Ixꞌaninti ju Lázaro
11
Ju acsnich ixtakꞌankꞌai pumatam lapanac ju ixjuncan Lázaro.
Chai ju yuchi ixꞌalin ju ixꞌalakꞌavin.
Ju pumatam ixjuncan Malia.
Chai ju pumatam ixjuncan Marta.
Va lakputam ixtatꞌajun junta juncan Betania.
2 Ju Malia ispꞌisekꞌe ixjunita ju Lázaro ju anuꞌ ixtakꞌankꞌai.
Yuchach ju Malia ju lacamucꞌalh ju ixcꞌuchꞌu ju quiꞌucxtinꞌan Jesús.
Chai ju anuꞌ cꞌuchꞌu na saksi ixꞌacamin.
Chai ju Malia achꞌanxacꞌanalh laꞌixꞌai.
3 Pus ju anuꞌ atsiꞌin ju ixꞌalakꞌavin ixtajunita ju Lázaro tamalakacha ju ixlapanacniꞌan junta ixvilhcha ju Jesús.
Chai ju yuꞌunch tajunilh ju Jesús:
―Ucxtin ju lapanac ju na mapꞌaini na takꞌankꞌai.
4 Acsni kꞌasmatlh ju Jesús ju chunch pus ajunilh ju anuꞌ lapanacni:
―Jantiyuꞌ xalhixtaknican ju ani takꞌankꞌat ni va caniyaꞌ.
Yuchi xalhixtaknican ju ani takꞌankꞌat ni catanonaꞌ ju lapanacni ni na tachapun ju Dios.
Chunch ju acpumispacanaꞌ ni icxakꞌaich ju quitꞌin ju istsꞌalh Dios icjunita.
5 Ju Jesús na ixtꞌalamapaini ju Marta chaich ju ispꞌisekꞌe chaich ju Lázaro.
6 Para ju Jesús acsni kꞌasmatlh ni ixtakꞌankꞌai ju Lázaro pus titolhcha lakatꞌui vilhchan junta ixvilhcha.
7 Ju astan ajunilh ju ixꞌamamakaꞌui:
―Caꞌanchokoch ju xaꞌestado Judea.
8 Ju ixꞌamamakaꞌui tajunich:
―Amamakaꞌunuꞌ tucaꞌ makꞌan ixtalacatꞌalhmapu- tumpalachan ju quintꞌaꞌisraelitaninꞌan.
Chai ja va pꞌinchꞌokꞌopꞌutꞌunch ju anch.
9 Akꞌalhtayanalh ju Jesús:
―Ja jantu pacxanta lakacautꞌui hora ju tam avilhchan.
Pus ju caꞌalhtananaꞌ ju tuncu jantu tuꞌuꞌ pukꞌalhkꞌosa ni laktsꞌin ju xaꞌatuncunuꞌ ju ani lacamunutpaꞌ.
10 Para ju va tsꞌista laꞌixtacꞌatsan cakꞌalhkꞌosaꞌ ni matiꞌ ju atuncunuꞌ ju laꞌixꞌalhunut.
11 Acsni naulh ju ani pus astan ajunich:
―Ju quiꞌamigoꞌan Lázaro lhtataich.
Para acꞌanaꞌ macujunuꞌ ju laꞌilhtatat.
12 Ju acsnich ju ixꞌamamakaꞌui tanaulhch:
―Quiꞌucxtin ni va lhtatai pus palai cajunaꞌ.
13 Ju Jesús va ixꞌajumputunch ni nitach vasalh.
Para ju yuꞌunch va ixtalhimachakxai ni ca vasalh va lhtatai ju Lázaro.
14 Lana acsnich ju vas ajunilh ju Jesús ni nilhch ju Lázaro.
15 Chai ajunich:
―Na iclhikꞌachan ju milacataꞌan ni jantu anch xacvilhcha acsni tavanan xani ju Lázaro.
Ju chunch ni laich palai aquilapulhilaksiyau.
Para ju chavai caꞌauch laktsꞌinin.
