Pumatam quilhpatiniꞌ chakoꞌulh
21
Junta ixvi ju Jesús ju laꞌixpujitatꞌan ju istꞌaꞌisraelitanin pus tasoknicꞌa taya chai alaktsꞌilh ju makꞌalinin ni ixtamujui ixlhakꞌailaktsꞌinꞌan lacalactꞌicstꞌi pꞌaklat junta ixpumucan tumin ju laꞌixpujitatꞌan.
Lucas 21.1-38
2 Chai vachuꞌ laktsꞌilh pumatam chakoꞌulh ju va ixnimacontilacanta chai na quilhpatiniꞌ ixjunita.
Chai ju yuchi mujulh lakatꞌui lactꞌicstꞌi tumin.
3 Pus ju Jesús naulh:
―Slivasalh ju iclajunau.
Palai lhu xaxtꞌakꞌa ju ani quilhpatiniꞌ chakoꞌulh ju va nimacontilacanta.
Palai jantu tachi chun ju aliꞌin.
4 Pus tachi chun ju yuꞌunch talhikꞌailaktsꞌinch ju Dios ju va xajnichokotachalhch.
Para ju ani mas va quilhpatiniꞌ para xtakkꞌolh chux ju ixtimakꞌata.
Calakꞌalhikꞌocanaꞌ ju kꞌai pujitat
5 Chai ju aliꞌin ju ixtavilanalh anch talhichivinilh ju pujitat.
Ixtanajun ni na kꞌoxich ixmaxantilacanta lacacꞌusi chiux chai ju lapanacni ixtaxtakta na lhu taxtokni ju na laccꞌus ixjunita ni na kꞌox catasu ju pujitat.
Para ju Jesús ajuni:
6 ―Aclajunau ixlacata ju ani taxtokni ju laktsꞌinatꞌit ju chavai.
Pus caminaꞌ avilhchan acsni jantu tuꞌuꞌ catilaꞌucxtavi ju chiux ju ixtꞌachiux.
Chux lana calakꞌalhikꞌocanaꞌ.
Chani lai pucꞌatsacan ni caꞌaclayaꞌ ju lacamunutpaꞌ
7 Chai tasacmich.
Tajuni:
―Amamakaꞌunuꞌ tas vananch ju caꞌuctaxtuyaꞌ ju ani minchivinti.
Tijuch ju catasuyach ju lai acpucꞌatsayau ni jantu makꞌan cativa tus catapasayaꞌ ju ani taxtokni.
8 Chai ju Jesús ajuni:
―Alaktsꞌintꞌit ni jantu xamatiꞌ cataꞌokxchokꞌon.
Pus na lhu lapanacni cataminaꞌ laquintapakaꞌut.
Chai chanich catanonach:
“Quitꞌin ju icCristo”.
Chai vachuꞌ catanonaꞌ ni vaninch minta ju avilhchan acsni acminchokoyaꞌ.
Para tun tꞌichꞌakꞌokꞌatꞌit ju yuꞌunch.
9 Chai acsni akꞌasmatꞌaꞌitꞌit ni alin ju lhilucut chai ni tamacxtuputun ju ixꞌucxtinꞌan ju aliꞌin lapanacni pus tun tꞌitꞌalhanantꞌit.
Pus tasqꞌuini ni pꞌulhnan catapasayaꞌ ju ani taxtokni.
Para jantu lana acsnich ju ixꞌaclanti ju lacamunutpaꞌ.
10 Pus tailhiꞌalh ixchivinti ju Jesús.
Ajuni:
―Ju amachakꞌan ju lakatam kꞌai lacatꞌun catatꞌalasayaꞌ ju amachakꞌan alakatam kꞌai lacatꞌun.
Chai ju lapanacni ju tachꞌakꞌokꞌai tam ucxtin catatꞌalasayaꞌ ju ixlapanacni ju apumatam ucxtin.
11 Chai na lacalhu caꞌalinach junta catataclhaꞌ ju lacatꞌun chai junta caꞌalinach ju chavanti chai junta lhu alin ju takꞌankꞌat.
Chai catalacasuyaꞌ ju kꞌai lhitalhan ju lactꞌiyan.
Chai ju lapanacni acsni catalaktsꞌinaꞌ na catatalhananaꞌ chai catapucꞌatsayaꞌ ni vanin ixꞌaclanti ju lacamunutpaꞌ.
