus takꞌoxitolhchokolh chai ajunich:
―Pus ni alin xamatiꞌ milhiꞌuxijnan ju jantu caꞌalactuꞌunulh yuchach ju pꞌulhnanch caꞌalacatꞌalhmanalh.
8 Aktam takꞌentachokopa chai tsucuchokopa atsꞌoknuꞌ ju lacatꞌun laꞌixkꞌelilimacaꞌ.
9 Acsni takꞌasmatlh ju naulh ju Jesús pus ju achivimakꞌanin taxcanilh ju ixꞌalhunutꞌan.
Pumatamin pumatamin tatsuculh taxtunin.
Pꞌulhnan tataxtulh ju xapapanin.
Chai astan taꞌalh ju paitat lapanacni.
Pus va isꞌakstuch tavilh ju Jesús.
Tꞌatamacaulh ju chakoꞌulh ju ixya laꞌixlacaitat junta ixvi ju Jesús.
10 Acsni takꞌoxitolhchokolh ju Jesús jantu xamatiꞌ laktsꞌilh ju achivimakꞌanin.
Va isꞌakstu ju ixya ju chakoꞌulh.
Pus junich:
―Chakoꞌulh tas xataꞌanch ju ixtachivimakꞌanan.
Ja jantu xamatiꞌ xaꞌulaniyan ju mintalakꞌalhin.
11 Pus ju chakoꞌulh akꞌalhtayanalh.
Naulh:
―Jantu xamatiꞌ ji quiꞌucxtin.
Pus ju Jesús junich:
―Nin quitꞌin jantu actiꞌulanin ju mintalakꞌalhin.
Aꞌinchich chai jantuch aliꞌ alactꞌuꞌunchꞌokꞌo.
Jesús ju lai amalacpucujui laꞌixtacꞌatsanꞌan ju lapanacni
12 Ju Jesús aktam chivinchokopa.
Chai ajunich ju lapanacni:
―Quitꞌin icjunita tachi ju tuꞌuꞌ maclhcu ni icmalacpucujui laꞌixtacꞌatsanꞌan ju lapanacni.
Ju aquinchꞌakꞌokꞌayaꞌ jantu tsꞌis cajunaꞌ ixtacꞌatsan.
Acmalacpucujuniyaꞌ ju ixtacꞌatsan ni laich caꞌalilh ju isꞌatsucunti jonkꞌalhita.
13 Pus ju acsnich ju fariseonin tajunich:
―Va laminchivinti miꞌakstu naꞌun ni xakꞌaiꞌat.
Ju minchivinti jantu slivasalh.
14 Akꞌalhtayanalh ju Jesús.
Ajunich:
―Mas ca va laquinchivinti ju icnajun ni icxakꞌai para ju quinchivinti stavasalanti ni iccꞌatsai ta anchach ju icmintacha chai ta anchach ju acꞌanchokoyaꞌ.
Para ju uxijnan jantu cꞌatsꞌayatꞌit ta anchach ju icmintacha nin ta anchach ju acꞌanchokoyaꞌ.
15 Ju uxijnan quilaꞌulaniyau ju quintalakꞌalhin tachi ju talai ju va lhilapanac.
Ju quitꞌin jantu xamatiꞌ icꞌulani ixtalakꞌalhin.
16 Chai mas icꞌulani ju ixtalakꞌalhin apumatam para stavasalanti ju tuchi acnonaꞌ ni jantu va quiꞌakstu quitꞌin ju icꞌulai talakꞌalhin.
Yuchi ju ictꞌamucꞌai talakꞌalhin ju quimpai ju quimacaminta.
17 Ju lamilhamapꞌaksinꞌan najun acsni va lakatamch chivinti catanaulh ixpumatꞌuiꞌan lapanacni pus soknicꞌach ju tuchi tanajun.
18 Pus quitꞌin quiꞌakstu icnajun tichi chavaich ju quitꞌin.
Chai ju quimpai ju quimacaminta vachuꞌ najun tichi chavaich ju quitꞌin.
19 Tajunich chavai:
―Tas anchach ju ya ju mimpai.
Akꞌalhtayanalh ju Jesús:
―Nin quitꞌin jantu quilamispayau.
