2 Chai ju lapanacni tatsuculh ulaninin ixtalakꞌalhin ju Jesús.

Tajunich ju Pilato:

―Ju ani ya lapanac iclhitaju ni va lakꞌalhiputun ju lakꞌachakꞌan chai kꞌalhtsajui ni amapalanancan laꞌixmacni ju César.

Chai ixnajun ni isꞌakstu ju Cristo junita chai kꞌai ucxtin junita.

3 Pus ju acsnich ju Pilato sacmilh ju Jesús.

Junich:

―Ja uxintꞌich ju ixꞌucxtinꞌan ju israelitanin.

Chai ju Jesús junich:

―Chunch tachi ju naꞌun.

4 Pus ju acsnich ju Pilato ajuni ju xalackꞌajin palijni chai ju ixtalhavat lapanacni:

―Jantu tuꞌuꞌ talakꞌalhin iclhitajuni ju ani lapanac.

5 Para ju yuꞌunch va apalai pꞌas tajuni:

―Para ju yuchi va amalasani ju lapanacni chai amalani ju lapanacni ju ixlhamapꞌaksin tachi ixlhilacaputsꞌun ju xaꞌestado Judea.

Pus taiꞌulachalh tus ju xaꞌestado Galilea chai tailhiꞌalh tus chilh ju ani.

6 Pus ju Pilato acsni kꞌasmatlh ju ixchivintiꞌan pus sacmilh ni amachakaꞌ junita ju xaꞌestado Galilea.

7 Chai acsni cꞌatsa ju Pilato ni amachakaꞌ anch ixjunita ju Jesús junta ixlhinajun ju gobernador Herodes pus lana malakachanilh ju yuchi.

Chai ni cꞌatan ixjunita ju acsnich pus ju Herodes vachuꞌ anch ixvilhcha ju lakꞌachakꞌan Jerusalén.

8 Chai ju Herodes acsni laktsꞌilh ju Jesús pus na kꞌachalh ni na makꞌan ju ixlaktsꞌimputun.

Pus na lhu taxtokni iskꞌasmatꞌa ixlacata yuchi chai na ixlaktsꞌimputun ni tuꞌuch lhamakꞌan canavi.

9 Pus na lhu chivinti ju xasacmi.

Para ju Jesús jantu tuꞌuꞌ xalhikꞌalhtaji.

10 Chai vachuꞌ ixtavilanalh ju xalackꞌajin palijni chai ju ixtalhatalanininta ju ixlhamapꞌaksinꞌan ju istꞌaꞌisraelitanin.

Chai ju yuꞌunch tapꞌastu ixtachivimakꞌan ju Jesús.

11 Pus ju acsnich ju Herodes chai ju ixtaropajni tatalacasunilh ni jantu tuꞌuꞌ ixtalhiulai ju Jesús.

Chai talhimakꞌakꞌamanalh.

Tamalakchꞌinilh ju cꞌusi pumpuꞌ tachi ju talakchꞌi ju xalackꞌajin.

Chai acsni talhimakꞌakꞌamanankꞌo pus malakachanichokopa ju Pilato.

12 Pus ju acsnich avilhchan talamaꞌamigoxla ju Pilato chai ju Herodes.

Pus ju pꞌulhnan va ixtalaxcajich.

13 Pus ju acsnich ju Pilato atꞌasanichokolh ju xalackꞌajin palijni chai ju xalackꞌajin sia yuꞌunch ju israelitanin chai ixtalhavat lapanacni.

14 Chai ajunich:

―Ju uxijnan quilalhiminitauch ju ani lapanac ni va nonatꞌit ni amalasani lapanac junita.

Para ju quitꞌin icquilhasacmita ju yuchi ju lamiꞌucxlacapuꞌan chai jantu tuꞌuꞌ iclhitajuni talakꞌalhin tuchꞌi lhichꞌivimakꞌanatꞌit ju uxijnan.

15 Chai nin yuchi ju Herodes jantu xalhitajuni ju ixtalakꞌalhin.

Yuchi quilhimalakachanichokochilh.