16 Ju acsnich ju Tumax ju ixjuncan Cuate ajunich ju ixꞌalactꞌatamakaꞌui:
―Caꞌauch vachuꞌ ju quijnanꞌan ni laich kꞌaixtam catꞌanitachau ju Jesús.
Jesús ju lai amacxtui ju tanitach chai axtaknichokoi isꞌatsucuntiꞌan
17 Acsni chaꞌalh ju Jesús ju laꞌixchakaꞌ ju lijunto macꞌatsanicalh ni lakatꞌatꞌich avilhchan ixꞌacnui ju Lázaro.
18 Ju lakꞌachakꞌan Betania vanin ixtꞌalachꞌapata ju lakꞌachakꞌan Jerusalén.
Tachi lakatꞌutu kilómetro ixlhimakat.
19 Pus yuchi lai ixtalhilakminta ju Marta chaich ju Maliach na lhu ju istꞌaꞌisraelitanin.
Va ixtamatankꞌoxaxkꞌayai ni jantu na cataꞌamakꞌaninilh ju ixlacata ju lijunto ispꞌisekꞌeꞌan Lázaro.
20 Ju Marta acsni kꞌasmatlh ni vaninch minta ju Jesús pus alh pakxtoknuꞌ.
Para ju Malia tavilhcaꞌ lacachakaꞌ.
21 Pus ju Marta junich ju Jesús:
―Quiꞌucxtin ni cꞌaꞌixvilhtꞌi ju ani pus jantu ixtini ju quimpꞌisekꞌe.
22 Para iccꞌatsai mas chavai tachi chun ju asqꞌuiniyaꞌ ju Dios caxtakniyan.
―Najunch ju Marta.
23 Ju Jesús junich ju Marta ni kꞌalhtailh:
―Calokꞌonchokoyaꞌ ju mimpꞌisekꞌe.
24 Chai ju Marta junich ju Jesús:
―Iccꞌatsai ni calokꞌonchokoyaꞌ ju quimpꞌisekꞌe laꞌixꞌaclanti ju lacamunutpaꞌ acsni catalokꞌonchokoyaꞌ ju tanitach.
25 Chai ju Jesús junich:
―Quitꞌin ju icꞌamalokꞌonininchokoi.
Chai quitꞌinch ju icxtꞌakꞌa ju atsucunti jonkꞌalhita.
Ju quilhilacaꞌanch mas caniyaꞌ ju ixlacatuna para catsucuyanta ju ixtacuvin ju lactꞌiyan.
26 Chai tachi chun ju alin isꞌatsucuntiꞌan ju jonkꞌalhita va ixlacaꞌatalh ni quintalhilacaꞌanch pus catatsucukꞌalhiyanta ju lactꞌiyan.
Ja lacꞌaꞌi ju ani.
27 Ju Marta junich:
―Chunch ji quiꞌucxtin.
Iclacaꞌich ni uxintꞌi ju Cristoꞌat.
Istsꞌalhꞌat Dios ju noncanch ni caminaꞌ ju ani lacamunutpaꞌ.
Ju Jesús kꞌalhun junta ixꞌacnui ju Lázaro
28 Acsni naulh ju chunch ju Marta pus lana anchokolh laꞌixchakaꞌ.
Chai lana va sek tꞌasanilh ju ispꞌisekꞌe ju Malia ixjuncan.
Junich:
―Ju amamakaꞌunuꞌ anuꞌ yacha chai tꞌasaniyanch.
29 Chai ju Malia acsni kꞌasmatlh ju anuꞌ chivinti pus lana vatsꞌalhti taya.
Lakꞌalh junta ixvilhcha ju Jesús.
30 Pus tucaꞌ ixchaꞌan ju Jesús ju lakꞌachakꞌan Betania.
Va anchcaꞌ ixvi junta tꞌalapakxtoklh ju Marta.
31 Pus ju Malia vatsꞌalhti taya junta ixvi chai taxtulh.
Pus ju ixtavilanalh laꞌixchakaꞌ ju Malia acsni talaktsꞌilh ni taxtulh pus tachꞌakꞌokꞌalh.
