―Jantu caꞌamakꞌaninilh ju miꞌalhunutꞌan.

Ju uxijnan ni lhilacꞌapꞌinatꞌit ju Dios pus vachuch aquilalhilacaꞌanau ju quitꞌin.

2 Junta vilhcha ju quimpai na lhu alin ju chakaꞌ.

Ni jantu cava chunch ju lactꞌiyan pus xaclajuniuch ni jantu chun junita.

Acꞌanach lakꞌoxiniꞌ ju milacchakaꞌan cunaꞌ ju uxijnan.

3 Chai ni acꞌanaꞌ lakꞌoxiniꞌ ju anuꞌ lakꞌachakꞌan ju milacataꞌan pus acminchokopalaꞌ aktam.

Chai quitꞌinch ju aclalhiꞌanau ju lactꞌiyan.

Ju chunch junta actsucuyanta pus vachuch anch ju atsꞌucꞌuyaꞌitꞌit ju uxijnan.

4 Cꞌatsꞌayatꞌitch ta anchach ju acꞌanaꞌ chai mispꞌayatꞌitch junta puꞌancan.

5 Ju Tumax junich ju Jesús:

―Quiꞌucxtin jantu iccꞌatsayau ta anchach ju apꞌinaꞌ.

Tas aclhimispayauch ju ti.

6 Ju Jesús junich ju Tumax:

―Quitꞌin ju icxati.

Laquimacni ju pucꞌatsacan ju stavasalanti.

Chai quitꞌin ju icxtꞌakꞌa ju atsucunti jonkꞌalhi.

Jantu lai xamatiꞌ lakꞌan ju quimpai ju jantu quilhilaksich.

7 Ni xaquilamispau tichi chavaich ju quitꞌin pus vachuꞌ ismispꞌatꞌit ju quimpai.

Pus ju chavai ni quilamispayauch tichi chavaich ju quitꞌin pus tachi ju va mispꞌayatꞌitch ju quimpai.

Chai tachi ju va laktsꞌinatꞌit ju quimpai.

8 Chai ju Pilipe junich:

―Quiꞌucxtin aquilamalacasuniuch ju mimpai.

Aclhikꞌachanauch.

9 Pus ju Jesús alackꞌalhtailh:

―Na makꞌanchich ju xaclatꞌaꞌalhtanatsucuyau ju uxijnan.

Ja vanach jantu qꞌuimispꞌai ji Pilipe.

Ju quilaktsꞌintach quitꞌin tachi ju va laktsꞌintach ju quimpai.

Tꞌas ni va nompꞌalai ju uxintꞌi ni acmalacasuniyan ju quimpai.

10 Ja jantu lacꞌaꞌi ni va lakatam Dios icjuntau ju quitꞌin chai ju quimpai.

Ju chivinti ju tuchi iclajunau jantu va laquiꞌakstu ju icchivinin.

Para ju quimpai ni va lakatam Dios quintꞌajunita pus yuchach ju navi ju lhichꞌalhcat ju laquimacni.

11 Alacꞌaꞌitꞌitch ni va lakatamch Dios ictꞌajunita ju quimpai.

U ni jantu lai pꞌulacꞌaꞌiyatꞌit ju va quinchivinti pus aquilapulhilacaꞌauch ju tuchi icnavita.

12 Slivasalh ju iclajunau.

Ju lhichꞌalhcat ju icnavi quitꞌin pus vachuꞌ chunch canaviyaꞌ ju quilhilacaꞌantach ju quitꞌin.

Chai palai kꞌai lhichꞌalhcat ju canaviyaꞌ ju yuchi va ixlacaꞌatalh ni aclakꞌanach ju quimpai junta vilhcha.

13 Tachi chun ju asqꞌuiniyaꞌitꞌit ju quimpai ju laquintapakaꞌut pus aclanaviniyauch.

Chunch ju catapucꞌatsayach ju lapanacni ni xakꞌai ju quimpai ju va quilacata ni istsꞌalh icjunita.

14 Ni tuꞌuꞌ asqꞌuinaꞌitꞌit ju laquintapakaꞌut pus quitꞌin ju aclanaviniyau.

15 Ni quilamapainiyau ju quitꞌin pus amuctꞌaxtꞌutꞌit ju quilhamapꞌaksin.

16 Quitꞌinch ju actapaininiyaꞌ ju quimpai chai cataxtakniyanch apumatam ju cataꞌaktaijuyan.

Ju yuchi catatꞌatolhkꞌalhiyanch.

17 Yuchi ju Spiritu Santu ju najun ju stavasalanti.

Ju jantu quintalhilacaꞌan pus jantu lai cataꞌamaklhtayananaꞌ ni va jantu talaktsꞌin nin catamispa ju yuchi.

Para ju uxijnan mispꞌayatꞌit ni tatꞌavilanch.