Pus ju ani lapanac jantu tuꞌuꞌ talakꞌalhin navita ju lai calhimakni.

16 Pus yuchi aclhinonaꞌ ju ixꞌulanica chai acmaconach.

17 Pus ju anuꞌ cꞌatan ju lapanacni aktsꞌiya istasqꞌuini ju gobernador ni caꞌamaconicalh pumatam tachꞌin ni chunch ixtalhilanita.

18 Pus ju ixtalhavatꞌan lapanacni va kꞌaixtam pꞌas tanaulh:

―Jantu amacꞌau ju ani ya lapanac.

Alai yuchi ju alhinauch ixlhiꞌanca.

Yuchi ju Barrabás ju iclacasqꞌuinau ni aquilamaconiuch.

19 Pus ju anuꞌ Barrabás ixlhitꞌalhnucanta ni va ixꞌamalasani ju amachakꞌan anch chai va ixꞌamakninin.

20 Para ju Pilato ni va ixmacomputun ju Jesús pus aktam axakꞌalachokopa ju ixtalhavatꞌan lapanacni.

21 Para ju yuꞌunch na pꞌas ixtanonchokopalai:

―Amaqꞌuilhtꞌatꞌich ju lacacurus.

22 Chai ajunchokopa ju ixlhipaktꞌutu:

―Para tajuch.

Tis talakꞌalhin ju navita ju yuchi.

Ju quitꞌin jantu tuꞌuꞌ talakꞌalhin ju iclhitajuni ju lai aclhinaulh ixmaknica.

Alai va aclhinonach ixꞌulanica chai acmaconach.

23 Para ju yuꞌunch na pꞌas ixtanajun acsni istasqꞌuinch ni camaquilhtacalh ju lacacurus.

Pus ju laꞌixchivintiꞌan ju yuꞌunch chai laꞌixchivintiꞌan ju xalackꞌajin palijni tatꞌalalhajalh.

24 Chai ju Pilato lhinaulh ni chach navicalh tachi istasqꞌuinta ju ixtalhavatꞌan lapanacni.

25 Chai amaconilh ju anuꞌ lapanac ju ixlhitꞌalhnucanta ni va ixꞌamalasani ju lapanacni chai ni va amakniniꞌ ixjunita.

Yuchach ju istasqꞌuinita ju lapanacni.

Chai makꞌaxtaklich ju Jesús ju laꞌixkꞌachatꞌan ju yuꞌunch.

26 Chai acsni talhiꞌalh ju Jesús pus tachꞌapayaulh pumatam lapanac ju Simón ixjuncan.

Amachakaꞌ xalacatꞌun Cirene.

Ju yuchi va ixmintacha lacacuxtu.

Pus tamakxkꞌokꞌalh ju curus chai ju yuchi tamalhiꞌanilh junta ixpꞌulai ju Jesús.

27 Chai na lhu lapanacni ixtachꞌakꞌokꞌata ju Jesús.

Chai na lhu chakolun ixtamakꞌanta vachuꞌ chai na ixtalackꞌalhun chai na pꞌas ixtalactꞌasai.

28 Para ju Jesús atalakaspꞌitnilh chai alacjunich:

―Chakolun amachakꞌan Jerusalén jantu aquilalhikꞌalhu ju quitꞌin.

Alai miꞌakstuꞌan alhikꞌalhunchꞌokꞌocꞌantꞌit.

Chai alhikꞌalhuntꞌit ju miꞌaskꞌatꞌan.

29 Chunch ju alatꞌit ni caminaꞌ ju avilhchan acsni chani catanonach ju lapanacni:

“Na kꞌox ju isꞌatsucuntiꞌan ju chakolun ju jantu lai ixꞌalin ju isꞌaskꞌatꞌa chai ju jantu tavanan taꞌakꞌainalh chai ju jantu tavanan taꞌamatsꞌiquinilh ju tam askꞌatꞌa”.

30 Pus ju acsnich avilhchan ju lapanacni catanonaꞌ ni palai kꞌox cava ni va capukꞌaitajunulh ju tuꞌuꞌ talhpa chai caꞌamakni.

