Malacꞌavani ju Jesús ju alakꞌachꞌix
9
Ju Jesús acsni tapasalh ju lacati laktsꞌilh pumatam lapanac.
Alakꞌachꞌix ixjunita tus acsni tsuculh.
2 Pus ju ixꞌamamakaꞌui tasacmilh ju Jesús.
Tajunich:
―Amamakaꞌunuꞌ tis chavaich ju alactuꞌunulh ni laich xalakꞌajun ju va alakꞌachꞌix.
Ja yuchi isꞌakstu u ixpai u ixnati.
3 Chai akꞌalhtayanalh ju Jesús:
―Jantu alakꞌachꞌix xalakꞌajun va ixlacaꞌatalh ni caꞌalactuꞌunulh ju yuchi nin ixpai nin ixnati.
Va alakꞌachꞌix xalakꞌajun ni laich caputalacasuyaꞌ ju ixlhichꞌalhcat ju Dios laꞌisꞌatsucunti ju yuchi.
4 Tasqꞌuini ni acnavi ju ixlhichꞌalhcat ju quimacaminta ni ictitꞌajuncaꞌ tachi acsni vilhcaꞌ ju avilhchan.
Cachinaꞌ avilhchan acsni acniyaꞌ.
Ju acsnich tachi ju na va tsꞌista cajunaꞌ acsni jantu lai xamatiꞌ chꞌalhcatnan.
5 Ni ictitꞌajuncaꞌ ju ani lacamunutpaꞌ pus tachi maclhcu icjunita ni icmapulhcui laꞌixtacꞌatsanꞌan ju lapanacni.
6 Ju Jesús acsni naulh ju chunch pus akchujlh ju lacatꞌun.
Navilh ju pulhkꞌom laꞌixchuꞌut.
Pus lhquilin lacpumucꞌalh ju laꞌixlakchulh ju anuꞌ alakꞌachꞌix.
7 Junich:
―Aꞌinchich lakpꞌuchꞌakꞌanaꞌ laxapos ju Siloé.
Ju ixtapakaꞌut ju anuꞌ pos nomputun Malakachacanta.
Pus ju anuꞌ lapanac alh lakpuchꞌakꞌanaꞌ.
Chai acsni taspꞌitcha lai ixꞌalacꞌavanan.
8 Ju ixtꞌatolhnin chai ju aliꞌinch lapanacni aktsꞌiya ixtalaktsꞌintach ni va isqꞌuin tumin ju anuꞌ lapanac.
Pus acsni cꞌuchꞌucalh tanaulich:
―Ja jantiyuꞌ ju ani ju ixtolai lacati chai va isqꞌuin tumin.
9 Ju aliꞌin lapanacni ixtanajunch ni yuchi.
Ju aliꞌin ixtanajun:
―Jantiyuꞌ.
Va ixtꞌachunch.
Para ju alakꞌachꞌix ixjunita ixmavasalai ni yuchi.
10 Tajunich chavai:
―Pus tꞌas xalhiꞌalacꞌavananch.
11 Ju alakꞌachꞌix ixjunita akꞌalhtayanalh.
Ajunich:
―Yuchi ju anuꞌ jokꞌat ju juncan Jesús navilh pulhkꞌom.
Quilacpumucꞌalh laquilakchulh chai quijunilh:
“Apꞌinchich lakpꞌuchꞌakꞌanaꞌ ju lacaSiloé”.
Pus icꞌalh.
Iclakpuchꞌakꞌalh.
Chai icꞌalacꞌavanalh.
12 Chai ju alakꞌachꞌix ixjunita talhisacmichokopa ju Jesús.
Tajunich:
―Tas anchach ju xaꞌan ju anuꞌ lapanac.
Chai ju alakꞌachꞌix ixjunita lhakꞌalhtayanalh.
Ajunich:
―Jantu iccꞌatsai.
Ju fariseonin taquilhasacmi ju alakꞌachꞌix ixjunita
13 Chai alhiꞌanicalh ju fariseonin ju anuꞌ alakꞌachꞌix ixjunita.
14 Pus avilhchan paꞌastacni ixjunita acsni tavanan navilh ju pulhkꞌom ju Jesús chai acsni amalacꞌavanilh ju alakꞌachꞌix.
15 Pus ju fariseonin aktam tasacmichokopa ju alakꞌachꞌix ixjunita.
Tajunich:
―Tꞌas xalhiꞌalacꞌavananch.
