16
Iclajuntauch junima taxtokni ni jantuch lai tam atꞌinompꞌalatꞌit astan.
2 Cataxcoxtuyan ju laꞌixpujitatꞌan ju quintꞌaꞌisraelitaninꞌan.
Cachinaꞌ avilhchan va tichi chavaich ju catamakniyan catanonach ni chunchach ju na kꞌox lhiulai ju Dios.
3 Chux ju ani taxtokni chunch catanaviyaꞌ ni va jantu tamispai ju quimpai nin quitꞌin.
4 Yuchi iclalhijunauch ju ani taxtokni ni laich apꞌastꞌacꞌaꞌitꞌit acsni tavanan chunch atꞌapꞌasayaꞌitꞌit.
Laich anonaꞌitꞌit ni chunchach ju xaclajunau.
Ju ani ixlhichꞌalhcat ju Spiritu Santu junita
Jantu xaclajuntau ju ani taxtokni ju pꞌulhnan ni xaclatꞌavilaucaꞌ.
Chai jantucaꞌ lai tuꞌuꞌ ixtapasai ju lamiꞌatsucuntiꞌan.
5 Para ju chavai aclakꞌanchokoyach ju quimalakachatachilh.
Para jantu xamatiꞌ ju milhiꞌuxijnan ju laich aquisacmiputulhch tas anchach ju acꞌanaꞌ.
6 Va yuchi ni na alakꞌamakꞌanininatꞌitch ju ixlacata junima taxtokni ju iclajuntau.
7 Para ju quitꞌin iclajunau ju stavasalanti.
Aktsꞌiya palai kꞌox ju milacataꞌan ni acꞌanchokolh ju lactꞌiyan.
Acsni va jantu acꞌanchokolh pus ju aꞌaktaijunuꞌ jantu catitalakmin ju uxijnan.
Para ni acꞌanaꞌ pus acmalakachatachilhch.
8 Chai ju yuchi acsni caminaꞌ caꞌamalacasuniyaꞌ ju lapanacni ixtalakꞌalhinꞌan.
Chai caꞌamalacasuniyaꞌ ju soknicꞌa atsucunti.
Chai caꞌamalacasuniyaꞌ ixꞌulanica ixtalakꞌalhinꞌan ju lapanacni.
9 Ju yuchi caꞌamalacasuniyach ju lapanacni ni alin ixtalakꞌalhinꞌan ni jantu quintalhilacaꞌan ju quitꞌin.
10 Ju yuchi camalacasuyaꞌ ju soknicꞌa atsucunti.
Chai putasui ni soknicꞌa ju quiꞌatsucunti ni aclakꞌanchokoyach ju quimpai chai jantuch vana aquintilalaktsꞌiu.
11 Ju yuchi camalacasuniyaꞌ ju lapanacni ni ulai talakꞌalhin ju Dios ni mucꞌanicantach ju ixtalakꞌalhin ju anuꞌ xakꞌai ju aꞌokxchokꞌoi tachi chun ju lapanacni ju ani lacamunutpaꞌ.
12 Na lhu taxtokni ju iclajumputunau.
Para ju chavai jantuch lai atꞌitꞌastꞌucnitꞌit.
13 Para acsni cachinaꞌ ju Spiritu Santu ju najun ju stavasalanti pus yuchi ju catamasuniyan tachi chun ju stavasalanti.
Chunch ju canaviyaꞌ ni jantu va ixchivinti isꞌakstu ju canonaꞌ.
Para tachi chun ju kꞌasmatni ju Dios yuchach ju canonaꞌ.
Chai catamacꞌatsanikꞌoyanch tachi chun ju taxtokni ju caminaꞌ.
14 Ju yuchi ni caꞌamalanininaꞌ ju quinchivinti chai catamamachakxaniyanch ju lamintacꞌatsanꞌan pus capumalacasuyaꞌ ni icxakꞌai.
15 Tachi chun ju ixꞌanuꞌ junita ju quimpai sich quiꞌanuꞌ vachuꞌ.
Yuchi iclhinajunch ju chavai ni caꞌamalanininaꞌ ju Spiritu Santu ju quinchivinti chai catamamachakxaniyan lamintacꞌatsanꞌan.
Ju amakꞌanit cajunaꞌ kꞌachat
Vachuꞌ chani ju ajuni ju ixꞌamamakaꞌun ju Jesús:
16 ―Vaninch minta ju avilhchan acsni jantuch aquilalaktsꞌinau.
Chai acsni catapasayaꞌ lakatam lakatꞌui avilhchanch aquilalaktsꞌinchokoyauch.
Chai astan aclakꞌanach ju quimpai.
17 Ju acsnich ju aliꞌin ju ixꞌamamakaꞌui ixtalajunich ju sia yuꞌunch:
―Tijuch nuꞌ ju ani ju quintajumputunan ni najun:
“Vaninch minta ju avilhchan acsni jantu aquilalaktsꞌinau”.
Chai ni nompalai:
“Acsni catapasayaꞌ lakatam lakatꞌui avilhchan aquilalaktsꞌinchokoyauch”.
Chai ni najun:
“Aclakꞌanach ju quimpai”.
18 Ixtanajunch:
―Tijuch nuꞌ ju nomputun ni va najun ni vanin minta ju avilhchan.
Jantu machakxayau tuchi ju najunch.