U ni va caꞌakxtakma ju tuꞌuꞌ lacatꞌicstꞌi talhpa.

31 Chunch catanonaꞌ ni caꞌalinaꞌ ju kꞌai makꞌalhkꞌajnat ju acsni.

Pus ju tuꞌuꞌ lhtacni qꞌuiu jantu xavacan.

Pus vana va chun ju quitꞌin.

Jantu lhijun ni acmaknicalh ni matiꞌ ju quintalakꞌalhin ju quitꞌin.

Para ju uxijnan chunch untꞌatꞌit tachi ju tuꞌuꞌ xaxixni qꞌuiu ju xavacan.

Pus ju alin ixtalakꞌalhin mamakꞌalhkꞌajnican.

Chai ixlhiyuchi amamakꞌalhkꞌajnicꞌanaꞌitꞌit ju uxijnan.

32 Chai talhiꞌalh vachuꞌ apumatꞌui tachꞌinin ju catꞌamaknicananta ju Jesús.

Para ju yuꞌunch aktsꞌiya ixtanavita tuꞌuꞌ talakꞌalhin.

33 Chai acsni tachaꞌalh ju anuꞌ akstijun junta saꞌaktsulh juncan pus anchach ju tamaquilhta ju Jesús chai ixtꞌiyunꞌan alactuꞌunin.

Ju pumatam tamaquilhta laꞌixlhicana iscurus ju Jesús.

Chai ju akꞌantam laꞌixlhimacx.

34 Chai ju Jesús naulh:

―Quimpai amacꞌacxaninch ju ani tayanalh lapanacni ni jantu tacꞌatsai tuchi tanavi.

Chai talalhvaknilh ixpumpuꞌ ju Jesús.

Chai talhilaslajlich ni catacꞌatsayaꞌ tis ixꞌanuch cajunaꞌ ju lakatam cꞌus ixpumpuꞌ.

35 Chai ju ixtalhavat lapanacni va taskꞌotutulh.

Chai mas yuꞌunch ju xalackꞌajin ixtalhitsꞌiꞌinch ju Jesús.

Ixtanajun:

―Ju yuchi amakꞌalhtaxtulh ju aliꞌin.

Pus chach makꞌalhtaxtucalh isꞌakstu ni sala yuchi ju Cristo ju sacxtuta ju Dios.

36 Chai vachuꞌ ju taropajni talhitsꞌiꞌilh.

Talakchaꞌalh ni va ixtaxtakniputun ju pinquin ju jantu can ixjunita.

37 Chai tajunich:

―Ni sala ixꞌucxtinꞌat ju mintꞌaꞌisraelitanin pus amakꞌalhtꞌaxtꞌucꞌach miꞌakstu.

38 Chai istsꞌokcanta laꞌisꞌaktsulh iscurus ju chivinti ju chani ixnajun:

“Ju ani yuchach ju ixꞌucxtinꞌan ju israelitanin”.

Chai istsꞌokcanta lacalhigriego chai lacalhilatin chai lacalhihebreo.

39 Chai pumatam ju anuꞌ alactuꞌunin ju ixꞌatꞌamaquilhtacanta ju Jesús ixlhitsꞌiꞌin vachuꞌ.

Chai juni:

―Ju uxintꞌi ni sala Cristoꞌat pus amakꞌalhtꞌaxtꞌuchꞌokꞌocꞌach ju miꞌakstu chai vachuꞌ ju quijnan.

40 Para kꞌailh ju akꞌantam.

Junich:

―Ja jantu lana tꞌalhoni ju Dios ni vana va chun ju makꞌalhkꞌajnan ju uxintꞌi tachi ju yuchi.

41 Chai ju quijnanꞌan islivasalh lhijun ni camakꞌalhkꞌajnanauch ni navitauch ju alactuꞌunti.

Para ju ani jantu tuꞌuꞌ alactuꞌunti ju navita.