Ja va a ti quimpaich lai amispꞌatꞌit.
Pus ni xaquilamispau ju quitꞌin pus vachuch ju quimpai caꞌismispꞌatꞌit.
20 Ju ani chivinti ju Jesús naulh acsni ixtꞌajun amalaniniꞌ ju laꞌixlacpujitatꞌan ju istꞌaꞌisraelitanin junta ixtaxtꞌakꞌa ixtuminꞌan.
Para jantu xamatiꞌ lai lacachꞌapalh ju acsnich ni jantucaꞌ ixchin ju ixꞌavilhchan.
Junta acꞌanaꞌ ju uxijnan jantu lai atꞌipꞌitꞌit
21 Ju Jesús ajunchokopa:
―Ju quitꞌin acꞌanach.
Chai aquilapuxcoyauch.
Para junta acꞌanaꞌ ju uxijnan jantu lai atꞌipꞌitꞌit.
Ju uxijnan acsni aniyaꞌitꞌit jantu makꞌotꞌinicꞌantꞌatꞌit ju miꞌalactuꞌuntiꞌan.
22 Ju acsnich talaclajunich ju istꞌaꞌisraelitanin:
―Ja va isꞌakstu nuꞌ ju maknichokoputuncan ni najunch ni jantu lai caꞌanau junta caꞌanaꞌ.
23 Ju Jesús ajunich:
―Ju uxijnan xanavin untꞌatꞌit ju ani lacamunutpaꞌ.
Ju quitꞌin lactꞌiyan icmintacha.
Ju uxijnan va amachakꞌan lacamunutpaꞌ untꞌatꞌit.
Ju quitꞌin jantu icꞌamachakaꞌ ju ani lacamunutpaꞌ.
24 Pus iclajunauch ni aniyaꞌitꞌit ju lamiꞌalactuꞌuntiꞌan.
Pus ni jantu lacꞌaꞌiyatꞌit ni chun icjunita tachi ju iclajunau pus aniyaꞌitꞌit ju lamiꞌalactuꞌuntiꞌan.
25 Tajunich:
―Tis chavaichꞌat ju uxintꞌi.
Pus ju acsnich ajunich ju Jesús:
―Acsni ictaiꞌula ju quiꞌamalaninti va tachi iclajuntauch tichi chavaich ju quitꞌin.
26 Na lhu taxtokni ju iclhichivimputun ju milacataꞌan chai lai aclaꞌulaniyau ju mintalakꞌalhinꞌan.
Para ju quimalakachatachilh yuchi ju najun ju stavasalanti.
Chai tuchi ju ickꞌasmatnita laꞌixmacni pus yuchach ju icnajun ju ani lacamunutpaꞌ.
―Acsni tavanan aquilaxtucmucꞌayau talaclhman ju quitꞌin ju quimalakachatachilh ju Dios ni lapanac actsucuyaꞌ ju ani pus acsnich ju amachꞌakxayaꞌitꞌit tichi chavaich ju quitꞌin.
Vachuꞌ amachꞌakxayaꞌitꞌit ni jantu tuꞌuꞌ icnavi ju va laquiꞌakstu.
Yuchi ju icchivinin tachi ju quimasunitach ju quimpai Dios.
29 Chai ju quimacaminta quintꞌaꞌalhtanan.
Chai ni aktsꞌiya icnavich tuchi ju kꞌoxich lhiulai ju yuchi pus yuchi jantu tavanan quilhimacajun.
30 Acsni naulh ju chunch ju Jesús pus na lhu talhilacaꞌalh ju yuchi.
Ju Dios catanaviyan ni jantu tachi ju va xalapanac aꞌunaꞌitꞌit
31 Ju Jesús ajunich ju anuch istꞌaꞌisraelitanin ju ixtalhilacaꞌantach ju yuchi:
―Pus ju uxijnan ni va tachi alacꞌaꞌitꞌit ju quinchivinti pus slivasalh ni quiꞌamamakaꞌunti aꞌunaꞌitꞌit.
32 Chai amispꞌayaꞌitꞌitch ju istavasalanti.
Chai acsni amispꞌayaꞌitꞌit ju istavasalanti pus amaxtꞌucꞌanaꞌitꞌit ju mimpuxalapanacniꞌan.