19 Pus ju Jesús amachakxanilh ni va istasacmiputunch.
Pus ajunich:
―Ja lasacmiyatꞌit ju va milhiꞌakstuꞌan ju tuchi xaclajunau acsni xacnajun ni vaninch minta ju avilhchan acsni jantu aquilalaktsꞌinau.
Chai ni xacnajun ni acsni catapasayaꞌ lakatam lakatꞌui avilhchan aquilalaktsꞌinchokoyau.
20 Slivasalh ju iclajunau.
Ju uxijnan akꞌalhununaꞌitꞌit.
Chai amakꞌanininaꞌitꞌit.
Para ju lapanacni ju jantu quintalhilacaꞌan catakꞌachanach.
Ju uxijnan mas amakꞌanininaꞌitꞌit para ju astan acꞌapkꞌoyaꞌitꞌit ju miꞌamakꞌanitꞌan.
Akꞌachꞌanaꞌitꞌit.
21 Ju tam chakoꞌulh acsni calokꞌomputunach na makꞌalhkꞌajnan ni chintach ju ixꞌavilhchan.
Para acsni catapasaniyach ju ixꞌamaklakꞌavanti pus jantuch pastacpalai ju ixmakꞌalhkꞌajnat.
Va lhikꞌachanch ni maklakꞌajuntach pumatam lapanac.
22 Pus chunchach vachuꞌ ju uxijnan.
Ju chavai slivasalh ni na amakꞌanininatꞌit.
Para acsni aclalaktsꞌinchokoyauch pus na akꞌachꞌanchꞌokꞌoyaꞌitꞌit ju lamiꞌalhunutꞌan.
Chai jantu lai xamatiꞌ catitataiꞌinin ju minkꞌachatꞌan.
23 Ju acsni avilhchan jantuch tuꞌuꞌ aquilasqꞌuiniyau ju quitꞌin.
Slivasalh ju iclajunau.
Tachi chun ju asqꞌuiniyaꞌitꞌit ju quimpai ju laquintapakaꞌutch cataxtakniyan.
24 Tus chavai jantu tuꞌuꞌ sqꞌuintꞌatꞌit ju laquintapakaꞌut.
Asqꞌuintꞌit chai amaklhtꞌayananaꞌitꞌit.
Ju chunch slivasalh alhikꞌachꞌanaꞌitꞌit ju lamiꞌalhunutꞌan.
Ju quitꞌin ictaiꞌinita ju ixtachaput ju lhinajun ju ani lacamunutpaꞌ
25 Junima taxtokni iclalhixakꞌalatau ju ispꞌumispꞌatꞌit ju stavasalanti.
Para jantu lai xaquilamachakxaniyau.
Para cachinaꞌ ju avilhchan acsni jantuch aclalhixakꞌalayau ju va apꞌumispꞌayaꞌitꞌit ju stavasalanti.
Ju acsnich lana vas aclajunau ixlacata ju quimpai.
26 Ju acsni avilhchan asqꞌuinaꞌitꞌit ju laquintapakaꞌut chai jantu iclajunau ni quitꞌinch ju actapaininiyaꞌ ju quimpai ju milacataꞌan.
27 Jantu tasqꞌuini ni chun aclalh ni isꞌakstu ju quimpai ju tamapainiyan va ixlacaꞌatalh ni quilamapainiyauch ju uxijnan chai lacꞌaꞌitꞌatꞌitch ni laꞌixmacni Dios ju icmintacha.
28 Laꞌixmacni quimpai ju xactaxtuyacha.
Icminta ju ani lacamunutpaꞌ.
Aktam acmaconchokopalaꞌ ju lacamunutpaꞌ chai aclakꞌanchokoyach ju quimpai.
29 Ju ixꞌamamakaꞌui ju Jesús tajunich:
―Ju chavai vasch quilajunau.
Jantu va lacatuꞌuꞌ ju quilapumamachakxaniyau ju stavasalanti.
30 Ju chavai iccꞌatsayauch ni mispꞌaich tachi chun ju taxtokni.
Jantu tasqꞌuini ni xamatiꞌ casacmin tuꞌuꞌ ni mispꞌakꞌoꞌui ju quiꞌatalacpastꞌacꞌat quincꞌan.
Yuchi ju icpulacaꞌiyauch ni laꞌixmacni Dios ju tꞌantꞌa.
31 Ajunich ju Jesús:
―Ja lacꞌaꞌiyatꞌitch ju chavai.
32 Cachinach ju avilhchan chai mas chavaich acsni amakpꞌitsꞌicꞌanaꞌitꞌit.
Ju pumatamin caꞌanaꞌ laꞌixlakchakaꞌan.
Aquilamacoyoyauch.
Para jantu va quiꞌakstu ju actitamacaulh ni quimpai ju quintꞌavi.
33 Chai iclajunauch ju ani taxtokni ni jantu calacꞌalh ju miꞌalhunutꞌan.
Jantu catilacꞌalh ju miꞌalhunutꞌan ni quilalhilacaꞌanau ju quitꞌin.
Ju ani lacamunutpaꞌ na amakꞌalhkꞌajnanaꞌitꞌit.
Para jantu atꞌalhanantꞌit.
Ju quitꞌin ictaiꞌinitach ju ixtachaput ju lhinajun ju ani lacamunutpaꞌ.