42 Pus ju acsnich ju yuchi junilh ju Jesús:

―Aqꞌuimpꞌastꞌacꞌaꞌich ju quitꞌin acsni ucxtin atꞌanchꞌokꞌoyaꞌ.

43 Chai ju Jesús junich:

―Slivasalh ju icjunan.

Chavai avilhchan ju aqꞌuintꞌatꞌolaꞌ ju lactꞌiyan.

44 Acsni chaꞌalh tachi kꞌatuncu pus na tsꞌis va ixlhilacaputsꞌun ju anuꞌ lacatꞌun.

Chai chunchach va tus lakatꞌutu hora atokꞌoxanaꞌ.

45 Va tsꞌankꞌalh ju avilhchan.

Chai ju lacpujitat ixꞌalin lakatam kꞌai pumpuꞌ ju ixyocanta ni pulactꞌui ixpunavicanta.

Pus ju acs pantsꞌiquis pus lana lhtꞌit takꞌexlh ju anuꞌ pumpuꞌ laꞌixlacaitat.

46 Chai ju Jesús tsꞌau tꞌasalh.

Chai naulh:

―Quimpai lamimacaꞌ icmakꞌaxtakniyan ju quintacuvin.

Chai acsni naulh ju chunch pus lana nilh.

47 Chai ju xacapitán ixtaropajni ju romanonin acsni laktsꞌilh tuchi tapasalh pus lakꞌaya ju Dios acsni naulh:

―Ju ani lapanac slivasalh na soknicꞌa ixjunita.

48 Pus na lhu lapanacni ixtayanalh ni va ixtalaktsꞌimputun ju ani lhamakꞌan.

Chai ixchuxꞌan acsni talaktsꞌilh tuchi tapasalh pus alactanquilhacsacalh ni chunch ixtanavi ju acsnich ni na ixtaꞌamakꞌaninin.

Chai taꞌanchokolh laꞌixchakaꞌan.

49 Para chux ju ixtꞌalamispan ju Jesús chai ju chakolun ju ixtachꞌakꞌokꞌata ju ixtatꞌamintacha ju xaꞌestado Galilea pus va makat ixtayanalh.

Ixtalaktsꞌin tuchi tapasalh.

50 Chai ixꞌalin pumatam lapanac ju José ixjuncan.

Amachakaꞌ Arimatea.

Chai ju yuchi makyuꞌunch ixjunita ju xalackꞌajin sia yuꞌunch ju israelitanin.

Chai ju yuchi na kꞌox lapanac ixjunita chai na soknicꞌa.

51 Ju yuchi vachuꞌ ixpacxantaji ju avilhchan acsni kꞌai ucxtin cajunaꞌ ju Dios.

Chai jantu kꞌox xalhiulai ju yuchi tachi ixtalhichivinin ju Jesús ju ixtꞌaxalackꞌajin nin tachi ju xatanavi.

52 Pus ju yuchi lakꞌalh ju Pilato chai quisqꞌuinilh ju ixlacatuna ju lijunto Jesús.

53 Chai ni lakꞌaꞌinilh ju Pilato pus ju yuchi alh chai pꞌuxlich.

Chai pachꞌi lacalhman pumpuꞌ.

Chai quimacnucalh ju lacalhucucu talhpa.

Chai ju anch jantucaꞌ xamatiꞌ ixmacnucanta.

54 Chai ju acsnich xamisparas ixjunita ju avilhchan paꞌastacni acsni jantu lai ixtachꞌalhcatnan.

55 Chai ju chakolun ju ixtatꞌamintacha ju Jesús ju xaꞌestado Galilea tachꞌakꞌokꞌalh ju José.

Talaktsꞌilh junta macnucalh ju lijunto Jesús chai ta yu xamamacan ju ixlacatuna.

56 Chai ju chakolun taꞌanchokolh laꞌixchakaꞌan.

Talakꞌoxilh ju achꞌitin chai ju cꞌuchꞌu ju na cꞌus acamin.

Chai taꞌastacnalh ju avilhchan paꞌastacni tachi ju ixnajun lacalhamapꞌaksin.