Alin ixtachaput ju Jesús
20
Lakatam avilhchan ixtꞌajun amalaniniꞌ ju lapanacni ju Jesús lacakꞌai ixpujitatꞌan ju istꞌaꞌisraelitanin chai ajuni ta yu laich cataputakꞌalhtaxtulh.
Pus tachincha ju xalackꞌajin palijni chai ju papaninch chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin.
Lucas 20.1-47
―Tis chavaich ju xajunan ni laich anaviyaꞌ tachi chun ju ani taxtokni.
3 Chai ju Jesús ajunich:
―Vachuꞌ aclasacmiyau lakatam chivinti.
Aquilajunauch.
4 Tis chavaich ju xamalakachayachilh ju Xivan ni caꞌamakpaxanalh.
Ja yuchi ju Dios u va lapanacni.
5 Pus ju yuꞌunch talacchivinilh ixlhiꞌakstuꞌan.
Ixtalaclajuni:
―Ni calhiquilhꞌaniu ni Dios ju xamalakachayachilh pus aquintajunin tajuch ni jantu xalacaꞌiniyau.
6 Chai ni canaju ni va lapanacni ju xatamalakachayachilh pus chux ju lapanacni aquintalacatꞌalhman ni na talacaꞌita ni ixlapanac Dios ixjunita ju Xivan.
7 Pus taꞌakꞌalhtayanalh ni jantu ixtacꞌatsai tichi chavaich ju xamalakachayachilh ju Xivan.
8 Pus ju acsnich ju Jesús ajunich:
―Pus nin quitꞌin jantu actilajuniu tichi chavaich ju xaquimalakachayachilh ni acnaviyaꞌ ju ani taxtokni.
Ju makchꞌalhcatni lapanacni na taꞌalactuꞌunulh
9 Pus ju acsnich ju Jesús tsuculh ajuniniꞌ ju lapanacni ju chivinti ju ixtꞌalaktsꞌipaxcavaich ju tuꞌuꞌ.
Ajuni:
―Pumatam lapanac chꞌanlh ju xaqꞌuiu uvas laꞌixlacatꞌun chai amachꞌixtaknilh ju makchꞌalhcatnin.
Chai ju yuchi na makꞌan alh alacatam lacatꞌun.
10 Chai acsni chilh ju avilhchan acsni alilh ju xaꞌuvas pus amalakachanichilh pumatam ixlapanac ju anuꞌ chꞌalhcatnin ni caꞌixtaxtaknilh ju xalhiꞌut tachi ixꞌalhitꞌatakꞌoxitach.
Para ju anuꞌ makchꞌalhcatnin talhilakanekma.
Va talhixcavatsꞌala.
Chai jantu tuꞌuꞌ taxtaknilh.
11 Chai malakachachokochilh apumatam ixlapanac.
Chai vana va chun tanavipa.
Talhilakanekma chai tamamaxanilh.
Va chunch taxcavatsꞌalachokolh.
Chai jantu tuꞌuꞌ taxtaknilh.
12 Chai ju amatꞌun malakachachokopa ixlhipumatꞌutu ixlapanac.
Pus ju yuꞌunch vana va chun tanavichokopa.
Tamacꞌatsani chai tamaxtulh lacapuꞌuvas.
13 Pus ju acsnich ju amanavin ju anuꞌ puꞌuvas naulh:
“Tas nuꞌ aclayach ju chavai.
Acmalakachayach ju quintsꞌalh ju na icmapaini.
Ca laich cava ni catatalhonilh ju yuchi acsni catalaktsꞌinaꞌ”.
14 Chai chunch ju navi.
Para ju anuꞌ makchꞌalhcatnin acsni talaktsꞌilh talaclajunilh sia yuꞌunch:
“Yuchach ju anuꞌ ju amanavinch cajunaꞌ acsni caniyaꞌ ju ixpai.
Pus asokꞌotꞌitch.
Camakniuch.
Chai quiꞌanuchꞌan cajunaꞌ ju ani puꞌachꞌananti”.
15 Pus chunchach ju tanavi.
Tatamacxtulh lacapuꞌuvas chai tamakni.
Pus acsni nonkꞌo ju ani chivinti ju Jesús pus asacmilh ju lapanacni.
Ajunich:
―Tꞌas nonatꞌit.
Tas caꞌulhtuyach ju amatꞌun ju anuch chꞌalhcatnin.
16 Pus caminach chai camaknikꞌoyach ju anuꞌ chꞌalhcatnin chai aliꞌin ju caꞌamachꞌixtaknichokoyach ju ixpuꞌuvas.
Pus ju lapanacni acsni takꞌasmatlh tuchi ixnajun ju Jesús tanaulh:
―Jantu calacasqꞌuinaꞌ ju Dios ni chunch ju catapasalh.
