2 Chai talhitajulh ju chiux ni makꞌosucanta.

Yuchi ju xamalhtich ixjunita junta ixmacnucanta ju Jesús.

3 Chai acsni tatanu pus jantu talhitaju ju ixlacatuna ju Jesús.

4 Para acsni na ixtalhamakꞌaninin ni matiꞌ tuꞌuꞌ ixma ju anch pus lana anch tatayacha ixpumatꞌuiꞌan lapanacni ju ixtalakchꞌita lakslipnicꞌa ixpumpuꞌan.

5 Pus lana na tatalhanalh ju chakolun chai tatakꞌentalh.

Para ju anuch lapanacni tajunich:

―Tajuch ni va pꞌuxcꞌoyatꞌit ju tꞌajun junta amacnucan ju tanita.

6 Ju yuchi jantu ani ma.

Lokꞌonchokota.

Apꞌastꞌactꞌit tuchi xatajunan acsni ixvilhchalhcaꞌ ju xaꞌestado Galilea.

7 Xatajunan ni aktsꞌiya istasqꞌuini ni camakꞌaxtakcanaꞌ laꞌixmacaꞌan ju lapanacni ju na alactuꞌunin tajunita.

Yuchi ju malakachatachilh ju Dios ni lapanac catsucuyaꞌ ju ani.

Chai camaquilhtacanaꞌ para calokꞌonchokoyach ju ixlhilakatꞌutu avilhchan.

8 Pus acsnicaꞌ ju tapastaclich ju ixchivinti ju Jesús.

9 Pus tataspꞌitchokocha junta ixmacnucanta ju Jesús acsni tucaꞌ ixlokꞌonchokota chai taꞌamacꞌatsani tachi chun ju ani taxtokni ju ixpumacautamꞌan chaich ju aliꞌin.

10 Pus yuꞌunch ju Malia amachakaꞌ Magdala chai ju Xivana chai ju Malia ixnati ju Jacobo chai ju aliꞌin chakolun ju tajunilh ju ixtamalakachan ju Jesús tachi chun ju ani taxtokni.

11 Para ju yuꞌunch ixtanajun ni va kꞌaya ixtanajun ju tꞌacunin.

Lana jantu taꞌalacaꞌinilh.

12 Para ju Pitaluꞌ lana taya.

Atsꞌalaꞌalh junta ixmacnucanta ju Jesús acsni tucaꞌ ixlokꞌonchokota.

Chai acsni lhan quitalacnu pus laktsꞌilh ni va yuchi ju ixma ju pumpuꞌ.

Pus anchokolh laꞌixchakaꞌ.

Alhamakꞌaniniꞌalh tuchi xatapasai.

13 Pus ju acsnich avilhchan pumatꞌui sia yuꞌunch ixtaꞌanta ju lakꞌachakꞌan Emaús.

Vanin ixtꞌavi ju lakꞌachakꞌan Jerusalén.

Tachi ju xaꞌalhtanta lakatꞌui hora.

14 Chai ixtalhichiviꞌanta tachi chun ju taxtokni ju ixtapasata.

15 Chai acsni ixtalacchiviꞌanta pus lana chincha isꞌakstu ju Jesús chai kꞌaixtam atꞌaꞌalh.

16 Para ju ixꞌalacꞌavantiꞌan va lataminicalh ni jantuch catamispa ju Jesús.

17 Pus ju yuchi ajunich:

―Tijuch ju lacnonatꞌit ju uxijnan junta alhtꞌananatꞌit.

Chai tajuch ni na va amakꞌanininatꞌit.

18 Chai akꞌalhtayanalh pumatam ju ixtꞌiyunꞌan ju Cleofas ixjuncan.

Junich:

―Tachi chun ju lapanacni ju ixtatꞌonacha ju lakꞌachakꞌan Jerusalén ca va uxintꞌi ju jantu cꞌatsꞌai tuchi xatapasai ju anch ju chavai.

19 Chai ju yuchi ajunich:

―Tis talakxtuch.

Chai ju yuꞌunch tajunich:

―Ixlacata ju Jesús amachakaꞌ Nazaret.

Pus laꞌixꞌucxlacapuꞌ ju Dios chai laꞌixꞌucxlacapuꞌan ju lapanacni ju yuchi malacasulh ni vasalh ixlapanac Dios ixjunita.

Chai na lai ixnavi ju tuꞌuꞌ lhamakꞌan chai na lai ixꞌamalaninin ixchivinti Dios.