Talaclajunich:
―Ca anch ju xaꞌan kꞌalhutolhnaꞌ junta makꞌacanta ju ixlacatuna ju lijunto ispꞌisekꞌe.
32 Ju Malia acsni chaꞌalh junta ixvi ju Jesús pus lana taꞌaktsokotalh vanin junta ixya.
Junich:
―Quiꞌucxtin ni cꞌaꞌixvilhtꞌi ju ani pus jantu ixtini ju quimpꞌisekꞌe.
33 Ju Jesús acsni laktsꞌilh ju Malia ni na ixkꞌalhunch chaich ju istꞌaꞌisraelitanin ju ixꞌalactꞌamintach kꞌaixtam ni vachuꞌ ixtalackꞌalhun pus xcanilhch ju ixꞌalhunut ju Jesús.
Amakꞌaninilh.
34 Ajunich ju Malia chai Marta:
―Tas anchach ju makꞌatꞌatꞌit ju ixlacatuna ju lijunto Lázaro.
Tanajunch ju Malia chai ju Marta:
―Asokꞌoch ji quiꞌucxtin.
Alaktsꞌintꞌachich.
―Alaktsꞌintꞌitch.
Slivasalh na ixtꞌalamapaini ju Lázaro.
37 Para ju aliꞌin tanaulh:
―Ju ani lapanac lai malacꞌavani ju alakꞌachꞌix.
Tajuch ni jantu lai xacꞌuchꞌupalai ni jantu cꞌaꞌixnilh ju Lázaro.
Taꞌacxtuchokolh ju Lázaro junta ixmacnucanta
38 Ju Jesús aktam xcanichokopa ju ixꞌalhunut.
Alh junta ixmakꞌacanta ju ixlacatuna ju lijunto Lázaro.
Anch junta pulhucucu talhpa ixjunita.
Chai ixyonicanta lhtꞌakꞌalh chiux ju laxamalhtich.
39 Ajunich ju Jesús ju lapanacni:
―Amakꞌosutꞌit ju chiux.
Para ju Marta ju ixlakꞌauch ju lijunto naulhch:
―Quiꞌucxtin para na ca acaminch ju chavai ni lakatꞌatꞌich avilhchan ju xatamai ju ani.
40 Ju Jesús junich:
―Ja jantu icjunan ni chavai ju alaktsꞌinaꞌ ju ixtachaput ju Dios ni vasalh alacꞌaꞌitꞌi.
41 Ju acsnich tamakꞌosulhch ju chiux.
Chai ju Jesús talakstꞌalh ju lactꞌiyan.
Naulh:
―Quimpai icxtakniyan lhakꞌailaktsꞌin ni quinkꞌasmatnitach ju tuchi xacsqꞌuiniyan.
42 Ju quitꞌin iccꞌatsai ni aktsꞌiya quinkꞌasmatnich.
Para va ixlacaꞌatalhꞌan ju ixtalhavat lapanacni ju ani tavilanalh icsqꞌuiniyanch chunch ni laich catalacaꞌiyaꞌ ni uxintꞌi ju qꞌuimacꞌatꞌantꞌa ju ani lacamunutpaꞌ.
43 Acsni nonkꞌo junima chivinti ju Jesús pus lana pꞌas chivinilh acsni junilh ju lijunto Lázaro:
―Lázaro atꞌaxtꞌuch makspaꞌ.
44 Pus ju Lázaro taxtulh junta ixmacnucanta.
Ixchꞌanchꞌicantacaꞌ chai ixmakchꞌicantacaꞌ lacapumpuꞌ acsni taxtulh.
Chai ju ixꞌucxpuꞌ ixlacapachꞌicantacaꞌ lacapayu.
Ajunich ju Jesús ju lapanacni:
―Alacxkꞌotnitꞌitch junta lacchꞌinicanta.
Chach ancha laꞌixchakaꞌ.
Lhilacchivinincalh ni camaknicanach ju Jesús
45 Ju acsnich na lhu ju istꞌaꞌisraelitanin ju ixtalakminta ju Malia talhilacaꞌalh ju Jesús ni talaktsꞌilh tuchi navilhch ju yuchi.
