Ixcorral ju borregojni
10
Ju Jesús tailhiꞌalh ju chivinti ju ixtꞌajun ajuniniꞌ ju fariseonin chai naulh:
―Slivasalh ju iclajunau.
Ju jantu caputanuyaꞌ laxamalhtich ju laꞌixcorral ju borregojni ni va alacatam ju capuꞌanaꞌ pus ju yuchi va akꞌalhonaꞌ chai va lacatapꞌastu ju taiꞌi ju jantu ixꞌanuꞌ.
2 Para ju caputanuyaꞌ laxamalhtich yuchach ju ixlhistacnaꞌ borregojni.
3 Ju ixlhistacnaꞌ malhtich malhtekꞌani ju vasalh ixlhitacnaꞌ borregojni.
Ju ixborregojni takꞌasmatni ju ixchivinti.
Chai ju yuchi atꞌasani ju ixborregojni laꞌixtapakaꞌutꞌan chai alacmaxtui.
4 Acsni amaxtukꞌojui ju ixꞌanuch pus apꞌulhnich.
Chai ju ixborregojni tachꞌakꞌokꞌaich ni tamispanich ju ixchivinti ju ixꞌucxtinꞌan.
5 Para ju va akꞌantam ni jantu tamispai pus jantu tachꞌakꞌokꞌai.
Alai va taꞌatsꞌalhni va ixlacata ni tamispanich ju ixchivinti ni jantuch ixꞌucxtinꞌan.
6 Pus ju Jesús acsni naulh ju chunch chivinti va ixꞌapumavasalaniputun tuꞌuꞌ ju fariseonin.
Para ju yuꞌunch jantu lai tamachakxa tuchi ju ixꞌamalanicanch.
Jesús ju kꞌox ixlhistacnaꞌ ju lapanacni ju tachi borregojni tajunita
7 Pus aktam ajunchokopa ju Jesús ju fariseonin:
―Slivasalh ju iclajunau.
Ju quitꞌin chunch icjunita tachi ju xamalhtich ju ixcorral ju borregojni.
8 Tachi chun ju alhistacnin ju pꞌulhnan ixtatꞌajun acsni tucaꞌ xacmin va akꞌalhonin ixtajunita.
Chai va lacatapꞌastu ixtataiꞌiputun ju jantu ixꞌanuꞌan.
Para ju lapanacni ju tachi borregojni tajunita jantu takꞌasmatnilh ju ixchivintiꞌan.
9 Ju quitꞌin chunch icjunita tachi ju xamalhtich ju corral.
Ju laquimacni catanuyaꞌ catakꞌalhtaxtuyaꞌ.
Chai ju laquimacni caꞌamaklhtayanankꞌoyaꞌ tachi chun ju ixmaktasqꞌuinit.
10 Ju akꞌalhonaꞌ yuchi lhiminch ni va akꞌalhonamputun chai lakmakniputun chai lakꞌalhiputun.
Ju quitꞌin iclhiminta ni caꞌalilh ju isꞌatsucuntiꞌan ju lapanacni ju conkꞌalhiyanta lactꞌiyan.
Chai slivasalh kꞌox cajunaꞌ ju anuꞌ atsucunti.
11 Quitꞌin ju kꞌox xaꞌalhistacnaꞌ ju lapanacni ju tachi borregojni tajunita.
Ju kꞌox xaꞌalhistacnaꞌ borregojni lhitapꞌux ju isꞌatsucunti va ixlacaꞌatalh ixborregojni.
12 Ju va xalapanac junita jantu chun navi ni jantiyuꞌ ju amanavin.
Pus ju yuchi acsni laktsꞌin ju maktiliꞌ ni mintach pus va lacmacoyojuich ju borregojni.
Chai atsꞌalaich.
Pus ju maktiliꞌ tapꞌastu alacchꞌapai chai amakpitsich ju borregojni.
13 Pus ju jantu tucan yuꞌ ju xaꞌalhistacnaꞌ yuchach lhiꞌatsꞌalai ni va xalapanac junita.
Jantu tuꞌuꞌ lhiulai ju borregojni.
14 Quitꞌin ju kꞌox ixlhistacnaꞌ ju lapanacni ju tachi borregojni tajunita.
Ju quitꞌin icꞌamispakꞌojui ju quilapanacni.
Chai ju quiꞌanuꞌ quintamispai.
15 Chunch vachuꞌ ju quimpai quimispai.
Pus vachuꞌ ju quitꞌin icmispai ju quimpai.
Chai ju quitꞌin acxtꞌakꞌaꞌ ju quiꞌatsucunti ni catatsuculh ju quilapanacni.
Chun tachi tam alhistacnaꞌ ni lhixtꞌakꞌa ju isꞌatsucunti ixlacata ixborregojni.
16 Vachuꞌ icpacxanta aliꞌ lapanacni ju tachi borregojni tajunita ju jantucaꞌ quintachꞌakꞌokꞌai.
Tasqꞌuini ni acꞌalhimilh.
Chai ju yuꞌunch catakꞌasmatꞌaꞌ ju quinchivinti.
Va chꞌanxtamch catajunaꞌ.
Chai va pumatamch cajunaꞌ ju alhistacnaꞌ.
17 Ju quitꞌin mas acxtꞌakꞌach ju quiꞌatsucunti laich acꞌamaklhtayananchokoyaꞌ.
Yuchi quilhimapaini ju quimpai.
18 Jantu lai xamatiꞌ aquintitaiꞌinilh ju quiꞌatsucunti ju va laꞌixkꞌachat isꞌakstu.
Quiꞌakstu ju acxtꞌakꞌaꞌ.
Alin ju quintachaput ni lai acxtꞌakꞌaꞌ.
