Ju Jesús achꞌanchꞌakꞌa ju ixꞌamamakaꞌui
13
Tucaꞌ cꞌatan ixjun.
Ju anuꞌ cꞌatan acsni ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin.
Pus ju Jesús cꞌatsalh ni chintach ju ixꞌavilhchan ni camaconach ju ani lacamunutpaꞌ.
Canach lactꞌiyan junta vi ju ixpai.
Pus ju yuchi aktsꞌiya ixꞌamapainich ju ixlapanacni acsni ixꞌalactꞌavi ju ani lacamunutpaꞌ.
Para ju chavai ni caꞌanach pus amasunilh ni vasalh na amapaini.
2 Acsni tapakstitama ju lacamixa pus ju lhacaticuru ixlhitanunch laꞌixꞌalhunut ju Judas Iscariote ju istsꞌalh Simón.
Yuchach ju mapastꞌacꞌani ni laich camakꞌaxtaklh ju Jesús.
3 Ju Jesús aktsꞌiya iscꞌatsaich ni ixtaknikꞌojutach ju ixpai tachi chun ju taxtokni laꞌixmacaꞌ.
Chai iscꞌatsaich ni laꞌixmacni Dios ju taxtutacha chai laꞌixmacni Dios ju caꞌanchokoyaꞌ.
4 Pus acsni tavenkꞌolh pus ju Jesús taya lacamixa.
Chai maxtulh lakatam ixpumpuꞌ.
Chꞌapalh alakatam pumpuꞌ chai musatocꞌalh.
5 Ju acsnich ju yuchi mujulh ju xcan lacakꞌax chai tsuculh alakchꞌakꞌaniniꞌ ixchꞌajaꞌan ju ixꞌamamakaꞌui.
Chai ixꞌachꞌanxacaich lacapumpuꞌ ju ismusajucꞌalh.
6 Para acsni lakꞌalh ju Simón Pitaluꞌ pus ju yuchi junich:
―Quiꞌucxtin ja aqꞌuinchꞌakꞌaniyaꞌiꞌan vachuꞌ ju laquinchꞌajaꞌ ju quitꞌin.
7 Chai ju Jesús junich:
―Ju tuchi icnavi ju uxintꞌi jantu machꞌakxai ju chavai.
Para amachꞌakxayaꞌ astan.
8 Pus ju Pitaluꞌ juni:
―Jantu tavanan aqꞌuintꞌichꞌanchꞌakꞌatꞌi.
Chai ju Jesús junich:
―Ni jantu acchꞌanchꞌakꞌayan pus jantu quilakꞌauꞌat.
9 Chai junich ju Simón Pitaluꞌ ju Jesús:
―Quiꞌucxtin pus jantu va yuchi ju quinchꞌajaꞌ ju aqꞌuinchꞌakꞌanin.
Para vachuꞌ ju quimacaꞌ chaich ju quiꞌaktsulhch.
10 Chai junich ju Jesús:
―Ni lhiyaxch ju xapꞌax pus jantu tasqꞌuini ni acchꞌakꞌanikꞌojun ju milacatuna.
Va minchꞌajaꞌ ju acchꞌakꞌaniyan.
Ju aliꞌ milacatuna chꞌakꞌakꞌocantach.
Chai ju uxijnan chꞌakꞌanicꞌantꞌatꞌitch ju lamiꞌalhunutꞌan vachuꞌ.
Para jantu minchuxꞌan.
11 Ju Jesús iscꞌatsaich tichi chavaich ju camakꞌaxtꞌakꞌaꞌ.
Yuchi lhinaulh ni jantu si achꞌakꞌanikꞌocanta ju ixꞌalhunutꞌan.
12 Ju astan acsni achꞌanchꞌakꞌakꞌolhch pus lakchꞌichokolh ju ixpumpuꞌ.
Tapakstitamachokolh ju lacamixa.