20 Para ju xalackꞌajin palijni chai ju xalackꞌajin quiꞌucxtin quincꞌan tamakꞌaxtaklh ju Jesús chai tamaknilh ju lacacurus.

21 Para ju quijnan xacnonau ni yuchi ixjunita ju xaquintamakꞌalhtaxtun ju quijnanꞌan ju israelitanin juntau.

Chai jantu va yuchi.

Para chavai ixlhilakatꞌutu avilhchan ju xatapasai ju ani taxtokni.

22 Chai vachuꞌ na iclhamakꞌanininau tuchi talaktsꞌilh ju aliꞌin chakolun ju sia quijnan.

Ju yuꞌunch ma na vatsꞌisin taquilacaꞌalh junta ixꞌacnui ju Jesús.

23 Para ma jantu talhitajunilh ju ixlacatuna.

Alai tataspꞌitcha chai tanaulh ni ma ixtalaktsꞌinta vachuꞌ ju anquilhnin.

Chai ju yuꞌunch ma tanaulh ni ma tꞌajun ju Jesús.

24 Chai ju aliꞌinch sia quijnan vachuꞌ taquilalh junta ixꞌacnui chai chunch ju talhitajulh tachi ju ixtanajunta ju chakolun.

Para ju Jesús ma jantu talaktsꞌilh.

25 Pus ju acsnich ju Jesús ajunich:

―Na tsꞌinqꞌui ju mintacꞌatsanꞌan ju uxijnan.

Na xcaich lacꞌaꞌiyatꞌit tachi chun ixchivinti ju lapanacni ju ixtanajun ixchivinti Dios.

26 Na istasqꞌuini ni calhimakꞌalhkꞌajnalh ju ani taxtokni ju Cristo.

Ju chunch ni laich calakꞌayacalh.

27 Pus ju acsnich ju Jesús tsuculh amavasalaniniꞌ tachi chun ju chivinti ju istsꞌokꞌulacanta laꞌixchivinti Dios junta ixlhichivinin ju yuchi.

Pus taiꞌula ta istsꞌokta ju Moisés chai tailhiꞌalh tus chaꞌalh ta istatsꞌokta tachi chun ju makꞌaniya lapanacni ju ixtanajun ixchivinti Dios.

28 Pus acsni tachaꞌalh ju anuꞌ lakꞌachakꞌan junta ixtaꞌanta pus ju Jesús lalh tachi ju va ixꞌamputun palai makat.

29 Para ju yuꞌunch tapꞌastu tachꞌapayaulh.

Tajunich:

―Aquilatꞌatolauch ni na tokꞌoxalh.

Anchalh ju avilhchan.

Pus alactꞌatanu ju yuꞌunch ni ixnajun ni caꞌalactꞌatolaꞌ.

30 Chai acsni alactꞌatavi ju lacamixa pus chꞌapalh ju xkapavati.

Junilh lakꞌailaktsꞌiuch ju Dios chai chꞌekꞌelh chai axtaknilh.

31 Pus lana takꞌoxichokolh ju ixlakchulhꞌan ju yuꞌunch chai tamispalh.

Para ju yuchi lana lakmixlh.

Jantu talaktsꞌilh.

32 Chai talajunilh sia yuꞌunch:

―Slivasalh na xackꞌachanau acsni xaquintatꞌachivimintan ju lacati.

Chai acsni xaquintamavasalanitan tuchi nomputun ixchivinti Dios ju tsꞌokcanta.

33 Pus lana talakasitaya ju acs pantsꞌiquis.

Taꞌanchokolh ju lakꞌachakꞌan Jerusalén.

Chai talhitajucha ju ixpumacautamꞌan chai ju aliꞌin ju ixꞌalactꞌavi.

Va lakputam ixtavilanalh.

34 Chai ju ixchuxꞌan ju yuꞌunch tajunilh ixtꞌiyunꞌan:

―Slivasalh ni lokꞌonchokolh ju quiꞌucxtinꞌan.

Pus talacasunilh ju Simón.

35 Chai vachuꞌ ixtꞌiyunꞌan tajunilh ju ixtalhavatꞌan tuchi tapasalh ju lacati chai ni tamispalh ni yuchach acsni chꞌekꞌelh ju xkapavati.

36 Chai acsni ixtatꞌajun nonin ju ani taxtokni pus ju Jesús lana tayacha laꞌixlacaitatꞌan chai ajunich:

―Akꞌachꞌantꞌit ju uxijnan.

37 Para ju yuꞌunch na tatalhanalh.

Na amakꞌesvacalh.

