―Ju quitꞌin chunch icjunita tachi ju tuꞌuꞌ xaqꞌuiu uvas.

Chai ju quimpai chunch junita tachi ju xaꞌalaxtunuꞌ.

2 Tachi chun ju lapanacni ju quintalhilacaꞌanta pus chunch tajunita tachi ju xamackꞌatapꞌu.

Pus ju jantu tasui ju quintachaput laꞌisꞌatsucunti tachi ju va jantu xtꞌakꞌa ju xatocꞌat.

Pus amakꞌosucan ju yuchi tachi acsni achakxmakꞌan ju tuꞌuꞌ xamackꞌatapꞌu ju jantuch xtꞌakꞌa ju xatocꞌat.

Chai tachi chun ju lapanacni ju tasui ju quintachaput laꞌisꞌatsucunti pus tachi ju va taxtꞌakꞌa ju xatocꞌat.

Pus tachi ju tuꞌuꞌ qꞌuiu ni calakachakxtucanch ni laich palai lhu catocꞌayaꞌ ju xatocꞌat pus vana va chun navican laꞌisꞌatsucunti ju anuꞌ lapanac.

Makꞌosunikꞌocan tachi chun ju alin laꞌisꞌatsucunti ju sastꞌucꞌa ni jantu tasui ixtachaput ju Dios laꞌisꞌatsucunti.

3 Ju uxijnan chꞌakꞌanicꞌantꞌatꞌitch ju lamiꞌalhunutꞌan lacachivinti ju xaclajunau.

4 Atsꞌucꞌutꞌit ju laquimacni.

Chai ju quitꞌin actsucuyaꞌ ju lamiꞌalhunutꞌan.

Ju tuꞌuꞌ ixmakpꞌu ju xaqꞌuiu uvas jantu lai catitocꞌalh ju xatocꞌat ju va laꞌisꞌakstu.

Tasqꞌuini ni anch ju camackꞌatꞌapꞌunchokolh ju laꞌistisivic.

Pus chunchach vachuꞌ ju uxijnan.

Jantu lai catitasu ixtachaput ju Dios ju lamiꞌatsucuntiꞌan ni jantu laquimacni ju tsꞌucꞌuyatꞌit.

5 Ju quitꞌin icjunita tachi ju tuꞌuꞌ xaqꞌuiu uvas.

Ju uxijnan tachi ju xamackꞌatapꞌu untꞌatꞌit.

Chai ju tꞌajunch laquimacni chai ni laꞌixꞌalhunut ju ictꞌajun pus yuchach ju xtꞌakꞌa lhu xatocꞌat ju laꞌisꞌatsucunti.

Pus ni jantu tꞌonatꞌit ju laquimacni pus jantu tuꞌuꞌ lai naviyatꞌit ju kꞌox calhiula ju quimpai Dios.

6 Ju jantu laquimacni tꞌajun camakꞌancanaꞌ tachi ju tuꞌuꞌ xamackꞌatapꞌu ju jantu kꞌox.

Ni chakxmakꞌancanta pus caxixach.

Chai camakꞌaixtokcanaꞌ.

Chai lacxavacanch.

7 Ni tꞌonatꞌitch ju laquimacni chai ni lacꞌaꞌitꞌatꞌitch ju lamiꞌalhunutꞌan ju quinchivinti pus laich aquilasqꞌuiniyau va tuchꞌi ju lacꞌasqꞌuinatꞌitch chai sich axtꞌaknikꞌocꞌanaꞌitꞌit.

8 Chai putasui ni yuchi ju xakꞌai ju quimpai acsni salaka ju atsꞌucꞌuyaꞌitꞌit.

Chai acsnich ju atꞌalacꞌasuyaꞌitꞌit ni vasalhch quilapanacni untꞌatꞌit.

9 Tachi ju quimpai ni na quimapaini pus chunchach vachuꞌ ju quitꞌin iclamapainiyau ju uxijnan.

Pus va tachi atsꞌucꞌutꞌit ta yu laich aclapumasuniyau ni iclamapainiyau.

10 Tachi ju quitꞌin ni icmuctaxtunilh ju ixlhamapꞌaksin ju quimpai chai quimapaini pus chunchach vachuꞌ ju uxijnan.

Va tachi aclamapainiyau ni amuctꞌaxtꞌuyaꞌitꞌit ju quilhamapꞌaksin.

11 Iclapujunau ju ani taxtokni va ixlacata ni chach alilh ju quinkꞌachat ju lamiꞌalhunutꞌan.

Chai chach vasalh akꞌachꞌanaꞌitꞌit.

12 Yuchi ju ani ju quilhamapꞌaksin ni alamapꞌainitꞌit ju milhiꞌuxijnanꞌan tachi ju quitꞌin ni iclamapainiyau.

13 Ju palai kꞌai amapaininti yuchi ju ani.

Acsni tam xamatiꞌ ju calhitapꞌuxlh ju isꞌatsucunti ixlacata tam ixꞌamigo.