Chai alin ju quintachaput ta yu lai acpuꞌamaklhtayananchokoyaꞌ.
Junima lhamapꞌaksin quimpai ju quixtaknita.
19 Aktam alinchokopa ju ixlaklakꞌaitiꞌan ju israelitanin va ixlacaꞌatalh junima chivinti.
20 Na lhu ju israelitanin ju ixtanajun:
―Ju yuchi va pacxanta lhacaticuru.
Jantu acꞌatsananta.
Tajuch ni kꞌasmatniyatꞌit ju ixchivinti.
21 Ju aliꞌin ixtanajun:
―Junima chivinti jantu ixchivinti ju tam xamatiꞌ ju va pacxanta lhacaticuru.
Ju lhacaticuru ja lai camalacꞌavani ju tam alakꞌachꞌix.
Ju israelitanin jantu tuꞌuꞌ talhiula ju Jesús
22 Ju amachakꞌan Jerusalén ixtatꞌajun macꞌataninin ju ixpujitatꞌan.
Lacalhicꞌasnin ixjunita.
23 Ju Jesús ixꞌalhtanatꞌajun laꞌismakspaꞌ laꞌixpujitatꞌan ju istꞌaꞌisraelitanin junta juncan ixꞌanuꞌ ju Salomón.
24 Pus ju istꞌaꞌisraelitanin lana talacaxcꞌavitnu ju Jesús.
Chai tajunich:
―Tas vananch ju aquilamavasalaniyau ju stavasalanti.
Ni uxintꞌich ju Cristoꞌat pus vasch aquilajuniu.
25 Chai akꞌalhtayanalh ju Jesús.
Ajunich:
―Ni iclajumpalauch.
Ni va jantu lacꞌaꞌipꞌalatꞌit.
Ju tuchi icnavi laꞌixtapakaꞌut ju quimpai Dios yuchach ju capucꞌatsacanaꞌ tichi chavaich ju quitꞌin.
26 Para ju uxijnan jantu lacꞌaꞌiyatꞌit ni jantu quimborregojni untꞌatꞌit tachi ju iclajuntauch.
27 Ju lapanacni ju tachi quimborregojni tajunita quintakꞌasmatnich ju quinchivinti.
Chai icꞌamispaich.
Chai quintachꞌakꞌokꞌaich.
28 Quitꞌin ju icꞌaxtakni ju isꞌatsucuntiꞌan jonkꞌalhita.
Chai jantu tavanan catanikꞌalhiyaꞌ.
Nin xamatiꞌ lai caꞌamakꞌosu ju laquimacni.
29 Yuchi ju quimpai ju xaquiꞌaxtakni.
Chai yuchi ju palai xakꞌai tachi chun ju lapanacni.
Jantu lai xamatiꞌ catiꞌamakꞌosu ju laꞌixmacni ju quimpai.
30 Ju quitꞌin chai ju quimpai va lakatamch icjuntau.
31 Aktam tasacchokopa ju chiux ju istꞌaꞌisraelitanin.
Va ixtaputꞌalhputunch ju Jesús.
32 Pus ju Jesús ajunich:
―Na lhu lhamakꞌan ju xaclamalacasuniyau laꞌixmacni ju quimpai.
Tasmalhch ju quilalhilacatꞌalhmaputunau.
33 Taꞌakꞌalhtayanalh ju istꞌaꞌisraelitanin.
Tajunich:
―Jantu iclalacatꞌalhmaputunau ixlacata ju kꞌoxi lhichꞌalhcat ju navitꞌa.
Para va ixlacaꞌatalh ju macxcai chivinti ju naꞌun ni naꞌun ni Diosꞌat.
Para ni va lapanac umpꞌalatꞌa.
34 Akꞌalhtayanalh ju Jesús:
―Ja jantu pꞌastꞌacꞌatꞌit ni tsꞌokcanta ju lamilhamapꞌaksinꞌan ni ma chani naulh ju Dios:
“Icnaulh ni diosnin untꞌatꞌit ju uxijnan”.
35 Pus diosnin alhixakꞌalacalh ju yuꞌunch ju axtaknicalh ixlhichꞌalhcat ju Dios.
Chai ju tuchi tsꞌokcanta lacalhamapꞌaksin jantu lai catimapaxacalh.
36 Ja jantu vana va chun ju quitꞌin ni quisacxtutach ju quimpai Dios chai quimalakachachilh ju ani lacamunutpaꞌ.
Tajuch ni va quilajunau ni macxcai ju icchivinin acsni icnajun ni istsꞌalh Dios ju icjunita.
37 Pus ni jantu ixlhichꞌalhcat ju quimpai ju icnavi pus jantu aquilalacaꞌiniu.
38 Para ni icnavi ju ixlhichꞌalhcat ju Dios pus apꞌulacꞌaꞌitꞌitch ju icnavi mas jantu lai lacꞌaꞌiyatꞌit ju tuchi iclajunau.
Ju chunch lai amispꞌayaꞌitꞌitch ni va lakatam Dios icjuntau ju quimpai chai ju quitꞌin.
39 Aktam ixtachꞌapaputumpalai ju Jesús.
Para lana taxtulh ju yuchi junta ixtavilanalhch ju fariseonin.
40 Aktam anchokopa ju makꞌantacutni lacxcan Jordán junta pꞌulhnan ixꞌamakpaxanan ju Xivan.
Anchach ju tolhcha.
41 Na lhu lapanacni ju ixtalakminch ju Jesús chai chani ixtanajunch:
―Ju Xivan jantu tuꞌuꞌ lhamakꞌan navita.
Para tachi chun ju naulh ju Xivan ixlacata ju ani lapanac islivasalh.
42 Chai na lhu talhilacaꞌalh ju Jesús.