17 Para ju Jesús alaktsꞌilh ju lapanacni chai alhikꞌalhtailh:
―Pus ni jantu chunch ju catapasayaꞌ pus tijuch ju nomputun ju chivinti ju tsꞌokcanta laꞌixchivinti Dios junta chani najun:
Ju chiux ju tasacmakꞌalh ju anuꞌ ixyonin chakaꞌ
yuchach ju valhch ju chiux ju makꞌastumucꞌacanta chakaꞌ junta tsꞌokcanta tuchi cꞌata ju yocanta.
18 Pus acsni quintasamakꞌan ju lapanacni pus va ixtꞌachunch junita tachi acsni pukꞌalhkꞌoscan ju tuꞌuꞌ chiux chai tacꞌatsanican.
Chai acsni icꞌaꞌulani ju lapanacni ju ixtalakꞌalhinꞌan pus va ixtꞌachunch junita tachi acsni catantꞌalhma ju tuꞌuꞌ kꞌai chiux chai jantu tavanan lai kꞌostolai.
Sacmican ixlacata ju amapalanti
19 Pus ju xalackꞌajin palijni chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin na ixtapuxcajui ta yu laich catapuchꞌapalh ju Jesús ju anuꞌ pantsꞌiquis.
Para na ixtatalhonita ju lapanacni.
Pus ni ixtamachakxata ixchivinti ju Jesús chai ixtacꞌatsai ni ixlhichivinin ju yuꞌunch acsni tavanan naulh ju chivinti ixlacata ju puꞌuvas pus yuchi ixtalhichꞌapaputun.
20 Pus talhistacli chai amalakachacalh ju lapanacni ju catatankꞌajlaktsꞌilh.
Chai ju yuꞌunch talhitalacasulh tachi ju lapanacni ju soknicꞌa ixjunita ju ixꞌatalacpastꞌacꞌatꞌan.
Va ixtapuxcolakxtuniputun ju chivinti ni laich catalhimakꞌaxtaknilh ju gobernador.
21 Pus yuchi taquilhisacmi:
―Amamakaꞌunuꞌ iccꞌatsayau ni naꞌun chai amalanininch ju stavasalanti.
Chai vaklhtam chun alaktsꞌin ju lapanacni.
Chai sok amalaninin ixlhamapꞌaksin ju Dios.
22 Pus tꞌas naꞌunch.
Ja lhijun ni acꞌamapalanauch ju laꞌixpuꞌucxtin ju romanonin u jantu.
23 Para ju Jesús lana amachakxanilh ni va ixtaꞌokxchokꞌoputun chai ajuni:
―Tajuch ni va quilapuxconiputunau ju quintalakꞌalhin.
24 Aquilamasuniuch ju tumin ju lhiꞌamapꞌalananatꞌit.
Tis ixꞌucxpuꞌ ju ani okslai.
Tis ixtapakaꞌut ju tsꞌokcanta ju ani.
Pus taꞌakꞌalhtayanalh.
Tajunich:
―Ixꞌanuꞌ ju César ixꞌucxtinꞌan ju romanonin.
25 Pus ju acsnich ju Jesús ajunich:
―Pus axtꞌaknitꞌit ju César ju ixꞌanuch.
Chai axtꞌaknitꞌit ju Dios ju ixꞌanuch.
26 Pus jantu lai talhitajunilh tuꞌuꞌ talakꞌalhin laꞌixchivinti ju xanajun laꞌixꞌucxlacapuꞌ ju lapanacni.
Alai va talhamakꞌaninilh ni na kꞌox xalhakꞌalhtayanan.
Chai va sek tataya.
Acsni catalokꞌonchokoyach ju tanita
27 Ju acsnich tachincha ju aliꞌin saduceonin ju jantu ixtalacaꞌi ni laich calokꞌonchokolh tam xamatiꞌ ju ixnita.
Talakmilh ju Jesús chai tasacmi:
28 ―Amamakaꞌunuꞌ ju Moisés quintaꞌatsꞌoknunin laꞌixlhamapꞌaksin ni canilh tam lapanac chai ma camacontilalh ixꞌamachakaꞌ para jantu tuꞌuꞌ catꞌamacontilalh ju isꞌaskꞌatꞌan pus ju ispꞌisekꞌe calhitsucuchokolh ju ixꞌamachakach ixjunita ju xani.
Chai camaꞌalini ju isꞌaskꞌatꞌa chai ju yuchi ni tsꞌalh pus ma casacnilh ixtapakaꞌut ju lijunto ixlakꞌau.
29 Pus ixꞌalin pumatujun lhiꞌalakꞌavin.
Chai ju xakꞌai alilh ixꞌamachakaꞌ.
Para astan nilh chai jantu tuꞌuꞌ macontilanilh ju isꞌaskꞌatꞌa.
