Ju Jesús chai ju Zaqueo
19
Ju Jesús tanucha ju lakꞌachakꞌan Jericó chai ixtapasatilaputun.
2 Para ixvi ju anch pumatam lapanac ju Zaqueo ixjuncan.
Ju yuchi xakꞌai achꞌiniꞌ ixjunita chai slivasalh na makꞌaliꞌ ixjunita.
3 Chai ju yuchi ismispaputun ju Jesús tichi chavaich.
Para jantu lai islaktsꞌin va ixlacaꞌatalh ixtalhavat lapanacni ju ixtalakꞌanta ju Jesús chai na putantꞌicstꞌi ixjunita ju Zaqueo.
4 Pus atsꞌalaꞌalh junta capuꞌanach ju Jesús.
Chai tocꞌacha laꞌixꞌacatan lakatam kꞌai qꞌuiu ni laich calaktsꞌinaꞌ ju Jesús acsni catapasayach ju anch.
5 Pus acsni chaꞌalh ju Jesús ju anch pus talakstꞌalh chai laktsꞌilh chai junich:
―Zaqueo vatsꞌalhtich atꞌakꞌalhtꞌaꞌutꞌich.
Tasqꞌuini ni acꞌastacnalh lacatsꞌunin ju laminchakaꞌ ju chavai.
6 Pus ju Zaqueo vatsꞌalhti takꞌalhtajulh lacaqꞌuiu chai lhikꞌach amaklhtayanalh ju Jesús laꞌixchakaꞌ.
7 Para acsni talaktsꞌilh ju lapanacni pus ixchuxꞌan talhichivinilh ju Jesús.
Tanaulh ni laich xatanuyacha laꞌixchakaꞌ ju anuꞌ lapanac ju na alactuꞌunuꞌ ixjunita.
8 Pus ju acsnich ju Zaqueo taya chai junilh ju Jesús:
―Ju chavai ji quiꞌucxtin aclhtam ju quimakꞌalit acꞌaxtakniyach ju quilhpatinin.
Chai ju iclhiꞌokxchokꞌomaxtulh tuꞌuꞌ pus paktꞌatꞌi acꞌaxtaknichokoyach ju ixtumin.
9 Chai ju Jesús junich:
―Chavai xatꞌakꞌalhtꞌaxtꞌuyatꞌit ju uxintꞌi chai tachi chun ju tatanumanalh laminchakaꞌ.
Ju chavai vasalh ixpapanti Abraham untꞌatꞌit ni quilalhilaksiyauch tachi ju lalh ju Abraham.
10 Pus yuchi iclhiminta ju quitꞌin ju quimalakachatachilh ju Dios ni lapanac actsucuyaꞌ ju ani.
Icmilh puxconaꞌ ju tsꞌankꞌata ni laich acꞌamakꞌalhtaxtuyaꞌ.
Ju lakcau tumin
11 Ni ixtatꞌajun kꞌasmatnin ju Jesús pus ju yuchi tailhiꞌalh ixchivinti chai ajunilh alakatam chivinti ju caꞌapumavasalaniyaꞌ tuchi nomputun acsni najun ni calhinonaꞌ ju Dios.
Chai apujunilh chunch ni vanin ixchaꞌamputun ju Jerusalén chai ju ixtatꞌaꞌanta lacati ixtalhiulai ni lana ucxtin cajunaꞌ ju Jesús.
12 Pus chani ajuni:
―Pumatam xakꞌai lapanac taxtulh laꞌixlakꞌachakꞌan chai alh makat.
Va alh amaklhtayanaꞌ ju ixpuꞌucxtin chai naulh ni caminchokoyach acsni caꞌamaklhtayananach.
13 Para acsni tucaꞌ ixꞌan pus atꞌasanilh pumacau ixlapanacni chai axtaknilh lakcavin tumin chai ajunich:
“Apꞌuchꞌalhcꞌatnantꞌit tus acsni actaspꞌitꞌanta”.
14 Para ju ixtꞌaꞌamachakꞌan talhixcailich chai amalakachacha ju alhtanin ni cataꞌalh taimayonin ju anuꞌ lapanac.
Chai acsni talakchilh tajunich:
“Jantu iclacasqꞌuinau ni uxintꞌi ju quiꞌucxtin quincꞌan aꞌuntꞌi”.
15 Para ju yuchi aktsꞌiya amaklhtayanalh ju ixpuꞌucxtin.
Chai acsni taspꞌitchokocha pus lhinaulh ixꞌatꞌasanica ju anuꞌ ixlapanacni ju ixꞌaxtaknita ixtumin.
Va iscꞌatsaputun tijuch ju punavilh kꞌantam kꞌantam.