Ju anuꞌ alakꞌachꞌix ixjunita chani ajuni:
―Va quimucꞌanilh pulhkꞌom ju laquilakchulh chai iclakpuchꞌakꞌalh.
Chai icꞌalacꞌavanalhch.
16 Pus ju acsnich ju aliꞌin fariseonin tanaulh:
―Ju ani lapanac jantu laꞌixmacni Dios ju xaminacha ni jantu maklacaꞌani ju avilhchan paꞌastacni.
Ju aliꞌin ixtanajunch:
―Para tas calhinavilhch ju ani lhamakꞌan ju va alactuꞌunu lapanac.
Pus ju fariseonin jantu va lakatam ixtanavi ixchivintiꞌan.
17 Tasacmichokopa aktam ju anuꞌ alakꞌachꞌix ixjunita.
Tajunich:
―Ju uxintꞌi tis chavaich lhiulai ju xalakpulakꞌoxiyan lamilakchulh.
Pus ju anuꞌ alakꞌachꞌix ixjunita naulh:
―Yuchi ju lapanac ju najun ixchivinti Dios.
18 Pus ju xalackꞌajin israelitanin jantuch ixtalacaꞌi ni yuchi cava ju alakꞌachꞌix ixjunita.
Chai jantu ixtalacaꞌi ni va calakꞌoxinicalh ju ixlakchulh.
Tus acsni ju talacaꞌi acsni atꞌasanicalh ju ixpai ixnati ju anuꞌ alakꞌachꞌix ixjunita.
19 Chai asacmicalh ju xapai xanati.
Ajuncanch:
―Ju ani ja yuchi ju mintsꞌalhꞌan ju nonatꞌit ni va alakꞌachꞌix ixjunita acsni lakꞌaulh.
Pus ju chavai tas xalhiꞌalacꞌavananch.
20 Taꞌakꞌalhtayanalh ju ixpai chai ixnati.
Tanaulh:
―Iccꞌatsayau ni yuchi ju ani ju quintsꞌalh quincꞌan.
Yuchi ju alakꞌachꞌix ixjunita acsni tavanan tsuculh.
21 Para jantu iccꞌatsayau ta xalhiꞌalacꞌavananch ju chavai.
Chai jantu iccꞌatsayau tichi chavaich ju xalakpulakꞌoxi.
Pus ju yuchi kꞌaich.
Yuchi ju asacmitꞌitch.
Isꞌakstuch canonaꞌ.
22 Chunchach ju talhakꞌalhtayanalh ju ixpai chai ixnati ni va ixtatalhonich ju xalackꞌajin istꞌaꞌisraelitanin.
Ju yuꞌunch ixtanajuntach ni xamatiꞌ canonaꞌ ni yuchi ju Cristo ju Jesús ju anuꞌ noncanch camalakachatachilh ju Dios pus jantu calacasqꞌuinicanaꞌ ni lai catanu ju laꞌixpujitatꞌan ju israelitanin.
23 Pus yuchach talhinaulh chunch ju ixpai chai ixnati acsni tavanan tanaulh ni kꞌaich ju istsꞌalhꞌan.
Yuchach ju casacmicalh.
24 Pus lhinonchokocalh istꞌasanica ju anuꞌ lapanac ju va alakꞌachꞌix ixjunita.
Tajunich:
―Anauch ni va yuchi ju xakꞌai ju Dios.
Ju quijnan iccꞌatsayau ni va alactuꞌunuꞌ ju anuꞌ lapanac ju xalakpulakꞌoxiyan.
25 Ju acsnich ju anuꞌ alakꞌachꞌix ixjunita akꞌalhtayanalh.
Najunch:
―Ni alactuꞌunuꞌ u jantu ju quitꞌin jantu iccꞌatsai.
Va lakatam taxtokni ju iccꞌatsai.
Va alakꞌachꞌix xacjunita.
Para ju chavai laich icꞌalacꞌavanan.
26 Chai tasacmichokopa ju anuꞌ alakꞌachꞌix ixjunita.
Tajunich:
―Tas xanaviyanch.
Tas xalhimalacꞌavaniyanch.
27 Chai akꞌalhtayanalh ju anuꞌ alakꞌachꞌix ixjunita.
Ajuni:
―Ni iclajumpalauch chai jantu xaquilakꞌasmatnipalau.
Tajuch ni va kꞌasmatchꞌokꞌopꞌutꞌunatꞌitch aktam.
Ja vachuꞌ va umpꞌutꞌunatꞌit ju uxijnan ixtamamakaꞌunti.