Ajunich ju ixꞌamamakaꞌui:
―Ja machꞌakxayatꞌit ju tuchi xaclanaviniyau.
13 Ju uxijnan acsni quilalhichivinau nonatꞌit ni icꞌamamakaꞌunuꞌ chai icꞌucxtin.
Vas nonatꞌit ni chunch icjunita ju quitꞌin.
14 Pus ju quitꞌin ni miꞌucxtinꞌan chai miꞌamamakaꞌunuꞌan icjunita ni iclachꞌakꞌaniuch ju minchꞌajaꞌan pus tasqꞌuini ni alachꞌanchꞌakꞌayaꞌitꞌitch vachuꞌ ju milhiꞌuxijnan.
15 Iclaxtakniuch ju lhilaktsꞌintaiti.
Ju uxijnan vachuꞌ chunch anaviyaꞌitꞌit tachi ju xaclanaviyauch.
16 Slivasalh ju iclajunau.
Ju va xalapanac jantiyuꞌ ju xakꞌai.
Yuchi ju xakꞌai ju xaꞌucxtin.
Nin yuchi ju va malakachacanta jantiyuꞌ ju xakꞌai.
Yuchi ju xakꞌai ju amalakachanan.
Pus chunch ju quilatꞌajuntau ju uxijnan.
17 Ni mispꞌayatꞌit ju ani taxtokni lhikꞌach ju atsꞌucꞌuyaꞌitꞌit acsni anaviyaꞌitꞌit ju chunch.
18 Jantu iclhichivinin ju milhichuxꞌan.
Iccꞌatsai tichi chavaich ju icsacxtutach.
Para chunchach ju capuꞌuctaxtuyach ju atsꞌoknut junta chani najun:
“Ju kꞌaixtam xaquintꞌavajin va quintꞌalaxcai xajun”.
19 Chavai ju iclajunau ni tucaꞌ tapasai ju anuꞌ lhamakꞌan ju iclajuntau.
Ju chunch acsni caꞌuctaxtuyach alacꞌaꞌiyaꞌitꞌit ni chunch icjunita tachi ju iclajuntauch.
20 Slivasalh ju iclajunau.
Ju amaklhtayanan ju icmalakachatachilhch pus tachi ju va jun quitꞌin ju quiꞌamaklhtayanan.
Chai ju quiꞌamaklhtayanan pus tachi ju va jun amaklhtayanan ju quimacaminta.
Ju Jesús naulh ni camakꞌaxtaknanaꞌ ju Judas
21 Acsni naulh ju Jesús ju chunch lana amakꞌaninilh laꞌixꞌalhunut.
Chai naulich:
―Slivasalh ju iclajunau.
Pumatam milhiꞌuxijnan ju aquimakꞌaxtꞌakꞌaꞌ.
22 Ju acsnich ju ixꞌamamakaꞌui va kꞌantam kꞌantam talalaktsꞌilh.
Jantu ixtacꞌatsai tichi chavaich ju ixlhichivincan.
23 Pus vanin ixtꞌatapakstitama ju Jesús pumatam ixtamamakaꞌun ju na ixmapaini.
24 Pus ju Simón Pitaluꞌ tamacyonilh ju yuchi ni casacmilh tichi chavaich ju lhichivincan.
25 Pus ju yuchi vanin cꞌatuꞌanilh ju Jesús.
Chai junilh:
―Quiꞌucxtin tis chavaich ju camakꞌaxtꞌakꞌan.
26 Ju Jesús akꞌalhtayanalh:
―Yuchach ju anuꞌ ju acmatajuniyaꞌ ju ixniꞌ laxaxcan quivaiti chai acxtakniyach.
Chai acsni matajunilh pus xtaknicalh ju Judas Iscariote.
Istsꞌalh ixjunita ju Simón.