16 Chai milh ju xapꞌulhnan chai junich:
“Quiꞌucxtin ju mintumin lhajachokolh alakcau”.
17 Chai ju ucxtin junich:
“Kꞌoxich.
Na kꞌox xalapanacꞌat.
Pus ni laich xamuctꞌaxtꞌui ixlacata ju va lacatsꞌunin pus alhinonaꞌich ju lakacau lakꞌachakꞌan”.
18 Chai milh ju apumatam.
Junich:
“Quiꞌucxtin ju mintumin lhajachokolh alakquis”.
19 Chai vana va chunch ju junilh ju ixꞌucxtin tachi ju junilh ju xapꞌulhnan.
Junich:
“Ju uxintꞌi laich alhinonaꞌ lakaquis lakꞌachakꞌan”.
20 Chai astan mimpa apumatam chai ju yuchi juni:
“Quiꞌucxtin anich iclhiminitan ju mintumin.
Va xacpachꞌimakꞌata lacapayu.
21 Pus va xactalhoniyan ju uxintꞌi ni iccꞌatsaich ni na pꞌas ju miꞌalhunut ju uxintꞌi.
Pus alakꞌach.
Yuꞌunch ju milapanacni ju talacsununiyan ju micebada ni laich lhu amakꞌaixtꞌokꞌaꞌ ju uxintꞌi mas jantu tuꞌuꞌ tapulhajai ju yuꞌunch.
Pus yuꞌunch ju tachꞌalhcatnan ni laich na lhu cajunaꞌ ju micebada ju uxintꞌi”.
22 Pus ju acsnich ju ixꞌucxtin junich:
“Na kꞌai unitꞌa ji xalapanac.
Pus va ixlacata ju minchivinti miꞌakstu ju acmucꞌaniyan ju mintalakꞌalhin.
Pus ju uxintꞌi nauch ni cꞌatsꞌaich ni na pꞌas ju quiꞌalhunut.
Chai yuꞌunch ju quilapanacni ju tachꞌalhcatnan chai talacsunui ju quicebada ni lai na lhu acmakꞌaixtꞌokꞌaꞌ ju quitꞌin.
23 Pus ni sala chunch icjunita pus tajuch ni jantu xamakꞌai ju quintumin junta makꞌacan ju tumin.
Ju chunch acsni xacminchokota pus xacꞌamaklhtayananchokolh ju quintumin chai chux ju isꞌaskꞌatꞌa”.
24 Pus ju acsnich ju xaꞌucxtin ajunich ju vanin ixtayanalh:
“Atꞌaiꞌinitꞌit ju tumin chai axtꞌaknitꞌit ju ixpacxanta ju lakcau”.
25 Para ju yuꞌunch tajuni:
“Para ji quiꞌucxtin ju yuchi alin lakcau”.
26 Para ju xaꞌucxtin ajuni:
“Pus islivasalh ju iclajunau.
Va tichi chavaich ju pacxanta tuꞌuꞌ pus palai lhu caxtaknicanaꞌ.
Para ju matich tuꞌuꞌ pus cataiꞌinicanaꞌ ju tuchi lacatsꞌunin ixꞌalinta.
27 Chai ju anuꞌ quintꞌalaxcainin ju jantu ixtalacasqꞌuin ni laich acꞌalhijunilh pus aquilalhiminiuch ju ani chai amaknitꞌit laquiꞌucxlacapuꞌ”.
Ju Jesús tanulh ju lakꞌachakꞌan Jerusalén
28 Acsni nonkꞌo ju ani ju Jesús pus alhtananchokopa laxati ju Jerusalén.
29 Chai chaꞌalh ju akstijun junta na lhu ixya ju xaqꞌuiu ju olivo juncan.
Vanin ju lakꞌachakꞌanixni Betfagé chai Betania.
Pus ju acsnich ju Jesús amalakacha ixtꞌiyunꞌan ixtamamakaꞌun.
30 Ajunich:
―Aꞌinchitꞌit ju anuꞌ tasui lakꞌachakꞌan chai acsni atꞌanutꞌachitꞌit pus alhitꞌaꞌuyaꞌitꞌit lakatam sastꞌi puru chꞌiyocanta.
Tucaꞌ xamatiꞌ putocꞌata tavanan.
Pus axkꞌotꞌayaꞌitꞌit chai aquilalhiminiyau.
31 Chai ni xamatiꞌ catasacmiyan tajuch ni va xkꞌotꞌayatꞌit pus va aꞌunaꞌitꞌit ni maktasqꞌuini ju miꞌucxtinꞌan.
32 Pus taꞌalh ju anuch ixꞌamalakachacan chai chunch ju talhitajulh tachi ixꞌajuncanta.
33 Chai acsni ixtatꞌajun xkꞌotainin ju puru pus ju amanavinin tajunich:
―Tajuch ni va xkꞌotꞌayatꞌit ju quimpuru quincꞌan.
