Ju Jesús lacamucꞌacalh ju cꞌuchꞌu ju na cꞌus ixꞌacamin
12
Acsni chinchokocha ju Jesús ju lakꞌachakꞌan Betania pus lakachaxancaꞌ avilhchan ixticꞌacxacaꞌ acsni cajunach ju anuꞌ cꞌatan ju lakꞌachakꞌan Jerusalén.
Ju Betania ixlakꞌachakꞌan ixjunita ju anuꞌ Lázaro ju ixnita chai ixlokꞌonchokota laꞌixtachaput ju Jesús.
2 Anch ju tanavinilh lakatam lacvaiti ju Jesús.
Chai ju Marta ixtꞌakꞌa vaiti.
Chai ju Lázaro ixmaktapakstitama junta ixtaꞌakstitamanalh ju Jesús junta ixtatꞌajun venin ni chunchach ixtalhilanita.
3 Ju acsnich ju Malia chꞌapalh paitat kilo ju na saksi cꞌuchꞌu ju va achꞌitin ixnavicanta chai na laklhu ixtapalh ixjunita.
Chai ju yuchi chꞌanmucꞌalh laꞌixchꞌanchꞌajaꞌ ju Jesús chai lhichꞌanxaca laꞌixꞌai.
Pus ju chakaꞌ na cꞌus pulacꞌacamilh ju lacacꞌuchꞌu.
4 Para pumatam ixtamamakaꞌun ju Jesús jantu kꞌox lhiula.
Ju yuchi Judas Iscariote ixjuncan.
Istsꞌalh Simón.
Yuchi ju anuꞌ camakꞌaxtꞌakꞌaꞌ ju Jesús.
Pus ju yuchi naulh:
5 ―Tajuch ni jantu lakatꞌutu cientos xalhistꞌai ju ixcꞌuchꞌu chai caꞌixꞌaxtaknilh ju quilhpatinin.
6 Mas chunch ju naulich para jantu slivasalh ni va camapaini ju quilhpatinin.
Alai punaulh ni va akꞌalhonaꞌ ixjunita.
Chai yuchi ju ixmakꞌatach ju ixtumin ju Jesús chaich ixtuminꞌan ju ixꞌatꞌamamakaꞌuich.
Chai anch ju ixkꞌalhomacutuich ju tumin.
7 Ju acsnich ju Jesús junich:
―Amacꞌauch.
Ju yuchi ixmakꞌata ju ani cꞌuchꞌu.
Chai ju chavai quixtꞌekꞌemucꞌanilh ni camakꞌacanaꞌ ju quilacatuna.
Chunch ju xanavich tachi ju lhilanitauch ni nican.
8 Ju quilhpatinin aktsꞌiya catatꞌaꞌalhtananan.
Para ju quitꞌin jantu lai actilatꞌaꞌalhtanankꞌalhiu.
Acsni lhilacchivinincalh ixlacata ju Lázaro
9 Na lhu ju israelitanin tacꞌatsa ni anch ixvi ju Jesús laꞌixchakaꞌ ju Malia.
Para jantu va yuchi ixtalhiminta ni va caꞌixtalaktsꞌimputulh ju Jesús.
Para vachuꞌ ixtalaktsꞌimputunch ju Lázaro ju ixlokꞌonchokotach laꞌixtachaput ju Cristo acsni ixnita.
10 Ju xalackꞌajin palijni ixtalajunich ju sia yuꞌunch ni camaknicanach vachuꞌ ju Lázaro.
11 Pus va ixlacaꞌatalh ni malokꞌonichokocalh ju Lázaro na lhu ju israelitanin tapumacaulh ju ixpalijniꞌan chai talhilacaꞌalh ju Jesús.
Yuchi ixtalhipastꞌacꞌach ni camaknicalh ju Lázaro.
Ju Jesús tanucha ju lakꞌachakꞌan Jerusalén
12 Acsni tuncunchokopa ju ixtalhavat lapanacni ju ixtachinta junta ixlai ju anuꞌ cꞌatan takꞌasmatlh ni mintach ju Jesús ju lakꞌachakꞌan Jerusalén.
13 Pus tachakxꞌilh ju ixꞌaxtacnaꞌan chai tachꞌapalhch chai taꞌalh pakxtoknin ju Jesús.
Ixtanajunch:
―Calakꞌayacalh ju Dios.
