2 Chai ju xalackꞌajin palijni chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin ixtapuxconi ta yu laich catapumakniyaꞌ ju Jesús.

Para na xcai talhiula ni na ixtatalhoni ju lapanacni.

3 Pus pumatam ju ixpumacautꞌuiꞌan Judas Iscariote ixjuncan.

Pus ju lhacaticuru chꞌapanilh ixꞌatalacpastꞌacꞌat.

4 Chai ju yuchi alh alactꞌachiviniꞌ ju xalackꞌajin palijni chai ju xaꞌucxtinin ju taropajnich ju ixtavilanancha lacpujitat.

Ju Judas va alh ajuniniꞌ ni laich caꞌamakꞌaxtakniyach ju Jesús.

5 Pus ju yuꞌunch na talhikꞌachalh chai tajunilh ni catamapalaꞌ.

6 Pus ju Judas amachꞌanu chai puxcaulich ta yu laich capumakꞌaxtakniyach ju yuꞌunch acsni matiꞌ lhu cava ju lapanacni.

7 Pus chilh ju avilhchan acsni cataꞌuyaꞌ ju xkapavati ju jantu lhiyalh ju xatꞌin.

Vachuꞌ acsni istasqꞌuini ni catamakniyaꞌ ju ixborregoꞌan ixlacata ju anuꞌ cꞌatan.

8 Pus ju Jesús amalakachalh ju Pitaluꞌ chai ju Xivan.

Ajunich:

―Inchitꞌit lakꞌoxinin ju vaiti ixlacata ju chavai cꞌatan ni laich caꞌuyau.

9 Chai ju yuꞌunch tajunich:

―Tas anchach ju lacꞌasqꞌuin ju aclakꞌoxiyau.

10 Chai ju yuchi ajuni:

―Acsni achꞌipꞌinaꞌitꞌit ju lakꞌachakꞌan pus apꞌakxtꞌokꞌaꞌitꞌit pumatam lapanac ju lhiꞌanta xcan laꞌixalu.

Pus atꞌaimayaꞌitꞌit ju yuchi tus catanuyanta ju lacachakaꞌ.

11 Chai aꞌunaꞌitꞌit ju amachakaꞌ:

“Ju amamakaꞌunuꞌ macaminiyan chivinti.

Tas ma anchach ju lai catꞌavenaꞌ ju ixꞌamamakaꞌunin ju chavai cꞌatan”.

12 Chunchach ju aꞌunaꞌitꞌit.

Chai ju yuchi catalhiꞌanan ju lhitantalactꞌui ixchakaꞌ.

Chai catamasuniyan ju kꞌai chakaꞌ junta kꞌox lakꞌoxicanta.

Anchach ju alakꞌoxiyaꞌitꞌit ju vaiti.

13 Pus taꞌalh chai talhitajulh tachi ju ajunicalh.

Chai anch ju talakꞌoxilh ju vaiti.

14 Pus astan tamilh ju Jesús chai ju aliꞌin.

Chai acsni chaꞌalh ju hora pus ju Jesús tapakstitꞌatama ju ixpumacautꞌuiꞌan ixtamalakachanꞌan.

15 Chai ju Jesús ajuni:

―Slivasalh ixlhichux quiꞌalhunut na xaclacasqꞌuin ni laich aclatꞌavenau ju uxijnan ju xavaiti ju chavai cꞌatan acsni tucaꞌ icmaknican.

16 Pus jantu aktam actiꞌuchokolh ju xavaiti ju ani cꞌatan tus acsni caꞌuctaxtukꞌoyaꞌ chux tuchi nomputun ju ani cꞌatan.

Tus caꞌuctaxtuyanta ju lactꞌiyan junta lhinajun ju Dios.

Tus acsnich ju lai acꞌuchokoyaꞌ chai yuchi xaclhilacasqꞌuin ni aclatꞌaꞌuyau ju chavai.

17 Pus ju acsnich ju Jesús chꞌapalh ju vaso chai junilh lakꞌailaktsꞌiuch ju Dios chai naulh:

―Achꞌapꞌatꞌit ju ani vaso.