33 Ju acsni taꞌakꞌalhtayanalhch ju aliꞌin lapanacni:
―Ju quijnan makꞌaniya ixꞌapapanatnich Abraham icjuntau.
Chai jantu tavanan ju va xalapanacni quintanavitan xamatiꞌ.
Tajuch ni va naꞌunch ju uxintꞌi ni acmaxtucanau ju quimpuxalapanacni quincꞌan.
34 Ju Jesús akꞌalhtailh:
―Slivasalh ju iclajunau.
Tachi chun ju tanavi alactuꞌunti pus yuchi ju ixꞌucxtinꞌan tanavita ju alactuꞌunti.
35 Ju va xalapanac jantu lai tsucukꞌalhi ju laꞌixchakaꞌ ju tam ixꞌucxtin.
Para ju aktsꞌiya istsꞌalh ju amachakaꞌ catsucukꞌalhiyaꞌ anch.
36 Pus ju quitꞌin ju istsꞌalh Dios icjunita ni aclamaxtuyau ju lamimpuxalapanacniꞌan pus slivasalhch jantu va xalapanacni aꞌunaꞌitꞌit.
37 Iccꞌatsai ni isꞌaskꞌatꞌan ju makꞌaniya Abraham untꞌatꞌit.
Para ni va quilamakniputumpalau ni jantu lacꞌaꞌipꞌutꞌunatꞌit ju quinchivinti ju iclajuntau.
38 Ju quitꞌin yuchi ju icnajun ju iclaktsꞌintach laꞌixmacni ju quimpai.
Tachi ju uxijnan ni naviyatꞌitch ju kꞌasmatꞌatꞌit laꞌixmacni ju mimpaiꞌan.
39 Chai ju lapanacni taꞌakꞌalhtayanalh.
Tajunich:
―Pus ju makꞌaniya quimpai quincꞌan yuchi ju Abraham.
Chai ajunich ju Jesús:
―Ni vasalh ixꞌapapanatnich caꞌixꞌuntꞌit ju Abraham ju makꞌanch ixtꞌajun pus ixnavitꞌit tachi ju navilh ju Abraham.
40 Para ju chavai ni va quilamakniputumpalau.
Ju quitꞌin ni va iclajumpalau ju stavasalanti ju ickꞌasmatꞌach laꞌixmacni ju quimpai Dios.
Ju Abraham jantu chunch ixnavi.
41 Ju uxijnan va ixlhichꞌalhcat ju mimpaiꞌan ju naviyatꞌit.
Pus tajunich:
―Jantu akchunan icjuntau.
Va pumatam ju quimpai quincꞌan.
Yuchi ju Dios.
42 Pus ju Jesús ajunich:
―Ni mimpaiꞌan cava ju Dios ca xaquilamapainiu ju quitꞌin ni laꞌixmacni Dios ju icminta ju ani.
Chai mas icminta ju ani jantu va laquiꞌakstu ju icminta.
Isꞌakstu ju Dios ju xaquimacaminchokoi.
43 Tajuch ni jantu lai machꞌakxayatꞌit ju tuchi iclajunau.
Ca ixlhiyuchi ni jantu quilakꞌasmatniputunau ju tuchi iclajunau.
44 Ju mimpaiꞌan ju uxijnan yuchi ju lhacaticuru.
Chai va ixkꞌachat yuchi ju navipꞌutꞌunatꞌit.
Ju yuchi amakniniꞌ junita tus laꞌixputaiꞌulacan ju lacamunutpaꞌ.
Jantu tavanan najunta ju stavasalanti ni lana jantu mispai tuchi ixtalakxtuch ju stavasalanti.
Acsni najun ju taꞌaklhtamat va najun tuchi alin ju laꞌixꞌalhunut ni va taꞌaklhtaman junita.
Chai xapai ju taꞌaklhtamat junita.
45 Yuchi jantu quilalhilacaꞌiniyau ju quitꞌin ni icnajun ju istavasalanti.
46 Tis chavaich ju milhiꞌuxijnan ju lai aquiꞌulanilh ju quintalakꞌalhin.
Ni icnajun ju stavasalanti pus tajuch ni jantu quilalacaꞌiniyau ju uxijnan.