Paxcat ju ixꞌucxtinꞌan ju israelitanin ju minta laꞌixtapakaꞌut ju Dios.
14 Ju Jesús lhitaju lakatam puru chai putocꞌalh.
Tachi ju tsꞌokcanta junta najun:
15 Jantu atꞌalhan ji amachakꞌan Jerusalén.
Anich minta ju miꞌucxtinꞌan.
Pujucalh ju puru.
16 Ju acsni jantu tamachakxa ju ani taxtokni ju ixꞌamamakaꞌui ju Jesús.
Para acsni anchokolh lactꞌiyan ju Jesús acsnicaꞌ ju tapastaclh ju ani taxtokni ni chunchach istsꞌokcanta ixlacata yuchi chai ni chunchach ju tamuctaxtulh ju lapanacni.
17 Tachi chun ju lapanacni ju ixtalaktsꞌinch ju Jesús acsni malokꞌonichokolh ju Lázaro acsni junilh ni cataxtulh junta ixmacnucanta pus yuꞌunch ju ixtanajunch ni vasalh chunch ju navilh ju Jesús.
18 Ju lapanacni ni ixtakꞌasmatꞌach tuchi lhamakꞌan ixnavita pus yuchi taquilhipakxtoklh ju Jesús.
19 Pus ju fariseonin ixtalaclajunich ju sia yuꞌunch:
―Alaktsꞌintꞌit.
Ju quijnanꞌan jantu quiclacaꞌicanau.
Chux ju lapanacni catachꞌakꞌokꞌayach ju anuꞌ lapanac ju Jesús juncan.
Ju lapanacni ju ixꞌajuncan griegonin ixtalaktsꞌimputun ju Jesús
20 Vachu na lhu ixtamakꞌanta ju griegonin junta ixtaꞌanta ju israelitanin ju ixtamaknajun ni Cristo yuchi ju xakꞌai.
Chunch ixtanajun junta lai cꞌatan.
21 Ju yuꞌunch talakꞌalh ju Pilipe ju amachakaꞌ Betsaida lhiGalilea.
Tatapaininilh.
Tajunich:
―Quiꞌamigo.
Iclaktsꞌimputunau ju Jesús.
22 Pus ju Pilipe alhch juniniꞌ ju Tilix.
Chai ju Tilix tꞌaꞌalhch ju Pilipe.
Taꞌalhch juninin ju Jesús.
23 Ju acsnich ju Jesús alackꞌalhtailh.
Ajunich:
―Vaninch chinch ju avilhchan acsni catacꞌatsayach ju lapanacni ni icxakꞌai.
Quitꞌinch ju quimalakachatachilh ju Dios ni lapanac actsucuyaꞌ ju ani.
24 Slivasalh ju iclajunau.
Ju satalhtsꞌi trigo ni jantu capuchꞌilh ju ixꞌaxtꞌakꞌa junta chꞌancanta lacatꞌun pus jantu lai tuꞌuꞌ catixtaklh ju xalhiꞌut.
Para ni capuchꞌiyaꞌ pus capꞌunaꞌ chai caxajtachilh chai na lhu caxtꞌakꞌaꞌ ju xalhiꞌut.
Pus tachi ju tapasai lasatalhtsꞌi trigo pus chunchach vachuꞌ ju catapasayaꞌ ju laquiꞌatsucuntiꞌan.
25 Ju na mapaini isꞌatsucunti ju ani lacamunutpaꞌ catsꞌankꞌayanta ju saꞌatsucunti ju lactꞌiyan.
Para ju jantu tuꞌuꞌ lhiulai ju isꞌatsucunti ju ani lacamunutpaꞌ pus pulhajai ju isꞌatsucunti jonkꞌalhita lactꞌiyan.
26 Ni xamatiꞌ quinchꞌalhcatnaniputun pus aquinchꞌakꞌokꞌalh.
Chai vanta anchach ju actsucuyaꞌ ju quitꞌin pus anchach vachuꞌ catsucuyaꞌ ju quilapanac.
Ni xamatiꞌ quinchꞌalhcatnaniputun pus camispacanaꞌ ni xakꞌai laꞌixmacni ju quimpai.