14 Ju uxijnan quiꞌamigojni aꞌunaꞌitꞌit ni anaviyaꞌitꞌit tuchi ju iclalhijunauch.

15 Ju chavai jantu va na va xalapanacni aclalhimispayau.

Ju va xalapanac jantu lai mispakꞌojui tuchi navich ju tam ixꞌucxtin.

Para ju quitꞌin iclamacꞌatsanikꞌotau ju uxijnan tachi chun ju ickꞌasmatꞌach ju laꞌixmacni ju quimpai.

Yuchi iclalhijunau ju chavai ni quiꞌamigojni untꞌatꞌit.

16 Jantu uxijnan ju quilasacxtu.

Para quitꞌin ju iclasacxtu ju uxijnan.

Chai iclalhilhcaꞌulatau ni laich alhipꞌitꞌit ju ani chivinti chai catasu ju quintachaput ju lamiꞌatsucuntiꞌan chai lai va tachi chunchach catasu ju lamiꞌatsucuntiꞌan.

Ju chunch tachi chun ju asqꞌuiniyaꞌitꞌit ju quimpai ni laquintapakaꞌutch pus ju yuchi cataxtakniyan.

17 Iclalhimapꞌaksiyau ni alamapꞌainitꞌitch pumatamin ju milhiꞌuxijnan.

Ju Jesús tailhiꞌalh ju ixchivinti chai chani ju ajuni ju ixꞌamamakaꞌui:

18 ―Ni va taxcayan ju jantu quintalhilacaꞌan pus acꞌatsꞌatꞌit ni quitꞌin ju pꞌulhnan xaquintaxcaji.

19 Ni ixtꞌatꞌui cava untꞌatꞌit ju jantu quintalhilacaꞌan pus ju jantu quintalhilacaꞌan ca catamapainin.

Para ni quitꞌin ju iclasacxtutauch ju laꞌixlhiyuꞌunchꞌan ju jantu quintalhilacaꞌan pus ixlhiyuchach jantu talhilaktsꞌinan ni ixtꞌatꞌui untꞌatꞌit.

Yuchi va talhixcayanch ju jantu quintalhilacaꞌanta.

20 Apꞌastꞌactꞌitch ni iclajuntau ni jantiyuꞌ ju xakꞌai ju va tam xalapanac.

Para yuchi ju palai xakꞌai ju ixꞌucxtin.

Pus ju quitꞌin ni quintamamakꞌalhkꞌajni pus vachuꞌ catamamakꞌalhkꞌajniyan ju uxijnan.

Ni quintalacaꞌinilhch ju quinchivinti pus vachuꞌ catalacaꞌiniyan ju minchivintiꞌan.

21 Chunch ju catapunaviyan va ixlacaꞌatalh ni quilalhilacaꞌanauch ju quitꞌin chai ju yuꞌunch jantu tamispai ju quimacaminta.

22 Ni jantu xacmilh chai jantu xacꞌamalani pus jantu ixꞌaꞌulanicalh ju ixtalakꞌalhinꞌan.

Para ju chavai jantu lai tanajun ni matiꞌ ju ixtalakꞌalhinꞌan.

23 Ju quixcaji pus quimpai ju quintꞌaxcaji.

24 Ni jantu cava xacnavi tuꞌuꞌ lhichꞌalhcat ju laꞌixlhiyuꞌunchꞌan tachi ju jantuch lai navi ju va tam xamatiꞌ pus jantu ixꞌaꞌulanicalh ju ixtalakꞌalhinꞌan.

Para ju chavai quintalaktsꞌintach ju quitꞌin chai ju quimpai chai quintalhixcailich ju quitꞌin chai ju quimpai.

Yuchi alhiꞌulanicanta ju ixtalakꞌalhinꞌan.

25 Ni chunch talai pus uctaxtui ju chivinti ju tsꞌokcanta laꞌixlhamapꞌaksinꞌan junta najun:

“Quintalhixcailh mas jantu tuꞌuꞌ talakꞌalhin xacnavi”.

Chunch najun laꞌixlhamapꞌaksinꞌan.

26 Pus ju quitꞌin aclamacaminiyauch ju cataꞌaktaijuyan.

Ju yuchi cataxtuyanta laꞌixmacni ju quimpai.

Yuchi ju Spiritu Santu ju najun ju stavasalanti.

Yuchach ju cataxtuyanta laꞌixmacni ju quimpai.

Chai acsni caminaꞌ ju yuchi pus caxtꞌakꞌaꞌ ju chivinti ju quilacata.

27 Chai vachuch ju uxijnan anonaꞌitꞌit ju tuchꞌi laktsꞌintꞌatꞌit ju icnavita ni quilachꞌakꞌokꞌatauch tus acsni ictaiꞌulacha ju amalaninti.