Alatꞌakꞌotꞌit ju milhiꞌuxijnan.

18 Akꞌotꞌit ju uxijnan ni iclajunau ni jantuch actikꞌotchokolh ju vino tus acsni vasalh calhinonkꞌoyaꞌ ju Dios.

19 Astan ju Jesús chꞌapalh ju xkapavati chai junilh lakꞌailaktsꞌiuch ju Dios.

Chai chꞌekꞌelh.

Chai axtaknilh ju yuꞌunch.

Ajunich:

―Yuchach ju ani ju quilacatuna ju xtakcanta ju milacataꞌan.

Va tsa chani alatꞌit ni laich apꞌupꞌastꞌacꞌaꞌitꞌit ju quiꞌaninti ju milacataꞌan.

20 Chai acsni ixtavenkꞌota pus vana va chun navichokopa.

Chꞌapachokolh ju vaso chai naulh:

―Ju ani lhikꞌotꞌat yuchi ju pumavasalacan ju sastꞌi chivinti ju iclatꞌatakꞌoxitauch.

Chai acpumavasalayaꞌ ju anuꞌ chivinti ju quiꞌacꞌalhni ju cataxtuyaꞌ ju milacataꞌan.

21 Para ju aquimakꞌaxtꞌakꞌach quintꞌavi ju chavai lacamixa.

22 Pus aktsꞌiya acniyaꞌ tachi ju iclhilhcanicanta.

Quitꞌin ju quimalakachatachilh ju Dios ni lapanac actsucuyaꞌ ju ani.

Para painich ju anuꞌ lapanac ju aquimakꞌaxtꞌakꞌaꞌ.

23 Pus ju acsnich ju ixꞌamamakaꞌui tatsuculh lasacminin sia lhiyuꞌunch tis nuꞌ chavaich ju sia lhiyuꞌunch ju canaviyaꞌ ju chunch.

24 Pus ju acsnich alilh lakatam laklakꞌaiti ju sia lhiyuꞌunch ju ixꞌamamakaꞌui ju Jesús.

Va ixtalhilakꞌaji tichi chavaich ju sia yuꞌunch ju kꞌox calhiulacalh ni yuchi ju xakꞌai canavicalh.

25 Para ju Jesús ajuni:

―Ju lapanacni ju jantu quintꞌaꞌisraelitanin tajunita alin ixꞌucxtinꞌan ju talhinajun.

Chai yuꞌunch ju talhinajun na va talhitakꞌayachokocan isꞌakstuꞌan tus talacasqꞌuin ni calhimispacalh ni yuꞌunch ju palai aꞌaktaijunun.

Mas jantu.

26 Para jantu chun anavitꞌit ju uxijnan.

Alai yuchi ju takꞌayaputun lamilhiꞌuxijnan capumavasalayaꞌ ni vasalh xakꞌai acsni va lacatꞌicstꞌi catalacasu chai ni jantu lacasqꞌuin ni calakꞌayacalh.

Chai yuchi ju lhinajun lamilhiꞌuxijnan capumalacasuyaꞌ ni vasalh xakꞌai acsni cachꞌalhcatnaniyaꞌ ju aliꞌin.

Jantiyuꞌ ni va cachꞌalhcatnanicalh.

27 Pus tꞌas nonatꞌit ju uxijnan.

Tis chavaich ju palai xakꞌai.

Ja yuchi ju tolai lacamixa chai vajin.

U yuchi ju ini ju ixvaiti.

Ja jantiyuꞌ ju tolai lacamixa.

Para ju quitꞌin chun icjunita tachi ju va milapanacꞌan.

28 Uxijnan ju jantu quilamacaju acsni na xacmakꞌalhkꞌajnan chai ixlacata ju quimakꞌalhkꞌajnat chilh ju quiꞌatalacpastꞌacꞌat ni xacmacaulh ju quilhichꞌalhcat.

29 Chai ni jantu xaquilamaconau ju acsnich pus yuchi iclalhilhcaꞌulatau ni ucxtinin aꞌunaꞌitꞌit tachi ju quimpai ni quilhcaꞌulanilh ju quitꞌin.