Ju Jesús alacjuni ni caniyaꞌ
Ju Jesús tailhiꞌalh ju ixchivinti chai chani naulh:
27 ―Ju chavai quixcani ju quiꞌalhunut.
Tijuch ju acnonaꞌ.
Ja acnonach:
“Quimpai aquimakꞌalhtꞌaxtꞌuch ju anuꞌ minta pantsꞌiquis”.
Jantu lai actinaulh ju chunch ni yuchi iclhitsucuta ju ani lacamunutpaꞌ.
28 Alai acnonaꞌ:
“Quimpai chach tacꞌatsa ju lapanacni ni xakꞌaichꞌat”.
Chai acsni naulh ju chunch ju Jesús pus lana mincha lakatam chivinti ju lactꞌiyan ju naulh:
―Tacꞌatsalh ju lapanacni ni icxakꞌai chai aktam camasunichokocanaꞌ.
29 Ju anuꞌ lapanacni ju vanin ixtayanalh takꞌasmatlich ju anuꞌ chivinti.
Chai ixtanajunch ni va tꞌasalh tꞌajin.
Chai ju aliꞌinch ixtanajunch ni anquilh ju xaxakꞌalai.
30 Akꞌalhtayanalh ju Jesús.
Ajunich:
―Jantu quilacata ju xalhimin junima chivinti.
Para milacataꞌan.
31 Ju chavai amucꞌanicalhch ixtalakꞌalhinꞌan ju lapanacni.
Chai ju xaꞌucxtin ju aꞌokxchokꞌoi chux ju lacamunutpaꞌ jantuch lai catilhinonkꞌo.
32 Ju quitꞌin ni acxtucmucꞌacanaꞌ ju lacacurus pus acꞌatꞌasanikꞌoyach ju laquimacni tachi chun ju lapanacni.
33 Ju punaulich ju chunch ju Jesús va ixꞌamamachakxaninimputunch ta yu capuniyach.
34 Taꞌakꞌalhtayanalh ju ixtalhavat lapanacni:
―Ju quijnan ickꞌasmatꞌauch ni najun ju lacalhamapꞌaksin ni catsucukꞌalhiyaꞌ ju Cristo ju noncan camalakachatachilh ju Dios.
Para ju uxintꞌi naꞌun ni tasqꞌuini ni caxtucmucꞌacalh lacacurus ju malakachatachilh ju Dios ni lapanac catsucuyaꞌ ju ani.
Tis chavaich ju ani ju malakachatachilh ju Dios ni lapanac catsucuyaꞌ ju ani.
Ja yuchi ju Cristo juncan.
35 Ju acsnich ju Jesús ajunich:
―Pus va pantsꞌiquisch ju tiꞌalin ju atuncunuꞌ ju lamilhiꞌuxijnan.
Alacꞌasqꞌuintꞌit ni chach tamapulhcunin ju lamiꞌalhunutꞌan ni alincaꞌ ju tachi atuncunuꞌ lamilhiꞌuxijnan.
Ni jantu lakꞌaꞌiyatꞌit pus jantu xcai ni catakꞌalhi ju miꞌatsucuntiꞌan.
Chunch aꞌunaꞌitꞌit tachi tam xamatiꞌ ju alhtanan lacaꞌatatsꞌisni.
Ju yuchi jantu cꞌatsai taꞌanchach ju puꞌan.
36 Ju quitꞌin tachi ju atuncunuꞌ icjunita.
Pus ni ictilatꞌavilau pus tus chavai aquilalhilacaꞌau.
Ju chunch atsꞌucꞌuyaꞌitꞌit tachi ju lapanacni ju tatꞌajun laquiꞌatuncunuꞌ.
Ju ani chivinti acsni naulh ju Jesús pus lana alh.
Alackꞌosmakꞌalh ju lapanacni.
Ju israelitanin jantu tavanan talacaꞌi ju ixchivinti Cristo
37 Ju Jesús mas navilhch ju laꞌixꞌucxlacapuꞌan ju lapanacni na lhu lhamakꞌan nin chunch jantu ixtalhilacaꞌan.
38 Ni chunchach talalh pus uctaxtulh ju ixchivinti ju makꞌaniya lapanac ju Isaías ixjuncan.
Ju yuchi ixnajun ixchivinti Dios chai chani ju junilh ju Dios:
Tis chavaich ji quiꞌucxtin ju lacaꞌita ju quinchivintiꞌan.