Chai catanuyaꞌ lamiꞌalhunutꞌan.

18 Jantu va miꞌakstuꞌan ju actilamacaju.

Aclalakminchokoyau ju uxijnan.

19 Jantuch makꞌan aquintitalaktsꞌilh ju jantu quintalhilacaꞌanta.

Ju yuꞌunch jantu aquintitalaktsꞌinchokolh tavanan.

Para ju uxijnan aquilalaktsꞌinchokoyau.

Chai ni ictꞌajun ju quitꞌin pus vachuꞌ atsꞌucꞌutꞌachitꞌit ju uxijnan ju lactꞌiyan.

20 Acsnich avilhchan ju acꞌatsꞌayaꞌitꞌit ni va lakatamch Dios ictꞌajunita ju quimpai.

Chai acꞌatsꞌayaꞌitꞌit ni laquimacni ju tꞌonatꞌit ju uxijnan chai ju quitꞌin ictꞌajun lamiꞌalhunutꞌan.

21 Ju quilacaꞌinich ju quilhamapꞌaksin chai muctaxtuich tachi ju najunch ju laquilhamapꞌaksin pus yuchach ju quimapaini.

Chai ju quimapaini pus vachuꞌ camapainicanaꞌ.

Yuchi ju quimpai ju camapainiyaꞌ.

Chai ju quitꞌin vachuꞌ acmapainiyaꞌ ju quilapanac.

Chai cacꞌatsayach ni laꞌixꞌalhunutch ju ictꞌajun.

―Chunch ju ajunilh ju ixꞌamamakaꞌui ju Jesús.

22 Pus pumatam ju ixꞌamamakaꞌui ju Jesús ixjuncan Judas.

Jantiyuꞌ ju Judas Iscariote.

Pus ju yuchi chani juni ju Jesús:

―Quiꞌucxtin tas aquilapumalacasuniyau ju quijnan chai jantuch atꞌalacꞌasuniyaꞌ ju jantu talhilacaꞌantan.

23 Akꞌalhtayanalh ju Jesús.

Junich:

―Ni xamatiꞌ quimapaini pus camuctaxtuyaꞌ ju laquinchivinti.

Chai ju quimpai camapainiyaꞌ.

Chai ju quimpai chai ju quitꞌin aclakminauch ju quilacaꞌinich ju quinchivinti.

Chai actsucuyauch laꞌixꞌalhunut ju yuchi.

24 Ju jantu quimapaini pus jantu tuꞌuꞌ lhiulai ju quinchivinti.

Ju chivinti ju kꞌasmatꞌatꞌit jantu quiꞌanuꞌ para ixꞌanuꞌ ju quimpai ju quimacaminta.

25 Pus iclajunau ju ani taxtokni ni iclatꞌavilaucaꞌ ju uxijnan.

26 Yuchi ju Spiritu Santu ju aꞌaktaijunuꞌ.

Chai yuchi ju camacaminiyaꞌ ju quimpai laquintapakaꞌut.

Yuchi ju catamasuniyan tachi chun ju taxtokni ju iclajuntau.

27 Ju quitꞌin aclaꞌaktaijuyau ni jantu calacꞌanaꞌ ju miꞌalhunutꞌan.

Tachi ju quitꞌin ni jantu lacꞌan ju quiꞌalhunut.

Para ju aꞌaktaijunti ju aclanaviniyau jantu chun tachi ju va ixꞌaꞌaktaijunti tam lapanac.

Jantu calacꞌalh ju miꞌalhunutꞌan nin yuchi ni atꞌalhanantꞌit.

28 Kꞌasmatꞌatꞌitch acsni xaclajunau ni acꞌanach junta vilhcha ju quimpai chai aclalakminchokoyauch ju uxijnan.

Pus ni xaquilamapainiu cava pus ixkꞌachꞌantꞌitch acsni iclajuniu ni aclakꞌanach ju quimpai ni yuchi ju palai xakꞌai.

Jantu quitꞌin.

29 Ju chavai ictilajunau ni jantucaꞌ icꞌan ju lactꞌiyan.

Ju chunch acsni acꞌanach pus acsnich ju alacꞌaꞌiyaꞌitꞌitch ju tuchi iclajuntauch.

30 Ju chavai jantuch makꞌan ju actilatꞌachiviniu ju uxijnan ni caminach ju xakꞌai ju okxchokꞌoi chux ju lacamunutpaꞌ.

Ju yuchi matiꞌ ju ixtachaput ni lai tuꞌuꞌ aquinavi.

31 Para icnavi tachi ju quijuni ju quimpai ni laich catapumispayaꞌ ju lapanacni ni icmapaini ju quimpai chai icnavi tachi ju quijuni ju yuchi.

Akꞌostꞌolatꞌitch.

Caꞌauch.