12 Para pꞌulhnan acsni tucaꞌ tapasai ju ani taxtokni pus catachꞌapayan chai catamamakꞌalhkꞌajniyan.
Chai amakꞌaxtꞌakcꞌanaꞌitꞌit laꞌixmacaꞌan ju xalackꞌajin lacpujitatnin.
Chai atꞌalhnucꞌanaꞌitꞌit.
Chai alhipꞌinicꞌanaꞌitꞌit ju xalackꞌajin chai ju aliꞌin ucxtinin.
Chai chux ju ani cataꞌulhtuyan va ixlacaꞌatalh ni quilachꞌakꞌokꞌayau ju quitꞌin.
13 Para ni chunch ju cataꞌulhtuyan pus laich aꞌunaꞌitꞌit ju yuꞌunch ju quilacata.
14 Pus pꞌas anaꞌuntꞌit lamiꞌalhunutꞌan ni jantu apꞌastꞌacꞌaꞌitꞌit pꞌulhnan ta yu laich akꞌalhtꞌayananaꞌitꞌit acsni catamucꞌaniyan ju mintalakꞌalhinꞌan.
15 Chunch ju alatꞌit ni quitꞌin quiꞌakstu ju aclaxtakniyau ju chivinti chai ju acꞌatsanti.
Chai tachi chun ju mintꞌalaxcaiꞌan jantu lai ta catapukꞌalhtayanananch nin lai catanaulh ni jantu slivasalh tuchꞌi nonatꞌit.
16 Chai mas mimpaiꞌan u minatiꞌan catamakꞌaxtꞌakꞌan.
Chai ju miꞌalakꞌavinꞌan chai ju milhiꞌalakꞌavinꞌan chai ju miꞌamigojniꞌan catamakꞌaxtꞌakꞌan.
Chai ju aliꞌin lamilhiꞌuxijnan catamakniyan.
17 Chai chux ju lapanacni catalhixcayan va ixlacata ni quilachꞌakꞌokꞌayau ju quitꞌin.
18 Para mas va tuchi catapasayaꞌ aktsꞌiya talhistꞌacꞌan ju Dios chai jantu catitsꞌankꞌa ju miꞌatsucuntiꞌan jonkꞌalhita.
19 Pus ni va tachi aquilalhilacaꞌanau pus caꞌalinaꞌ ju miꞌatsucuntiꞌan jonkꞌalhita.
20 Acsni alaktsꞌinaꞌitꞌit ju lakꞌachakꞌan Jerusalén ni catalakachokoputunach ju taropajni pus ju acsnich apꞌucꞌatsꞌayaꞌitꞌit ni chaꞌalh ju ixpumaclacan.
21 Ju acsnich ju tatꞌonacha ju xaꞌestado Judea chach taꞌatsꞌalaꞌalh ju xalacatalhpan.
Chai ju tavilanancha ju lakꞌachakꞌan Jerusalén chach tataxtulh.
Chai ju va tatꞌonacha laꞌixcuxtuꞌan chach taꞌatsꞌalalh.
Jantu catatanu ju lakꞌachakꞌan.
22 Pus ju anuch avilhchan va ixpumapalhcan ju talakꞌalhin cajunaꞌ.
Chai acsni catapasayaꞌ ju chunch pus capuꞌuctaxtuyach tachi chun ju taxtokni ju tsꞌokcanta laꞌixchivinti Dios ixlacata yuchi.
23 Para painiꞌitnich ju taꞌakꞌainanta chai ju alin lacatꞌicstꞌi isꞌaskꞌatꞌa ju acsni avilhchan.
Pus slivasalh kꞌai makꞌalhkꞌajnat ju caꞌalinaꞌ laꞌixlacatꞌunꞌan ju quintꞌaꞌisraelitanin chai ju yuꞌunch catalaktsꞌinaꞌ ixtalhkꞌamti ju Dios.
24 Pus ju aliꞌin camaknicanaꞌ lacalhilucut.
Chai ju aliꞌin tachꞌinin canavicanaꞌ chai calhiꞌancanach vanta lhiꞌanchach ju alin ju lakꞌachakꞌanixni.
Chai ju jantu israelitanin tajunita yuꞌunch ju catatsucuyaꞌ ju lakꞌachakꞌan Jerusalén tus acsni cataꞌaktsayach ju avilhchan ju alhcanicanta ju yuꞌunch.