30 Ju chunch lai aꞌuyaꞌitꞌit chai akꞌotꞌaꞌitꞌit laquimixa acsni kꞌai ucxtin acjunach.

Chai alhinonaꞌitꞌit chux ju ixꞌapapanatnich ju ixpumacautꞌuiꞌan istsꞌalan ju Israel.

31 Chai ju Jesús vachuꞌ chani junilh ju Pitaluꞌ:

―Simón ju lhacaticuru tasqꞌuinitanch ni laich cataꞌulhtuyan tachi ju ulhtucan ju tuꞌuꞌ trigo acsni cꞌalhacan.

Pus va yuchi ju xaꞌamacxtalh ju sun lhiꞌan ju un.

Para ju xatrigo jantu.

Pus ju lhacaticuru talaktsꞌintanuputunan ni aquilacꞌapꞌauch u aquilalhilaksikꞌalhiyau.

32 Para ju quitꞌin ictapaininita ju Dios ju milacataꞌan ni jantu lana aquilacꞌapꞌauch.

Chai acsni aqꞌuinchꞌakꞌokꞌachꞌokꞌoyaꞌich ju uxintꞌi pus aꞌaktꞌaiꞌutꞌich ju milhiꞌalakꞌavin ni vachuꞌ ixlhichux ixꞌalhunutꞌan aquintalhilaksichokoyaꞌ.

33 Para ju Pitaluꞌ junich:

―Quiꞌucxtin ju quitꞌin aclhilakꞌaꞌiyach mas actꞌatꞌalhnucanch.

U mas actꞌaniyanch.

34 Para ju Jesús junich:

―Pitaluꞌ icjunan ni chavai atatsꞌisni acsni tucaꞌ tꞌasai ju puyux pus paktꞌutu ju naꞌuntꞌa ni jantu qꞌuimispꞌai.

35 Chai ju Jesús ajunich ju ixꞌamamakaꞌui:

―Acsni tavanan iclamalakachau chai jantu ixlhipꞌintꞌatꞌit ju mintuminꞌan nin mimpastiꞌan nin lakatꞌui minchꞌanxtꞌakꞌanꞌan ja tuꞌuꞌ xatacꞌacxniyan.

Chai ju yuꞌunch tajunilh ni jantu.

36 Pus ju acsnich ju Jesús ajuni:

―Kꞌoxich.

Para ju chavai tasqꞌuini ni atsꞌucꞌuyaꞌitꞌit tachi tam taropa ju an junta alin ju ixtꞌalaxcai.

Ju chavai ju alin ju ixtumin calhiꞌalh.

Vachuꞌ ju ispasti.

Chai ju matiꞌ ixmachita pus castꞌalh ju ixpumpuꞌ chai calhitamaulh lakatam.

37 Pus chunch ju aꞌulhtꞌutꞌit ni iclajunau ni tasqꞌuini ni caꞌuctaxtuyaꞌ ju quilacata ju anuꞌ ju tsꞌokcanta laꞌixchivinti Dios junta chani najun:

“Ju yuchi laktsꞌincalh tachi ju va alactuꞌunuꞌ”.

Chunch ju najun chai tꞌajun uctaxtunuꞌ ju chavai.

38 Chai ju ixꞌamamakaꞌui tajunich:

―Quiꞌucxtin alin lakatꞌui quimachitaꞌan.

Chai ju yuchi ajunich:

―Chach va anch lhitamactalh.

Pus va naulh ju chunch ni jantu ixtamachakxani tuchi ju ixꞌajumputun.

39 Ju Jesús taxtulh lacachakaꞌ chai alh ju anuꞌ akstijun junta puꞌolivonin ixjuncan tachi ju aktsꞌiya ixlai.

Chai ju ixꞌamamakaꞌui vachuꞌ tachꞌakꞌokꞌalh.