34 Chai ju yuꞌunch tajunich:
―Ni va maktasqꞌuini ju quiꞌucxtin quincꞌan.
35 Pus yau ajunilh chai talhiminilh ju Jesús.
Chai taꞌakxchꞌamucꞌalh ixcutunꞌan ju puru.
Chai tamucꞌalh ju Jesús.
36 Chai acsni alhtanalh ju Jesús ju laxati Jerusalén pus ju ixtalhavat lapanacni ixtamamalhiꞌanta ixcutunꞌan ju lacati.
37 Chai acsni vanin ixtachaꞌamputun junta lhiꞌatajuntinicꞌach ju anuꞌ akstijun junta lacya ju xaqꞌuiu olivo pus chux ju ixtalhavat ju ixꞌamamakaꞌui na ixtakꞌachanch.
Na pꞌas ixtachivinin acsni tatsuculh lakꞌayanin ju Dios.
Ixtalakꞌayai ixlacata tachi chun ju lhamakꞌan ju ixtalaktsꞌinta.
38 Ixtanajun:
―Paxcat ju ani xakꞌai ucxtin ju minta laꞌixtapakaꞌut ju Dios.
Ju chavai alin ju akꞌoxamixnit ju lactꞌiyan.
Chach lakꞌayacalh ju Dios.
39 Para ju acsnich ju aliꞌin fariseonin ju ixtamakminta tajunich ju Jesús:
―Amamakaꞌunuꞌ akꞌaich ju miꞌamamakaꞌunin.
40 Para ju Jesús ajunich:
―Iclajunau ni va sek catalactavi ju ani minta lapanacni pus catalactꞌasalh ju chiux chai aquintalakꞌaya.
41 Chai acsni vanin chaꞌalh ju Jesús chai laktsꞌilh ju lakꞌachakꞌan Jerusalén pus na lhikꞌalhulh.
42 Naulh:
―Na kꞌox ixva ni ixmachꞌakxatꞌit ju chavai acsni iclatꞌavilau ni quilacata lai aꞌunchꞌokꞌotꞌit ixꞌamigojni ju Dios.
Para ni jantu chun xalayatꞌit pus ju chavai jantu alakꞌaꞌinicꞌanaꞌitꞌit ni laich amachꞌakxayaꞌitꞌit.
43 Na kꞌox ixva ni ixmachꞌakxatꞌit ni cachinaꞌ ju avilhchan acsni kꞌalhtankꞌai catamucꞌayaꞌ ju tꞌun ju mintꞌalaxcaiꞌan laꞌixtalakachoko ju milakꞌachakꞌanꞌan chai catalakꞌaxkꞌavitnuyan chai jantu jintaꞌ lai atꞌipꞌutꞌaxtꞌutꞌit.
44 Chai catamaktakꞌoyach ju milakꞌachakꞌanꞌan.
Chai catamaknikꞌoyan chux ju uxijnan ju tꞌonatꞌit anch.
Jantu catamaconaꞌ ju tuꞌuꞌ chiux ju va calaꞌucxtocꞌalh ju ixtꞌachiux ju lakꞌachakꞌan.
Pus chunch catanaviniyan ni jantu quilamispayau ju quitꞌin ju icDios ju chavai avilhchan acsni iclalakmintauch.
Axcauxtucalh ju lapanacni ju lacpujitat
45 Ju acsnich ju Jesús tanuchalh laꞌixpujitatꞌan ju istꞌaꞌisraelitanin chai tsuculh alactixcoxtunuꞌ tachi chun ju ixtaꞌulata ixlhistꞌatꞌan chai ju ixtaꞌatamonanch ju anch.
46 Ixꞌajuni:
―Laꞌixchivinti Dios tsꞌokcanta junta chani najun:
“Ju quinchakaꞌ xachakaꞌ junita junta tꞌachivincan ju Dios”.
Chunch ju najun lacaꞌatsꞌoknut.
Para ju uxijnan va tachi ixchakaꞌ ju akꞌalhaunin lhimalacxtꞌuyatꞌit.
47 Pus chux avilhchan ixꞌamalaninin ju Jesús ju lacpujitat.
Para ju xalackꞌajin palijni chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin chai ju xalackꞌajin ju lakꞌachakꞌan Jerusalén va ixtamakniputun.
48 Para jantu lai ixtalhitajuni ta yu laich tuꞌuꞌ catanavi ni chux ju lapanacni va tachi ixtalakmin ni ixtakꞌasmatniputun ixchivinti.
Lucas 19.1-48