27 Pus ju Judas acsni amaklhtayanalh ju vati aktsꞌiya ixlhipastactach laꞌixꞌalhunut tuchi ixnaviputunch.
Pus ju acsnich pantsꞌiquis lana tanulh ju lhacaticuru laꞌixꞌalhunut ju Judas.
Chai ju Jesús junich:
―Ju tuchꞌi navipꞌutꞌun vatsꞌalhch anavitꞌi.
28 Para tachi chun ju aliꞌin ju ixtapakstitamai lacamixa jantu xamatiꞌ xamachakxai tajuch ni va chunch xajuncan ju Judas.
29 Ju Judas ni ixmamakꞌanicanta ju tumin pus ju aliꞌin va tamachakxa tachi ju va cajunilh ju Jesús:
“Atꞌamochich ju tuchi camaktasqꞌuiniyau ixlacata ju cꞌatan”.
U tachi ju va cajunilhch:
“Axtꞌakninch lacatsꞌunin ju quilhpatinin”.
30 Acsni amaklhtayanalh ju vati ju Judas ju xtaknilh ju Jesús pus lana taxtulh.
Chai na istsꞌistach.
Ju Jesús xtaklh ju sastꞌi lhamapꞌaksin
31 Acsni taxtulh ju yuchi pus najunch ju Jesús:
―Ju chavai chinta ju avilhchan acsni aclakꞌayacanaꞌ.
Quitꞌin ju quimalakachatachilh ju Dios ni lapanac actsucuyaꞌ ju ani.
Chai vachuꞌ calakꞌayacanaꞌ ju Dios ju quilacata quitꞌin.
32 Chai ni catacꞌatsayaꞌ ju lapanacni ni yuchi ju xakꞌai ju Dios ju va quilacata pus ju Dios camacꞌatsaniyaꞌ ju lapanacni ni icxakꞌai vachuꞌ.
Chai vatsꞌalhti canaviyaꞌ chunch.
33 Quiꞌaskꞌatꞌan va pantsꞌiquis ju iclatꞌavilau ju uxijnan.
Aquilapuxcoyauch.
Chai tachi ju icꞌajunilh ju quintꞌaꞌisraelitaninꞌan pus vachuꞌ chunch iclajunau ju uxijnan.
Junta acꞌanaꞌ ju uxijnan jantu lai atꞌipꞌitꞌit.
34 Lakatam sastꞌi lhamapꞌaksin ju iclaxtakniyau.
Yuchi ni alamapꞌainitꞌit ju milhiꞌuxijnanꞌan.
Tachi ju iclamapainiyauch pus vachuꞌ chunch alamapꞌainitꞌit ju milhiꞌuxijnanꞌan.
35 Ju chunch tachi chun ju lapanacni catapucꞌatsayaꞌ ni quiꞌamamakaꞌunti untꞌatꞌit ni alamapꞌainitꞌitch ju milhiꞌuxijnanꞌan.
Ju Jesús naulh ni canonaꞌ ju Pitaluꞌ ni jantu mispai
36 Ju Simón Pitaluꞌ junich:
―Quiꞌucxtin ta anchach ju apꞌinaꞌ.
Akꞌalhtayanalh ju Jesús:
―Junta acꞌanaꞌ ju quitꞌin jantu lai aqꞌuintꞌichꞌakꞌokꞌa ju chavai.
Para astan aqꞌuinchꞌakꞌokꞌayaꞌ.
37 Ju Pitaluꞌ junich:
―Quiꞌucxtin tajuch ni jantu lai actichꞌakꞌokꞌan ju chavai.
Acxtꞌakꞌach ju quiꞌatsucunti ju milacata.
38 Akꞌalhtayanalh ju Jesús:
―Ja vasalh lai axtꞌaktꞌi ju miꞌatsucunti ju quilacata.
Slivasalh ju icjunan.
Acsni jantucaꞌ tꞌasai ju puyux pus paktꞌutuch ju naꞌuntꞌa ni jantu qꞌuimispꞌai.