40 Chai acsni tachaꞌalh junta aktsꞌiya ixtaꞌastacnan pus ju Jesús ajuni ju ixꞌamamakaꞌui:

―Atꞌachꞌivinintꞌit ju Dios ni jantu cataꞌokxchokꞌoyan ju lhacaticuru.

41 Chai ju yuchi alh ixlhimakat tachi ju laich macaꞌancan ju chiux.

Chai ju anch ju yuchi taꞌaktsokotalh chai tꞌachivinilh ju Dios.

42 Junich:

―Quimpai ni lacꞌasqꞌuinch aqꞌuimakꞌosunin ju ani makꞌalhkꞌajnat.

Para jantu iclacasqꞌuin ni anavitꞌi ju quinkꞌachat quitꞌin.

Alai yuchi ju anavitꞌi ju minkꞌachat ju uxintꞌi.

43 Chai talacasunilh pumatam anquilh ju mincha lactꞌiyan chai xtaknilh ju ixtachaput.

44 Chai ni na ixmakꞌalhkꞌajnan pus lana ixlhichux ixꞌalhunut ju tapaininilh ju Dios.

Chai ju ixtalhtꞌajat valhch tachi ju tuꞌuꞌ acꞌalhni ju kꞌalhtankꞌai lachꞌapata chai ixtamayacha ju lacatꞌun.

45 Pus acsni tꞌachivinkꞌo ju Dios pus taya chai alakminchokolh ju ixꞌamamakaꞌui.

Chai alhitajulh ni va ixtalhtatanan ni na ixtaꞌamakꞌaninin.

46 Chai ajunich:

―Tꞌas ni va lhtꞌatꞌapꞌalatꞌit.

Akꞌostꞌolatꞌit.

Atꞌachꞌivinintꞌit ju Dios ni jantu cataꞌokxchokꞌoyan ju lhacaticuru.

47 Chai acsni ixtꞌajuncaꞌ alactꞌachiviniꞌ ju ixꞌamamakaꞌui ju Jesús pus tachincha ju ixtalhavat lapanacni.

Chai ixꞌapꞌulhnita ju anuꞌ ixlhipumacautꞌuiꞌan ju Judas ixjuncan.

Chai lakmilh ju Jesús ni camacchꞌuchꞌuyach.

48 Para ju Jesús junich:

―Judas ja lacaꞌamacchꞌuchꞌunti ju aqꞌuimakꞌaxtꞌakꞌaꞌ ju quitꞌin ju quimalakachatachilh ju Dios ni lapanac actsucuyaꞌ ju ani.

49 Pus ju ixꞌamamakaꞌui acsni talaktsꞌilh tuchi catapasayach pus tajunich:

―Quiꞌucxtin ja acmakniyauch lacamachita.

50 Chai pumatam sia lhiyuꞌunchach macꞌatsani ju ixlapanac ju xakꞌai pali.

Chakxpꞌuxnilh ju ixꞌakꞌaxkꞌolh ju ixcatucana.

51 Para ju Jesús juni:

―Chach va anch lhitamactalh.

Chai ju Jesús chꞌapalh ju ixꞌakꞌaxkꞌolh ju anuꞌ lapanac chai lana catumucꞌachokolh.

52 Pus ju xalackꞌajin palijni chai ju xataropajni lacpujitat chai ju papanin yuꞌunch ju ixtaminta inin ju Jesús.

Chai ju Jesús ajunich:

―Tajuch ni va quilanaviyau tachi tam akꞌalhonaꞌ ju chꞌapꞌapꞌutꞌunatꞌit ni lhitꞌantꞌatꞌit ju mimachitaꞌan chai ju minqꞌuiuꞌan.

53 Pus chux tuncujun xaclatꞌavilhchau lamilacpujitatꞌan chai ju anch jantu quilachꞌapauch.

Para ju chavai ju Dios talakꞌaꞌiniyan ni chunch ju aquilaꞌulhtuyau.

Vachuꞌ lakꞌaꞌinilh ju lhacaticuru ni chunch ju aquiꞌulhtulh.

54 Pus tachꞌapalh ju Jesús.

Talhiꞌalh chai tamanucha laꞌixchakaꞌ ju xakꞌai pali.