47 Ju isꞌaskꞌatꞌa Dios kꞌasmatni ju ixchivinti.
Ju uxijnan jantu kꞌasmatpꞌutꞌunatꞌit ni jantu isꞌaskꞌatꞌan Dios untꞌatꞌit.
Ju Cristo aktsꞌiya ixtꞌajunch
48 Ju acsnich ju istꞌaꞌisraelitanin taꞌakꞌalhtayanalh.
Tajuni ju Jesús:
―Ja jantu cꞌuꞌu slivasalh tachi ju iclajunau ni va amachakaꞌat Samaria chai va pꞌacxantꞌa ju lhacaticuru.
49 Chai akꞌalhtayanalh ju Jesús.
Ajuni ju lapanacni:
―Ju quitꞌin jantu icpacxanta ju lhacaticuru.
Alai va iclajumputunau ni yuchi ju xakꞌai ju quimpai Dios.
Chai ju uxijnan jantu tuꞌuꞌ quilalhiulayau.
50 Jantu va quiꞌakstu ju iclacasqꞌuin ni catanaulh ju lapanacni ni icxakꞌai.
Alin tichi chavaich ju lacasqꞌuin ni catanaulh ju lapanacni ni icxakꞌai.
Chai yuchi ju alaktsꞌintanunuꞌ.
51 Slivasalh ju iclajunau.
Ju camuctaxtuyaꞌ ju quinchivinti jantu catini.
52 Ju acsnich ju istꞌaꞌisraelitanin tajunich:
―Ju chavai iccꞌatsayauch ni va pꞌacxantꞌa ju lhacaticuru.
Ju Abraham ni nipa.
Chai ju lapanacni ju ixtanajun ju ixchivinti Dios vachuꞌ tani.
Chai ju uxintꞌi ni va nompꞌalai ni jantu catini ju camuctaxtuyaꞌ ju minchivinti.
53 Ju uxintꞌi ja palai xakꞌaiꞌat.
Ja palai jantu ju makꞌaniya quimpai quincꞌan Abraham.
Ju yuchi ni nipa.
Chai vachuꞌ tanita ju lapanacni ju ixtanajunch ixchivinti Dios.
Pus ju uxintꞌi tis chavaichꞌat navichꞌokꞌocꞌan miꞌakstu.
54 Chai akꞌalhtayanalh ju Jesús.
Ajunich ju lapanacni:
―Ni va quiꞌakstu cava ju iclacasqꞌuin ni catanaulh ju lapanacni ni icxakꞌai pus jantu catilhitapalalh mas chunch catanaulh.
Yuchi ju quimpai ju najun ni icxakꞌai.
Chai ju uxijnan ni va nompꞌalatꞌit ni yuchi ju miDiosꞌan.
55 Ju uxijnan jantu mispꞌayatꞌit ju yuchi.
Para ju quitꞌin icmispai ju yuchi.
Ni acnaulh ni jantu icmispai ju yuchi pus vachuꞌ va ixnonaꞌ taꞌaklhtamat acva tachi ju uxijnan.
Para ju quitꞌin icmispai ju yuchi.
Chai icmuctaxtuich tuchi najuntach ju yuchi.
56 Ju makꞌaniya mimpaiꞌan Abraham lhikꞌachalh ni ixlacaꞌita ni calaktsꞌinaꞌ ni acminaꞌ.
Chai laktsꞌilh.
Chai lhikꞌachalh.
57 Pus ju acsnich ju istꞌaꞌisraelitanin tajunich:
―Ju uxintꞌi jantucaꞌ pꞌacxantꞌa cincuenta cꞌata.
Tꞌas laich lhinaꞌun ni laktsꞌinch ju Abraham.
58 Ajunich chavai ju lapanacni ju Jesús:
―Slivasalh ju iclajunau.
Acsni tucaꞌ istsucui ju Abraham xactꞌajunch.
59 Chai tasaclich chavai ju chiux ju ixtaputꞌalhputunch.
Para ju Jesús lana apakꞌosnulh ju lapanacni chai taxtulh ju laꞌixpujitatꞌan ju istꞌaꞌisraelitanin.
Laꞌixlacaitat ixtalhavat lapanacni ju putapasatilalh acsni tavanan alh.