Va ixtanajun ni ca ixtalaktsꞌin ju alasanin.

38 Para ju yuchi ajunich:

―Tajuch ni va tꞌalhanantꞌit.

Tajuch ni va chunch ju pꞌastꞌacꞌatꞌit lamiꞌalhunutꞌan.

39 Alaktsꞌintꞌit ju quimacaꞌ chai ju quinchꞌajaꞌ ni quitꞌinch.

Aquilalacachꞌapauch chai aquilalakalaktsꞌiuch.

Ni va alasanin xacva pus jantu ixꞌalilh ju quiꞌacanit nin quiꞌalucutni.

Para ju uxijnan laktsꞌinatꞌit ni alin ju quiꞌacanit chai quiꞌalucutni.

40 Chai acsni naulh ju chunch pus alacmalacasunilh ju ixmacaꞌ chai ixchꞌajaꞌ.

41 Para ju yuꞌunch jantucaꞌ lai ixtalacaꞌi ni va ixtalhikꞌachanch ni aktsꞌiya talaktsꞌinchokolh chai ni va ixtalhamakꞌanininta.

Pus yuchi alhijunich:

―Ja alin lacatsꞌunin ju mivaitiꞌan.

42 Pus taxtaknilh lacatsꞌunin axpꞌupꞌunti pamata chai lacatsꞌunin tꞌaxcat.

43 Chai ju Jesús amaklhtayanalh chai tsuculh unaꞌ laꞌixꞌalacꞌavantiꞌan ju yuꞌunch.

44 Chai ajuni:

―Yuchach ju chivinti ju xaclajunau acsni xaclatꞌavilaucaꞌ ju uxijnan.

Iclajuniu ni istasqꞌuini ni caꞌuctaxtulh tachi chun ju istsꞌokcanta ju quilacata laꞌixlhamapꞌaksin ju Moisés chai laꞌixchivintiꞌan ju lapanacni ju ixtanajun ixchivinti Dios chai lacasalmos.

45 Pus ju acsnich ju Jesús alakꞌoxinilh ixtacꞌatsanꞌan ni laich catamachakxayaꞌ tuchi nomputun ixchivinti Dios ju tsꞌokcanta.

46 Chai ajunich:

―Tsꞌokcanta laꞌixchivinti Dios ni istasqꞌuini ni camakꞌalhkꞌajnalh ju Cristo chai calokꞌonchokolh laꞌixꞌaninti ixlhilakatꞌutu avilhchan.

47 Vachuꞌ tsꞌokcanta ni caꞌajunicalh ju lapanacni ni laich caꞌamacꞌacxanicanach ju ixꞌalactuꞌuntiꞌan va tichi chavaich ju calacaꞌilh ni Cristo yuchi ju ixnoncan camalakachatachilh ju Dios chai camacaulich ixꞌalactuꞌuntiꞌan.

Caꞌajunicalh ju ani chivinti tachi chun ju amachakꞌan ju kꞌai lakꞌachakꞌanixni.

Chai cataiꞌulacanach ju ani lakꞌachakꞌan Jerusalén.

48 Chai uxijnan ju anonaꞌitꞌit ni laktsꞌintꞌatꞌit ju ani taxtokni.

49 Chai aclamalakachanitachauch ju tuchi kꞌalhtasuta ju quimpai ni cataxtakniyan.

Para atꞌolatꞌitcaꞌ ju ani lakꞌachakꞌan Jerusalén tus acsni axtꞌaknicꞌanaꞌitꞌit ju tachaput ju caminanta talaclhman.

50 Ju Jesús atꞌataxtulh ju ixꞌamamakaꞌui ju lakꞌachakꞌan Jerusalén.

Chai akꞌailhiꞌalh ju lakꞌachakꞌan Betania.

Chai chꞌixlh ju ixmacaꞌ chai asqꞌuininilh ju Dios ju kꞌox isꞌatsucuntiꞌan ju yuꞌunch.

51 Chai acsni ixtꞌajuncaꞌ sqꞌuinininiꞌ ju Dios ju kꞌox isꞌatsucuntiꞌan pus lana alacmacaulich.

Lhiꞌancalh ju lactꞌiyan.

52 Chai ju ixꞌamamakaꞌui talakꞌayalh.

Chai astan taꞌanchokolh ju lakꞌachakꞌan Jerusalén chai slivasalh na ixtakꞌachanch.

53 Chai va tachi ixtatanumanalh ju lacpujitat.

Ixtajuni lakꞌailaktsꞌiuch ju Dios chai ixtalakꞌayai ju yuchi.