30 Chai ju ixlhipumatꞌui tꞌatsucuchokopa ju ixꞌamachakach ixjunita.
Chai astan vachuꞌ nipa.
Jantu tuꞌuꞌ macontilalh ju isꞌaskꞌatꞌa.
31 Chai ju ixlhipumatꞌutu tꞌatsucuchokopa.
Chai vana va chun talakꞌo ixchuxꞌan ixpumatujunꞌan.
Tus tanikꞌo.
Chai jantu xamatiꞌ macontilanilh ju isꞌaskꞌatꞌa.
32 Chai ju astan pus vachuꞌ nilh ju anuꞌ chakoꞌulh.
33 Pus acsni calokꞌonchokocanaꞌ pus tis ixꞌamachakach cajunaꞌ ni tatꞌatsucukꞌo ixpumatujunꞌan lhiꞌalakꞌavin.
34 Ju acsnich ju Jesús akꞌalhtayanalh.
Ajunich:
―Ju lapanacni ju ani lacamunutpaꞌ tatamakꞌaxtꞌokꞌa chai talaꞌi.
35 Para alin lapanacni ju kꞌox alhiulai ju Dios ni catalokꞌonchokoyach chai cataꞌanach ju lactꞌiyan.
Chai ju anch jantu tamakꞌaxtokcan chai jantu laꞌican.
36 Jantu tasqꞌuini ni catamakꞌaxtokcha ju anch ni jantu catitanichokolh ju anch.
Alai va ixtꞌachunchach catatsucuyanta tachi ju anquilhnin.
Chai isꞌaskꞌatꞌan Dios tajunita ni talokꞌonchokota.
37 Mas isꞌakstu ju Moisés mavasala ni catalokꞌonchokoyach ju tanita acsni atalacasunilh ju Dios ju lacaꞌachꞌitin ju jantu tavanan lai lhcukꞌo.
Pus ju Moisés acsni tsꞌokꞌula tuchi tapasalh ju anch pus naulh ni Dios juni ni isDiosꞌan junita ju makꞌaniya lapanacni ju Abraham chai ju Isaac chai ju Jacob ixꞌajuncan.
38 Pus ju Dios ni najun ni isDios junita ju anuch lapanacni pus va pumavasalai ni tatꞌajun ju yuꞌunch.
Pus mas nonau ni va nita tam xamatiꞌ para ju Dios alhilaktsꞌin tachi ju tatꞌajun.
39 Pus ju acsnich ju aliꞌin sia yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin tajunich ju Jesús:
―Amamakaꞌunuꞌ na kꞌox xanaꞌun.
40 Pus tus acsnich jantu lai tuꞌuꞌ aliꞌ talhisacmichokoputulh.
Tis istsꞌalh ju Cristo
41 Ju Jesús ajunich ju aliꞌin fariseonin:
―Tꞌas nonatꞌit.
Tas laich talhinajun ju lapanacni ni istsꞌalh David ju Cristo ju ixnoncan camalakachatachilh ju Dios.
42 Pus isꞌakstu ju David chani naulh ju laxaꞌalhiqui ju Salmos juncan:
Ju ucxtin Dios junilh ju quiꞌucxtin:
“Vanin atꞌaꞌulh junta icvi.
43 Tus acsni actꞌalalhajayaꞌ ju mintꞌalaxcai”.
44 Pus ni isꞌakstu David naulh ni ixꞌucxtin junita pus ju chunch va nomputun ni jantu va istsꞌalh junita.
Ju Jesús aꞌulani ju talakꞌalhin
45 Pus tachi chun ju lapanacni takꞌasmatlh acsni chani ajuni ixꞌamamakaꞌui ju Jesús:
46 ―Alhistꞌaccꞌantꞌit ni jantu cataꞌokxchokꞌon ju yuꞌunch ju na talhatalanininta ju milhamapꞌaksinꞌan.
Pus ju yuꞌunch na takꞌachani ju laclhman ixpumpuꞌan tachi ju tam xakꞌai.
Chai na kꞌox talhiulai acsni amacꞌamican ju laꞌixtalhavat lapanacni.
Chai na takꞌachani ni tatolai laꞌixputolanꞌan ju xalackꞌajin ju lacpujitat chai lacapuvai.
47 Va taꞌokxchokꞌotaiꞌini ixlacchakaꞌan ju chakolun ju va animacontilacanta.
Chai astan talapalai tachi ju na va kꞌox panicni ju tatꞌachivinin ju Dios ni lai catapuꞌokxchokꞌolh ju lapanacni ni catanaulh ni na tatalhoni ju Dios.
Para ju yuꞌunch cataꞌamaklhtayananaꞌ palai lhu ju ixmakꞌalhkꞌajnatꞌan.
Palai jantu ju aliꞌin lapanacni.