46 Para ju aliꞌin taꞌalh laktsꞌinin ju fariseonin.
Taꞌalh juninin tuchi navilhch ju Jesús.
47 Ju acsnich ju xalackꞌajin palijni chaich ju fariseonin tamakꞌaixtoklh ju ixtꞌaxalackꞌajin.
Ixtalajunich:
―Tas calayauch ju chavai.
Ju ani lapanac na lhu lhamakꞌan ju malacasui.
48 Ni va calhilakꞌaꞌiyau pus chux ju quintꞌaꞌisraelitaninꞌan catalhilacaꞌankꞌoyach ni ixꞌucxtinꞌan junita.
Chai cataminach ju romanonin ju talhinajun ju ani lacatꞌun chai catalakꞌalhiyaꞌ ju quimpujitatꞌan chai aquintamaknikꞌoyan.
49 Para pumatam lhiyuꞌunch ixjuncan Caifás.
Ju yuchi xakꞌai pali ixjunita ju anuꞌ cꞌata.
Ju yuchi ajunich ju ixtꞌaxalackꞌajin:
―Ju uxijnan jantu tuꞌuꞌ mispꞌayatꞌit.
50 Jantu machꞌakxayatꞌit ni palai kꞌox ju quilacataꞌan ni canilh pumatam lapanac.
Jantu camaknikꞌocau ju quijnanꞌan ju israelitanin juntau.
51 Ju Caifás jantu va laꞌisꞌakstu pastaclh ju ani chivinti.
Para ni xakꞌai pali ixjunita ju anuch cꞌata pus yuchi lhinaulh ni caniyaꞌ ju Jesús ixꞌokxtapalhni ju istꞌaꞌisraelitanin.
52 Chai jantu va yuchi ni canilh ixꞌokxtapalhni ju istꞌaꞌisraelitanin.
Para vachuꞌ laꞌixꞌaninti va lakatam ixꞌanavikꞌoputun ju isꞌaskꞌatꞌan Dios ju tatꞌajun ixlhilacaputsꞌun ju lacamunutpaꞌ.
53 Pus tus acsnich avilhchan ju tapastaclh ta yu laich catapumakniyaꞌ ju Jesús.
54 Ixlhiyuchach ju Jesús jantu ixꞌalhtanamputun laꞌixꞌucxlacapuꞌan ju istꞌaꞌisraelitanin.
Va alh laxalacatꞌun junta vanin ixtꞌalachꞌapata ju anuꞌ xalacatꞌun junta matiꞌ tuꞌuꞌ ixjunita.
Alh ju lakꞌachakꞌan ju ixjuncan Efraín.
Anch ju alactꞌatolhcha ju ixꞌamamakaꞌui.
55 Ju ixcꞌatanꞌan ju israelitanin vanin ixjunita.
Ju cꞌatan ju ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin.
Pus acsni tucaꞌ ixchin ju anuꞌ cꞌatan pus na lhu lapanacni ixtachaꞌanta ju lakꞌachakꞌan Jerusalén.
Ixtataxtutacha laꞌixtꞌunꞌan.
Va ixtaꞌan navinin tachi ju ixnajunch laꞌixlhamapꞌaksin ju Moisés ni laich cataꞌulh ju ixborregoꞌan.
56 Chai ixtapuxcajuich ju Jesús.
Chai ixtalajunich ju sia yuꞌunch acsni ixtayanalh lacakꞌai ixpujitatꞌan:
―Tꞌas nonatꞌit ju uxijnan.
Ja caminaꞌ nuꞌ ju chavai cꞌatan ju anuch ju juncan Cristo u jantu.
57 Ju xalackꞌajin palijni chaich ju fariseonin ixtaxtaktach ju lhamapꞌaksin ni tam xamatiꞌ cacꞌatsayaꞌ ta anchach ju catsucucha ju anuch Jesús pus lana canonach.
Ju chunch laich cataꞌanaꞌ chꞌapanin.