Tis chavaich ju ismasunicanta ni na tachapunꞌat ji quiꞌucxtin Dios.
39 Chunch ju naulh ju Isaías.
Chai ni jantu lai ixtalacaꞌi pus uctaxtulh ixchivinti ju Isaías junta chani nonchokoi lacaꞌalacatam atsꞌoknut:
40 Dios ju anavilh ni alakꞌachꞌixnin catava laꞌixtacꞌatsanꞌan ju lapanacni.
Chai na pꞌas anavinilh ixꞌalhunutꞌan.
Ju chunch jantuch lai catapamachakxananaꞌ ju ixtacꞌatsanꞌan.
Chai jantu lai catalacaꞌiyaꞌ tuꞌuꞌ laꞌixꞌalhunutꞌan.
Chai jantu lai tam catapastꞌacꞌaꞌ laꞌixꞌalhunutꞌan ni laich tam acꞌanavinilh ixꞌalhunutꞌan.
41 Yuchach ju ani ju naulh ju Isaías acsni masunilh ju Dios ni yuchach ju Dios ju xakꞌai tucan.
Chai chunch ju lhichivinilh.
42 Aktsꞌiya na lhu ju xalackꞌajin talhilacaꞌalh ju Jesús.
Para va ixlacaꞌatalhꞌan ju fariseonin jantu ixtapunomputun ju anuch xalackꞌajin ni ixtalhilacaꞌanta ju Jesús.
Va ixtanajunch ni jantu caꞌaxcoxtucalh laꞌixpujitatꞌan ju istꞌaꞌisraelitanin ni jantu xamatiꞌ cacꞌatsa ni talhilacaꞌanta ju Jesús.
43 Chunch ju talalh ni va palai kꞌox ixtalhiulai ni catanaulhch ju ixtꞌalapanacni ni xalackꞌajin tajunita.
Palai jantu tuꞌuꞌ talhiula ni Dios ju canaulh ni xalackꞌajinch catava.
Ju laꞌixchivinti Jesús caputasuyach ju ixtalakꞌalhinꞌan ju lapanacni
44 Ju Jesús pꞌas naulh:
―Ju quilhilacaꞌantach jantu va quitꞌin ju quilhilacaꞌanta.
Para vachuꞌ yuchi ju lhilacaꞌan ju quimacaminta.
45 Chai va tichi chavaich ju quilaktsꞌin pus tachi ju va laktsꞌin ju quimacaminta.
46 Ju quitꞌin icminta ju ani lacamunutpaꞌ tachi ju tuꞌuꞌ maclhcu ni laich acꞌamalacpucujuyaꞌ ju lapanacni.
Ju chunch tachi chun ju quintalhilacaꞌanch quitꞌin jantu va tachi tsꞌista cajunaꞌ ju laꞌixtacꞌatsanꞌan.
47 Ju cakꞌasmatꞌaꞌ ju quinchivinti para ni jantu tuꞌuꞌ calhiulayaꞌ pus jantu quitꞌin ju icꞌulani ixtalakꞌalhin.
Jantiyuꞌ iclhiminta ju quitꞌin ni va acꞌaꞌulanilh ixtalakꞌalhinꞌan ju lapanacni.
Va icminta amakꞌalhtaxtunuꞌ ju lapanacni.
48 Alin tuchi ixtalakxtuch ju ulani ixtalakꞌalhin ju jantu tuꞌuꞌ quilhiulai chai ju jantu lacaꞌi ju quinchivinti.
Ju chivinti ju icnajunta anch ju caputasuyach ixtalakꞌalhinꞌan acsni cachinaꞌ ju avilhchan ju ixꞌaclanti lacamunutpaꞌ.
49 Chai jantu va quiꞌakstu ju icchivinin.
Para yuchi ju icnajun tuchi quijuni ju quimpai ju quimacaminta.
Chai yuchi ju quimavasalanilh ta yu laich acnonaꞌ.
50 Chai iccꞌatsaich ni alin ju atsucunti jonkꞌalhita acsni muctaxtucan ju laꞌixlhamapꞌaksin ju quimpai Dios.
Pus yuchi ju icnajunch tachi ju quijunitach ju quimpai Dios.