28 Pus talhitalhkꞌamalh ju xalackꞌajin israelitanin.
Tajunich ju anuꞌ alakꞌachꞌix ixjunita:
―Ju uxintꞌi ixtamamakaꞌunchꞌat.
Para ju quijnan ixtamamakaꞌunti Moisés icjuntau.
29 Ju quijnan iccꞌatsayau ni Dios ju xakꞌala ju Moisés.
Para ju ani lapanac jantu iccꞌatsayau ta anchach ju xaminacha.
30 Chai akꞌalhtayanalh ju anuꞌ alakꞌachꞌix ixjunita.
Ajunich ju xalackꞌajin istꞌaꞌisraelitanin:
―Slivasalh kꞌai lhamakꞌan ju ani.
Ju uxijnan jantu cꞌatsꞌayatꞌit ta anchach ju mintacha ju yuchi para ju quitꞌin quimalacꞌavanilh.
31 Cꞌatsayauch ni jantu kꞌasmatni ju va alactuꞌunuꞌ ju Dios.
Para ni alin xamatiꞌ ju talhoni ju Dios chai navini ju ixkꞌachat pus yuchi ju kꞌasmatni.
32 Tus laꞌixputaiꞌulacan ju lacamunutpaꞌ jantu tavanan kꞌasmatcanta ni caꞌalilh xamatiꞌ ju lai camalacꞌavani ju va alakꞌachꞌix lakꞌajunta.
33 Pus ju anuꞌ lapanac ni jantu cava laꞌixmacni Dios ju minta ca jantu lai tuꞌuꞌ catinavi.
34 Chai taꞌakꞌalhtayanalh ju xalackꞌajin israelitanin.
Tajunich ju anuꞌ alakꞌachꞌix ixjunita:
―Ju uxintꞌi istsꞌalhꞌat ju va alactuꞌunu lapanacni.
Ja va quilamalaniputunauch ju quijnan.
Pus lana xcoxtucalh junta ixtanun.
Ju aliꞌin jantu tamachakxaputun ixchivinti Dios
35 Chai kꞌasmatlh ju Jesús ni tixcoxtucalh ju anuꞌ alakꞌachꞌix ixjunita.
Chai acsni pakxtokchokolh junich:
―Ju uxintꞌi ja lhilaksi ju istsꞌalh Dios.
―Juncanch ju alakꞌachꞌix ixjunita.
36 Chai ju alakꞌachꞌix ixjunita kꞌalhtailh ju Jesús.
Junich:
―Tis chavaich ju anuꞌ lhichꞌivinin ji quiꞌamigo.
Aqꞌuiꞌunch ni laich aclhilaksi ju yuchi.
37 Chai ju Jesús acsni kꞌalhtailh ju anuꞌ alakꞌachꞌix ixjunita junich:
―Laktsꞌintꞌach.
Chai yuchach ju tꞌonan tꞌachivinin.
38 Chai ju anuꞌ alakꞌachꞌix ixjunita junich ju Jesús:
―Iclhilaksiyanch ji quiꞌucxtin.
Chai lana taꞌaktsokotanilh.
Tsuculh nonaꞌ ni yuchach ju Dios.
39 Chai naulh ju Jesús:
―Ju quitꞌin iclhiminta ju ani lacamunutpaꞌ ni laich caputasuyaꞌ ixtalakꞌalhinꞌan ju lapanacni.
Ju chunch ju tachi ju va alakꞌachꞌixnin tajunita ni va jantu amachakxanan catamachakxayaꞌ ju stavasalanti.
Chai ju tanajun ni tamachakxai ju stavasalanti pus tachi alakꞌachꞌixnin catajunaꞌ ni jantu cataꞌamachakxananaꞌ.
40 Ju aliꞌin fariseonin ju ixtamakvilanalh junta ixvi ju Jesús acsni takꞌasmatnilh ju ani chivinti tajunich ju Jesús:
―Ja vachuꞌas tachi ju va alakꞌachꞌixnin icjuntau ni jantu lai icꞌamachakxananau.
41 Pus ju Jesús ajunich ju fariseonin:
―Ni tachi ju va alakꞌachꞌixnin cava untꞌatꞌit ni va jantu amachꞌakxananatꞌit cava pus jantu ixꞌulanicꞌantꞌatꞌit ju miꞌalactuꞌuntiꞌan.
Para ni nonatꞌit ni machꞌakxayatꞌit ju stavasalanti pus yuchi na lhiꞌalin ju miꞌalactuꞌuntiꞌan ni jantu naviyatꞌit.