Pus ju Pitaluꞌ va ixlhimakat chꞌakꞌokꞌalh.

55 Pus ju aliꞌin ixtamalhculatach ixpulacni ta ixlakachakꞌaxnucanta ju ixchakaꞌ ju xakꞌai pali.

Chai ixtalacskꞌonvilanalh.

Chai vachuꞌ ixmakvi ju Pitaluꞌ.

56 Pus pumatam atsiꞌ acsni laktsꞌilh ni anchach vachuꞌ ixmakskꞌonvi ju Pitaluꞌ pus lana skꞌotutu chai naulh:

―Ju ani vachuꞌ ixmakꞌanta ju yuchi.

57 Para ju yuchi naulh ni jantu.

Junich:

―Chakoꞌulh jantu icmispai ju yuchi.

58 Chai ni pantsꞌiquis jumpa pus laktsꞌinchokopa apumatam chai junich:

―Ju uxintꞌi vachuꞌ makyuꞌunch.

Para ju Pitaluꞌ junich:

―Jantu quitꞌin.

59 Chai ni tapasalh tachi tam hora pus apumatam pꞌas naulh:

―Slivasalh ni vachuꞌ ixtꞌavilhcha ju yuchi ju ani ya ni vachuch amachakaꞌ xaꞌestado Galilea.

60 Para ju Pitaluꞌ junich:

―Jantu icmachakxai tuchꞌi qꞌuiꞌuni.

Chai acsni ixtꞌajuncaꞌ chiviniꞌ pus lana tꞌasalh ju puyux.

61 Pus ju Jesús talakaspꞌitlh chai laktsꞌilh ju Pitaluꞌ.

Chai ju Pitaluꞌ lana pastaclh ju ixchivinti tachi ju ixjunita ni paktꞌutu canonaꞌ ni jantu mispai acsni tucaꞌ tꞌasata ju puyux.

62 Pus taxtulh ju Pitaluꞌ chai na pꞌas tsuculh kꞌalhunuꞌ.

63 Pus ju anuch lapanacni ju ixtalhistꞌacꞌach ju Jesús va ixtalhitsꞌiꞌinch ju yuchi chai ixtalakanekmai.

64 Chai acsni talakpuchꞌilh pus talacpasa chai tajunilhch:

―Anauch tichi chavaich ju xaꞌulaniyan.

65 Chai ixtajuni na lhu macxcai chivinti.

66 Chai acsni tunculh pus tatakꞌaixtoklh ju xapapanin sia yuꞌunch ju israelitanin chai ju xalackꞌajin ixpalijniꞌan chai ju yuꞌunch ju na ixtalhatalanininta ixlhamapꞌaksinꞌan ju istꞌaꞌisraelitanin.

Pus yuꞌunch ju ixtalhinajun sia yuꞌunch ju israelitanin chai anch ju lhimincalh ju Jesús.

Chai tajunich:

67 ―Ja uxintꞌich ju Cristoꞌat.

Yuchi ju ixnoncan camalakachatachilh ju Dios.

Aquilajuniuch.

Para ju Jesús ajunich:

―Mas aclajuniu jantu atꞌilacꞌaꞌitꞌit.

68 Chai mas aclasacmiu tuꞌuꞌ ixlacata yuchi jantu tuꞌuꞌ aquintilalhikꞌalhtajiu nin yuchi ni lai aquintilamacaju.

69 Para tus chavai actolach vanin junta vi ju Dios ju na tachapun.

Quitꞌin ju quimalakachatachilh ju Dios ni lapanac actsucuyaꞌ ju ani.

70 Pus ju acsnich ixchuxꞌan tajuni:

―Pus ja uxintꞌiꞌas ju istsꞌalh Dios.

Chai ju yuchi ajunilh:

―Chunch tachi ju nonatꞌit.

71 Pus ju acsnich ju yuꞌunch talaclajunilh:

―Pus tis alich chivinti ju maktasqꞌuiniyau ni quiꞌakstuchꞌan ju xakꞌasmatniyau tuchi xanajun.