Acsni caminchokoyaꞌ ju Cristo chanich catasuyaꞌ
25 Chai tamch catasuyaꞌ ju avilhchan chai ju malhquiyuꞌ chai ju stꞌacu.
Chai ju ani lacatꞌun na catamakꞌalhkꞌajnanaꞌ ju lapanacni.
Chai lana jantu catacꞌatsayaꞌ tuchi catalayaꞌ ni na catꞌasayaꞌ ju alama chai na calucununach ju xcan.
26 Pus vak caꞌanaꞌ ju ixꞌalacꞌavantiꞌan ju lapanacni va ixlacata ixtalhantichꞌan acsni tapastꞌacꞌa tuchi catapasayaꞌ ju ani lacatꞌun.
Pus mas yuchi ju avilhchan chai ju malhquiyuꞌ chai ju stꞌacu catalucununach.
27 Pus acsnich ju aquintalaktsꞌinaꞌ ju quitꞌin ju quimalakachatachilh ju Dios ni lapanac actsucuyaꞌ ju ani.
Acminaꞌ lacaꞌataputsꞌi chai catacꞌatsayaꞌ ju lapanacni ni na alin ju quintachaput chai ni icxakꞌai.
28 Pus acsni cataiꞌulayach ju ani taxtokni pus asaꞌulatꞌit ju miꞌaktsulhꞌan chai akꞌachꞌanaꞌitꞌit ni vaninch minta ju avilhchan acsni amakꞌalhtꞌaxtꞌucꞌanaꞌitꞌit.
29 Vachuꞌ ajunilh lakatam chivinti ju ixꞌapumavasalaniputun ju tuchi ixꞌamalaniputun.
Pus ajuni:
―Alaktsꞌintꞌit ju xaqꞌuiu higuera chai tachi chun ju aliꞌ qꞌuiu.
30 Acsni catsucutachilh xajnichiniꞌ ju sastꞌi xaxkꞌoi pus ju uxijnan pꞌucꞌatsꞌayatꞌit ni vaninch minta ju lacapꞌasni.
31 Pus vana va chun ju ani.
Acsni alaktsꞌinaꞌitꞌit ni tꞌajun uctaxtunuꞌ ju ani taxtokni pus acꞌatsꞌayaꞌitꞌit ni vaninch minta ju avilhchan acsni calhinonkꞌoyaꞌ ju Dios.
32 Slivasalh ju iclajunau.
Jantu catitani ju chavai tatꞌajun lapanacni tus acsni jantu uctaxtukꞌojui chux ju ani.
33 Ju lactꞌiyan chai ju lacatꞌun calaclayaꞌ.
Para aktsꞌiya caꞌuctaxtuyaꞌ ju quinchivinti.
34 Pus alaktsꞌinchꞌokꞌocꞌantꞌit miꞌakstuꞌan ju uxijnan.
Jantu xcai ni na lhu caꞌalilh ju macxcai lamiꞌalhunutꞌan chai atꞌakꞌapꞌayaꞌitꞌit u na lhu ju alhamakꞌaninitꞌit ju xataxtokni ju saꞌatsucunti ju ani lacamunutpaꞌ.
Chai ni chunch ju alatꞌit pus laich cachilh ju anuꞌ avilhchan acsni jantu cꞌatsꞌayaꞌitꞌit ni laich camilh.
35 Pus ju anuꞌ avilhchan acsni cachinaꞌ chunch catapasayaꞌ tachi ju tapasai acsni tuꞌuꞌ chꞌapacanta lacaskꞌapa.
Pus va tam pantsꞌiquis cachinaꞌ chai astan jantu xamatiꞌ ixlhilacaputsꞌun ju ani lacamunutpaꞌ laich tamch catapastꞌacꞌaꞌ.
36 Pus va tachi skꞌala atsꞌucꞌutꞌit.
Chai va tachi asqꞌuinitꞌit ju Dios ni kꞌox catalhiulayan chai ixlhiyuchi lai apꞌutꞌakꞌalhtꞌaxtꞌuyaꞌitꞌit tachi chun ju ani taxtokni ju caminaꞌ.
Chai vachuꞌ lai atꞌayayaꞌitꞌit laquiꞌucxlacapuꞌ ju quitꞌin ju quimalakachatachilh ju Dios ni lapanac actsucuyaꞌ ju ani.
Laich atꞌayayaꞌitꞌit laquiꞌucxlacapuꞌ ni matiꞌ ju miꞌalactuꞌuntiꞌan.